Адистештирилген финансы уюмдарынын ишин жөнгө салуу Эрежелери (Кыргыз Республикасынын Улуттук банк Башкармасынын (НПА) токтомуна карата 2-тиркеме)

| | | Кыргыз Республикасынын Улуттук банк Башкармасынын 2026-жылдын 6-июлундагы № 2026-П-17/35-6-(НПА) токтомуна карата 2-тиркеме |

Адистештирилген финансы уюмдарынын ишин жөнгө салуу ЭРЕЖЕЛЕРИ

1. Жалпы жоболор

1. Кыргыз Республикасынын Улуттук банкы (мындан ары - Улуттук банк) финансы системасынын туруктуулугун сактоо жана алардын ишинин Кыргыз Республикасынын мыйзамдарынын жана ченемдик укуктук актыларынын талаптарына шайкеш келишин камсыз кылуу максатында накталай эмес чет өлкө валютасын сатып алуу жана сатуу операцияларын уюштуруу боюнча ишти жүзөгө ашыруучу адистештирилген финансы уюмдарынын (мындан ары - АФУ) ишин көзөмөлдөйт.

АФУ Кыргыз Республикасынын коммерциялык банктарынын өтүнмөлөрү боюнча накталай эмес чет өлкө валютасын сатып алуу жана сатуу боюнча операцияларды накталай эмес чет өлкө валютасына гана жүзөгө ашырууга укуктуу. АФУ Улуттук банк тарабынан чыгарылган өлчөнгөн куйма түрүндөгү баалуу металлдар менен операцияларды, эгерде мындай операциялар лицензияда көрсөтүлгөн болсо, жүзөгө ашырууга укуктуу. АФУ Кыргыз Республикасынын коммерциялык банктарынын бүтүмдүн параметрлери (көлөмү, валютасы, эсептешүү күнү, курсу) боюнча өтүнмөлөрүн кабыл алууну, салыштырууну жана алардын андан ары аткарылышын камсыз кылат. Мында АФУ:

- Кыргыз Республикасынын коммерциялык банктарынын ортосунда ортомчу (оператор) катары иш алып барат;

- бүтүмдөр боюнча эсептешүүлөрдү Кыргыз Республикасынын коммерциялык банктарында ачылган эсептешүү (күндөлүк) эсептери аркылуу жүзөгө ашырат;

- Кыргыз Республикасынын коммерциялык банктарынан алынган өтүнмөлөрдүн негизинде жана аларды аткаруу үчүн жетиштүү акча каражаттары болгондо бүтүмдөрдүн аткарылышын камсыз кылат.

Бул Эрежелер Кыргыз Республикасынын Улуттук банкынын лицензиясынын негизинде иш алып барган жана айрым банктык операцияларды жүзөгө ашырууга укуктуу микрофинансылык уюмдарга, кредиттик союздарга, «Кредиттик союздардын каржы компаниясы» ААКка, алмашуу бюролоруна таркатылбайт.

2. Улуттук банк АФУну туруктуу өнүктүрүү жана анын финансы системасынын туруктуулугун сактоо максатында, АФУ милдеттүү түрдө аткарууга тийиш болгон экономикалык ченемдерди, талаптарды жана чектөөлөрдү белгилейт. Улуттук банктын алдыга койгон максаттарын жана милдеттерин аткарууга жетишүү үчүн Улуттук банк Башкармасы өзүнчө токтом кабыл алуу менен ушул Эрежелерде белгиленген экономикалык ченемдердин жана талаптардын маанисин чектелген мөөнөткө өзгөртүшү мүмкүн.

3. Улуттук банк Кыргыз Республикасынын мыйзамдарына жана ушул Эрежелерге ылайык, АФУга карата эскертүү чараларын жана санкцияларды колдонууга укуктуу.

4. АФУ, ушул Эрежелерде жана Улуттук банктын ченемдик укуктук актыларында белгиленген экономикалык ченемдердин жана талаптардын маанилерин бузууга жол бербестен, тобокелдиктерди кошумча басаңдатуу максатында экономикалык ченемдер жана талаптар боюнча кыйла жогорулатылган талаптарды белгилеши мүмкүн.

2. АФУ милдеттүү түрдө аткарууга тийиш болгон экономикалык ченемдер, талаптар жана чектөөлөр

5. АФУ, алар үчүн Улуттук банк тарабынан белгиленген экономикалык ченемдерди, талаптарды жана чектөөлөрдү так сактоого тийиш.

6. АФУ өздүк капиталынын минималдуу ченеминин өлчөмү минималдуу уставдык капиталдын кеминде 100% деңгээлинде колдоого алынууга тийиш.

7. АФУ өздүк капиталынын минималдуу ченеминин өлчөмү төмөнкү формула боюнча аныкталат:

Н1 = (СК / УК) * 100%, мында: СК - баа берүү күнүнө карата АФУ өздүк капиталы; УК – АФУ үчүн Улуттук банк тарабынан белгиленген минималдуу уставдык капитал.

