Кант шаардык кеңешинин «Кант шаарынын мэриясынын 2026-жылга карата бюджетин жана 2027–2028-жылдарга бюджеттин болжолун бекитүү жөнүндө» токтому

КАНТ ШААРДЫК КЕҢЕШИНИН ТОКТОМУ

2026-жылдын 12-февралы № 54/XI-29

Кант шаарынын мэриясынын 2026-жылга карата бюджетин жана 2027–2028-жылдарга бюджеттин болжолун бекитүү жөнүндө

Кыргыз Республикасынын «Жергиликтүү өз алдынча башкаруу жөнүндө» Мыйзамынын 31-беренесинин негизинде, Кант шаарынын мэри У.Б.Майлибашевдин жана Кант шаарынын мэриясынын Финансы-экономикалык өнүктүрүү бөлүмүнүн башчысы А.К.Өзбекованын «Кант шаарынын мэриясынын 2026-жылга карата бюджетин жана 2027–2028-жылдарга бюджеттин болжолун бекитүү жөнүндө» баяндамаларын угуп

КАНТ ШААРДЫК КЕҢЕШИ ТОКТОМ КЫЛАТ:

1. Кант шаарынын мэриясынын 2026-жылга карата кирешелер жана чыгымдар боюнча бюджети 518 862,3 миң сом (беш жүз он сегиз миллион сегиз жүз алтымыш эки миң үч жүз) сом өлчөмүндө бекитилсин, анын ичинен:

- бюджеттик каражаттар – 454 262,3 миң сом (төрт жүз элүү төрт миллион эки жүз алтымыш эки миң үч жүз) сом;

- атайын каражаттар – 64 600,0 миң сом (алтымыш төрт миллион алты жүз миң) сом өлчөмүндө бекитилсин.

2. Кант шаарынын 2027-2028-жылдарга бюджетинин негизги параметрлеринин болжолу бекитилсин:

- 2027-жылга кирешелер жана чыгашалар боюнча бюджеттин болжолу 579 692,3 миң сом (беш жүз жетимиш тогуз миллион алты жүз токсон эки миң үч жүз) өлчөмүндө, 2028-жылга – 646 225,3 миң сом (алты жүз кырк алты миллион эки жүз жыйырма беш миң үч жүз) өлчөмүндө бекитилсин;

- 2027-2028-жылдарга бекитилген болжолдонгон шаардык бюджеттин параметрлери ар бир конкреттүү мезгилде кабыл алынганда кайра каралууга тийиш.

3. Кант шаарынын мэриясынын 2026-жылдын башына карата акча каражаттарынын калдыгы 53 572,2 миң сом (элүү үч миллион беш жүз жетимиш эки миң эки жүз) өлчөмүндө, анын ичинде:

- бюджеттик каражаттар – 50 828,1 миң сом (элүү миллион сегиз жүз жыйырма сегиз миң жүз) сом;

- атайын каражаттар – 2 744,1 миң сом (эки миллион жети жүз кырк төрт миң жүз) сом өлчөмүндө бекитилсин.

4. Кант шаарынын 2026-жылга карата киреше бөлүгү жана 2027–2028-жылдарга болжолу № 1-тиркемеге ылайык булактар боюнча түшүүлөрдүн эсебинен түзүлөрү бекитилсин.

5. 2026-жылга карата шаардык бюджеттен чыгашаларды каржылоого каражаттар № 2–10-тиркемелерге ылайык бекитилсин.

6. 2026-жылга чыгашаларды каржылоо иш жүзүндө түшкөн кирешелердин чегинде жүргүзүлөрү белгиленсин. Мында биринчи кезекте корголгон беренелер боюнча чыгашалар (эмгек акы, Социалдык фондго төгүмдөр, дары-дармек каражаттары, тамак-аш), ошондой эле коммуналдык кызмат көрсөтүүлөр каржылансын.

7. Муниципалдык мекемелердин штаттык санындагы бош орундарга жана ченемдик укуктук актылардын кабыл алынышына байланыштуу чыгашалардын корголгон беренелери азайтылышы же көбөйтүлүшү мүмкүн.

8. Чыгашалардын беренелерин максаттуу пайдалануу үчүн жоопкерчилик муниципалдык уюмдарга жана мекемелерге жүктөлсүн.

