«Электрондук документ жүгүртүүнүн мамлекеттик системасы» автоматташтырылган маалымат системасы жөнүндө жобо (Кыргыз Республикасынын Өкмөтүнүн токтомуна)

Тиркеме

(Кыргыз Республикасынын Өкмөтүнүн 2020-жылдын 30-октябрындагы № 526 токтомуна)

"Электрондук документ жүгүртүүнүн мамлекеттик системасы" автоматташтырылган маалымат системасы жөнүндө ЖОБО

1. Жалпы жоболор

1. Ушул Жобо "Электрондук документ жүгүртүүнүн мамлекеттик системасы" автоматташтырылган маалымат системасынын максаттарын, милдеттерин, функцияларын, оператордун, ээлик кылуучунун жана пайдалануучунун укуктары менен милдеттерин, ошондой эле көрсөтүлгөн маалымат системасына кошулуунун тартибин белгилейт.

2. "Электрондук документ жүгүртүүнүн мамлекеттик системасы" автоматташтырылган маалымат системасы (мындан ары - "ЭДМС" АМС) сырттан келген документтер сыяктуу эле "ЭДМС" АМСти (анын бардык түзүмдүк бөлүмдөрүн камтуу менен) пайдалануучулар тарабынан түзүлгөндөрдү өзүнө камтыган "ЭДМС" АМСти пайдалануучуларда электрондук документ жүгүртүүнү автоматташтырууга арналган, программалык каражаттар менен маалыматтар базасынын жыйындысы болуп саналган өтмө маалымат системасынан турат.

3. Ушул Жободо төмөнкүдөй терминдер жана аныктамалар пайдаланылат:

"ЭДМС" АМСтин ээси - электрондук башкаруу жаатындагы ыйгарым укуктуу мамлекеттик орган; "ЭДМС" АМСтин оператору - "ЭДМС" АМСти эксплуатациялоону, анын техникалык жана программалык коштоону ишке ашыруучу Кыргыз Республикасынын Президентинин Иш башкармасына караштуу "Кызмат" мамлекеттик мекемеси; "ЭДМС" АМСти пайдалануучу - аткаруучу, мыйзам чыгаруучу органдар, сот системасы жана башка мамлекеттик органдар, Кыргыз Республикасынын Президентинин Администрациясы, жергиликтүү өз алдынча башкаруу органдары, ошондой эле юридикалык жана жеке жактар; электрондук документ - электрондук формада, башкача айтканда, электрондук эсептөө машиналарын пайдалануу менен адамдын кабылдоосу үчүн жарактуу түрдө, ошондой эле маалыматтык- телекоммуникациялык тармактар боюнча берүү же маалымат системаларында иштетүү үчүн берилген документтештирилген маалымат; кагаз түрүндөгү документтин электрондук көчүрмөсү (электрондук көчүрмө) - кагаз документтин сканерленген же сүрөткө тартылган образын берүүчү, кагаз түрүндө түзүлгөн, сканерленген документтин мазмунуна өзгөртүү киргизбестен, техникалык каражаттардын жардамы аркылуу кайрадан электрондук формага бир бүтүн нерсе катары өзгөртүлгөн электрондук формадагы маалыматтар; электрондук колтамга - электрондук формадагы башка маалыматка кошулган жана (же) ага логикалык жактан байланышкан, маалыматка кол коюлган адамды аныктоо үчүн пайдаланылуучу электрондук формадагы маалымат; электрондук архив - маалыматтары электрондук түрдө белгиленген архив. (КР Министрлер Кабинетинин 2022-жылдын 30-апрелиндеги № 235, 2025-жылдын 7-апрелиндеги № 181 токтомдорунун редакцияларына ылайык)

2. "ЭДМС" АМСтин максаты, милдети жана функциялары

4. "ЭДМС" АМСтин иштөөсүнүн максаты түзүүнү, иштеп чыгууну, каттоону, уюштурууну, жөнөтүүнү, аткарууну контролдоо жана электрондук документтерди сактоо болуп саналат.