8. АФУ өздүк капитал эсебин (баа берүү күнүнө карата) төмөнкү көрсөткүчтөрдүн негизинде жүргүзүүгө тийиш:

- төлөнгөн уставдык капиталдын (жөнөкөй жана артыкчылык берилген акциялар);

- номиналдан үстөк салынган капиталдын;

- жеке адамдар жана юридикалык жактар тарабынан салынган кошумча капиталдын;

- өткөн жылдардын бөлүштүрүлбөгөн пайда/чыгымынын;

- өтүп жаткан жыл ичиндеги чыгымынын.

9. Н2 ликвиддүүлүк ченеминин (көрсөткүчү) маанисин кеминде 100% деңгээлинде колдоого алуу зарыл.

10. Ликвиддүүлүк ченеми (көрсөткүчү) төмөнкү формула боюнча аныкталат:

Н2 = (ЛА / ОБ) * 100%, мында: ЛА - ликвиддүү активдер, ага улуттук жана чет өлкө валютасындагы нак акча каражаттары (касса), ошол эле валюталарда АФУ эсептешүү (күндөлүк) эсептериндеги каражаттар жана банктардагы депозиттер, ошондой эле репо-келишими боюнча сатылып алынган жогорку ликвиддүү баалуу кагаздарды кошо алганда, Кыргыз Республикасынын Министрлер Кабинети менен Улуттук банк тарабынан чыгарылган мамлекеттик казына векселдери жана башка жогорку ликвиддүү баалуу кагаздар (мындан ары - жогорку ликвиддүү баалуу кагаздар) кирет. Аталган баалуу кагаздар ликвиддүүлүк ченемин (көрсөткүчүн) эсептөөдө сыйлыкты (дисконтту) жана реализацияланбаган пайданы (чыгымды) минуска чыгаруу менен эске алынат; ОБ – АФУ милдеттенмелери, аларга банктар алдындагы милдеттенмелер, акционерлерге төлөөнүүгө тийиш болгон дивиденддер, чет өлкө валютасын алмаштыруу боюнча кардарлар алдында милдеттенмелер, бюджетке которулууга тийиш болгон салыктар боюнча милдеттенмелерден тышкары башка милдеттенмелер кирет.

11. АФУ улуттук банк тарабынан берилген лицензиянын негизинде иш жүргүзгөн коммерциялык банктарда чет өлкө валютасында эсептешүү (күндөлүк) эсептерин ачат.

12. АФУ коммерциялык банктарда каражат жайгаштырууга ички лимиттерди, анын ичинде тобокелдиктердин топтолушун, банктардын финансылык туруктуулугун жана операциялык ишенимдүүлүгүн эске алуу менен бир банкка лимит белгилөөсү зарыл.

Мында АФУ бир коммерциялык банкта жайгаштырылган каражаттарынын өлчөмү АФУ эсептешүү жана депозиттик эсептеринде турган каражаттардын жалпы көлөмүнүн 20% ашпоого тийиш. АФУ коммерциялык банктарда каражаттарды жайгаштырууну диверсификациялоону камсыз кылууга жана бүтүмдөр боюнча милдеттенмелерди өз убагында аткарууга таасир эте турган каражаттардын топтолушуна жол бербөөгө милдеттүү. Каражаттарды жайгаштыруу АФУ ички саясатында белгиленген ишенимдүүлүк жана финансылык туруктуулук критерийлерине ылайык келген коммерциялык банктарда гана жүзөгө ашырылат.

13. Чет өлкө валютасын накталай эмес формада сатып алуу жана сатуу боюнча бүтүмдөр Кыргыз Республикасынын коммерциялык банктарынын эсептешүү көлөмү, валютасы, курсу жана күнү боюнча дал келген толук камсыздалган утурлама өтүнмөлөрү болгондо гана түзүлөт.

АФУ тиешелүү утурлама өтүнмөлөр жок болгон учурда же аларды аткаруу үчүн акча каражаттары жетишсиз болгон учурда бүтүмдөрдү түзүүгө укугу жок. АФУ уюштурган бүтүмдөр боюнча эсептешүүлөр бүтүм түзүлгөн күнү тараптардын милдеттенмелерин бир эле учурда аткаруу менен жүзөгө ашырылат. Бүтүмдөр боюнча милдеттенмелерди аткаруу АФУ эсептеринде тиешелүү өтүнмөлөр боюнча эсептешүүлөрдү жүргүзүү үчүн каралган жетиштүү акча каражаттары болгон шартта жүзөгө ашырылат. АФУ банктардын өтүнмөлөрүн аткаруунун алкагында алынган акча каражаттарын тиешелүү бүтүмдөр боюнча эсептешүүлөрдү жүргүзүү үчүн гана пайдаланууга укугу жок.

