15-берене. Юридикалык жактардын бенефициардык ээлеринин ачык-айкындыгын камсыз кылуу боюнча чаралар

1. Кыргыз Республикасында түзүлгөн жана катталган юридикалык жактар, чет өлкөлүк юридикалык жактардын филиалдары (өкүлчүлүктөрү) төмөнкүлөргө милдеттүү:

1) акыр аягында (ээлик кылуу жана контролдоо тизмеги аркылуу) ушул юридикалык жактын менчик укугуна түз же кыйыр (үчүнчү жактар аркылуу) ээлик кылган же ушул юридикалык жакты контролдогон жеке жак (мындан ары - юридикалык жактын бенефициардык ээси) жөнүндө такталган жана жаңыланган маалыматтарды колдо болгон жана жеткиликтүү маалыматтын негизинде түзүүгө;

2) юридикалык жактын бенефициардык ээси жөнүндө маалыматты түзүлгөн датасынан тартып ушул юридикалык жактын катталган (жайгашкан) жеринде беш жылдан кем эмес сактоого.

2. Акционерлердин реестрин кармоочулар төмөнкүлөргө милдеттүү:

1) юридикалык жактын акционерлеринин реестрин (мындан ары - реестр) түзүүгө жана жаңылап турууга;

2) реестрди түзүлгөн датасынан тартып беш жылдан кем эмес сактоого;

3) реестрдеги маалыматтарды финансылык чалгындоо органынын суроо-талабынын негизинде, анын ичинде электрондук форматта, байланыштын корголгон каналдары боюнча берүүгө.

3. Кыргыз Республикасында түзүлгөн жана катталган юридикалык жактар, чет өлкөлүк юридикалык жактардын филиалдары (өкүлчүлүктөрү) ушул берененин 1-бөлүгүнө ылайык юридикалык жактын бенефициардык ээси жөнүндө түзүлгөн маалыматты финансылык чалгындоо органынын суроо-талабынын негизинде, анын ичинде электрондук форматта, байланыштын корголгон каналдары боюнча берүүгө милдеттүү.

4. Кыргыз Республикасында түзүлгөн жана катталган юридикалык жактардын, чет өлкөлүк юридикалык жактардын филиалдарынын (өкүлчүлүктөрүнүн) бенефициардык ээлери жөнүндө электрондук маалыматтар базасы түзүлөт.

Аталган электрондук маалымат базасын түзүү, жаңылоо, сактоо тартиби жана ага кирүү тартиби Кыргыз Республикасынын Министрлер Кабинети тарабынан белгиленет.

5. Кыргыз Республикасынын укук коргоо органдары, улуттук коопсуздук органдары, прокуратура органдары жана Кыргыз Республикасынын текшерүүчү органдары Кыргыз Республикасынын мыйзамдарына ылайык кылмышкерлердин же алар менен байланышкан жактардын Кыргыз Республикасында түзүлгөн юридикалык жактын, Кыргыз Республикасында иштеген чет өлкөлүк юридикалык жактардын филиалдарынын (өкүлчүлүктөрүнүн) юридикалык жактагы үлүшүн ээлеп калуусунун жана (же) контролдоосунун же бенефициардык ээси болуп калуусунун алдын алуу максатында зарыл болгон чараларды көрүүгө тийиш.

(КР 2022-жылдын 28-декабрындагы № 125, 2025-жылдын 23-январындагы N 26 Мыйзамдарынын редакцияларына ылайык)