131-берене. Түрмөлөр

1. Жазаны түрмөдө өтөө үчүн которулган соттолгондор камераларда кармалат. Соттолгондун жазуу жүзүндөгү арызы боюнча, ошондой эле соттолгондун жеке коопсуздугуна коркунуч келип чыкканда же болбосо башка соттолгондордун же мекеменин кызматкерлеринин өмүрүнө жана саламаттыгына коркунуч жараткан соттолгонду бөлүп кармоо зарылдыгы болгондо, түзөтүү мекемесинин начальнигинин жүйөлөнгөн токтому менен көрсөтүлгөн соттолгондор жеке камераларда кармалат.

2. Соттолгондорду камераларга жайгаштыруу ушул Кодекстин 79-беренесинде каралган талаптарды сактоо менен жүргүзүлөт. Чарбалык тейлөө жумуштарын аткаруу үчүн түрмөгө жиберилген соттолгондор башка соттолгондордон бөлөк кармалат.

3. Жазасын түрмөдө өтөп жаткан соттолгондор төмөнкүлөргө укуктуу:

1) жеке эсептеринде болгон акча каражатынын жыйырма беш эсептик көрсөткүчтөн ашпаган суммасын ай сайын тамак-аш азыктарын жана күндөлүк керектелүүчү предметтерди сатып алууга чыгымдоого;

2) жыл ичинде беш кыска мөөнөттүү жана бир узак мөөнөттүү жолугушуу алууга;

3) бир жылда алты жолу телефондук сүйлөшүүгө;

4) күн сайын эки саат таза абага сейилдөөгө чыгуудан пайдаланууга.

4. Соттун түрмөгө которуу жөнүндөгү чечими менен дайындалган мөөнөт анын мыйзамдуу күчүнө кирген күндөн баштап эсептелет.

(КР 2021-жылдын 28-октябрындагы № 126, 2025-жылдын 11-январындагы № 2 Мыйзамдарынын редакцияларына ылайык)