14. Ушул Эрежелердин 15-пунктунда каралган бүтүмдөр боюнча милдеттенмелер аткарылбай калган учурда, бүтүмдүн тарабы милдеттенмени бузган контрагенттен Кыргыз Республикасынын мыйзамдарында же АФУ менен банктын ортосундагы эки тараптуу келишимдерде пайыздардын башка, жогору өлчөмү каралбаса, мөөнөтү өткөн төлөмдүн суммасынан Кыргыз Республикасынын Улуттук банкынын эки эселенген эсептик ченеминин өлчөмүндөгү пайыздарды мөөнөтү өткөн ар бир күн үчүн төлөп берүүнү талап кылууга укукту

15. АФУда тобокелдиктерди башкаруу саясаты иштелип чыгууга жана АФУ аткаруу органы тарабынан жактырылууга тийиш (акционердик коом формасындагы (мындан ары - АК) АФУ үчүн Башкарма жана жоопкерчилиги чектелген коом формасындагы (мындан ары - ЖЧК) АФУ үчүн ыйгарым укуктуу аткаруу органы/адам, мындан ары – аткаруу органы), ал кийин АФУ ыйгарым укуктуу башкаруу органы (акционердик коом формасындагы АФУ үчүн директорлор кеңеши жана жоопкерчилиги чектелген коом формасындагы АФУ үчүн ыйгарым укуктуу башкаруу органы/адам, мындан ары – ыйгарым укуктуу башкаруу органы) тарабынан бекитилет.

16. АФУнун ыйгарым укуктуу башкаруу органы мезгил-мезгили менен саясаттын шайкештигине баа берип турат жана зарыл болгон учурда өзгөртүүлөрдү жана толуктоолорду киргизет, алар да аткаруу органы тарабынан алдын ала жактырылууга тийиш.

17. АФУда накталай эмес формада чет өлкө валютасын сатып алуу-сатуу боюнча операцияларды жүргүзүү эрежелери иштелип чыгып, АФУ аткаруу органы тарабынан бекитилүүгө тийиш, анын ичинде:

- өтүнмөлөрдү кабыл алуу тартиби;

- эсептешүүлөрдү жүргүзүү жана сатып алуу-сатуу боюнча операцияларды жүргүзүү тартиби;

- операциялардын көлөмүнө жана тобокелдиктердин концентрациясына ички лимиттерди, анын ичинде ушул Эрежелерде белгиленген чектөөлөрдү эске алуу менен бир банкка лимиттерди белгилөө;

- тобокелдиктерди башкаруу боюнча чаралар;

- жетиштүү каражаттар жок болгон учурда бүтүмдөрдү түзүүгө жол бербөөнү камсыз кылуучу механизм;

- бүтүмдөр жөнүндө маалыматты сактоо тартиби;

- талаш маселелерди жөнгө салуу жол-жоболору;

- операцияларды жүргүзүү жана ушул Эрежелердин талаптарын сактоо үчүн зарыл болгон башка ченемдер.

18. АФУ тарабынан ишке ашырылган операциялар боюнча Улуттук банк төмөнкүлөрдүн максималдуу өлчөмүн белгилөөгө укуктуу:

- чет өлкө валютасын сатып алуу-сатуу операциялары боюнча комиссиялык сый акынын (тарифтердин);

- финансылык туруктуулукту сактоо максатында чет өлкө валютасын сатып алуу жана сатуу курстарынын ортосундагы айырмадан.

19. АФУ төмөнкүлөргө укугу жок:

- юридикалык жана жеке жактарга кредиттерди жана зайымдарды берүүгө;

- чет өлкө валютасын сатып алуу-сатуу бүтүмдөрү боюнча эсептешүүлөрдү жүргүзүүдө пайдалануу максатында гана акционерлерден зайымдарды эске албаганда, юридикалык жана жеке жактардан каражаттарды карызга алууга.

3. Мезгил-мезгили менен берилүүчү жана башка отчётторду берүү тартиби жана мөөнөттөрү

20. АФУда автоматташтырылган эсепке алуу жана отчет берүү системалары болууга, алар Кыргыз Республикасынын Улуттук банк Башкармасынын 2021-жылдын 22-декабрындагы № 2021-П-20/72-8-(НПА) токтому менен бекитилген "Кыргыз Республикасынын коммерциялык банктарында маалымат коопсуздугун камсыз кылуу боюнча талаптар жөнүндө" жобонун талаптарына ылайык келүүгө тийиш. АФУ Улуттук банкка отчетту электрондук түрдө сунуштоо үчүн интернеттен пайдалануу мүмкүнчүлүгүнө ээ болуусу зарыл.

21. АФУ Улуттук банкка ушул Эрежелердин 1-7-тиркемелерине ылайык формада, тартипте жана мөөнөттө ишенимдүү мезгил-мезгили менен берилүүчү регулятивдик отчетту, ошондой эле Улуттук банктын жазуу жүзүндөгү суроо-талабына ылайык башка кошумча маалыматты берип турууга тийиш.

22. АФУ отчёттук жумуш күнүнөн кийинки жумуш күнү саат 11:00дөн кечиктирбестен, күн сайын Улуттук банкка накталай эмес чет өлкө валютасын сатып алуу-сатуу операциялары жөнүндө отчетту ушул Эрежелердин 6-тиркемесинде көрсөтүлгөн формага ылайык, электрондук форматта берип турууга тийиш. Отчетто операциялардын көлөмү, бүтүмдөр боюнча валюта курстары жана контрагенттер жөнүндө маалыматтар камтылууга тийиш.

АФУ накталай эмес чет өлкө валютасын сатып алуу жана сатуу боюнча жалпыланган отчетту ушул Эрежелердин 6-тиркемесинде көрсөтүлгөн формага ылайык, электрондук түрдө Улуттук банкка берүүгө милдеттүү. Мында АФУ бул отчетторду басып чыгарууга, жооптуу кызматкердин мөөрү менен күбөлөндүрүүгө, АФУнун штампы менен бекитүүгө, хронологиялык тартипте көктөөгө жана АФУда сакталышын камсыз кылууга тийиш.

