Кыргыз Республикасынын Президентин шайлоодо талапкерлер тарабынан берилген шайлоо документтерин кабыл алуу жана текшерүү боюнча жумушчу топ жөнүндө (Кыргыз Республикасынын Шайлоо жана референдум өткөрүү боюнча борбордук комиссиясынын токтому менен бекитилди)

| | Кыргыз Республикасынын Шайлоо жана референдум өткөрүү боюнча борбордук комиссиясынын 2026-жылдын 19-августундагы № 84 токтомунатиркеме |

Кыргыз Республикасынын Президентин шайлоодо талапкерлер тарабынан берилген шайлоо документтерин кабыл алуу жана текшерүү боюнча жумушчу топ жөнүндө ЖОБО

1. Жалпы жоболор

2. Жумушчу топтун милдеттери жана ыйгарым укуктары

3. Жумушчу топтун курамы жана анын ишмердигинин уюштурулушу

1. Жалпы жоболор

1. Кыргыз Республикасынын Президентин шайлоодо талапкерлер тарабынан берилген шайлоо документтерин кабыл алуу жана текшерүү боюнча жумушчу топ жөнүндө жобо (мындан ары – Жобо) Кыргыз Республикасынын Президентин шайлоодо талапкерлер тарабынан берилген шайлоо документтерин кабыл алуу жана текшерүү боюнча жумушчу топтун (мындан ары – Жумушчу топ) максаттарын, милдеттерин, ыйгарым укуктарын жана иш тартибин аныктайт.

Жумушчу топ Кыргыз Республикасынын Шайлоо жана референдум өткөрүү боюнча борбордук комиссиясы (мындан ары – Борбордук шайлоо комиссиясы) тарабынан Кыргыз Республикасынын Президентин шайлоону даярдоо жана өткөрүү мезгилине түзүлөт.

2. Жумушчу топ жарандардын, талапкерлердин жана шайлоо процессинин башка катышуучуларынын шайлоо укуктарынын кепилденишин камсыз кылуу, ошондой эле талапкерлердин шайлоо документтеринин Кыргыз Республикасынын мыйзамдарынын талаптарына шайкештигин жана аныктыгын текшерүү максатында түзүлөт.

3. Жумушчу топ өз ишмердигинде Кыргыз Республикасынын Конституциясын, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө”, “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” Кыргыз Республикасынын конституциялык мыйзамдарын, башка ченемдик укуктук актыларды, ошондой эле ушул Жобону жетекчиликке алат.

2. Жумушчу топтун милдеттери жана ыйгарым укуктары

4. Шайлоо документтеринин, анын ичинде талапкерлерди каттоо үчүн шайлоо комиссиясына электрондук жана/же кагаз алып жүрүүчүдө берилген кол коюу барактарынын аныктыгын жана алардын “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын жана Борбордук шайлоо комиссиясынын башка ченемдик укуктук актыларынын талаптарына шайкештигин текшерүү Жумушчу топтун милдеттери болуп саналат.

5. Бул милдеттерди ишке ашыруу үчүн Жумушчу топ:

- бардык шайлоо документтеринин бар экендигин жана Президенттин кызмат ордуна талапкерлер жөнүндө маалыматтардын аныктыгын текшерүүнү;

- талапкердин ыйгарым укуктуу өкүлдөрүн каттоо үчүн документтерди кабыл алууну жана каттоо күбөлүктөрүн даярдоону;

- талапкерлердин ишенимдүү адамдарын каттоо үчүн документтерди кабыл алууну жана каттоо күбөлүктөрүн даярдоону;

- талапкерлердин өкүлдөрүн шайлоо комиссияларына дайындоого документтерди кабыл алууну жана каттоо күбөлүктөрүн даярдоону;

- ыйгарым укуктуу өкүлдөрдөн талапкерлерди колдогон шайлоочулардын колу коюлган кол коюу барактарын кабыл алууну;

- талапкерди колдогон колдорду чогултуу боюнча автоматташтырылган маалыматтык тутум аркылуу шайлоочулардын колдорунун аныктыгын текшерүүнү;

- кол коюу барактарында камтылган колдорду жана шайлоочулар тууралуу маалыматтарды текшерүүдө талапкерлерге бирдей шарттарды камсыз кылууну;

- кол коюу барактарын текшерүүнүн натыйжалары боюнча отчёт даярдоону;

- Борбордук шайлоо комиссиясынын жыйналыштарында талапкерлерди каттоо жөнүндө чечимдерди же каттоодон баш тартуу жөнүндө жүйөлүү чечимдерди кароо жана кабыл алуу үчүн шайлоо документтериндеги маалыматтардын аныктыгын текшерүүнүн натыйжалары боюнча корутундуларды даярдоону;

- документтерди кабыл алуудан, талапкерди каттоодон баш тартуу жөнүндө чечимдер даттанылган учурда зарыл болгон материалдарды даярдоону;

- талапкерлер же алардын ыйгарым укуктуу өкүлдөрү тарабынан берилген бардык шайлоо документтерин белгиленген тартипте жана мыйзамдарда белгиленген мөөнөттөрдө даярдоону жана Борбордук шайлоо комиссиясынын архивине өткөрүп берүүнү жүзөгө ашырат.

