Кыргыз Республикасынын аймагында колдонууга уруксат берилген контролдук-кассалык машиналардын мамлекеттик реестрин түзүү жана жүргүзүү эрежелери (Кыргыз Республикасынын Өкмөтүнүн токтомуна)

КР Министрлер Кабинетинин 2025-жылдын 25-апрелиндеги № 238 токтомуна ылайык КҮЧҮН ЖОГОТТУ

4-тиркеме (Кыргыз Республикасынын Өкмөтүнүн 2019-жылдын 17-декабрындагы № 691 токтомуна)

Кыргыз Республикасынын аймагында колдонууга уруксат берилген контролдук-кассалык машиналардын мамлекеттик реестрин түзүү жана жүргүзүү эрежелери

1. Бул эрежелер Кыргыз Республикасынын Салык кодексинин 109-беренесинин 5-бөлүгүнө ылайык иштелип чыккан жана контролдук-кассалык машиналарды (мындан ары – ККМ) Кыргыз Республикасынын аймагында колдонууга уруксат берилген контролдук-кассалык машиналардын мамлекеттик реестрине (мындан ары – ККМдин мамлекеттик реестри) киргизүү жана алып салуу тартибин аныктайт.

2. Ушул эрежелерде төмөнкүдөй аныктамалар пайдаланылат:

1) ККМдин мамлекеттик реестри – Кыргыз Республикасынын Өкмөтү белгилеген ККМге карата техникалык талаптарга шайкештигине белгиленген тартипте ырасталган ККМнын ар бир модели боюнча ыйгарым укуктуу салык органынын автоматташтырылган маалыматтык системасындагы маалыматтардын жыйындысы;

2) арыз берүүчү – кайрылуу боюнча электрондук башкаруу чөйрөсүндөгү ыйгарым укуктуу мамлекеттик орган ККМдин мамлекеттик реестрине контролдук-кассалык машинанын моделин киргизүү же чыгаруу жөнүндө маселени карап жаткан адам;

3) ККМ – накталай акча каражаттары жана электрондук акчалар, банктык төлөм карточкалары жана чектери аркылуу соода операцияларын же иштерди аткарууда жана кызмат көрсөтүүдө ишке ашырылуучу акчалай эсептешүүлөрдү пайдаланууга багытталган фискалдык эстутуму бар техникалык (аппараттык-программалык) каражаттар.

Фискалдык эстутуму бар техникалык (аппараттык-программалык) каражат болуп Кыргыз Республикасынын Өкмөтү аныктаган, шифрленген түрдө фискалдык маалыматтар оператору (мындан ары – ФМО) катары маалыматтарды топтоонун, берүүнүн жана сактоонун техникалык процессин камсыздоочу ыйгарым укуктуу салык органына жана/же башка органга реалдуу убакыт режиминде маалыматтарды чогултуу, оңдолбогон ар бир суткалык (нөөмөт сайын) каттоо, узак мөөнөткө сактоо, иштеп чыгуу жана берүү үчүн колдонулуучу программалык башкаруу орнотулган техникалык каражат саналат;

4) ККМдин модели – даярдоочу/иштеп чыгуучу тарабынан ыйгарылган уникалдуу аталышы жана номери бар түзүлүштүн же программалык камсыздоонун түрү (тиби);

5) ККМди сертификациялоо боюнча орган – Кыргыз Республикасынын мыйзамдарында берилген тартипте аккредитациядан өткөн, Кыргыз Республикасынын Өкмөтү тарабынан белгиленген ККМдин техникалык талаптарына, ККМ моделдеринин нускаларына жана/же фискалдык маалыматтарды берүүчү түзүлүштөргө шайкеш келишине экспертиза уюштуруу жана жүргүзүү функцияларын өз алдынча аткаруучу мамлекеттик орган же уюм.

6) субъект – Кыргыз Республикасынын Салык кодексине ылайык ККМди колдонууга милдеттүү болгон адам;

7) фискалдык маалыматтарды берүүчү түзүлүш (мындан ары – ФМБТ) – корголгон, шифрленген, оңдолбогон, энергияга көз каранды эмес узак убакытка маалыматты сактоону камсыздоочу электрондук контролдук лентасы бар жана ыйгарым укуктуу салык органына жана/же ФМОго зымдуу же зымсыз байланыш каналдары аркылуу фискалдык маалыматтарды берүүнү камсыздоочу модулу бар түзүлүш;

3. ККМдин ар бир модели субъектке же болбосо башка адамга аны андан ары субъектке сатуу үчүн сатылганга чейин электрондук башкаруу чөйрөсүндөгү ыйгарым укуктуу мамлекеттик органда же ККМди сертификациялоо боюнча органда Кыргыз Республикасынын Өкмөтү бекиткен ККМге карата техникалык талаптарга ылайык келүү жана ККМдин мамлекеттик реестрине киргизүү жол-жоболорунан өтүүсү керек.