23. АФУ мезгил-мезгил менен берилүүчү регулятивдик отчетту, анын ичинде накталай эмес чет өлкө валютасын сатып алуу жана сатуу боюнча отчетторду бербеген учурда, АФУ Улуттук банкка анын берилбешинин себептери жөнүндө кийинки отчеттук жумуш күнүнөн кечиктирбестен жазуу жүзүндө билдирет. Отчеттордо системалуу түрдө так эмес маалыматтардын берилишинде жана белгиленген мөөнөттөрдүн бузулушунда АФУга карата Улуттук банктын ченемдик укуктук актыларында жана Кыргыз Республикасынын мыйзамдарында каралган таасир этүү чаралары колдонулушу мүмкүн.

24. Көрсөтүлгөн отчётту Улуттук банкка өз убагында жана ишенимдүү берүү жоопкерчилиги АФУнун аткаруу органынын жетекчисине жүктөлөт.

25. АФУнун финансылык отчету Улуттук банкка АФУнун финансылык отчетун түзүү, жарыялоо жана Улуттук банкка берүү боюнча Улуттук банктын талаптарына ылайык сунушталат.

4. АФУга карата колдонулуучу таасир этүү чаралары

26. АФУ орун алган тобокелдиктерди өз убагында аныктоо жана алардын талаптагыдай тескөөгө алынышы үчүн жоопкерчиликтүү болот.

27. Улуттук банк тышкы (аралыктан) көзөмөл жана инспектордук текшерүүлөрдү жүргүзүү аркылуу, анын ичинде текшерүүнүн негизи болуп саналган документти көрсөтүү менен алдын ала маалымдабастан, АФУнун ишине көзөмөл жүргүзүүгө укуктуу. Инспектордук текшерүүлөр Кыргыз Республикасынын Улуттук банк Башкармасынын 2022-жылдын 17-августундагы № 2022-П-33/52-2-(БФКУ) токтому менен бекитилген Банк эмес финансы-кредит уюмдарынын жана Кыргыз Республикасынын Улуттук банкынын көзөмөлдүгүнө алынган башка юридикалык жактардын ишине инспектордук текшерүү жүргүзүү жөнүндө нускоонун талаптарына ылайык жүргүзүлөт.

28. Улуттук банк АФУнун ишинде бузуулар жана кемчиликтер аныкталган учурда, Кыргыз Республикасынын Улуттук банк Башкармасынын 2020-жылдын 23-декабрындагы № 2020-П-33/73-12-(БФКУ) токтому менен бекитилген Банк эмес финансы-кредит уюмдарына жана Кыргыз Республикасынын Улуттук банкынын көзөмөлдүгүнө алынган башка юридикалык жактарга карата колдонулуучу таасир этүү чаралары жөнүндө жобого ылайык таасир этүү чараларын колдонууга укуктуу.

29. Ага карата таасир этүү чараларын колдонуу жөнүндө чечим кабыл алынган АФУ, Кыргыз Республикасынын Улуттук банк Башкармасынын 2017-жылдын 17-майындагы № 19/13 токтому менен бекитилген «Кыргыз Республикасынын Улуттук банкы менен коммерциялык банктардын, банктык операциялардын айрым түрлөрүн жүзөгө ашыруучу уюмдардын жана алардын уюштуруучуларынын (катышуучуларынын), юридикалык жактардын жана жеке адамдардын ортосундагы пикир келишпестиктерди сотко чейин жөнгө салуу жөнүндө» жобого ылайык бул чечимге даттанууга укуктуу.

30. АФУну жоюу боюнча милдеттер АФУнун уставында жоюуга ыйгарым укуктуу башкаруу органына жүктөлөт.

| | | Адистештирилген финансы уюмдарынын ишин жөнгө салуу эрежелерине карата 1-тиркеме |

Адистештирилген финансы уюмдарынын Мезгил-мезгили менен берилүүчү регулятивдик отчётунун КУРАМЫ

МЕЗГИЛ-МЕЗГИЛИ МЕНЕН БЕРИЛҮҮЧҮ РЕГУЛЯТИВДИК ОТЧЁТ

Мезгилдүүлүгү: - ай сайын; - жыл сайын; - корректировкалоо.

Отчёт берип жаткан уюм: ___________________________________________________ ___________________________________________________________________ (АФУнун аталышын ири басма тамгалары менен берүү зарыл) АФУнун тышкы аудитору ____________________

(№ жана түзүлгөн күнүнө шилтеме) КОЛ ТАМГА ЖАНА КҮБӨЛӨНДҮРҮҮ Биз, төмөндө кол койгондор, бул отчет жана анын тиркемелери Кыргыз Республикасынын Улуттук банкынын талаптарына ылайык даярдалгандыгын тастыктайбыз. Ошондой эле, биз бул отчетту текшергенибизди жана ал АФУнун ушул отчеттук күнгө карата талапка ылайык абалын жана маалыматтарды камтыгандыгын тастыктайбыз.

