497-берене. Кызмат адамдарынын айрым категориясын кылмыш-жаза жоопкерчилигине тартуунун тартиби

1. Жогорку Кеңештин депутатын, Акыйкатчыны (Омбудсменди) жана анын орун басарын кылмыш-жаза жоопкерчилигине тартуу жөнүндө чечим, ал кылмыш жасаган жерде кармалган учурларды кошпогондо, Жогорку Кеңештин депутаттарынын жалпы санынын көпчүлүгүнүн макулдугу менен Башкы прокурор тарабынан кабыл алынат.

2. Жогорку Кеңешинин депутатын, Акыйкатчыны (Омбудсменди) жана анын орун басарын кылмыш-жаза жоопкерчилигине тартууга макулдук алуу үчүн Башкы прокурор Жогорку Кеңешке тиешелүү сунуш киргизет. Башкы прокурор 3 күндүк мөөнөттө Жогорку Кеңештин кылмыш-жаза жоопкерчилигине тартууга макулдук берүү же болбосо макулдук берүүдөн баш тартуу жөнүндө токтому кабыл алынгандыгы тууралуу кабарландырылат.

Жогорку Кеңештин депутатын, Акыйкатчыны (Омбудсменди) жана анын орун басарын кылмыш-жаза жоопкерчилигине тартууга макулдук берүүдөн Жогорку Кеңештин баш тартуусу ыйгарым укуктарынын мөөнөтү бүткөнгө чейин аларга карата ишти токтото туруу үчүн негиз болуп саналат. Башкы прокурор иш боюнча өндүрүш аяктаган күндөн тартып 3 күндүк мөөнөттө Жогорку Кеңешке тергөөнүн жыйынтыктары тууралуу билдирүүгө милдеттүү.

3. Башкы прокурордун сунушу боюнча Судьялар кеңешинин макулдугу менен судьяны, анын ичинде экс-судьяны кылмыш-жаза жоопкерчилигине тартууга жол берилет. Башкы прокурор судьяны, анын ичинде экс-судьяны жоопкерчиликке тартууга макулдук алуу үчүн Судьялар кеңешине тийиштүү сунуш киргизет, анда иштин жагдайлары, судья, анын ичинде экс-судья шектелип жаткан Кылмыш-жаза кодексинин беренеси, жоопкерчиликке тартууга макулдук берүү жөнүндө өтүнүч көрсөтүлөт. Судьялар кеңеши мындай макулдукту берүүдөн баш тартуу жөнүндө чечим кабыл алган учурда, ошол эле негиздер боюнча судьяны, анын ичинде экс-судьяны жоопкерчиликке тартууга макулдук берүү жөнүндө сунушун кайталап киргизүүгө жол берилбейт.

4. Кыргыз Республикасынын Конституциясында аныкталган тартипте Жогорку Кеңеш тарабынан кызматынан четтетилген Президентти, ошондой эле Кыргыз Республикасынын экс-президентин кылмыш-жаза жоопкерчилигине тартуу жөнүндө чечим Башкы прокурор тарабынан кабыл алынат.

5. Катталган Президенттикке талапкер, Жогорку Кеңештин депутаттыгына талапкер кылмыштары үчүн шайлоонун натыйжалары расмий жарыяланган күнгө чейин жана Кыргыз Республикасынын Шайлоо жана референдум өткөрүү боюнча борбордук комиссиясынын макулдугусуз кылмыш-жаза жоопкерчилигине тартылышы мүмкүн эмес. Кылмыштары үчүн аларды жоопкерчиликке тартуу жөнүндө чечимди прокуратура органдары кабыл алат.

6. Башкы прокурорду кылмыш-жаза жоопкерчилигине тартуу жөнүндө чечим Президенттин сунушу боюнча Жогорку Кеңештин депутаттарынын жалпы санынын жарымынан кем эмесинин макулдугу менен анын орун басарларынын бири тарабынан кабыл алынат.