Өзгөн шаардык кеңешинин «Өзгөн шаарында бузуулар жөнүндө иштерди кароо боюнча комиссия тууралуу жобону жана бузуулар боюнча комиссия курамын бекитүү»токтому

ӨЗГӨН-ШААРДЫК КЕҢЕШИ ТОКТОМ Өзгөн шаардык кеңешинин (VI чакырылышынын) кезектеги XV сессиясы отуруму

2018-жылдын 20-декабры №15/6 Өзгөн шаарында бузуулар жөнүндө иштерди кароо боюнча комиссия тууралуу жобону жана бузуулар боюнча комиссия курамын бекитүү Өзгөн шаардык кеңешинин (VI чакырылышынын) кезектеги XV сессиясынын отуруму күн тартибине Кыргыз Республикасынын Бузуулар жөнүндөгү кодексинин, Кыргыз Республикасынын Өкмөтүнө караштуу жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин 2018-жылдын 17-октябрындагы №01-18/26 буйругунун, Өзгөн шаар мэриясынын 2018-жылдын 3-декабрындагы №1126, 2018-жылдын 10-декабрындагы №1149 каттарынын жана Өзгөн шаардык кеңешинин «Мыйзамдуулук, регламент, депутаттык мандат, депутаттык этика, укуктук маселелер, мамлекеттик мекемелер жана коомдук уюмдар менен иштөө боюнча» туруктуу комиссиясына 2018-жылдын 12-декабрындагы отурумунун №5 протоколунун негизинде киргизилген маселени угуп жана талкуулап ТОКТОМ КЫЛАТ:

1. Өзгөн шаарында бузуулар жөнүндө иштерди кароо боюнча комиссия тууралуу жобо 1-тиркемеге ылайык бекитилсин.

2. Бузуулар боюнча комиссия курамы депутаттардын сунушун эске алуу менен 2-тиркемеге ылайык бекитилсин.

3. Комиссияга Кыргыз Республикасынын бузуулар жөнүндө кодексине жана КР башка мыйзамдарына ылайык иш жүргүзүү милдеттендирилсин.

4. Бул жобону Кыргыз Республикасынын Юстиция Министрлигинин Ош облусу боюнча башкармалыгынан каттоодон өткөрүү жагы шаардык мэриянын аппаратына милдеттендирилсин.

5. Токтомдун аткарылышын көзөмөлдөө жагы Өзгөн шаардык кеңешинин «Мыйзамдуулук, регламент, депутаттык мандат, депутаттык этика, укуктук маселелер, мамлекеттик мекемелер жана коомдук уюмдар менен иштөө боюнча» туруктуу комиссиясына тапшырылсын.

Төрага

А.Джалилов

Өзгөн шаардык кеңешинин 2018-жылдын 20 - декабрындагы кезектеги XV сессиясынын №15/6 токтомунун № 1 тиркемеси

Өзгөн шаардык мэриянын Бузуулар жөнүндө иштерди кароо боюнча Комиссиясынын Жобосу

1. Жалпы жоболор

1. Өзгөн шаардык мэриянын Бузуулар жөнүндө иштерди кароо боюнча Комиссиясынын Жобосу (мындан ары-Жобо) Кыргыз Республикасынын 2017-жылдын 13-апрелиндеги №58 “Бузуулар жөнүндө кодексинин” (мындан ары - Кодекс) жана Кыргыз Республикасынын Өкмөтүнө караштуу Жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин 2018-жылдын 17-октябрындагы №01-18/126 буйругу менен бекитилген “Кыргыз Республикасынын жергиликтүү өз алдынча башкаруу органдарынын бузуулар жөнүндө иштерди кароо боюнча комиссиялары тууралуу” Типтүү Жобонун негизинде иштеп чыгылып, бул жобо, Өзгөн шаардык мэриянын “Бузуулар боюнча комиссиясын (мындан ары - Комиссия) түзүүнүн жана анын ишинин тартибин аныктайт.