9. 2025-жылы жетишсиз каржыланган чыгашалар 2026-жылга бюджетте каралган ассигнованиелердин эсебинен жана алардын чегинде гана толукталаары белгиленсин.

10. 2026-жылга салык агенттери тарабынан төлөнүүчү киреше салыгынын пландалган түшүүлөрүнөн Кант шаарынын мэриясынын шаардык бюджетине чегерүүлөрдүн ченеми 90%, жер казынасын пайдалануу салыгы боюнча түшүүлөр (алтынды, мунайды жана газды кошпогондо, роялти) – 50% өлчөмүндө бекитилсин.

11. Муниципалдык мекемелердин сметаларда бекитилген бюджеттик жана атайын каражаттардын суммаларынан ашык түшкөн кирешелери толугу менен шаардык бюджеттин карамагында калтырылсын.

12. Муниципалдык уюмдарга жана мекемелерге казыналык системадан өтпөстөн бюджеттик жана атайын каражаттарды пайдаланууга тыюу салынсын.

13. Кант шаарынын мэрине 2026-жылы кирешелердин болжолдонгон түшүүлөрүнөн ашыкча түшкөн каражаттардын, ошондой эле кирешелердин чыгашалардан ашыкча болушунун эсебинен бекитилген бюджетке Кант шаардык кеңешинин депутаттары менен макулдашуу боюнча өзгөртүүлөрдү жана тактоолорду киргизүү укугу берилсин.

14. Кант шаарынын мэринин 2026-жылга Резервдик фонду шаардык бюджеттин чыгашаларынын жалпы көлөмүнүн 1,5% чейинки өлчөмүндө, 4 600,0 миң сом (төрт миллион алты жүз миң) өлчөмүндө түзүлсүн.

15. Кант шаарынын мэриясынын Финансы-экономикалык өнүктүрүү бөлүмү шаардык бюджетти аткаруу мезгилинде киреше бөлүгү ашыкча аткарылган учурда, бул каражаттарды Кыргыз Республикасынын Президенти тарабынан социалдык маселелерди чечүү боюнча коюлган милдеттерди ишке ашырууга, улуттук жана мамлекеттик программаларды, Кыргыз Республикасынын Министрлер Кабинетинин токтомдорун, Кант шаардык кеңешинин жана мэриянын токтомдорун ишке ашырууга, муниципалдык кызматкерлерди сыйлоого, коммуналдык кызмат көрсөтүүлөр боюнча карыздарды төлөөгө, зарыл болгон учурда өзгөчө кырдаалдардын кесепеттерин жоюуга, жергиликтүү өз алдынча башкаруу органдарына убактылуу каржылык жардам көрсөтүүгө, башка сатып алууларга жана чыгымдарга пайдаланууну караштырсын.

16. Эмгекке материалдык кызыктырууну жана эмгектин натыйжалуулугун жогорулатуу максатында Кант шаарынын мэриясынын жана Кант шаардык кеңешинин кызматкерлеринин ар бирине 3 айлык эмгек акыга чейинки өлчөмдө акчалай сый акы (Нооруз майрамына, Кыргыз Республикасынын мамлекеттик жана муниципалдык кызматкерлеринин күнүнө, Кыргыз Республикасынын Эгемендүүлүк күнүнө) 2026-жылдын башына карата бюджеттик каражаттардын эркин калдыгынын эсебинен же жергиликтүү бюджеттин киреше бөлүгүнүн ашыкча аткарылышынын эсебинен төлөнсүн.

17. Кыргыз Республикасынын 2024-жылдын 19-февралындагы №52 «Аксакалдар соттору жөнүндө» Мыйзамынын 38-беренесинин 2-пунктунун негизинде, Кант шаарындагы аксакалдар сотунун ар бир мүчөсүнө 2026-жылдын январь айынан тартып ай сайын 5,0 (беш) миң сомдон материалдык сыйлоо максатында жергиликтүү бюджеттен акча каражаттары бөлүнсүн.

18. Аз камсыз болгон үй-бүлөлөрдүн бакубаттуулугун жогорулатуу максатында, арыздар келип түшкөн сайын жана турак жай-тиричилик шарттары изилденгенден кийин 1 000 (бир миң) сомдон 20 000 (жыйырма миң) сомго чейин өлчөмдө материалдык жардам көрсөтүлсүн. Оор турмуштук кырдаал жаралган учурда каржылоонун өлчөмү кырдаалга жараша көбөйтүлсүн.

