97-статья. Киши өлтүрүү

(1) Киши өлтүргөндө, атайылап башка кишинин өмүрүн кыйганда, - сегиз жылдан он беш жылга чейинки мөөнөткө эркиндигинен ажыратууга жазаланат. (2) Киши өлтүрүү:

1) эки же андан ашык адамды;

2) күнөөкөр үчүн кош бойлуу экендиги белгилүү болгон аялды;

3) күнөөкөр үчүн алсыз абалда экендиги белгилүү болгон адамды же жашы жетпеген өспүрүмдү;

4) өзүнүн кызматтык ишин же коомдук парзын жүзөгө ашырып жүргөн адамды же анын жакындарын;

5) көптөгөн адамдардын өмүрү үчүн коркунучтуу ыкма менен;

6) өзгөчө мыкаачылык менен;

7) зордуктоо же жыныстык кумарын башка түрдө күч колдонуп канааттандыруу менен коштолгондо;

8) пайда табуу максатында же жалданып, ошого тете каракчылык, опузалап талап кылуу же бандитчилик менен коштолгондо;

9) улуттар аралык, расалык, же болбосо диний көрө албастык же касташуу негизинде;

10) хулигандык максаттарда;

11) адамды уурдоо же барымтага алуу менен коштолгондо;

12) жабырлануучунун бир мүчөсүн же денесинин башка жерин пайдалануу максатында;

13) башка кылмышты жашыруу же аны жасоону жеңилдетүү максатында;

14) адамдардын тобу тарабынан;

15) алдын ала макулдашуу боюнча адамдардын тобу тарабынан;

16) уюшкан кылмыштуу топ же кылмыштуу шериктик тарабынан жасалганда, - мүлкүн конфискациялоо менен же андай кылбастан он эки жылдан жыйырма жылга чейинки мөөнөткө эркиндигинен ажыратууга жазаланат же мүлкүн конфискациялоо менен же андай кылбастан өмүр бою эркиндигинен ажыратууга тартылат.

(КР 2007-жылдын 25-июнундагы № 91 Мыйзамынын редакциясына ылайык)