4. ККМдин моделдери электрондук башкаруу чөйрөсүндөгү ыйгарым укуктуу мамлекеттик орган же ККМди сертификаттоо боюнча орган тарабынан берилүүчү, Кыргыз Республикасынын Өкмөтү бекиткен ККМдин техникалык талаптарына ККМдин шайкештиги/шайкеш келбегендиги жөнүндө корутундунун (мындан ары – корутунду) негизинде ККМдин мамлекеттик реестрине/нен киргизилет жана чыгарылат.

5. Электрондук башкаруу чөйрөсүндөгү ыйгарым укуктуу мамлекеттик орган ККМ моделдеринин ККМдин мамлекеттик реестрин жүргүзөт:

- кошо куралган маалымат берүүчү түзүлүш (модем) менен;

- ККМ маалыматтарын колдонууга уруксат берилген ФМБТ моделдерин көрсөтүү менен конструкцияда маалыматтарды берүү түзүлүшү (модем) жок.

6. ККМдин мамлекеттик реестри төмөнкүлөрдү камтууга тийиш:

1) уюштуруу-укуктук формасын көрсөтүү менен ККМди даярдоочу заводдун толук аталышын жана салык төлөөчүнүн идентификациялык номерин;

2) ККМдин моделинин аталышын, анын ичинде ККМдин модели, мында конструкцияда маалыматтарды берүү түзүлүшү (модели) болбойт, ФМБТ моделдерин көрсөтүү менен, алар болгон учурда ККМдин маалыматтарын колдонууга уруксат берилет;

3) ККМди жана/же ФМБТны даярдоо датасы;

4) ККМдин мамлекеттик реестрине ККМдин моделин киргизген дата;

5) оң корутундунун берилген датасы жана номери;

6) корутунду берген органдын толук аталышы;

7) ККМдин моделдери, анын ичинде ККМди эсептешүүлөр үчүн автоматтык түзүлүштөрдө гана пайдалануу жана Интернет тармагында төлөмдүн электрондук каражаттарын колдонуу менен эсептешүү мүмкүндүгү жөнүндө маалыматтарды пайдалануу мүмкүн болгон иш чөйрөсү (алмашуу бюросу, нотариус, ломбарддар ж.б.).

7. ККМдин моделдерин ККМдин мамлекеттик реестрине киргизүү жөнүндө маселени кароо үчүн арыз берүүчүлөр электрондук башкаруу чөйрөсүндөгү ыйгарым укуктуу мамлекеттик органга кайрылышат.

8. Мамлекеттик органдар ККМдин мамлекеттик реестринен ККМдин моделдерин чыгаруу жөнүндө сунушту негиздөө менен, электрондук башкаруу чөйрөсүндөгү ыйгарым укуктуу мамлекеттик органга кайрылууга укуктуу.

9. ККМдин мамлекеттик реестрине ККМдин моделдерин киргизүү жөнүндө маселени демилгелөө үчүн арыз ээси арыз менен бирге электрондук башкаруу чөйрөсүндөгү ыйгарым укуктуу мамлекеттик органга төмөнкүлөрдү берет:

- ККМди жана/же ФМБТны жана оңдоо үчүн алардын жабдууларын берүүлөр жана техникалык колдоо жөнүндө ККМди даярдоочу завод же алардын расмий өкүлү менен түзүлгөн келишимдин көчүрмөсүн, мында ККМдин жана/же ФМБТнын үлгүлөрү жана/же ККМ мамлекеттик реестрине киргизилүүчү ККМдин жана/же ФМБТнын кепилдик жана кепилдиктен кийинки оңдоо шарттары каралган. Эгерде билдирүүчү катары ККМди даярдоочу завод эсептелсе, Кыргыз Республикасынын мыйзамдарында белгиленген тартипте күбөлөндүрүлгөн документтердин көчүрмөлөрү берилет, ал Кыргыз Республикасынын мыйзамдарына ылайык Кыргыз Республикасынын аймагында ККМди жана/же ФМБТны чыгаруучу заводдун ККМге жана/же ФМБТга болгон автордук укугун ырастайт;

- ККМ жана/же ФМБТ мүнөздөмөлөрүн сүрөттөө менен техникалык документтер (ККМ жана/же кассалык күбөлөндүрүү ыкмасы, пайдалануу жана оңдоо документтери), анын ичинде кагаз жана электрондук түрдөгү ККМдин жана/же ФМБТнын моделинин түстүү сүрөтү, түзүлүүчү чектердин жана отчеттордун фискалдык жана/же фискалдык эмес режимдерде басылып чыккан үлгүлөрдү;