2. Комиссия Өзгөн шаардык мэриянын сунушу (мындан ары-мэрия) менен Өзгөн шаардык кеңеши (мындан ары –шаардык кеңеш) тарабынан түзүлөт, б.а. Комиссия жөнүндө жобо, анын сандык жана персоналдык курамы шаардык кеңештин чечими менен бекитилет жана туруктуу иштөөчү коллегиалдуу орган болуп эсептелет.

3. Комиссия өз ишмердүүлүгүндө Кыргыз Республикасынын Конституциясын, Кыргыз Республикасынын “Бузуулар жөнүндө кодексин”, башка ченемдик укуктук актыларды жана ушул Жобону жетекчиликке алып, кодексте каралган бузуулар жөнүндө иштерди кароо боюнча ыйгарым укуктарга ээ.

4. Комиссия жыл сайын, 15-январдан кеч эмес өткөн календарлык жылда аткарган өз иштери тууралуу отчет даярдап шаардык кеңешке киргизет.

5. Комиссиянын ишмердүүлүгүн материалдык-техникалык жактан камсыздоо шаардык бюджетте каралган каражаттардын эсебинен жүргүзүлөт.

2. Комиссияны түзүүнүн жана анын ишмердүүлүгүн токтотуунун тартиби

6. Комиссия так санда, 5-11 адамдан, Комиссиянын төрагасынын, төрагасынын орун басарынын, катчысынын жана мүчөлөрүнүн курамында түзүлөт.

7. Комиссиянын курамына төмөндөгүлөр киришет:

- шаардык кеңештин депутаттары;

- мэриянын кызматчылар;

- шаардын чегинде жашаган жарандык коомдун жана жергиликтүү жамааттын өкүлдөрү (макулдашуу боюнча).

Комиссиянын төрагасы комиссиянын мүчөлөрүнүн ичинен, ал эми Комиссиянын катчысы мэриянын муниципалдык кызматчысы болгон Комиссиянын мүчөлөрүнүн ичинен дайындалат (шайланат).

8. Жарандык коомдун жана жергиликтүү жамааттын өкүлдөрүнөн 21 жашка толгон, эң кеминде атайын орто билимге болгон Кыргыз Республикасынын жараны Комиссиянын мүчөсү боло алат.

9. Соттун чечими менен аракетке жөндөмсүз же аракетке жөндөмдүүлүгү чектелген деп табылган; соттулугу бар же мыйзамда аныкталган тартипте алынбаган же жабылбаган соттулугу бар; акталбаган негиздер боюнча соттук куугунтуктоосу (жазык иши) токтотулган, мурда жазык жоопкерчилигине тартылган; медициналык корутундуга ылайык ден соолугунун абалы Комиссиянын мүчөсүнүн ыйгарым укуктарын аткарууга тоскоолдук кылган адамдар Комиссиянын мүчөсү боло албайт.

10. Комиссиянын иштеп жаткан курамынын ыйгарым укуктары шаардык кеңеш Комиссияны түзүү жөнүндө чечим кабыл алган күндөн тартып башталат жана Комиссиянын жаңы курамы бекитилген учурдан тартып токтотулат.

11. Төмөнкү учурларда комиссия мүчөсүнүн ыйгарым укуктары токтотулат:

- өз ыйгарым укуктарын токтотуу тууралуу жазуу жүзүндо арыз бергенде;

- муниципалдык кызматын токтоткондо;

- соттун ага айыптоочу өкүмү күчүнө киргенде;

-күчүнө кирген соттун чечими менен жөндөмсүз же аракетке жөндөмдүүлүгү чектелген, дайынсыз жок болгон же өлгөн деп табылганда;

- медициналык корутундуга ылайык ден соолугунун абалы ыйгарым укуктарын аткарууга тоскоолдук кылганда;

