КР Өкмөтүнүн аппарат жетекчиси - министринин «Кыргыз Республикасынын Өкмөтүнүн Аппарат жетекчиси - министрдин жана анын орун басарларынын ортосунда милдеттерди бөлүштүрүү жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮНҮН АППАРАТ ЖЕТЕКЧИСИ - МИНИСТР БУЙРУК 2021-жылдын 1-марты № 19 Кыргыз Республикасынын Өкмөтүнүн 2010-жылдын 24-декабрындагы № 338 токтому менен бекитилген Кыргыз Республикасынын Өкмөтүнүн Аппараты жөнүндө жобонун 23-пунктуна ылайык:

1. Кыргыз Республикасынын Өкмөтүнүн Аппарат жетекчиси - министрдин жана анын орун басарларынын ортосунда милдеттерди бөлүштүрүү тиркемеге ылайык бекитилсин.

2. Төмөнкүлөр күчүн жоготту деп таанылсын:

- Кыргыз Республикасынын Өкмөтүнүн Аппарат жетекчиси - министрдин 2019-жылдын 19-сентябрындагы № 169 буйругу;

- Кыргыз Республикасынын Өкмөтүнүн Аппарат жетекчиси - министрдин 2020-жылдын 21-сентябрындагы № 119 буйругу;

- Кыргыз Республикасынын Өкмөтүнүн Аппарат жетекчиси - министрдин 2020-жылдын 18-ноябрындагы № 124 буйругу;

- Кыргыз Республикасынын Өкмөтүнүн Аппарат жетекчиси - министрдин 2020-жылдын 7-декабрындагы № 131 буйругу.

Өкмөттүн Аппарат жетекчиси - министр

Ж.А.Асанкулов

Тиркеме

Кыргыз Республикасынын Өкмөтүнүн Аппарат жетекчиси - министрдин жана анын орун басарларынын ортосунда милдеттерди бөлүштүрүү

1. Кыргыз Республикасынын Өкмөтүнүн Аппарат жетекчиси - министр

Кыргыз Республикасынын Өкмөтүнүн Аппарат жетекчиси - министр (мындан ары - Өкмөттүн Аппарат жетекчиси) Кыргыз Республикасынын Өкмөтүнүн (мындан ары - Өкмөт), Кыргыз Республикасынын Премьер-министринин (мындан ары - Премьер-министр) жана Кыргыз Республикасынын вице-премьер-министрлеринин (мындан ары - вице-премьер-министрлер) ишин уюштуруучулук, аналитикалык жана маалыматтык камсыздоо маселелери боюнча Кыргыз Республикасынын Өкмөтүнүн Аппаратынын (мындан ары - Өкмөттүн Аппараты) ишине жалпы жетекчилик кылат жана контролдойт, ошондой эле Өкмөттүн Аппарат жетекчисинин орун басарларынын ишин координациялайт. Төмөнкү маселелер боюнча Өкмөттүн Аппаратынын ишин координациялайт:

- мамлекеттик суверендүүлүктү, аймактык бүтүндүктү коргоо, конституциялык түзүлүштү, коомдук тартипти сактоо, кылмыштуулукка каршы күрөшүү боюнча чараларды, ошондой эле коргонуу жөндөмүн чыңдоо боюнча чараларды ишке ашыруу;

- өзгөчө кырдаалдардын алдын алуу жана кесепеттерин жоюу, укуктук тартипти камсыздоо, терроризмди (экстремизмди) каржылоого жана кылмыш жолу менен алынган кирешелерди легалдаштырууга (адалдоого) каршы аракеттенүү, экономикалык кылмыштарды, экономика жана финансы чөйрөсүндөгү кызматтык кылмыштарды аныктоо, алдын алуу, бөгөт коюу, ачуу жана иликтөө, жазаларды аткарууну камсыздоо, баңги каражаттарын, психотроптук заттарды жана прекурсорлорду жүгүртүү жаатындагы бирдиктүү саясатты жүргүзүү, аларды мыйзамсыз жүгүртүүгө каршы аракеттенүү, коррупцияга каршы саясатты ишке ашыруу;

- тышкы саясатты ишке ашыруу, эл аралык кызматташтыкты өнүктүрүү жана эл аралык уюмдар менен өз ара аракеттенүү;

