Кыргыз Республикасынын Министрлер Кабинетинин Төрагасынын (Кыргыз Республикасынын Министрлер Кабинетинин корутундусун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТӨРАГАСЫ ТЕСКЕМЕ 2023-жылдын 10-февралы № 81 "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесине ылайык:

1. Кыргыз Республикасынын Жогорку Кеңешинин депутаты Ж.К.Акаев демилгелеген "Кыргыз Республикасынын жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин тиркелген корутундусу жактырылсын.

2. Бул тескеме Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.Жапаров

Кыргыз Республикасынын Министрлер Кабинетинин Төрагасынын 2023-жылдын 10-февралындагы № 81 тескемеси менен жактырылган

Кыргыз Республикасынын Жогорку Кеңешинин депутаты Ж.К.Акаев демилгелеген "Кыргыз Республикасынын жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин КОРУТУНДУСУ Кыргыз Республикасынын Министрлер Кабинети "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесине ылайык Кыргыз Республикасынын Жогорку Кеңешинин депутаты Ж.К.Акаев демилгелеген "Кыргыз Республикасынын жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбоорун (мындан ары - мыйзамдын долбоору) карап чыгып, төмөнкүдөй корутундуга келди. Мыйзамдын долбоору менен "Кыргыз Республикасынын жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө" Кыргыз Республикасынын Мыйзамынын 21-беренесинин 2-бөлүгүн төмөнкүдөй мазмундагы биринчи абзац менен толуктоо сунушталат: "Кыргыз Республикасынын өзгөчө статусу бар айрым чек ара аймактарынын тизмесине кирген айылдарда акыркы 5 жылдан кем эмес мөөнөттө жашаган жарандар акчалай салым төлөбөстөн отуз күндүк мобилизациялык резервдин аскер жыйындарынан өтүүгө укуктуу.". Мында жогоруда аталган Мыйзамдын 21-беренесине ылайык жыйырма эки жашка чыккан, аскердик жана альтернативдик кызматты өтөбөгөн жана райондук (шаардык) чакыруу комиссияларынын чечимдери менен чакыруу мөөнөтүн кийинкиге жылдырууга жана андан бошотууга ээ болбогон жарандар мобилизациялык резервдин 30 күндүк жыйындарына республикалык бюджеттин кирешесине 500 эсептик көрсөткүч суммасында акчалай салым төлөөгө тийиш. Мобилизациялык резервдин жыйындарынан өтүүдө бир аскер кызматчысына 30 күнгө колдо болгон финансылык маалыматтарга ылайык белгилүү бир акча каражаты (кийим жана азык-түлүк менен камсыздоого орточо эсеп менен 26000 сом суммасында) чыгымдалат. Мындан тышкары "Кыргыз Республикасынын 2023-жылга жана 2024-2025-жылдардын пландык мезгилине республикалык бюджети жөнүндө" Кыргыз Республикасынын Мыйзамында 500 эсептик көрсөткүч өлчөмүндөгү акчалай салымды төлөбөстөн 30 күндүк мөөнөттөгү мобилизациялык резервдин жыйындарын өтүү боюнча чыгымдарга акча каражаты каралган эмес. Жогоруда аталгандар мыйзамдын долбоорунда көрсөтүлгөн өзгөртүүлөр мамлекеттин бюджетине кошумча жүктөм алып келе тургандыгын далилдейт. Кыргыз Республикасынын Жогорку Кеңешинин 2021-жылдын 28-апрелиндеги № 4537-VI токтому менен бекитилген 2021-2025-жылдарга Кыргыз Республикасынын өзгөчө статуска ээ болгон айрым чек арага чектеш аймактарынын коопсуздугун жана социалдык-экономикалык өнүгүүсүн камсыз кылуу боюнча Мамлекеттик программада республикалык бюджеттин мүмкүнчүлүктөрүнө ылайык олуттуу социалдык колдоо каралганын белгилей кетүү зарыл. Кыргыз Республикасынын Министрлер Кабинети мыйзамдын долбоорунда көрсөтүлгөн өзгөчө статусу бар Кыргыз Республикасынын айрым чек ара аймактарында жашаган жарандарга преференцияларды берүү калктын көчүп кетишине таасир бербей тургандыгын, тескерисинче акыркы 5 жыл ичинде аталган калктуу конуштарда жашагандыгы жөнүндө маалымкаттарды алуу менен байланышкан коррупциялык кесепеттерди жаратышы мүмкүн экендигин белгилейт. Кыргыз Республикасынын Конституциясынын 86-беренесинин 3-бөлүгүнө, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесинин 5-бөлүгүнө, "Кыргыз Республикасынын Жогорку Кеңешинин Регламенти жөнүндө" Кыргыз Республикасынын Мыйзамынын 53-беренесинин 5-бөлүгүнө ылайык мамлекеттик бюджеттин эсебинен каржылануучу чыгымдарды көбөйтүүнү караган мыйзам долбоорлору Кыргыз Республикасынын Министрлер Кабинети каржылоо булагын аныктагандан кийин Кыргыз Республикасынын Жогорку Кеңеши тарабынан кабыл алынат. Ошондой эле мыйзамдын долбооруна финансы-экономикалык негиздеме, тиешелүү эсептер берилген эмес. Ошол эле учурда "Кыргыз Республикасынын ченемдик укуктук актылары жөнүндө" Кыргыз Республикасынын Мыйзамынын 3-беренесине ылайык ченем жаратуу иш-аракети жарандардын жана юридикалык жактардын укуктарын, эркиндиктерин жана мыйзамдуу кызыкчылыктарын сактоо, негиздүүлүк, максатка ылайыктуулук жана адилеттүүлүк принциптеринде жүзөгө ашырылат. Жогоруда баяндалгандардын негизинде, Кыргыз Республикасынын Конституциясынын 86-беренесинин 3-бөлүгүн жетекчиликке алып, Кыргыз Республикасынын Министрлер Кабинети сунушталган мыйзамдын долбоорун кабыл алууну максатка ылайыктуу эмес деп эсептейт.