Эскертүүлөр:

1. Титулдук баракта төмөнкүлөр көрсөтүлүүгө тийиш:

- катталган күнү жана чыгыш номери;

- отчет даярдалган дата (мисалы, 2015-жылдын 20-ноябрына карата абал боюнча);

- отчет даярдалып бүткөн күн;

- мезгилдүүлүгү - "айлык", "жылдык" же "корректировкалоо". Эгерде, техникалык мүнөздөгү каталар болсо, отчетту корректировкалоого жол берилет. Бул учурда өзгөртүүлөр киргизилген отчеттун формалары гана сунушталып, киргизилген өзгөртүүлөр маркер менен белгиленип көрсөтүлөт;

- жүргүзүлгөн аудиттин же текшерүүнүн түрү - төмөнкү саптардын бири же экөө көрсөтүлөт:

а) ички текшерүү - эгерде текшерүү ички аудит тарабынан жүргүзүлгөн болсо;

б) корутундусуз аудит - аудит жүргүзүлүп, келечектеги иш пландарга сунуш-көрсөтмөлөрдү бербестен, операциялар жана бухгалтердик эсепке алуу туура жүргүзүлгөндүгү жөнүндө корутунду берүү менен чектелсе;

в) корутунду берүү менен ишке ашырылган аудит - аудит жүргүзүлүп, операциялардын жана бухгалтердик эсепке алуунун туура жүргүзүлгөндүгүн текшерүүдөн тышкары, АФУга анын ишин жакшыртуу жана/же өркүндөтүү үчүн сунуш-көрсөтмөлөр жана иш-чаралар планы сунушталса;

- отчет берүүчү АФУнун басма тамгалар менен көрсөтүлгөн аталышы;

- тышкы аудитор - жылдык отчётту берүүдө толтурулат;

- ыйгарым укуктуу башкаруу органынын жетекчисинин (эгерде бар болсо), аткаруу органынын жетекчисинин, башкы бухгалтердин жана отчетту түзүүгө жана берүүгө жооптуу адамдын тастыктоочу кол тамгалары;

- АФУнун мезгил-мезгили менен берилүүчү регулятивдик отчётунун түзүлүшү, сунушталышы үчүн жооп берген кызматкеринин кызмат ордун, аты-жөнүн жана телефон номерин көрсөтүү менен анын кол тамгасы.

АФУНУН ДИРЕКТОРЛОР КЕҢЕШИНИН МҮЧӨЛӨРҮ ЖӨНҮНДӨ МААЛЫМАТ

АФУНУН АТКАРУУ ОРГАНЫНЫН МҮЧӨЛӨРҮ ЖӨНҮНДӨ МААЛЫМАТ

Эскертүүлөр:

1. АФУнун ыйгарым укуктуу башкаруу органынын мүчөлөрү жөнүндө маалыматтар, төмөнкү маалыматтарды камтууга тийиш:

- аты-жөнү;

- иштеген жери;

- кызматы;

- жумуш телефонунун номери;

- кол тамгасынын үлгүсү.

2. АФУнун аткаруу органынын мүчөлөрү жөнүндө маалыматтар төмөнкү маалыматтарды камтууга тийиш:

- аты-жөнү;

- иштеген жери;

- кызматы;

- жумуш телефонунун номери;

- кол тамгасынын үлгүсү.

АФУНУН АЙРЫМ КЫЗМАТ АДАМДАРЫ ЖӨНҮНДӨ МААЛЫМАТ

Эскертүүлөр:

1. АФУнун айрым кызмат адамдары жөнүндө маалыматтар АФУнун төмөнкү айрым кызмат адамдарынын тизмесин камтыйт:

1) башкы бухгалтер;

2) АФУдагы ликвиддүүлүктү тескөө боюнча жооптуу кызмат адамы;

3) АФУ тарабынан жүзөгө ашырылган, накталай жана накталай эмес чет өлкө валютасын сатып алуу жана сатуу боюнча операцияларга жооптуу кызмат адамы.

2. Ар бир кызмат адамы боюнча төмөнкү маалыматтар камтылууга тийиш:

- аты-жөнү;

- кызматы;

- жумуш телефонунун номери;

- кол тамгасынын үлгүсү.

3. АФУнун айрым кызмат адамдарына алардын белгилүү бир иш багыттары боюнча ыйгарылган жоопкерчиликтер АФУнун уставына ылайык ыйгарым укуктуу башкаруу органынын (директорлор кеңеши, Башкарма) чечимдери менен таризделүүгө тийиш.

АФУ БОЮНЧА БАЗАЛЫК МААЛЫМАТ

Эскертүүлөр:

1. АФУ жөнүндө базалык маалымат төмөнкү маалыматтарды камтууга тийиш:

- отчет берүүчү АФУнун толук аталышы - АФУнун толук расмий аталышы;

- дареги;

а) шаары - АФУнун башкы кеңсеси жайгашкан шаардын аталышы;

б) көчөсү, үй номери - көчөнүн аталышы жана башкы кеңсенин имаратынын номери;

в) почта индекси - почта бөлүмүнүн индекси;

- расмий жарыяланган байланыш:

а) телефон - АФУнун расмий телефон номери;

б) факс - АФУнун расмий факс номери;

в) электрондук почта - электрондук почтанын расмий дареги;

- АФУнун Интернеттеги веб-сайты - АФУнун Интернеттеги расмий веб-сайты;

- уставдык (акционердик) капиталынын суммасы:

а) жарыяланган - АФУнун жарыяланган уставдык капиталынын суммасы;

б) айкын төлөнгөн – АФУнун айкын төлөнгөн уставдык капиталынын суммасы.

