36-статья. Кыргыз Республикасынын аймагына дары-дармек каражаттарын ташып келүүнүн тартиби

Кыргыз Республикасынын аймагына дары-дармек каражаттарын ташып келүү Кыргыз Республикасынын мыйзамдарына ылайык жүзөгө ашырылат. Жеке жана коммерциялык эмес пайдалануу үчүн Кыргыз Республикасынын аймагына дары-дармек каражаттарын ташып келүүгө лицензиясыз же Кыргыз Республикасынын саламаттык сактоо жаатындагы ыйгарым укуктуу мамлекеттик органынын ташып келүү уруксаты менен ушул Мыйзамдын 38-статьясында каралган учурларда гана жол берилет. Кыргыз Республикасында каттоодон өткөрүлбөгөн, бирок жөнөтүүлөр жүзөгө ашырылып келинген өлкөлөрдө каттоодон өткөн жана колдонулуп жаткан дары-дармек каражаттарын ташып келүү уруксаты өзгөчө учурларда (стихиялык кырсык, инфекциялык оорунун жайылышы) Кыргыз Республикасынын саламаттык сактоо жаатындагы ыйгарым укуктуу мамлекеттик органы тарабынан жол берилет. Дары-дармек каражаттарына клиникага чейинки жана клиникалык изилдөө жүргүзүүгө арналган, каттоодон өткөрүлбөгөн дары-дармек каражаттарын Кыргыз Республикасынын аймагына ташып келүүгө Кыргыз Республикасынын саламаттык сактоо жаатындагы ыйгарым укуктуу мамлекеттик органынын уруксаты боюнча жол берилет. Кыргыз Республикасынын аймагына сапаты дары-дармек каражатын өндүргөн ишкананын сертификаты менен тастыкталган, дары-дармек каражаттарын өндүрүүчү өлкөнүн дары-дармек каражаттарынын сапаты мамлекеттик стандарттарга ылайык өндүрүлгөндүгү ырасталган ташып келинүүчү дары-дармек каражаттары ташылса болот. Жарактуулук мөөнөтүнүн бүтүшүнө жарактуулугунун бардык мөөнөтүнүн үчтөн бири калган дары-дармек каражаттарын Кыргыз Республикасынын аймагына ташып келүүгө тыюу салынат. Кыргыз Республикасынын аймагына сапаты стандартка жооп бербеген дары-дармек каражаттарын жана жасалма дары-дармек каражаттарын ташып келүүгө тыюу салынат.