- өзүнүн намысын жана кадыр-баркын кетирүүчү жосун жасаганда;

- комиссиянын мүчөсү өлгөндө;

- Кыргыз Республикасынын чегинен сырткары жерге туруктуу жашоо үчүн чыгып кеткенде;

-Кыргыз Республикасынын жарандыгынан чыкканда, Кыргыз Республикасынын жарандыгын жоготкондо же чет мамлекеттин жарандыгын алганда;

- шаардык кеңештин депутаты катары ыйгарым укуктарынын мөөнөтү аяктаганда;

- жарандык коом жана жергиликтүү жамаат тарабынан өз өкүлүн кайра чакырып алганда.

12. Комиссиянын жаңы мүчөсү Комиссиянын мурдагы мүчөсүнүн ыйгарым укуктарын токтотуу жөнүндө чечим кабыл алынгандан 15 календарлык күндөн кеч эмес бекитилет.

13. Комиссиянын ыйгарым укуктары Комиссия өз ыйгарым укуктарын аткарбаган же талаптагыдай эмес аткарганда шаардык кеңештин чечими менен токтотулушу мүмкүн.

14. Комиссиянын жаңы курамы Комиссиянын мурдагы курамынын ыйгарым укуктары токтотулгандан 5 календарлык күндөн кеч эмес мөөнөттө түзүлөт.

3. Комиссиянын ишинин тартиби

16. Комиссия бузуулар жөнүндө иштерди Кодекске ылайык отурумдарда карайт. Комиссиянын отурумдары зарылчылыгына жараша (материалдардын түшүшүнө карата) өткөрүлөт. Комиссиянын отурумдарынын мезгилдүүлүгү бузуулар жөнүндө иштерди кароонун мыйзам тарабынан аныкталган мөөнөттөрүн сактоого тийиш.

17. Комиссиянын жалпы мүчөлөрүнүн үчтөн экиси катышса, Комиссиянын отуруму укуктуу болуп, комиссиянын жалпы мүчөлөрүнүн жарымынан көбү добуш берсе чечим кабыл алынды деп эсептелет.

18. Бузуулар жөнүндө ишти Комиссия иштин материалдары келип түшкөндөн баштап, Кодексте аныкталган тартипте он күндүк мөөнөттө карайт.

19. Мэриянын жетекчилиги өз чечимдери менен бузуулар жөнүндө протокол түзүү боюнча ыйгарым укук берилген кызмат адамдарынын тизмегин аныктайт.

20. Комиссия чечимди аныктама же токтом түрүндө чыгарат, анда комиссия, ишти карап чыгып, төмөндөгү токтомдордун бирин чыгарат:

1) жаза чарасын колдонуу жөнүндө;

2) туумду кошуп эсептөө жөнүндө (Кодекстин 29-беренеси);

3) иш боюнча өндүрүштү кыскартуу жөнүндө.

4) ишти кароо Комиссиянын компетенциясына кирбей тургандыгы ачыкталган кезде, ишти ведомстволук караштуулугу боюнча өткөрүп берүү жөнүндө аныктама чыгарат.

21. Иш боюнча чыгарылган токтомго даттануу тартиби, жаза чаралары жана кошумча укуктук кесепеттер жөнүндө токтомду аткаруунун тартиби Кодексте каралган тартипте жүзөгө ашырылат.

4. Комиссиянын мүчөлөрүнүн укуктары жана милдеттери

22. Комиссиянын ишмердүүлүгүн Комиссиянын төрагасы уюштурат. Бузуу жөнүндө иштерди кароодо Комиссиянын мүчөлөрү бирдей укукка ээ.

23. Комиссиянын мүчөлөрү төмөндөгүлөргө милдеттүү:

- каралып жаткан бузуу жөнүндө иштердин материалдары менен таанышууга;

- бузуу жөнүндө иштер боюнча иликтөөгө жана далилдерге баа берүүгө катышууга;

-чечим чыгарып жатканда талкуулоого жана добуш берүүгө катышууга;

- жүрүм-турумдун этикасынын эрежелерин сактоого;

- отурумдун протоколуна кол коюуга.