- иш кагаздарын жүргүзүү, Өкмөттүн кароосуна берилген ченемдик укуктук актылардын долбоорлоруна укуктук экспертиза жүргүзүү, соттордо Өкмөттүн кызыкчылыктарын коргоо;

- өлкөдөгү кырдаалга, аймактардын экономикалык жана социалдык абалына, тескеген чөйрөлөрүндөгү мамлекеттик стратегияларды, программаларды жана улуттук долбоорлорду ишке ашырууга мониторинг жүргүзүү, баалоо боюнча аналитикалык жана маалыматтык иштер;

- жашыруундуулук режимин сактоо, мамлекеттик сырды түзгөн жана Кыргыз Республикасынын мыйзамдары менен корголгон маалыматтарды коргоо.

Кыргыз Республикасынын Конституциясынын, Кыргыз Республикасынын мыйзамдарынын, Өкмөттүн токтомдорунун, буйруктарынын жана Кыргыз Республикасынын башка ченемдик укуктук актыларынын тескеген чөйрөлөрүндөгү аткаруу бийлигинин органдары тарабынан аткарылышын координациялайт, мониторинг жүргүзөт жана талдайт. Аткаруу бийлигинин органдарынын жарандардын кайрылуулары маселелери боюнча ишин жалпы координациялайт жана мониторинг жүргүзөт. Төмөнкүлөр боюнча иштерди координациялайт:

- Өкмөттүн маалыматтык ресурстарын түзүү жана талаптагыдай абалда сактоо, ошондой эле электрондук документ жүгүртүүнү жана "электрондук өкмөттү" иштеп чыгуу жана киргизүү боюнча аткаруу бийлигинин органдарынын ишин;

- Өкмөттүн токтомдорун жана буйруктарын, Премьер-министрдин буйруктарын, Кыргыз Республикасынын Жогорку Кеңешине киргизүүдө Кыргыз Республикасынын мыйзамдарынын долбоорлорун, ошондой эле башка ченемдик укуктук актыларды жана документтерди даярдоонун жана тариздөөнүн стандарттарын сактоо менен Өкмөттүн Регламентинин, Өкмөттүн Аппаратында документтер менен иштөөнүн регламентинин талаптарынын аткарылышын контролдоо.

Төмөнкүлөр боюнча чараларды көрөт:

- Өкмөттүн жыйындарын жана Премьер-министрдин катышуусундагы кеңешмелерди өткөрүүнү уюштуруучулук-методикалык жана протоколдук камсыздоо;

- Премьер-министрдин жана вице-премьер-министрлердин катышуусундагы иш-чараларды өткөрүүдө мамлекеттик протоколдун сакталышы.

Аткаруу бийлигинин органдарына, жергиликтүү мамлекеттик администрацияларга жана жергиликтүү өз алдынча башкаруу органдарына анын компетенциясына кирген маселелер боюнча өткөрүлүп берилген мамлекеттик ыйгарым укуктары боюнча тапшырмаларды берет. Премьер-министрдин номенклатурасына кирген Өкмөттүн Аппаратынын кызматкерлерин кызмат ордуна дайындоо жана кызмат ордунан бошотуу тууралуу сунуштарды Премьер-министрге киргизет. Өкмөттүн Аппарат жетекчисинин номенклатурасына кирген Өкмөттүн Аппаратынын түзүмдүк бөлүмдөрүнүн кызматкерлерин белгиленген тартипте кызмат ордуна дайындайт жана кызмат ордунан бошотот. Өкмөттүн Аппаратынын кызматкерлерин белгиленген тартипте сыйлайт жана аларга карата тартиптик жоопкерчилик чараларын көрөт, Өкмөттүн Аппаратынын кызматкерлерин, ошондой эле Өкмөттүн Аппаратынын милдеттерин аткарууга көмөк көрсөткөн жарандарды сыйлоо үчүн Өкмөттүн Аппаратынын ведомстволук сыйлыктарын белгиленген тартипте уюштурат. Өкмөттүн Аппаратынын ишине таандык болгон маселелер боюнча аткаруу үчүн милдеттүү болгон буйруктарды чыгарат. Премьер-министрге Өкмөттүн Аппаратынын түзүмдүк бөлүмдөрү жөнүндө жоболорду белгиленген тартипте бекитүүгө киргизет. Премьер-министрге Өкмөттүн Аппаратынын түзүмү жана штаттык ырааттамасы боюнча сунуштарды киргизет. Төмөнкүлөрдүн өз ара аракеттенүүсүн камсыздайт:

- Өкмөттүн, Премьер-министрдин Кыргыз Республикасынын Президенти, башка мамлекеттик органдар менен;

- Өкмөттүн, Премьер-министрдин, вице-премьер-министрлердин эл аралык финансы институттары жана өнүктүрүү боюнча өнөктөштөр менен.

