10-статья. Камсыздандыруу төгүмдөрүн ыктыярдуу төлөө

1. Камсыздандыруу төгүмдөрүн ыктыярдуу төлөө (ушул статьянын 11-пунктунда көрсөтүлгөн адамдарды кошпогондо) каалагандай өлчөмдө, бирок Пенсиялык фондго орточо айлык эмгек акынын өлчөмүнүн 8 пайызынан кем эмес же фонддор боюнча камсыздандыруу төгүмдөрүнүн суммаларын төмөнкүдөй өлчөмдөрдө бөлүштүрүү менен орточо айлык эмгек акынын өлчөмүнүн 10 пайызынан кем эмес жүзөгө аткарылышы мүмкүн:";

Пенсиялык фондго - 8 пайыз; Мамлекеттик топтолуучу пенсиялык фондуна - 2 пайыз. 1-1. Камсыздандыруу төгүмдөрүн ыктыярдуу төлөө ар кандай өлчөмдө, бирок Пенсиялык фондго орточо айлык эмгек акынын өлчөмүнөн 3 пайызынан кем эмес өлчөмдө төмөнкү жактар тарабынан жүргүзүлүшү мүмкүн:

а) юридикалык жакты түзбөстөн өз ишин жүзөгө ашырган, жер үлүшүнө жана/же участогуна же анын бир бөлүгүнө ээ болгон же аны ижарага берүүдөн киреше алган дыйкан (фермердик) чарбаларынын башчылары, мүчөлөрү;

б) жер үлүшүнө жана/же участогуна же анын бир бөлүгүнө ээ болгон же аны ижарага берүүдөн киреше алган жеке жактар;

в) жер үлүшүнө жана/же айыл чарба багытындагы жер участогуна же анын бир бөлүгүнө ээ болгон, ошондой эле өз жер участокторун (үлүштөрүн) ижарага берген айыл чарба кооперативдеринин мүчөлөрү;

г) Айыл чарба жерлеринин мамлекеттик фондунун жерлеринен (жайыттарды кошпогондо), токой фондунун участокторунан жерлерди ижарага алган жеке жактар;

д) жайыттарды пайдаланууга укугу бар жеке жактар;

е) суу көлмөлөргө жана насостук станциялар менен сугарылуучу жерлерге ээ болгон жеке жактар.

2. Камсыздандыруу төгүмдөрүн ыктыярдуу төлөө Кыргыз Республикасынын Министрлер Кабинети тарабынан белгиленген тартипте үстүдөгү ай үчүн жана келерки мезгилге гана жүзөгө ашырылат.

3. 1996-жылдын январынан кийинки мезгил үчүн камсыздандыруу стажын калыбына келтирүү жана өздүк камсыздандыруу эсебинде камсыздандыруу төгүмдөрүн топтоо максатында Кыргыз Республикасынын жарандары камсыздандыруу төгүмдөрүн төлөөгө чейинки жана/же кийинки мезгилдер үчүн, чет өлкөлүк жарандар жана жарандыгы жок адамдар, ошондой эле юридикалык жактар жеке жактардын пайдасына камсыздандыруу төгүмдөрүн Пенсиялык фондго каалагандай өлчөмдө, бирок орточо айлык эмгек акынын 8 пайызынан кем эмес өлчөмдө айына төлөй алышат.

4. Мамлекеттик социалдык камсыздандыруу боюнча камсыздандыруу төгүмдөрүн төлөөчү адамдар Мамлекеттик пенсиялык топтоо фондуна камсыздандыруу төгүмдөрүн каалагандай өлчөмдө, бирок орточо айлык эмгек акынын 2 пайызынан кем эмес өлчөмдө ыктыярдуу төлөмдөрдү жүргүзө алышат.

(КР 2017-жылдын 29-июнундагы № 112, 2022-жылдын 4-ноябрындагы № 101, 2024-жылдын 10-майындагы № 84, 2025-жылдын 12-февралындагы № 37 , 2025-жылдын 29-октябрындагы № 243 Мыйзамынын редакциясына ылайык)

Көңүл буруңуздар! КР 2024-жылдын 10-майындагы № 84 Мыйзамы менен киргизилген өзгөртүүлөр, берилген Мыйзам расмий жарыяланган күндөн тартып бир жыл өткөндөн кийин күчүнө кирет.