1.А бөлүгү. Баланстык отчет

(миң сом)

Эскертүүлөр:

1. "Активдер" деген А. бөлүкчөсүндө төмөнкү маалымат чагылдырылат.

"Акча каражаттары" деп аталган 1-статьяда жүгүртүү кассасындагы банкнотторду жана монеталарды, жолдогу банкнотторду жана монеталарды, банкоматтардагы банкнотторду жана монеталарды кошо алганда, акча каражаттарынын суммасы валюталардын түрлөрү боюнча чагылдырылат: сом жана чет өлкө валюталары. "Башка банктардагы эсептешүү эсептери" деп аталган 2-статьяда банктардагы эсептешүү эсептериндеги акча каражаттардын суммасы чагылдырылат, мында маалыматтар ар бир банк боюнча ачык көрсөтүлүүгө тийиш. Калдыктар валюталар боюнча: сом жана чет өлкө валютасы түрүндө көрсөтүлөт. "Банктардагы депозиттер" деп аталган 3-статьяда банктарда жана башка финансы-кредит уюмдарында күрөөгө коюлган депозиттердеги акча каражаттарын кошо алганда, депозиттердеги акча каражаттардын суммасы чагылдырылат. "Баалуу кагаздары" деп аталган 4-статьяда адистештирилген финансы уюмуна таандык баалуу кагаздардын баланстык наркы көрсөтүлөт: тооруктук баалуу кагаздар, сатууга жарактуу баалуу кагаздар жана төлөөгө чейин кармалып туруучу баалуу кагаздар портфели. "Негизги каражаттар" деп аталган 5-статьяда адистештирилген финансы уюмунун ээлигинде турган же адистештирилген финансы уюму пайдаланып жаткан жердин жана/же жер үлүшүнүн, имараттардын жана башка курулмалардын наркы, эмерек жана жабдуулар, анын ичинде автоунаа, ошондой эле, курулушка байланыштуу материалдардын, иштердин жана башка капиталдаштырылган чыгашалардын баасы, ижарага алынган менчикти ыңгайлаштырууга карата капиталдык салымдар камтылат. Материалдык эмес активдер бул статьяга кошулбайт. Негизги каражаттарды жер жана имараттар; курулуп бүтө элек имараттар жана башка негизги каражаттар сыяктуу топтор боюнча көрсөтүү зарыл. "Баалуу металлдар" деп аталган 6-статьяда адистештирилген финансы уюмундагы Улуттук банк тарабынан эмиссияланган өлчөнгөн куймалар түрүндө баалуу металлдардын наркы көрсөтүлөт. "Башка активдер" деп аталган 7-статьяда жогоруда көрсөтүлбөгөн активдердин баланстык наркы чагылдырылат. "Бардыгы болуп активдер" деп аталган 8-статьяда 1-7-статьялардын суммасы көрсөтүлөт.

2. "Милдеттенмелер" деген Б. бөлүкчөсүндө төмөнкү маалымат чагылдырылат.

"Банктар алдында милдеттенмелер" деп аталган 9-статьяда банктар алдында милдеттенмелердин суммасы чагылдырылат. "Төлөөгө каралган салыктар" деп аталган 10-статьяда бюджетке чегерилүүгө тийиш болгон адистештирилген финансы уюмунун милдеттенмелеринин суммасы көрсөтүлөт. "Төлөөгө каралган дивиденддер" деп аталган 11-статьяда акционерлерге төлөнүүгө тийиш болгон акча каражаттардын суммасы көрсөтүлөт. "Башка милдеттенмелер" деп аталган 12-статьяда жогоруда көрсөтүлбөгөн башка милдеттенмелер чагылдырылат. "Бардыгы болуп милдеттенмелер" деп аталган 14-статьяда 9-13-статьялардын суммасы көрсөтүлөт.

3. "Капитал" деген В. бөлүкчөсүндө төмөнкү маалымат чагылдырылат.

"Акционердик капитал" деп аталган 15-статьяда адистештирилген финансы уюмунун акционердик капиталынын мааниси көрсөтүлөт:

а) жөнөкөй акциялар - адистештирилген финансы уюмунун жөнөкөй акцияларынын жалпы суммасы көрсөтүлөт;

б) артыкчылык берилген акциялар - адистештирилген финансы уюмунун артыкчылык берилген акцияларынын жалпы суммасы көрсөтүлөт;

в) акционерлер тарабынан салынган кошумча капиталды кошо алганда, номиналдан үстөк салынган капитал - акционерлер тарабынан акциялардын номиналдык наркынан үстөк салынган акча каражаттарынын суммасы, ошондой эле Улуттук банктын капиталынын (өздүк каражаттарынын) минималдуу өлчөмү боюнча талаптарын аткаруу үчүн уюштуруучулар/акционерлер тарабынан салынган кошумча капитал көрсөтүлөт;