5. "ЭДМС" АМСтин иш милдеттери болуп төмөнкүлөр саналат:

- электрондук документтер жана кагаз түрүндөгү документтердин электрондук көчүрмөлөрү менен иштөөнүн натыйжалуулугун жана ыкчамдуулугун жогорулатуу;

- электрондук документтердин жана кагаз түрүндөгү документтердин электрондук көчүрмөлөрүн иштеп чыгуу технологиясын оптималдаштыруу, системалаштыруу жана бирдейлештирүү;

- кирген жана чыккан электрондук документтердин, кагаз түрүндөгү документтердин электрондук көчүрмөлөрүн каттоону жакшыртуу жана документтерди жүгүртүүнүн сапатын жогорулатуу;

- электрондук документтердин жана кагаз түрүндөгү документтердин электрондук көчүрмөлөрүн жеткирүү жана иштеп чыгуу, кирген жана чыккан электрондук документтердин жана кагаз түрүндөгү документтердин электрондук көчүрмөлөрүн каттоого алуу менен байланышкан кол эмгектерин кыскартуу жана ага кетүүчү убакытты азайтуу;

- электрондук документтердин жана кагаз түрүндөгү документтердин электрондук көчүрмөлөрүнүн жоголуп кетүүсүнө жол бербөө;

- электрондук документтердин жана кагаз түрүндөгү документтердин электрондук көчүрмөлөрүн издөөгө кетүүчү убакытты кыскартуу;

- аткаруучулук тартипти контролдоону күчөтүү;

- "ЭДМС" АМСте катталган электрондук документтердин жана кагаз түрүндөгү документтердин электрондук көчүрмөлөрү жөнүндө маалыматтардын негизинде ар түрдүү статистикалык отчетторду түзүү.

6. "ЭДМС" АМСтин функциясы болуп төмөнкүлөр эсептелет:

- кирген электрондук документтерди жана кагаз түрүндөгү документтердин электрондук көчүрмөлөрүн кабыл алуу, иштеп чыгуу, каттоого алуу, тапшыруу;

- ички электрондук документтерди жана кагаз түрүндөгү документтердин электрондук көчүрмөлөрүн даярдоо, иштеп чыгуу, каттоого алуу, чыккандарын жөнөтүү жана тапшыруу;

- кирген, чыккан, ички электрондук документтердин жана кагаз түрүндөгү документтердин электрондук көчүрмөлөрүнүн аткарылышын контролдоо;

- электрондук документтерди жана кагаз түрүндөгү документтердин электрондук көчүрмөлөрүн алгачкы карап чыгуунун жыйынтыгы боюнча жетекчилик тарабынан уюштурулган резолюцияларды, тапшырмаларды түзүү;

- электрондук документтердин жана кагаз түрүндөгү документтердин электрондук көчүрмөлөрүн тапшырууда аткаруучулар арасында тапшырманы кайра башкага, бир түзүмдүк бөлүмдөн башкасына жана/же бир түзүмдүк бөлүмдүн чегинде багыттоо жана жеткире иштеп чыгуу үчүн кайтаруу мүмкүнчүлүгү;

- аткаруучу тарабынан электрондук документтердин жана кагаз түрүндөгү документтердин электрондук көчүрмөлөрүнүн аткаруу мөөнөттөрү келип калгандыгы жөнүндө эскертүүлөрдү автоматташтырылган түрдө жөнөтүү;

- электрондук документтердин жана кагаз түрүндөгү документтердин электрондук көчүрмөлөрүн ар түрдүү критерийлер боюнча суроо-талапты берүү аркылуу жана "негизги сөз" аркылуу издөө;

- ар түрдүү критерийлер боюнча тапшырмаларды тандоо жана иргөө мүмкүндүгү;

- электрондук документтердин жана кагаз түрүндөгү документтердин электрондук көчүрмөлөрүн алардын маанилүүлүгүнө жана учурдагы статусуна (аткаруудагылар, аткарылбагандар (мөөнөтүн өткөргөндөр), аткарылгандар (мөөнөтүндө аткарылган/мөөнөтү өткөрүү менен аткарылган) жараша кайсы бир түс менен автоматтык түрдө бөлүп көрсөтүү;

- контролдоочулар жана/же ыйгарым укуктуу адамдар тарабынан электрондук документтердин жана кагаз түрүндөгү документтердин электрондук көчүрмөлөрүнүн аткаруу мөөнөттөрүнүн өтүп кеткендиги тууралуу фактыларын аныктоо мүмкүндүгү;

- тапшырылган параметрлерге ("ЭДМС" АМСти пайдалануучулардын аткаруучулары боюнча бөлүмдөр, электрондук документтер жана кагаз түрүндөгү документтердин электрондук көчүрмөлөрүнүн түрлөрү, тапшырманын авторлоруна) ылайык аткаруу тартибин талдоо жана контролдоо, зарыл маалыматтарды "Microsoft" жана "Excel" форматында басып чыгаруу мүмкүнчүлүгү менен отчетторду даярдоо;

- электрондук документтердин жана кагаз түрүндөгү документтердин электрондук көчүрмөлөрүнүн жүгүртүү боюнча тарыхын кароо мүмкүндүгү;

