Кыргыз Республикасынын Шайлоо жана референдум өткөрүү боюнча борбордук комиссиянын «Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоо натыйжалары тууралуу» токтому

КЫРГЫЗ РЕСПУБЛИКАСЫНЫН ШАЙЛОО ЖАНА РЕФЕРЕНДУМ ӨТКӨРҮҮ БОЮНЧА БОРБОРДУК КОМИССИЯСЫ ТОКТОМ 2021-жылдын 9-декабры № 801 Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоо натыйжалары тууралуу "Кыргыз Республикасынын Жогорку Кеңешинин депутаттарын шайлоону дайындоо жөнүндө" Кыргыз Республикасынын Президентинин 2021-жылдын 29-августундагы № 370 Жарлыгы менен Кыргыз Республикасынын Жогорку Кеңешинин депутаттарын шайлоо 2021-жылдын 28-ноябрына дайындалды. "Кыргыз Республикасынын Жогорку Кеңешинин депутаттарын шайлоону өткөрүү боюнча шайлоо округдарынын схемасы жана чек аралары жөнүндө" Кыргыз Республикасынын Шайлоо жана референдум өткөрүү боюнча борбордук комиссиясынын 2021-жылдын 5-сентябрындагы № 684 токтому менен бир мандаттуу № 25 Аламүдүн шайлоо округунун схемасы жана чек арасы бекитилди. Бир мандаттуу Аламүдүн шайлоо округунда добуш берүүнү өткөрүү үчүн 61 шайлоо участогу түзүлгөн. Бир мандаттуу № 25 Аламүдүн шайлоо округу боюнча шайлоочулардын тизмесине 111353 шайлоочу киргизилген, алардын ичинен 30638 шайлоочу добуш берүүгө катышты, бул 27,51%ды түздү. Кыргыз Республикасынын Шайлоо жана референдум өткөрүү боюнча борбордук комиссиясы бир мандаттуу шайлоо округу боюнча Кыргыз Республикасынын Жогорку Кеңешинин депутаттыгына төмөнкү 10 талапкерди каттады:

1. Абдувалиев Зарылбек Рубенович;

2. Бегалиев Болотбек Касымбекович;

3. Дунканаев Айбек Медетбекович;

4. Атамбаев Сейидбек Алмазбекович;

5. Момункулов Эмил Базаркулович;

6. Аспек уулу Азамат;

7. Момонкулов Талгат Мелисович;

8. Чынтемиров Бердибек Айбекович;

9. Иманалиев Каныбек Капашович;

10. Чакибаев Эмиль Акжолтоевич.

Анын ичинен 9 талапкер добуш берүүгө катышты. Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоону даярдоо жана өткөрүү мезгилинде 6 арыз жана даттануу түштү. Түшкөн бардык арыздар жана даттануулар каралып чыкты жана алар боюнча Кыргыз Республикасынын мыйзамдарына ылайык чечимдер кабыл алынды. Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоодо добуш берүүнүн жыйынтыгы тууралуу Аламүдүн округдук шайлоо комиссиясынын 2021-жылдын 4-декабрындагы протоколунун маалыматтарына ылайык:

- Абдувалиев Зарылбек Рубенович 1050 (3,42%) добуш алды;

- Бегалиев Болотбек Касымбекович 4169 (13,60%) добуш алды;

- Дунканаев Айбек Медетбекович 537 (1,75%) добуш алды;

- Атамбаев Сейидбек Алмазбекович 7976 (26,03%) добуш алды;

- Момункулов Эмил Базаркулович 2068 (6,74%) добуш алды;

- Аспек уулу Азамат 967 (3,15%) добуш алды;

- Момонкулов Талгат Мелисович 526 (1,71%) добуш алды;

- Чынтемиров Бердибек Айбекович 3458 (11,28%) добуш алды;

- Иманалиев Каныбек Капашович 2978 (9,71%) добуш алды;

- "Баарына каршы" позициясы үчүн 5353 (14,47%) добуш берилди.

"Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө" Кыргыз Республикасынын конституциялык Мыйзамынын 64-беренесинин 51-бөлүгүнө ылайык, "Ушул бир мандаттуу шайлоо округу боюнча добуш берүүгө катышкан шайлоочулардын кыйла көп добушун алган талапкер бир мандаттуу шайлоо округу боюнча Жогорку Кеңештин шайланган депутаты деп таанылат". Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоодо добуш берүүнүн жыйынтыгы тууралуу № 25 Аламүдүн округдук шайлоо комиссиясынын 2021-жылдын 4-декабрындагы протоколунун негизинде, "Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө" Кыргыз Республикасынын конституциялык Мыйзамынын 37-беренесинин 4-бөлүгүнө, 64-беренесинин 51-бөлүгүнө ылайык, "Кыргыз Республикасынын Шайлоо жана референдум өткөрүү боюнча борбордук комиссиясы жөнүндө" Кыргыз Республикасынын конституциялык Мыйзамынын 3-беренесин, 4-беренесинин 1-бөлүгүнүн 26-пунктун, 8-беренесин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы ТОКТОМ КЫЛАТ:

1. Бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин депутатын шайлоо болуп өттү деп таанылсын.

2. Атамбаев Сеидбек Алмазбекович - бир мандаттуу № 25 Аламүдүн шайлоо округу боюнча Кыргыз Республикасынын Жогорку Кеңешинин шайланган депутаты деп таанылсын.

3. Бул токтом "Эркин Тоо" газетасына жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Бул токтомдун көчүрмөсү Кыргыз Республикасынын Жогорку Кеңешине жөнөтүлсүн.

5. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары Т.Шайназаровго жүктөлсүн.

Төрага

Н. Шайлдабекова