24. Комиссиянын мүчөлөрү төмөндөгүлөргө укуктуу:

- бузуу жөнүндө иштерге катышып жаткан адамдарга суроолорду берүүгө;

- бузуу жөнүндө иштер боюнча кабыл алынып жаткан чечимдер боюнча сунуштарды кийирүүгө жана Кодексте каралган башка укуктарга.

25. Комиссиянын төрагасы, Комиссиянын мүчөсүнүн милдеттеринен сырткары, төмөндөгүлөргө милдеттүү:

- Комиссиянын ишмердүүлүгүн пландаштыруу, уюштуруу жана жетектөөгө;

- Комиссиянын отурумдарында төрагалык кылууга;

- Комиссиянын отурумунун күн тартибин бекитүүгө;

-чечимдерге (аныктамаларга жана токтомдорго), ошондой эле Комиссиянын башка документтерине кол коюуга;

- Комиссиянын ишмердүүлүгүнө көзөмөл жүргүзүүгө.

Комиссиянын төрагасы, Комиссиянын мүчөсүнүн укуктарынан сырткары, төмөнкүдөй укуктарга ээ:

- өз компетенциясынын чегинде Комиссиянын атынан ишеним катсыз аракеттерди жасоого жана мамлекеттик бийликтин органдары, жергиликтүү өз алдынча башкаруу органдары, кызмат адамдары жана жарандар менен болгон мамилелерде комиссиянын кызыкчылыктарын билдирүүгө;

- Комиссиянын ыйгарым укуктарына кирген маселелер боюнча тапшырмаларды берүүгө;

- ушул Жобого жана Кодекске ылайык башка укуктарга.

26. Комиссиянын төрагасынын орун басары Комиссиянын мүчөсүнүн милдеттеринен сырткары:

- бузуулар жөнүндө иштерди комиссиянын отурумунда кароого алдын-ала даярдоону уюштурат;

- Комиссиянын төрагасынын тапшырмаларын аткарат;

- Комиссиянын төрагасы жок болгон учурда анын ыйгарым укуктарын ишке ашырат;

- ушул Жобого жана Кодекске ылайык башка функцияларды аткарат.

27. Комиссиянын катчысы, Комиссиянын мүчөсүнүн милдеттерин аткаруудан сырткары:

- бузуулар жөнүндө иштерди Комиссиянын кароосуна даярдоону уюштурат;

- өз ишмердүүлүгүн Комиссиянын төрагасынын жетекчилигинин астында ишке ашырат;

- Комиссиянын төрагасынын тапшырмаларын аткарат;

- келип түшкөн материалдарды, билдирүүлөрдү жана арыздарды, ошондой эле бузуу жагдайы бар экендигин көрсөткөн, массалык маалымат каражаттарында (анын ичинде Интернетте) жарыяланган кабарларды кабыл алат жана каттайт;

- бузуулар жөнүндо протоколдорду, Комиссия тарабынан чыгарылган токтомдорду жана аныктамаларды Кодекстин жана ушул Жобонун талаптарына ылайык даярдоону жана тариздөөнү камсыз кылат;

- Комиссиянын мүчөлөрүн, бузуулар жөнүндө өндүрүшкө катышып жатышкан адамдарды талаптагыдай ишти кароонун убактысы жана орду тууралуу кабарландырат, аларды Комиссиянын кароосуна киргизилген иштердин материалдары менен тааныштырат;

- Комиссиянын отурумдарынын протоколун жүргүзөт жана тариздейт, аларга кол коет;

- Комиссия тарабынан чыгарылган чечимдерге (аныктамаларга жана токтомдорго) кол коет;

- аныктамалардын жана токтомдордун көчүрмөлөрүн тиешелүү адамдарга белгиленген мөөнөттөрдө тапшырууну же жөнөтүүнү камсыз кылат;