6. Талапкердин документтеринде талапкерди каттоо үчүн тоскоолдук болуп саналган дал келбестиктер табылган учурда Жумушчу топ документтерди алгандан кийин 48 сааттын ичинде талапкерге бул дал келбестиктер тууралуу кабарлоого милдеттүү. Талапкер кабарлама алган учурдан тартып 48 сааттын ичинде зарыл өзгөртүүлөрдү киргизүүгө жана оңдолгон документтерди берүүгө укуктуу.

7. Иштин натыйжалары боюнча Жумушчу топ корутундулардын жана башка документтердин негизинде талапкерди каттоо жөнүндө, талапкердин ыйгарым укуктуу өкүлдөрүн, ишенимдүү адамдарын каттоо жөнүндө же аларды каттоодон баш тартуу жөнүндө чечимдердин долбоорлорун даярдайт жана Борбордук шайлоо комиссиясынын кароосуна киргизет.

3. Жумушчу топтун курамы жана анын ишмердигинин уюштурулушу

8. Жумушчу топтун курамы Борбордук шайлоо комиссиясы тарабынан так эмес санда бекитилет.

Жумушчу топтун жетекчиси Борбордук шайлоо комиссиясынын мүчөлөрүнүн арасынан дайындалат. Жумушчу топтун мүчөлөрү Борбордук шайлоо комиссиясынын аппаратынын кызматкерлеринин, ошондой эле мыйзамдарда белгиленген тартипте ишке тартылган адистердин арасынан дайындалат. Жумушчу топтун курамын өзгөртүү аны түзүү тартибиндей эле тартипте жүзөгө ашырылат.

9. Жумушчу топтун ишмердигин камсыздоо жана анын милдеттерин аткаруу үчүн Борбордук шайлоо комиссиясы калкты каттоо жана документтештирүү чөйрөсүндөгү ыйгарым укуктуу мамлекеттик органдын өкүлдөрүн жана соттук-эксперттик ишмердик чөйрөсүндөгү ыйгарым укуктуу мамлекеттик органдын эксперттерин тартууга укуктуу.

10. Жумушчу топтун иши үчүн тартылуучу адистердин курамы Жумушчу топтун милдеттерине, талапкерлер тарабынан берилген шайлоо документтеринин көлөмдөрүнө, Борбордук шайлоо комиссиясынын жыйналыштарында кароо үчүн зарыл материалдарды даярдоого кеткен убакытка жараша аныкталат жана Жумушчу топтун ишмердигинин ар кандай этаптарында өзгөрүшү мүмкүн.

11. Жумушчу топтун жетекчиси Жумушчу топтун ишмердигин жетектөөнү жүзөгө ашырат, зарылчылыкка жараша аны чакырат жана топтун мүчөлөрүнө тапшырмаларды бөлүштүрөт, ошондой эле кошумча адистерди жана эксперттерди ишке тартуу маселелерин чечет.

12. Жумушчу топтун жетекчисинин оозеки жана жазуу жүзүндөгү көрсөтмөлөрү Жумушчу топтун мүчөлөрү, анын ичинде келишимдик негизде ишке тартылган адистер тарабынан аткарылууга тийиш.

13. Жумушчу топтун чечимдери Жумушчу топтун жыйналыштарында Жумушчу топтун мүчөлөрүнүн жалпы санынын көпчүлүгү тарабынан добуш берүү жолу менен кабыл алынат.

14. Жумушчу топтун бардык мүчөлөрү бирдей укуктарга ээ.

15. Жумушчу топтун жыйналышында анын ар бир мүчөсү бир добушка ээ.

16. Жумушчу топ кабыл алган чечим менен макул болбогон Жумушчу топтун мүчөсү Жумушчу топтун чечимине тиркеле турган өзгөчө пикирин жазуу жүзүндө билдирүүгө укуктуу.

17. Жумушчу топтун ишмердиги аяктаганда Жумушчу топтун бардык документтери Борбордук шайлоо комиссиясынын архивине мыйзамда белгиленген тартипте жана көрсөтүлгөн мөөнөттөрдө өткөрүлүп берилет.