Кыргыз Республикасынын Коргоо министрлигинин «Авиациялык атайын иштер» мамлекеттик кызмат көрсөтүүнүн стандартын бекитүү жөнүндө» буйругу

КЫРГЫЗ РЕСПУБЛИКАСЫНЫН КОРГОО МИНИСТРЛИГИ БУЙРУК

2025-жылдын 9-июлу № 2

“Авиациялык атайын иштер” мамлекеттик кызмат көрсөтүүнүн стандартын бекитүү жөнүндө Кыргыз Республикасынын Өкмөтүнүн 2012-жылдын 3-сентябрындагы № 603 токтому менен бекитилген Мамлекеттик жана муниципалдык кызмат көрсөтүүлөрдүн типтүү стандартына жана Кыргыз Республикасынын Министрлер Кабинетинин 2023-жылдын 3-мартындагы № 115 “Кыргыз Республикасынын Министрлер Кабинетинин айрым ченем жаратуучу ыйгарым укуктарын мамлекеттик органдарга жана жергиликтүү өз алдынча башкаруунун аткаруу органдарына өткөрүп берүү жөнүндө” токтомуна ылайык, 23565 аскер бөлүгү тарабынан көрсөтүлүүчү мамлекеттик кызмат көрсөтүүлөрдүн сапатын жогорулатуу боюнча тапшырмаларды ишке ашыруу максатында, буйрук кылам:

1. Тиркелген “Авиациялык атайын иштер” мамлекеттик кызмат көрсөтүүнүн стандарты бекитилсин.

2. Күчүн жоготту деп таанылсын:

- Кыргыз Республикасынын Коргоо министрлигинин 2023-жылдын 21-августундагы № 2 “Авиациялык атайын жумуштар” мамлекеттик кызмат көрсөтүүлөрдүн стандартын бекитүү жөнүндө” буйругу;

- Кыргыз Республикасынын Коргоо министрлигинин 2023-жылдын 21-августундагы № 3 “Авиациялык атайын жумуштар” мамлекеттик кызмат көрсөтүүнүн административдик регламентин бекитүү жөнүндө” буйругу.

3. Кыргыз Республикасынын Куралдуу Күчтөрүнүн Генералдык штабынын башчысы - Коргоо министринин биринчи орун басары төмөнкүлөр боюнча чара көрсүн:

- ушул буйрукту Кыргыз Республикасынын Өкмөтүнүн 2010-жылдын 26-февралындагы № 117 “Кыргыз Республикасынын ченемдик, укуктук актыларын расмий жарыялоо булактары жөнүндө” токтомуна ылайык расмий жарыялоо;

- эки нускада мамлекеттик жана расмий тилдерде, кагаз жана электрондук алып жүрүүчүдө, ченемдик укуктук актыларды жарыялоо булагын көрсөтүү менен буйруктун көчүрмөлөрүн Кыргыз Республикасынын Юстиция министрлигине расмий жарыялангандан кийин үч иш күнүнүн ичинде Кыргыз Республикасынын ченемдик укуктук актыларынын мамлекеттик реестрине киргизүү үчүн, ошондой эле ал күчүнө киргенден тартып үч иш күнүнүн ичинде буйруктун көчүрмөсүн маалымат үчүн Кыргыз Республикасынын Президентинин Администрациясына жиберүү.

4. Ушул буйруктун аткарылышын контролдоо Кыргыз Республикасынын Куралдуу Күчтөрүнүн Генералдык штабынын башчысы - Коргоо министринин биринчи орун басарына жүктөлсүн.

5. Ушул буйрук расмий жарыяланган күндөн тартып он иш күнү өткөндөн кийин күчүнө кирет.

6. Буйрук тиешелүү адамдарга чейин жеткирилсин.

Кыргыз Республикасынын Коргоо министрлигинин mil.gov.kg расмий сайтында 2025-жылдын 14-июлунда жарыяланды.

Коргоо министри генерал-майор

Р.М. Мукамбетов