- Комиссия тарабынан чыгарылган токтомдорго жана аныктамаларга даттанууларды кабыл алат, аларды кароону уюштурат;

- Комиссия тарабынан чыгарылган аныктамалардын жана токтомдордун аткарылышына көзөмөл жүргүзөт;

- Комиссиянын иш кагаздарынын жүргүзүлүшүн жана сакталышын камсыз кылат;

- бузуулар жөнүндө иштерди кароонун тажрыйбасын иликтейт жана жалпылайт, комиссиянын ишмердүүлүгүн жөнгө салуучу ченемдик укуктук актыларды өркүндөтүү боюнча сунуштарды даярдайт;

- отчеттуулукту жана статистикалык отчеттуулукту жүргүзөт;

- Кодекске жана ушул Жобого ылайык башка милдеттерди аткарат.

Комиссиянын катчысы убактылуу жок болгон учурда анын милдеттерин комиссиянын төрагасынын тапшыруусу боюнча комиссиянын мүчөлөрүнүн бири аткарып турат.

28. Комиссиянын мүчөсү төмөнкү учурда бузуулар жөнүндө иштерди кароого катышууга акысы жок, эгер, ал;

- бузуу үчүн жоопкерчиликке тартылып жаткан адамдын, жабырлануучунун, анын мыйзамдуу өкүлдөрүнүн, коргоочусунун, өкүлүнүн, адвокатынын, ошондой эле күбөсүнүн, эксперттин, адистин, котормочунун туугандары болсо;

- иштин чечилишине тике же кыйыр түрдө кызыкдар болсо.

5. Комиссиянын иш кагаздарын жүргүзүү

29. Иш кагаздарын жүргүзүүгө жалпы жетекчилик Комиссиянын төрагасы тарабынан ишке ашырылат, ал бул иштин абалы үчүн жоопкерчилик тартат.

30. Эсеп журналдарынын сакталышы, аларга маалыматтардын өз убагында жана анык, так киргизилиши үчүн жоопкерчиликти Комиссиянын катчысы тартат.

31. Бузуулар жөнүндө иш өндүрүшүнүн катышуучуларына бардык зарыл документтерди жөнөтүү Комиссиянын катчысы тарабынан жүргүзүлөт.

32. Бузуулар жөнүндө иштер боюнча кабарламалар ишти кароонун датасы дайындалгандан кийинки күндөн кеч эмес жиберилет (кабарлоо формасы белгиленген, 3-тиркеме). Жиберилген кабарлама адресатка тапшырылбай калганы билинген учурда, комиссиянын жооптуу катчысы ошол замат тапшырылбай калуунун себептерин аныктоого, бул тууралуу Комиссиянын төрагасына билдирүүгө, анын көрсөтмөсү боюнча кабарламанын өз убагында тапшырылышын камсыз кылуучу чараларды көрүүгө милдеттүү.

Комиссиянын отурумуна келбеген адамдардын кабарламаларынын айырма бөлүгү ишке тигилет.

33. Бузуу жасалган жерде айып пул өндүргөн учурда айып пулду төлөө банк картасын пайдалануу менен терминал аркылуу жүргүзүлөт, ал эми төлөөнүн мындай формасы мүмкүн болбогондо, Комиссиянын катчысы бузуу үчүн жоопкерчиликке тартылып жаткан адамга кабыл алынган үлгүдөгү, атайын финансылык отчеттулуктун документи болуп эсептелүүчү жана эки нускада түзүлүүчү айып пул дүмүрчөгүн (квитанциясын) берет. Жоопкерчиликке тартылып жаткан адам салынган айып пулду ыктыярдуу төлөөгө макулдугун билдирип айып пул дүмүрчөгүнүн (квитанциясынын) биринчи нускасына кол коет, экинчи нускасы жаза чарасы колдонулуп жаткан адамга берилет.

