Кыргыз Республикасынын « „Эркектер менен аялдар үчүн бирдей укуктар менен бирдей мүмкүнчүлүктөрдүн мамлекеттик кепилдиктери жөнүндө“ Кыргыз Республикасынын Мыйзамына өзгөртүүлөрдү жана толуктоолорду киргизүү тууралуу» Мыйзамы

1-берене.

"Эркектер менен аялдар үчүн бирдей укуктар менен бирдей мүмкүнчүлүктөрдүн мамлекеттик кепилдиктери жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2008-ж., № 6/2, 648-ст.) төмөнкүдөй өзгөртүүлөр жана толуктоолор киргизилсин:

1. 10-берененин 1-бөлүгү "муниципалдык кызматка кирүүдө" деген сөздөрдөн кийин ", кызматтан көтөрүлүүдө" деген сөздөр менен толукталсын.

2. 23-берененин 1 жана 3-бөлүктөрү күчүн жоготту деп таанылсын.

3. 24-беренеде:

2-бөлүк төмөнкүдөй редакцияда баяндалсын: "Жогорку Кеңеш өз компетенциясынын чектеринде бир жыныстагы адамдардын жетимиш пайыздан ашпаган өкүлчүлүгүн эске алуу менен:

- Президенттин сунуштамасы боюнча Жогорку соттун судьяларын (анын ичинде Жогорку соттун Конституциялык палатасынын судьяларын) шайлайт;

- Судьяларды тандоо боюнча кеңештин курамын бекитет;

- Шайлоо жана референдум өткөрүү боюнча борбордук комиссиянын мүчөлөрүн шайлайт;

- Эсептөө палатасынын мүчөлөрүн шайлайт;

- Акыйкатчынын (Омбудсмендин) сунуштамасы боюнча Акыйкатчынын (Омбудсмендин) орун басарларын шайлайт.";

3-бөлүк күчүн жоготту деп таанылсын.

4. 25-берене төмөнкүдөй мазмундагы экинчи жана үчүнчү абзацтар менен толукталсын:

"- гендердик саясаттын негизги багыттарын аныктайт;

- эл аралык милдеттенмелерге ылайык, ар кыл социалдык топтор үчүн мыйзамда белгиленген жана бирдей мүмкүнчүлүктөрдү камсыз кылууга багытталган гендердик саясатты ишке ашырууну камсыз кылуу боюнча атайын чараларды ишке ашырат;".

5. 32-берененин 1-бөлүгүндө "прокуратурасы жүзөгө ашырат" деген сөздөр "прокуратура органдары жүзөгө ашырат" деген сөздөр менен алмаштырылсын.

2-берене.

Ушул Мыйзам расмий жарыяланган күндөн тартып күчүнө кирет.

Кыргыз Республикасынын Президенти

Р. Отунбаева