458-берене. Жашы жете электи сот адилеттиги системасынан чыгаруу

1. Эгерде жашы жете электи биринчи жолу анчалык оор эмес кылмыш жасаган деп эсептөөгө негиз болсо, тергөөчү ушул Кодекстин 35-беренесинин 1-бөлүгүнүн 23-пунктуна ылайык жашы жете электи жазыктык сот адилеттигинин системасынан мыйзамда каралган тартипте чыгаруу максатында сотко чейинки өндүрүштү кыскартуу жөнүндө жүйөлөштүрүлгөн чечим кабыл алууга укуктуу.

2. Жазыктык сот адилеттигинин системасынан чыгаруу жөнүндө чечим кабыл алууда анын эң мыкты кызыкчылыктары, жасалган кылмыштын мүнөзү жана оордугу, жаш курагы, күнөөсүнүн даражасы, келтирилген залал, кылмыш жасагандан кийинки жүрүм-туруму көңүлгө алынууга тийиш.

3. Жашы жете электи жазыктык сот адилеттиги системасынан чыгаруу төмөнкү жагдайлардын жыйындысы бар болгондо колдонулушу мүмкүн:

1) ал биринчи жолу анчалык оор эмес кылмыш жасаган болсо;

2) жашы жете элек шектүүнүн мурда соттуулугу жок болсо;

3) жашы жете элек жазыктык сот адилеттигинин системасынан чыгаруу жана медиация программасына катышпаган болсо;

4) жашы жете эле кылмыш жасаганын мойнуна алса;

4. Жашы жете электи жазыктык сот адилеттигинин системасынан чыгаруу келишиминде төмөнкү чаралар каралуусу мүмкүн:

1) кат жүзүндө эскертүү;

2) келтирилген залалды толук же жарым-жартылай төлөп берүү;

3) милдеттенме коюу;

4) көзөмөл коюу.

Жашы жете электи жазыктык сот адилеттигинин системасынан чыгаруу боюнча бир нече чаралар бир учурда колдонулуусу мүмкүн.