Кыргыз Республикасында өзгөчө баалуу (жаңгак жана арча) дарактар породаларын кыюуга, ташууга, сатып алууга жана сатууга, даярдоого жана пайдаланууга, экспорттоого тыюу салуу жөнүндө

1-статья. Кыргыз Республикасынын аймагында өзгөчө баалуу (жаңгак жана арча) дарактар породаларын кыюуга, өсүүсүн токтотууга чейинки деңгээлде залал келтирүүгө, сатууга жана сатып алууга, даярдоого, пайдаланууга, буюмдар жасоого, экспорттоого, анын ичинде санитардык кыюуга 2030-жылга чейин тыюу салынат, токойду кыюусуз кыйраган дарактардан тазалоо жана токойду багуу иретинде кыюу буга кирбейт. Кыргыз Республикасынын аймагында жерлеринде курулуш жана жардыруу иштери, кабелдерди, өткөргүч түтүктөрдү жана башка коммуникацияларды алып өтүү транспорттук магистралдык жолдорду куруу, илимий изилдөөлөрдү жүргүзүү, жер казынасын геологиялык изилдөө жана өздөштүрүү максатында берилген аймактардын чегинде аларды сактоого негизделген мүмкүнчүлүк жок болгондо, келтирилгин чыгашалардын ордун (алынбай калган пайданы кошуу менен) жана токой чарба өндүрүшүнүн жоготууларынын ордун толтуруу менен өзгөчө баалуу дарактарды (жаңгак жана арча) кыюуга жол берилет. Өзгөчө баалуу дарактардын породаларын кыюу токой чарбасын башкаруучу атайын ыйгарым укуктуу мамлекеттик органдын корутундусу боюнча Кыргыз Республикасынын Өкмөтү бекиткен эрежелерге ылайык жүзөгө ашырылат. Токой чарба өндүрүшүнүн жоготууларынын ордун толтуруу тартибинде келип түшкөн, ошондой эле даярдалган жыгачтарды сатуудан түшкөн каражаттар Кыргыз Республикасынын Өкмөтү тарабынан бекитилген Жобого ылайык токойду сактоого, коргоого, өстүрүүгө, токойдун өнүмдүүлүгүн жогорулатууга жана белгилүү бир түрдөгү кыйылган бир дарактын ордуна, тиешелүү түрдөгү 100 көчөттү олтургузуу пропорциясында компенсациялык чараларды колдонуу менен кыйылууга жаткан дарактарды калыбына келтирүү үчүн пайдаланылат. (КР 2011-жылдын 26-июлундагы № 129, 2012-жылдын 16-июлундагы № 113, 2017-жылдын 25-июлундагы № 140 Мыйзамдарынын редакцияларына ылайык)

2-статья. Мыйзамсыз өзгөчө баалуу (жаңгак жана арча) дарактар породаларын кыюуда, ташууда, сатып алууда жана сатууда, даярдоодо жана пайдаланууда, буюмдарды жасоодо, экспорттоодо ишти жасоо куралы же анын түздөн-түз объектиси болуп саналган (өзгөчө баалуу дарак породаларын, даярдалган буюмдар, курулган имараттар жана курулуштар ж.б.) же буюмдарды жана чийки заттарды кайра иштетүүгө колдонулган (цехтер, тактай тилгичтер, автотранспорт), имараттарды жана курулуштарды курууга колдонулган (Өзгөчө баалуу (жаңгак жана арча) дарак породаларынан жасалган терезе кашектери, эшиктер, ар кандай конструкциялар) конфискацияланууга жатат. Конфискацияланган жаңгак тамырлары, уюлдары жана жыгачтары Өкмөт тарабынан белгиленген тартипте колдонулушу, сатылышы же жок кылынышы мүмкүн. Мыйзамсыз иштен түшкөн кирешелер тартып алынып, республикалык бюджетке чегерилүүгө тийиш. Ушул Мыйзамдын талаптарын бузууда күнөөлүү болгон адамдар Кыргыз Республикасынын мыйзамдарына ылайык жоопкерчиликке тартылышат. (КР 2008-жылдын 8-октябрындагы № 206 Мыйзамынын редакциясына ылайык)

3-статья. Кыргыз Республикасынын ченемдик укуктук актыларында камтылган ченемдер ушул Мыйзамга карама-каршы келсе анда ушул Мыйзамдын жоболору колдонулат.

4-статья. Ушул Мыйзам жарыяланган күндөн тартып күчүнө кирет. Ушул Мыйзам кабыл алынганга чейин конфискацияланган (секвестирленген) жана айлана-чөйрөнү коргоо жана токой чарбасы боюнча ыйгарым укуктуу мамлекеттик органдын жоопкерчилигинде сакталып турган 186,3 куб.м көлөмүндөгү жаңгак жыгачтары жана 7 тонна көлөмдөгү жаңгак уюлдары ушул Мыйзам күчүнө кирген күндөн баштап жыйырма эки айдын ичинде Өкмөт белгилеген тартипте Кыргыз Республикасынын аймагында сатылууга, ташылууга, пайдаланууга же жок кылынууга тийиш. Кыргыз Республикасынын Өкмөтү өзүнүн ченемдик укуктук актыларын ушул Мыйзамга ылайык келтирсин. (КР 2008-жылдын 8-октябрындагы № 206, 2012-жылдын 16-июлундагы № 113 Мыйзамдарынын редакцияларына ылайык) Кыргыз Республикасынын Конституциясынын 66-статьясынын 4-пунктунун экинчи бөлүгүнө ылайык Мыйзамга кол коюлду деп эсептелет.

Кыргыз Республикасынын Президенти

К.Бакиев