19. Кант шаарындагы кварталдык комитеттин ар бир мүчөсүнө 2026-жылдын январь айынан тартып кварталына 5,0 (беш) миң сомдон материалдык сыйлоо максатында жергиликтүү бюджеттен акча каражаттары бөлүнсүн.

20. Кант шаарынын мэриясына 2026-жылдын башына карата бюджеттик каражаттардын эркин калдыгынын жана жергиликтүү бюджеттин киреше бөлүгүнүн ашыкча аткарылышынын эсебинен Кант шаарынын мэриясынын жана Кант шаардык кеңешинин кызматкерлерине, техникалык тейлөө персоналына (ТТП) жана кенже тейлөө персоналына (КТП), ошондой эле ТКЧ аппаратынын кызматкерлерине айыл чарба азык-түлүктөрүн камдоо үчүн ар бирине 30,0 (отуз) миң сом өлчөмүндө жөлөкпул төлөөгө акча каражаттары бөлүнсүн.

21. Өндүрүштүк зарылчылыкка байланыштуу Кант шаарынын мэриясынын аппараты үчүн сатылып алынган «Chevrolet Tracker» үлгүсүндөгү, мамлекеттик № 858 AG номуру бар нөөмөттүк автомашина шаардык кеңештин аппаратына пайдаланууга берилсин. Ошондой эле 2026-бюджеттик жылга күйүүчү-майлоочу материалдар 100% өлчөмүндө жана зарыл болгон запастык бөлүктөр, ошондой эле башка транспорттук кызмат көрсөтүүлөр менен камсыз кылуу каралсын.

22. Кант шаарынын мэриясына 2026-жылдын январь айынан тартып Кыргыз Республикасынын Президентинин 2022-жылдын 1-августундагы № 266 «Кыргыз Республикасынын мамлекеттик жарандык кызматчыларына жана муниципалдык кызматчыларына эмгек акы төлөө шарттары жөнүндө» Жарлыгынын 4-пунктуна жана Кыргыз Республикасынын Министрлер Кабинетинин 2022-жылдын 1-августундагы № 433 «Кыргыз Республикасынын мамлекеттик органдарын жана жергиликтүү өз алдынча башкаруу органдарын тейлөөгө тартылган кызматкерлердин эмгек акы төлөө шарттары жөнүндө» токтомунун 4-пунктуна ылайык, Кант шаардык кеңешинин жана Кант шаарынын мэриясынын кызматкерлерине, техникалык тейлөө персоналына (ТТП) жана кенже тейлөө персоналына (КТП), ошондой эле ТКЧ аппаратынын кызматкерлерине кызматтык маянасына 100% өлчөмүндө ай сайын кошумча төлөмдөрдү төлөөгө, 2026-жылдын башына карата бюджеттик каражаттардын эркин калдыгынын жана жергиликтүү бюджеттин киреше бөлүгүнүн ашыкча аткарылышынын эсебинен акча каражаттары бөлүнсүн.

23. Кант шаарынын мэрине Кыргыз Республикасынын колдонуудагы мыйзамдарына ылайык, шаардык бюджеттин каражаттарынын эсебинен муниципалдык кызматчыларга жана кызматкерлерге, мэриянын уюмдарына жана мекемелерине сый акы берүү жана кызматтык маяналарды жана үстөк акыларды белгилөө укугу сакталсын.

24. Кант шаарынын мэриясына 2026-жылдын башына карата бюджеттик каражаттардын эркин калдыгынын жана жергиликтүү бюджеттин киреше бөлүгүнүн ашыкча аткарылышынын эсебинен Кант шаарынын мэриясынын, Кант шаардык кеңешинин жана ТКЧ аппаратынын техникалык тейлөө персоналына (ТТП) жана кенже тейлөө персоналына (КТП):

- тамак-ашка – 2026-жылдын январь айынан тартып ай сайын 5,0 (беш миң) сомдон;

- транспорттук чыгымдарга – 2026-жылдын январь айынан тартып ай сайын 2,0 (эки миң) сомдон акча каражаттары бөлүнсүн.

25. Бул токтомдун аткарылышын көзөмөлдөө Кант шаардык кеңешинин бюджет жана финансы боюнча туруктуу комиссиясына (Коджакматов М.К.) жүктөлсүн.

| Төрага | | М. Бейшебаев |