- Өкмөттүн Аппаратынын Кыргыз Республикасынын Президентинин жана Өкмөтүнүн Иш башкармасы менен.

Өкмөттүн Аппаратынын ишин финансы-чарбалык камсыздоо маселелерин тескейт. Өкмөттүн Аппаратынын бюджети боюнча сунуштарды түзөт жана белгиленген тартипте киргизет. Өкмөттүн Аппаратынын чыгымдар сметасынын чегинде финансылык каражаттарды тескейт. Тескеген түзүмдүк бөлүмдөрдүн иш пландарын жана отчетторун карайт жана бекитет. Өкмөттүн Аппарат жетекчиси төмөнкү түзүмдүк бөлүмдөрдүн ишин координациялайт:

- коргоо, укуктук тартип жана өзгөчө кырдаалдар бөлүмүнүн;

- эл аралык кызматташтык бөлүмүнүн;

- укуктук экспертиза бөлүмүнүн;

- талдоо жана стратегиялык пландоо тобунун;

- адам ресурстарын башкаруу бөлүмүнүн;

- Өкмөттүн Аппаратынын канцеляриясынын (чечимдерди аткарууну контролдоону жана жарандардын кайрылууларын кароону камсыздоодон тышкары).

Кыргыз Республикасынын Өкмөтүнүн Соттук өкүлчүлүк борборунун ишин координациялайт.

2. Өкмөттүн Аппарат жетекчисинин биринчи орун басары

Өкмөттүн Аппарат жетекчисинин биринчи орун басары Өкмөттүн Аппарат жетекчисинин милдеттерин ал жок учурда аткарат. Төмөнкү маселелер боюнча Өкмөттүн Аппаратынын ишин координациялайт:

- экономикалык реформаларды жүргүзүү, экономикалык өнүктүрүүнү талдоо, болжолдоо жана пландоо, бизнес чөйрөсү үчүн ыңгайлуу шарттарды түзүү, инвестициялык, фискалдык, баа, тарифтик жана монополияга каршы саясат, мамлекеттик менчик, Евразия экономикалык бирлиги менен өз ара аракеттенүү;

- финансы жана кредит саясатын жүргүзүү, салыктарды жана бажы төлөмдөрүн башкаруу, финансы рыногун өнүктүрүү, мамлекеттик сатып алуулар, республикалык бюджеттин аткарылышын контролдоо;

- маалыматтык технологиялар жана байланыш;

- агроонөр жай комплексин жана жаратылышты пайдаланууну өнүктүрүү, жер реформасы, суу ресурстарын башкаруу, айлана-чөйрөнү коргоо жана токой чарбасы, мамлекеттик жана мобилизациялык резервдеги материалдык баалуулуктарды топтоо, сактоо жана пайдалануу, ветеринардык жана фитосанитардык коопсуздукту контролдоо жана көзөмөлдөө;

- чечимдердин аткарылышын контролдоону камсыздоо.

Аткаруу бийлигинин органдарынын ишин координациялайт, мониторинг, талдоо жүргүзөт жана тейлеген чөйрөлөрдө мамлекеттик саясатты ишке ашыруу жана өркүндөтүү боюнча сунуштарды иштеп чыгат. Кыргыз Республикасынын Конституциясынын, Кыргыз Республикасынын мыйзамдарынын, Өкмөттүн токтомдорунун жана буйруктарынын, Кыргыз Республикасынын башка ченемдик укуктук актыларынын тейлеген чөйрөлөрдө аткаруу бийлигинин органдары тарабынан аткарылышын координациялайт, мониторинг жана талдоо жүргүзөт. Тейлеген чөйрөлөрдө Кыргыз Республикасынын мыйзамдарын, стратегияларды жана программаларды, Кыргыз Республикасынын Жогорку Кеңешинин токтомдорун, Кыргыз Республикасынын Президентинин жарлыктарын, буйруктарын аткаруунун жүрүшү жөнүндө Премьер-министрге аналитикалык жана маалымдама материалдарын даярдайт. Тейлеген түзүмдүк бөлүмдөрдүн иш пландарын жана отчетторун карайт жана бекитет. Өкмөттүн Аппарат жетекчисинин биринчи орун басары төмөнкү түзүмдүк бөлүмдөрдүн ишин координациялайт:

- экономика жана инвестициялар бөлүмүнүн;

- финансы жана кредит саясаты бөлүмүнүн;

- санариптик трансформациялоо бөлүмүнүн;

- агроөнөр жай комплекси жана экология бөлүмүнүн;

- Кыргыз Республикасынын Өкмөтүнүн Евразия экономикалык бирлигиндеги иштер жана интеграциялык процесстер боюнча атайын өкүлүнүн катчылыгынын;

- Өкмөттүн Аппаратынын канцеляриясынын (чечимдердин аткарылышын контролдоону камсыздоо маселеси боюнча).

Өкмөттүн Аппаратынын Ачык Өкмөттүн Улуттук форумунун катчылыгы менен өз ара аракеттенүүсүн камсыз кылат.

3. Өкмөттүн Аппарат жетекчисинин биринчи орун басары рангындагы Өкмөттүн Кыргыз Республикасынын Жогорку Кеңешиндеги туруктуу өкүлү

Өкмөттүн Аппарат жетекчисинин биринчи орун басары рангындагы Өкмөттүн Кыргыз Республикасынын Жогорку Кеңешиндеги туруктуу өкүлү (мындан ары - туруктуу өкүл) Өкмөттүн Кыргыз Республикасынын Жогорку Кеңешиндеги өкүлчүлүгүн жетектейт. Туруктуу өкүл Өкмөттүн Аппаратынын Кыргыз Республикасынын Жогорку Кеңеши менен Өкмөттүн натыйжалуу жана ыкчам өз ара аракеттенүүсүн камсыздоо жана мыйзам долбоорлоо иши боюнча ишин координациялайт. Кыргыз Республикасынын Жогорку Кеңешинде Өкмөттүн кызыкчылыктарын коргойт. Кыргыз Республикасынын Жогорку Кеңешинин токтомдорунун жана протоколдук тапшырмаларынын, Кыргыз Республикасынын Жогорку Кеңешинин комитеттеринин, депутаттык фракцияларынын чечимдеринин жана суроо-талаптарынын, депутаттык фракцияларынын жана депутаттарынын суроо-талаптарынын аткаруусуна мониторинг жана талдоо жүргүзөт.

4. Өкмөттүн Аппарат жетекчисинин биринчи орун басары рангындагы Өкмөттүн чек ара маселелери боюнча атайын өкүлү

Өкмөттүн Аппарат жетекчисинин биринчи орун басары рангындагы Өкмөттүн чек ара маселелери боюнча атайын өкүлү (мындан ары - Атайын өкүл) чек араны делимитациялоо жана чек ара аймактарын өнүктүрүү маселелери боюнча иштерди координациялайт жана мониторинг жүргүзөт. Атайын өкүлдүн компетенциясына кирген маселелерде анын жетекчилигинин тапшырмасы боюнча чет мамлекеттердин мекемелеринде жана уюмдарында Өкмөттүн Аппаратынын жана Өкмөттүн атынан чыгат. Атайын өкүл чектеш мамлекеттер менен Кыргыз Республикасынын Мамлекеттик чек арасын делимитациялоо, демаркациялоо жана редемаркациялоо боюнча өкмөттөр аралык комиссиялардын ишин координациялайт. Атайын өкүлдүн катчылыгы (бөлүмдүн укугунда) Атайын өкүлдүн ишин камсыздайт.

5. Өкмөттүн Аппарат жетекчисинин орун басары

Өкмөттүн Аппарат жетекчисинин орун басары Өкмөттүн Аппаратынын төмөнкү маселелер боюнча ишин координациялайт:

- билим берүү, маданият, илим, спорт, жогорку квалификациялуу илимий жана илимий-педагогикалык кадрларды аттестациялоо;

- саламаттык сактоо, социалдык жана пенсиялык камсыздоо, эмгек жана миграция, мамлекеттик социалдык камсыздандыруу бюджетинин аткарылышын контролдоону камсыздоо, ошондой эле санитардык коопсуздукту контролдоо жана көзөмөлдөө;

- интеллектуалдык менчик жана салттуу билимдерди коргоо;

- маалыматтык саясат жана жалпыга маалымдоо каражаттары менен өз ара аракеттенүү;

- отун-энергетикалык комплекси, жер казынасын пайдалануу жана минералдык ресурстар, өнөр жай;

- транспорт жана коммуникациялар, курулуш жана архитектура, турак жай-коммуналдык чарба, экологиялык жана техникалык коопсуздукту контролдоо жана көзөмөлдөө;

- жарандардын кайрылууларын кароону камсыздоо.