- электрондук документтердин жана кагаз түрүндөгү документтердин электрондук көчүрмөлөрүнүн ведомстволук электрондук архивин жүргүзүү;

- "ЭДМС" АМСти аткаруучу-пайдалануучунун каттоодон өтүүсү жана жөнөтүүсү үчүн түзүмдүк бөлүмдөрдүн аткаруучулары менен маселени иштеп чыгуу жөнүндө кыскача маалыматты (комментарий) ошол документке тиркелген билдирүүлөр түрүндө жүргүзүү мүмкүндүгү;

- ыйгарым укуктуу жетекчинин/кызматчынын электрондук документке кол коюуда электрондук колтамганы колдонушу;

- жөнөтүү же тапшырма берүү үчүн уюштуруу түзүмүн жүргүзүүнү жана кызматчылардын тизмесин камсыздоо;

- иш кагаздарын жүргүзүүчүнүн каттоосунан өткөн электрондук документтерди жана кагаз түрүндөгү документтердин электрондук көчүрмөлөрүн автоматтык архивдештирүү ошондой эле электрондук документтердин жана кагаз түрүндөгү документтердин электрондук көчүрмөлөрүн каттоодон өткөрүү үчүн ыңгайлашкан номерлөөчүгө колдоо көрсөтүү, иш номенклатурасын жүргүзүү менен камсыздоо;

- техникалык мүмкүнчүлүктөр болгон учурда, маа6лымат алмашуу жана электрондук документ жүгүртүүнү жүргүзүү үчүн "ЭДМС" АМСтин башка мамлекеттик , муниципалдык маалымат системалары жана юридикалык жана жеке жактардын маалымат системалары менен интеграцияланышын камсыздоо;

- түрдүү документтерди, анын ичинде ченемдик укуктук актылардын долбоорлорун кароодо "ЭДМС" АМСти пайдалануучулар арасында маалыматтык өз ара аракеттенүүнү камсыздоо;

- "ЭДМС" АМСтин маалымат системасы менен мамлекеттик органдардын жана , жергиликтүү өз алдынча башкаруу органдарынын, юридикалык жана жеке жактардын электрондук документ жүгүртүү системасынын ортосунда интеграциялоону камсыздоо.

(КР Министрлер Кабинетинин 2022-жылдын 30-апрелиндеги № 235 токтомунун редакциясына ылайык)

3. "ЭДМС" АМСтин электрондук документтеринин жана кагаз түрүндөгү документтеринин электрондук көчүрмөлөрүнүн түрлөрү

7. "ЭДМС" АМСке электрондук документтер жана кагаз түрүндөгү документтердин электрондук көчүрмөлөрүнүн төмөндөгү негизги түрлөрү катталат:

- кирген каттар;

- чыккан каттар;

- кызматтык каттар;

- ченемдик укуктук актылар;

- актылар;

- корутундулар;

- протоколдор;

- мамлекеттик органдарга жана жергиликтүү өз алдынча башкаруу органдарынын иш-аракеттерине байланыштуу маселелер боюнча жеке жактардын арыздары;

- жарандардын кайрылуулары;

- электрондук документтердин жана кагаз түрүндөгү документтердин электрондук көчүрмөлөрүнүн жана башка түрлөрү.

Электрондук документтердин жана кагаз түрүндөгү документтердин электрондук көчүрмөлөрүнүн ар бир түрүнө "ЭДМС" АМСтин бардык катышуучулары үчүн милдеттүү болуп саналган индекс ыйгарылат. Мамлекеттик жашыруун сырларды камтыган маалыматтарды жана жетүү чектелген грифи бар башка документтерди "ЭДМС" АМСке киргизүүгө жана иштеп чыгууга болбойт (Абзац КР Министрлер Кабинетинин 2022-жылдын 8-апрелиндеги № 207 токтомуна ылайык күчүн жоготту) (КР Министрлер Кабинетинин 2022-жылдын 8-апрелиндеги № 207 токтомунун редакциясына ылайык)

8. Зарыл болгон учурларда электрондук документтердин жана кагаз түрүндөгү документтердин электрондук көчүрмөлөрүнүн күбөлөндүрүлгөн кагаз түрүндөгү көчүрмөсү, же электрондук документтердин жана кагаз түрүндөгү документтердин электрондук көчүрмөсүнүн (мындан ары - документтердин көчүрмөлөрү) бөлүгү даярдалышы мүмкүн.