- ККМди жана/же ФМБТны пайдалануу боюнча кагаз жана электрондук түрдөгү колдонмону;

- фискалдык режимди орнотуу, кайра фискалдаштыруу, фискалдык отчетторду жана Кыргыз Республикасынын мыйзамдарында каралган башка иш-аракеттерди жокко чыгаруу боюнча колдонмону;

- электрондук башкаруу чөйрөсүндөгү ыйгарым укуктуу мамлекеттик орган же ККМди сертификациялоо боюнча орган тарабынан берилүүчү техникалык талаптарга ККМдин ылайык келиши жөнүндө корутундуну;

- тиешелүү сертификациялоодон өткөн программалык-аппараттык же программалык каражатты, анын жардамы менен ККМдин жана/же ФМБТнын программалык бөлүгүн модификациялоого текшерүү жүргүзүлөт.

10. Электрондук башкаруу чөйрөсүндөгү ыйгарым укуктуу мамлекеттик орган арыз ээсинен арызды, документтердин толук пакетин жана программалык-аппараттык каражаттарды же инструменттерди алгандан кийин ыйгарым укуктуу салык органынын автоматташтырылган маалыматтык системасына 5 (беш) жумуш күндүн ичинде ушул Эрежелердин 6-пунктунда аталган маалыматтарды киргизет.

11. ККМдин моделдери электрондук башкаруу чөйрөсүндөгү ыйгарым укуктуу мамлекеттик орган тарабынан ККМдин мамлекеттик реестринен төмөнкүдөй негизде чыгарылат:

- ККМдин модели Кыргыз Республикасынын Өкмөтү тарабынан бекитилген ККМге карата техникалык талаптарга ылайык келбей калгандыгын ырастоочу корутундулар, анын ичинде ККМде фискалдык маалыматтарды жана башка маалыматтарды санкцияланбаган өзгөртүү жана ККМди программалык камсыздоону санкцияланбаган модификациялоо мүмкүндүгүнүн бардыгы;

- ККМдин мамлекеттик реестринен ККМдин моделдерин сунуштарды негиздөө менен чыгаруу жана тиешелүү корутунду берүү жөнүндө мамлекеттик органдардын кайрылуусу.

12. ККМ моделинин нускаларында аны ККМдин мамлекеттик реестрине киргизгенден кийин техникалык талаптарга ылайык келбегендик, анын ичинде ККМдеги фискалдык маалыматтардын жана башка маалымдардын санкцияланбаган өзгөрүүлөрү жана ККМди программалык камсыздоону санкцияланбаган модификациялоо аныкталса, ККМдин бул модели корутундунун негизинде ККМдин мамлекеттик реестринен чыгарылууга тийиш. ККМдин модели ККМдин техникалык талаптарына шайкеш келбегендиги ырасталган учурда, ыйгарым укуктуу салык органынын автоматташтырылган маалымат системасында катталган жана субъекттер тарабынан колдонулган ККМдин бул моделинин нускалары корутунду алынган күндөн тартып 10 (он) жумуш күн мурда субъекттерге алдын ала билдирүү менен ыйгарым укуктуу салык органы тарабынан каттоодон алынууга тийиш жана корутунду алынган күндөн тартып 30 (отуз) календардык күндүн ичинде ККМдин мамлекеттик реестринен чыгарылууга тийиш.

13. ККМге карата техникалык талаптар өзгөргөн учурда ККМдин мамлекеттик реестрине мурун киргизилген жана жаңы кабыл алынган ККМдин техникалык талаптарына шайкеш келбеген ККМдин моделдеринин нускаларын субъекттер колдоно алышат жана тиешелүү ченемдик укуктук акт күчүнө кирген күндөн тартып 90 (токсон) календардык күндүн ичинде ККМдин мамлекеттик реестринен чыгарылбашы керек.

14. Ыйгарым укуктуу салык органынын автоматташтырылган маалыматтык системасында катталган жана субъекттер колдонгон ККМге карата жаңы кабыл алынган техникалык талаптарга ылайык келбеген ККМдин моделдеринин нускалары 90 (токсон) календардык күн өткөндөн кийин 10 (он) жумуш күн мурда субъекттерге алдын ала маалымдоо менен 30 (отуз) календардык күндүн ичинде ыйгарым укуктуу салык органы тарабынан ККМ каттоодон алынууга жана ККМдин мамлекеттик реестринен чыгарылууга тийиш.

____________________________________________________________________________________________________________