34. Комиссиянын катчысы бузуулар жөнүндө иштерди түзүүнү, аларды төмөндөгүдөй хронологиялык тартипте топтоштуруп тигүүнү камсыздайт:

- бузуулар жөнүндө протокол жана ишке байланыштуу башка материалдар;

- отурумдун процессинде ишке кошулган, келип түшкөн иретинде жайгаштырылган бардык документтер;

- белгиленген тартипте кол коюлган комиссиянын отурумунун протоколу;

- ишти кароонун жыйынтыгында отурумда чыгарылган аныктамалар, токтомдор.

Бардык документтер көктөмөгө алардын тексти көрүнүп тургандай болуп көктөлөт.

35. Комиссия тарабынан каралган бардык иштер эсепке алынууга жатат. Иштин номуру каттоо журналындагы катар номурун жана келип түшкөн жылды камтыйт.

36. Бузуулар жөнүндө протокол түзүүчү кызмат адамдары бузуулар жөнүндө каралган иштер тууралуу маалыматтарды Комиссия менен ай сайын салыштырып турушат.

37. Комиссия ай сайын Комиссия тарабынан салынган айып пулдардын келип түшүшүн казначылыктын райондук бөлүмү менен салыштырып, текшерип турат.

38. Комиссия төмөнкүдөй эсеп журналдарын жүргүзө алат:

- бузуулар жөнүндо иштерди эсепке алуу журналы;

- айып пул салынган адамдарды эсепке алуу журналы;

- бузууну жасоо үчүн жоопкерчиликке тартылып жаткан адамдарга жиберилген кабарламаларды эсепке алуу журналы (№4-тиркеме).

39. Журналдардын барактары номурланган, көктөлгөн, мөөр менен бекитилген болууга тийиш,эсеп журналындагы бардык жазуулар окуй алгыдай даана, көк же сыя көк түстөгү сыя (паста) менен жазылат.

40. Журналдарды сактоо мөөнөтү 3 жыл. Бузуулар жөнүндо иштерди сактоо мөөнөтү 5 жыл. Көрсөтүлгөн мөөнөт аяктаганда алар тизим боюнча архивге тапшырылат.

41. Эсепке алуу журналдары ички колдонуунун документтери болуп эсептелет жана мекеме-уюмдарга, жеке жарандарга же кызмат адамдарына, Кыргыз Республикасынын мыйзамдарында каралган учурлардан сырткары, комиссиянын төрагасынын уруксаты менен гана берилет.

Өзгөн шаардык кеңешинин 2018-жылдын 20 декабрындагы кезектеги XV сессиясы№ 15/6 токтомунун 2- тиркемеси

Өзгөн шаарынын бузуулар боюнча административдик комиссиясынын курамы

Мамадалиев Шакир Шамшидинович-Өзгөн шаарынын 1-вице-мэри, Тайлаков Маматбек Капарович – Өзгөн шаар мэриясынын аппарат жетекчиси, Абдулкасимов Илхамжан Маматкасимович – Өзгөн шаар мэриясынын юристи, Калбердиев Сабырбек Арыккозуевич - Өзгөн шаар мэриясынын башкы адиси, Мусажанов Улугбек Тохтасинович - Өзгөн шаар мэриясынын жетектөөчү адиси, Шамуратов Улугбек Юлдашбаевич – жергиликтүү жамааттын өкүлү, Закиржан – коомдук уюмдун өкүлү, Ахмедов Хасилжан Садыкович – Өзгөн шаардык кеңешинин депутаты, Мирзажанов Бахтиержон Камилжанович - Өзгөн шаардык кеңешинин депутаты, Хурулбаев Мансуржон Мухтарович - Өзгөн шаардык кеңешинин депутаты, Джакыпов Алмаз Назармаматович - Өзгөн шаардык кеңешинин депутаты,

Жооптуу катчы:

Н. Мамадалиев