г) бөлүштүрүлбөгөн пайда - адистештирилген финансы уюмунун бөлүштүрүлбөгөн пайдасынын суммасы чагылдырылат;

г1) өткөн жылдардын пайдасы - каражаттардын бөлүгү акционерлерге бөлүштүрүлгөндөн кийин жана адистештирилген финансы уюмунун келечектеги керектөөлөрү үчүн резервге которулгандан кийин адистештирилген финансы уюмунда калган өткөн жылдарда түшкөн пайда чагылдырылат; г2) өтүп жаткан жылдын пайдасы - ушул жылда алынган пайда чагылдырылат; г3) адистештирилген финансы уюмунун келечектеги керектөөлөрү үчүн резервдер - адистештирилген финансы уюмунда келечекте жагдайлар үчүн пайдаларды бөлүштүрүүнүн эсебинен түзүлүүчү резервдердин суммасы көрсөтүлөт. "Жалпы камдар" деп аталган 16-статьяда адистештирилген финансы уюмунун активдерин кайра баалоонун эсебинен түзүлгөн адистештирилген финансы уюмундагы резервдердин өлчөмү чагылдырылат:

а) негизги каражаттарды кайра баалоо боюнча резерв - негизги каражаттарды кайра баалоо суммасы көрсөтүлөт;

б) сатууга жарактуу жана төлөөгө чейин кармалып туруучу баалуу кагаздарды кайра баалоо боюнча резерв - сатууга жарактуу жана төлөөгө чейин кармалып туруучу баалуу кагаздарды кайра баалоодон келип чыккан сатып өткөрүлбөгөн кирешелердин жана чыгымдардын суммасы берилет;

в) башка жалпы резервдер - башка жалпы резервдердин суммасы чагылдырылат. Бул статьяда инвестициялар боюнча тобокелдиктердин ордун жабууга каралган резерв боюнча маалыматтар да чагылдырылат.

"Бардыгы болуп капитал" деп аталган 17-статьяда 15 жана 16-статьялардын суммасы көрсөтүлөт. "Бардыгы болуп милдеттенмелер жана капитал" деп аталган 18-статьяда 14 жана 17-статьялардын суммасы көрсөтүлөт.

2-бөлүк. Пайда жана чыгым жөнүндө отчет (миң сом)

Эскертүүлөр:

1. "Пайыздык кирешелер" деген А. бөлүкчөсүндө төмөнкү маалыматтар чагылдырылат.

"Банктардагы депозиттер боюнча пайыздык кирешелер" деп аталган 1-статьяда адистештирилген финансы уюмунун банктардагы жана финансы-кредит уюмдардагы депозиттерден пайыздык кирешелери көрсөтүлөт. "Баалуу кагаздар боюнча пайыздык кирешелер" деп аталган 2-статьяда адистештирилген финансы уюмунун баалуу кагаздар боюнча пайыздык кирешелери көрсөтүлөт. "Башка пайыздык кирешелер" деп аталган 3-статьяда жогоруда көрсөтүлбөгөн пайыздык же ушул сыяктуу башка кирешелер чагылдырылат. "Бардыгы болуп пайыздык кирешелер" деп аталган 4-статьяда 1-3-статьялардын суммасы көрсөтүлөт.

2. "Пайыздык чыгашалар" деген Б. бөлүкчөсүндө төмөнкү маалыматтар чагылдырылат.

"Башка пайыздык эмес чыгашалар" деп аталган 5-статьяда адистештирилген финансы уюмунун пайыздык же ушул сыяктуу башка чыгашалары көрсөтүлөт. "Бардыгы болуп пайыздык кирешелер" деп аталган 6-статьяда 5-статьянын суммасы чагылдырылат.

3. "Пайыздык эмес кирешелер" деген В. бөлүкчөсүндө төмөнкү маалыматтар чагылдырылат.

"Чет өлкө валютасы менен операциялардан түшкөн киреше" деп аталган 7-статьяда адистештирилген финансы уюмунун чет өлкө валютасы менен операциялардан кирешелери көрсөтүлөт. "Башка пайыздык эмес кирешелер" деп аталган 8-статьяда жогоруда көрсөтүлбөгөн пайыздык эмес кирешелер көрсөтүлөт. "Бардыгы болуп пайыздык кирешелер" деп аталган 9-статьяда 7 жана 8-статьялардын суммасы көрсөтүлөт.

4. "Пайыздык эмес чыгашалар" деген Г. бөлүкчөсүндө төмөнкү маалыматтар чагылдырылат.

Бул бөлүкчөдө бухгалтердик баланстын тиешелүү эсептериндеги дебеттик калдыктар көрсөтүлөт. "Чет өлкө валюталары менен операциялардан чыгымдар" деп аталган 10-статьяда адистештирилген финансы уюмунун чет өлкө валютасы менен операциялардан чыгашалары көрсөтүлөт. "Башка пайыздык эмес чыгашалар" деп аталган 11-статьяда жогоруда көрсөтүлбөгөн пайыздык эмес чыгашалары көрсөтүлөт. "Бардыгы болуп пайыздык эмес чыгашалар" деп аталган 12-статьяда 10 жана 11- статьялардын суммасы көрсөтүлөт.

