430-берене. ЭЭЗ субъекттерине салык салуунун өзгөчөлүгү

1. Эгерде ушул главада жана "Кыргыз Республикасындагы эркин экономикалык зоналар жөнүндө" Кыргыз Республикасынын Мыйзамында башкача каралбаса, ушул Кодекстин 427-беренесинин 1-бөлүгүнүн талаптарына жооп берген ЭЭЗ субъекттеринин иши салыктын бардык түрлөрүнөн бошотулат.

2. ЭЭЗ субъекти болуп эсептелбеген субъект тарабынан өндүрүштө пайдалануу үчүн арналган товарларды, жумуштарды жана кызмат көрсөтүүлөрдү Кыргыз Республикасынын аймагынан ЭЭЗ субъектине берүүдө ушул Кодекстин 254-беренесинин 2-бөлүгүндө белгиленген ставка боюнча КНС салынат.

3. Ушул Кодекстин 427-беренесинин жана "Кыргыз Республикасындагы эркин экономикалык зоналар жөнүндө" Кыргыз Республикасынын Мыйзамынын талаптарына жооп бербеген ЭЭЗ субъекттин ишине жалпы салык режимине ылайык салык салынат.

Министрлер Кабинети бекиткен тизмеге киргизилген товарларды кошпогондо, Кыргыз Республикасынын калган аймагына берүү үчүн товарларды ЭЭЗ аймагынан алып чыгууда, анын ичинде аларды ЭЭЗ субъекттери болуп саналбаган жактардын пайдасына ажыратып алууда товарларга ушул Кодекске ылайык КНС салынат. Товарларды тизмеге киргизүүнүн тартиби жана критерийлери Министрлер Кабинети тарабынан аныкталат.

4. Товарларды ЭЭЗ чек арасы аркылуу алып өтүүдө алынуучу салыктарды башкаруу ЕАЭБ мыйзамдарына, Кыргыз Республикасынын бажы иши чөйрөсүндөгү мыйзамдарына жана Кыргыз Республикасынын ЭЭЗ жөнүндө мыйзамдарына ылайык жүзөгө ашырылат.

5. Кыргыз Республикасынын аймагын кошпогондо, ЕАЭБге мүчө-мамлекеттердин аймагына берүү максатында ЭЭЗ аймагында өндүрүлгөн товарларды ташып чыгуу КНС жана акциз төлөөдөн бошотулат.

Евразия экономикалык бирлиги жөнүндө келишимде белгиленген мөөнөттөрдө жана тартипте ЕАЭБге мүчө-мамлекеттердин аймагына товарларды ташып кирүү жана кыйыр салыктарды төлөө ырасталбаган учурда КНС суммасы төлөнүүгө тийиш.

51. Кыргыз Республикасынын аймагына ташып чыгууну кошпогондо, келип чыгышы Евразия экономикалык бирлиги жөнүндө келишимге ылайык каралган Товарлардын келип чыгышын аныктоо эрежелерине ылайык белгиленген товарларды кийин ташып чыгуу менен ЭЭЗ аймагына импорттоодо ушул Кодекстин 423-беренесинде белгиленген ставкалар боюнча бирдиктүү салык төлөнөт.

Товарларды ушул бөлүккө ылайык кийин ташып чыгуу максатында ЭЭЗ аймагына импорттоону жүзөгө ашыруучу ЭЭЗ субъекти ушул Кодекстин 324-беренесинде белгиленген режимди колдонууга милдеттүү.

6. Кыргыз Республикасынын ички рыногунда керектөө үчүн ЭЭЗ субъекттери көрсөткөн кызматтарга, жумуштарга жалпы салык режимине ылайык салык салынат. Кыргыз Республикасынын ички рыногунда керектөө үчүн кызмат көрсөтүүлөр, жумуштар болуп, ЭЭЗ субъекттери болуп саналбаган Кыргыз Республикасынын субъекттери тарабынан ЭЭЗ аймагында жана Кыргыз Республикасынын калган аймаганда сатып алынуучу кызмат көрсөтүүлөр, жумуштар саналат.

7. Кирешелерди төлөө булагында эсептелүүгө, кармалууга жана төлөнүүгө тийиш болгон кирешелерге ушул Кодекске ылайык салык салынууга тийиш.

8. Эгерде ЭЭЗ субъекти ЭЭЗдин аймагында, ошондой эле Кыргыз Республикасынын калган аймактарында жана анын чегинен тышкары иш жүргүзсө, анда мындай ЭЭЗ субъекти ушул Кодекске ылайык өз-өзүнчө эсеп жүргүзүүгө милдеттүү.

9. (КР 2025-жылдын 31-июлундагы № 185 Мыйзамына ылайык күчүн жоготту)

10. (КР 2025-жылдын 31-июлундагы № 185 Мыйзамына ылайык күчүн жоготту)

(КР 2023-жылдын 3-апрелиндеги № 78, 2024-жылдын 23-июлундагы № 136 , 2025-жылдын 12-февралындагы № 37, 2025-жылдын 31-июлундагы № 185, 2025-жылдын 31-декабрындагы № 262 Мыйзамдарынын редакцияларына ылайык)