2726-статья. Сот тарабынан арыз кабыл алынгандан кийин карыз тарап же башка адам тарабынан кредитордун талаптарын канааттандыруу

1. Сот карыз тарапты банкрот деп табуу жөнүндө арыз кабыл алынгандан кийин карыз тарап арыз берүүчүнүн талабын толугу менен канааттандырууга макул болсо, иш өндүрүшүн токтотуп коюуга укуктуу. Иш өндүрүшүн токтотуу жөнүндө сот аныктама чыгарат.

2. Арыз берүүчүнүн талабын канааттандыруу үчүн карыз тарап ушул статьянын 1-пунктунда көрсөтүлгөн соттун аныктамасы чыккан учурдан тартып, он күндүн ичинде төмөнкүдөй аракеттерди аткарууга:

1) арыз берүүчүнүн талабына толук канааттандыруу үчүн зарыл сумманы соттун депозиттик эсебине которууга;

2) ушул Мыйзамдын 27-5-статьясынын 3-пунктунун талабына ылайык арыз берүүчү кошкон мамлекеттик алымды жана убактылуу администраторду (эгер ал дайындалса) сыйлоону кошо алганда соттун бардык чыгымдарын төлөөгө;

3) (КР 2009-жылдын 24-июлундагы № 247 Мыйзамына ылайык алынып салынды)

4) (КР 2009-жылдын 24-июлундагы № 247 Мыйзамына ылайык алынып салынды)

Ушул пунктта көрсөтүлгөн аракеттерди карыз тарап үчүн башка адам жүргүзүүгө укуктуу.

3. Арыз берүүчүнүн талаптарын канааттандыруу акыркы кулактандыруу жарыялангандан же ушул статьянын 2-пунктунда көрсөтүлгөн акыркы кабар жөнөтүлгөндөн он күн өткөндөн кийин соттун депозиттик эсебинен төлөө жолу менен сот аркылуу канааттандырылат.

4. Төмөнкүдөй учурда:

1) эгерде карыз тарап ушул статьянын 1 жана 2-пункттарында каралган шартты аткарбаганда;

2) ушул статьянын 3-пунктунда каралган мөөнөт ичинде башка кредитор сотко өзүнүн макул эместигин билдиргенде, сот иш өндүрүшүн кайра баштайт.

Иш өндүрүшүн кайра баштоо жөнүндө сот аныктама чыгарат, ага даттанууга мүмкүн эмес.

5. Иш өндүрүшү кайра башталган учурда соттун депозиттик эсебинде турган акча каражаты иш маңызы боюнча мааниси каралганга чейин ошол эсепте сакталат.

6. Карыз тарапты банкрот деп табуудан баш тартуу жөнүндө сот чечим кабыл алган учурда, акча каражаты карыз тарап үчүн акча кошкон адамга же карыз тарапка кайтарылып берилет.

7. Карыз тарапты банкрот деп табуу жөнүндө жана банкроттук процессинин тигил же бул жол-жоболорун дайындоо жөнүндө сот чечим кабыл алган учурда, акча каражаты банкроттук процессинин чыгымдарын жабуу жана кредиторлорго төлөө үчүн пайдаланылат.

(КР 1998-жылдын 30-декабрындагы № 160, 2006-жылдын 27-январындагы № 30, 2009-жылдын 24-июлундагы № 247 Мыйзамдарынын редакцияларына ылайык)