9. Документтердин көчүрмөлөрүн даярдоо жана андан ары күбөлөндүрүү иш кагаздарын жүргүзүүгө жооптуу бөлүмдүн кызматчысы тарабынан ишке ашырылат.

10. Документтердин көчүрмөлөрүн даярдоо электрондук документтердин жана кагаз түрүндөгү документтердин электрондук көчүрмөлөрүнүн файлын (файлдардын), ага тиркемелерди (эгер болсо) кагазга чыгаруу Кыргыз Республикасында Иш кагаздарын жүргүзүү боюнча типтүү нускамага ылайык аларды андан ары күбөлөндүрүү жолу менен ишке ашырылат.

11. Электрондук документтерди жана кагаз түрүндөгү документтердин электрондук көчүрмөлөрүн "ЭДМС" АМСке каттоо, жүргүзүү жана аткарылышып контролдоо, ошондой эле электрондук документтерди жана кагаз түрүндөгү документтердин электрондук көчүрмөлөрүн сактоонун тартиби Кыргыз Республикасында Иш кагаздарын жүргүзүү боюнча типтүү нускамада белгиленген тартипте даярдалат.

12. "ЭДМС" АМСти пайдалануучуну жоюуда (кайра уюштурууда) бардык электрондук документтер архив иштери чөйрөсүндөгү ыйгарым укуктуу мамлекеттик орган тарабынан белгиленген тартипте Электрондук документтердин мамлекеттик архивине тапшырылат.

13. "ЭДМС" АМС тиешелүү сервердик жабдууларга маалыматтык коопсуздукту камсыздоо талаптарын сактоо менен жайгаштырылат. Сервердик жабдууларга жана сервердик бөлмөгө, ошондой эле маалыматтык коопсуздукту камсыздоого болгон талаптар Кыргыз Республикасынын Өкмөтүнүн 2017-жылдын 21-ноябрындагы № 762 "Мамлекеттик маалыматтык системалар базасында камтылган маалыматты коргоо талаптарын бекитүү жөнүндө" токтомуна ылайык белгиленет.

4. "ЭДМС" АМСтин ээсинин, операторунун жана пайдалануучунун укуктары жана милдеттери

14. "ЭДМС" АМСтин ээсинин милдеттерине төмөнкүлөр кирет:

- "ЭДМС" АМСти ишке киргизүү жана пайдаланууну (эксплуатациялоо) координациялоону жана мониторинг жүргүзүүнү камсыздоо;

- "ЭДМС" АМСтин иштөө процессинде "ЭДМС" АМСти пайдалануучуларды методологиялык жана консультациялык жактан колдоону камсыздоо;

- пайдалануучунун иш өзгөчөлүгүнө жана "ЭДМС" АМСтин ишин өркүндөтүү боюнча суроо-талаптарга байланыштуу "ЭДМС" АМС кызмат көрсөтүүлөрүнө өзгөртүүлөрдүн жана толуктоолордун зарылчылыгы жөнүндө сунуштары менен "ЭДМС" АМС пайдалануучуларынын кайрылууларын кароо.

15. "ЭДМС" АМСтин ээси төмөнкүлөргө укуктуу:

- "ЭДМС" АМСтин операторунан "ЭДМС" АМСти ишке киргизүү жана пайдалануунун (эксплуатациялоонун) жүрүшү жөнүндө маалыматтарды суроого;

- "ЭДМС" АМСтин операторуна "ЭДМС" АМСке зарыл болгон өзгөртүүлөр менен толуктоолорду киргизүү жөнүндө сунуштар менен кайрылууга;

- мамлекеттик жана муниципалдык маалымат системаларынын, анын ичинде "ЭДМС" АМСтин электрондук документ жүгүртүүлөр системаларынын ортосунда интеграциялоо маселелерин макулдашууга;

16. "ЭДМС" АМСтин операторунун милдеттерине төмөнкүлөр кирет:

- "ЭДМС" АМСти башкарууну, техникалык жана программалык коштоону камсыздоо;

- "ЭДМС" АМСти пайдалануучулардын кайрылуулары жана суроо-талаптары боюнча "ЭДМС" АМСти пайдаланууну жакшыртууну камсыздоо, анын ичинде "ЭДМС" АМС ишиндеги жеткире иштелбегендерди, кемчиликтерди жана мүчүлүштүктөрдү четтетүү;

- "ЭДМС" АМСтин ээсинин жана "ЭДМС" АМСти пайдалануучулардын сунуштары боюнча "ЭДМС" АМС ишине зарыл болгон өзгөртүүлөрдү киргизүү;