Тейлеген чөйрөлөрдө аткаруу бийлигинин органдарынын ишин координациялайт, мониторинг, талдоо жүргүзөт жана мамлекеттик саясатты ишке ашыруу жана өркүндөтүү боюнча сунуштарды иштеп чыгат. Кыргыз Республикасынын Конституциясынын, Кыргыз Республикасынын мыйзамдарынын, Өкмөттүн токтомдорунун жана буйруктарынын, Кыргыз Республикасынын башка ченемдик укуктук актыларынын тейлеген чөйрөлөрдө аткаруу бийлигинин органдары тарабынан аткарылышын координациялайт, мониторинг жана талдоо жүргүзөт. Тейлеген чөйрөлөрдө Кыргыз Республикасынын мыйзамдарын, стратегияларды жана программаларды, Кыргыз Республикасынын Жогорку Кеңешинин токтомдорун, Кыргыз Республикасынын Президентинин жарлыктарын, буйруктарын аткаруунун жүрүшү жөнүндө Премьер-министрге аналитикалык жана маалымдама материалдарын даярдайт. Тейлеген түзүмдүк бөлүмдөрдүн иш пландарын жана отчетторун карайт жана бекитет. Өкмөттүн Аппарат жетекчисинин орун басары төмөнкү түзүмдүк бөлүмдөрдүн ишин координациялайт:

- социалдык өнүктүрүү бөлүмүнүн;

- билим берүү, маданият жана спорт бөлүмүнүн;

- өнөр жай, отун-энергетикалык комплекси жана жер казынасын пайдалануу бөлүмүнүн;

- курулуш, транспорт жана коммуникациялар бөлүмүнүн;

- маалыматтык камсыздоо бөлүмүнүн;

- Өкмөттүн Аппаратынын канцеляриясынын (жарандардын кайрылууларын кароону камсыздоо маселеси боюнча).

6. Өкмөттүн Аппарат жетекчисинин орун басары, уюштуруу-инспектордук иштер жана региондук өнүктүрүү бөлүмүнүн башчысы

Өкмөттүн Аппарат жетекчисинин орун басары, уюштуруу-инспектордук иштер жана региондук өнүктүрүү бөлүмүнүн башчысы Өкмөттүн Аппаратынын региондордогу уюштуруу-инспектордук иштер, административдик-аймактык реформаларды жүргүзүү, жергиликтүү өз алдынча башкарууну өнүктүрүү, региондорду комплекстүү өнүктүрүү жана региондорду өнүктүрүү боюнча мамлекеттик программаларды ишке ашыруу маселелери боюнча ишин координациялайт. Өкмөттүн облустардагы ыйгарым укуктуу өкүлдөрүнүн аппараттарынын, жергиликтүү мамлекеттик администрациялардын, өткөрүп берилген мамлекеттик ыйгарым укуктар боюнча жергиликтүү өз алдынча башкаруу органдарынын ишин координациялайт жана мониторинг жүргүзөт, алардын ишин өркүндөтүү боюнча сунуштарды иштеп чыгат, ошондой эле аткаруу бийлигинин органдары менен коомдук кеңештердин ортосунда өз ара аракеттенүүнү координациялайт жана ага мониторинг жүргүзөт. Аткаруу бийлигинин органдарынын системасын оптималдаштыруу, аткаруу бийлигинин органдарынын жана алардын жетекчилеринин ишинин натыйжалуулугуна мониторинг жүргүзүү жана баалоо системасын уюштуруу маселелери, аткаруу бийлигинин органдарында мамлекеттик кызматты өркүндөтүү, башкаруу ишин жана мамлекеттик, муниципалдык кызмат көрсөтүүлөрдү стандартташтыруу маселелери боюнча сунуштарды иштеп чыгат.