- "ЭДМС" АМСтин ээси менен макулдашуу аркылуу мамлекеттик , муниципалдык маалымат системаларын, юридикалык жана жеке жактардын маалымат системаларын "ЭДМС" АМС менен интеграциялоону камсыздоо;

- "ЭДМС" АМСти ишке киргизүүнүн жана пайдалануунун (эксплуатациялоонун) жүрүшү жөнүндө маалыматтарды "ЭДМС" АМСтин ээсине берүү;

- "ЭДМС" АМСти пайдалануучулар тарабынан (маалыматтык өз ара аракеттенүүнү уюштуруу үчүн зарыл болгон шарттар болгондо) колдонулган электрондук документ жүгүртүү маалымат системасы менен "ЭДМС" АМСтин маалыматтык жактан өз ара аракеттенүүсүн камсыздоо;

- "ЭДМС" АМСтин маалыматтык коопсуздугун камсыздоо;

- "ЭДМС" АМСти пайдалануучу кызматкерлерге "ЭДМС" АМСти пайдалануу боюнча окутууларды уюштуруу;

- "ЭДМС" АМСти пайдалануучуларга "ЭДМС" АМСти эксплуатациялоо боюнча методологиялык жана консультациялык колдоо көрсөтүү;

- "ЭДМС" АМСти туташтыруу жана техникалык тейлөө жөнүндө "ЭДМС" АМСти пайдалануучу менен келишим түзүү.

(КР Министрлер Кабинетинин 2022-жылдын 30-апрелиндеги № 235 токтомунун редакциясына ылайык)

17. "ЭДМС" АМСтин оператору төмөнкүлөргө укуктуу:

- "ЭДМС" АМСтин ээсинен "ЭДМС" АМСке өзгөртүүлөрдү киргизүү боюнча суроо-талаптарды техникалык тапшырма түрүндөгү катта тариздөөсүн талап кылууга;

- "ЭДМС" АМСтин ээсинин сунушу боюнча "ЭДМС" АМСти андан ары модификациялоону/толук иштеп чыгууну ишке ашырууга;

- "ЭДМС" АМСти пайдалануучунун ишинин өзгөчөлүгүнө байланыштуу "ЭДМС" АМСтин ишин жакшыртуу үчүн зарыл болгон өзгөртүүлөр менен толуктоолорду киргизүү жөнүндө сунуш менен "ЭДМС" АМС ээсине кайрылуу;

18. "ЭДМС" АМСти пайдалануучунун укуктары:

- пайдалануучунун ишинин өзгөчөлүктөрүнө байланыштуу "ЭДМС" АМСтин ишине өзгөртүүлөр менен толуктоолордун зарылдыгы жөнүндө сунуш менен "ЭДМС" АМС ээсине жана операторуна кайрылуу;

- "ЭДМС" АМСтин ээсине жана операторуна "ЭДМС" АМСти жакшыртуу жана модернизациялоо боюнча суроо-талап менен кайрылуу;

- "ЭДМС" АМСтин иштөөсүндөгү көйгөйлөрдү четтетүү маселелери боюнча операторго кайрылуу;

- "ЭДМС" АМСтин операторунан "ЭДМС" АМСти эксплуатациялоо боюнча методологиялык жана консультациялык колдоо көрсөтүүсүн суроо.

5. "ЭДМС" АМСке туташтыруу же интеграциялоо тартиби

19. "ЭДМС" АМСке туташтыруу "ЭДМС" АМСтин оператору тарабынан "ЭДМС" АМСтин ээси менен макулдашкандан кийин "ЭДМС" АМСти пайдалануучу жана оператордун ортосунда түзүлгөн келишимдин негизинде байланыш каналдарын коргоо каражаттарын колдонуу аркылуу жүргүзүлөт.

20. "ЭДМС" АМСти пайдалануучуларга жетүү мамлекеттик жарандык кызматтар жана муниципалдык кызматтардагы адам ресурстарын башкаруу маалыматтык (автоматташтырылган) системасы аркылуу алынган маалыматтардын негизинде "ЭДМС" АМСтин кызматкерлеринин - пайдалануучулардын активдүүлүк статусун (өргүү, бейтап баракчасы) эске алуу менен камсыздалат. Жетүү тартиби "ЭДМС" АМС оператору тарабынан белгиленет.

21. "ЭДМС" АМСке интеграциялоо процесси "ЭДМС" АМСтин ээси менен макулдашылган тиешелүү модулдар (адаптерлер) иштелип чыккандан жана интеграцияланган (туташтырылган) маалымат системасы жөнүндө жобо бекитилгенден кийин гана ишке ашырылышы мүмкүн.