5. "Башка операциялык жана административдик чыгашалар" деген Д. бөлүкчөсүндө төмөнкү маалыматтар чагылдырылат.

"Персоналга кеткен чыгашалар" деп аталган 13-статьяда АФУнун кызматкерлерине эмгек акы, сый акылар жана башка ушул сыяктуу төлөмдөргө байланыштуу чыгашалар көрсөтүлөт (14-статьяда көрсөтүлгөн ыйгарым укуктуу башкаруу органынын мүчөлөрүнө төлөмдөрдөн тышкары):

а) эмгек акы жана сый акылар;

б) башка компенсациялар (башка төлөөлөр);

в) Социалдык фондго төлөмдөр.

"Ыйгарым укуктуу башкаруу органынын мүчөлөрүнө төлөнүүчү сый акылар " деп аталган 14- статьяда АФУнун ыйгарым укуктуу башкаруу органынын (эгерде болсо) жана аткаруу органынын мүчөлөрүнө төлөнүүчү төлөмдөр жана жана сый акылар көрсөтүлөт. "Менчиктен салыкты кошо алганда, негизги каражаттарга башка чыгашалар" деп аталган 15-статьяда амортизацияга чегерүүлөрдү жана менчикке салыктар боюнча чыгашаларды кошо алганда, адистештирилген финансы уюмунун имаратына жана курулмаларына, эмеректерине, транспортуна, жабдууларына, компьютерлерине, программалык камсыздоолоруна жана материалдык эмес активдерине кеткен чыгашалар көрсөтүлөт:

а) ижара төлөмү;

б) коммуналдык кызмат көрсөтүүлөр жана менчиктен салык;

в) амортизацияга чыгашалар.

"Салыктар жана камсыздандыруу" деп аталган 16-статьяда пайда салыгын жана менчиктен салыкты эске албаганда, камсыздандырууга, салыктарга байланыштуу чыгашалар көрсөтүлөт. "Башка операциялык жана административдик чыгашалар" деп аталган 17-статьяда күтүлбөгөн кирешелерди жана чыгашаларды кошо алганда, жогоруда көрсөтүлбөгөн бардык операциялык жана административдик чыгашалар көрсөтүлөт. "Бардыгы болуп операциялык жана административдик чыгашалар" деп аталган 18- статьяда 7-11-статьялардын суммасы чагылдырылат. "Таза операциялык киреше (чыгым)" деп аталган 19-статьяда адистештирилген финансы уюмунун таза операциялык кирешеси (чыгымы) (9-статьянын суммасы менен 12- жана 18-статьялардын суммалары ортосунда айырма) көрсөтүлөт. "Пайда салыгы" деп аталган 20-статьяда адистештирилген финансы уюмунун пайда салыгы боюнча чыгашалары көрсөтүлөт. "Таза пайда (чыгым)" деп аталган 21-статьяда адистештирилген финансы уюмунун таза пайдасы (чыгымы) - 19-статья минус 20-статья көрсөтүлөт.

3-БӨЛҮК. А. КАПИТАЛ ТҮЗҮМҮ (миң сом)

Б. Адистештирилген финансы уюмунун акциялары жөнүндө маалыматтар

(миң сом)

4-бөлүк. Бөлүштүрүлбөгөн пайдадагы өзгөрүүлөр (миң сом)

Эскертүүлөр:

1. "Капитал түзүмү" 3.А. бөлүгүндө төмөнкү маалыматтар чагылдырылат.

Капитал өзүндө жөнөкөй жана артыкчылык берилген акцияларды, бөлүштүрүлбөгөн пайданы жана капиталдык резервдерди камтыйт. Бул отчетто чогуу алгандагы капиталдын суммасы баланстык отчеттун 14-статьясында көрсөтүлгөн чогуу алгандагы капиталдын суммасына барабар болууга тийиш. Бул таблицадагы 1-, 3- жана 7-саптардан тышкары, бардык суммалар жыл башынан бери таза суммардык өзгөрүүлөр катары көрсөтүлүүгө тийиш. Бул бөлүктө суммалар оң жана терс мааниде болушу мүмкүн. Бардык суммалар миң сом менен берилет. "Жыйынтыгында, өткөн календардык жыл үчүн отчетто көрсөтүлгөн капитал" деп аталган 1-статьяда корректировкалоолор киргизилгенге чейинки жыл башындагы баланстык отчетто алгач көрсөтүлгөн капиталдын суммасы чагылдырылат. Өз ишин жылдын 1-январынан тартып же кийинчерээк баштаган адистештирилген финансы уюмдары үчүн бул статьяда нөлдүк белги көрсөтүлөт, ал эми баштапкы капитал 2-статьяда көрсөтүлөт. "Өткөн жыл үчүн отчетто көрсөтүлбөгөн капитал эсептерин корректировкалоо" деп аталган 2-статьяда жыл башындагы маалыматтарга өзгөртүүлөрдүн киргизилишине алып келген капитал эсептериндеги калдыктарга киргизилген бардык өзгөртүүлөрдүн суммалары чагылдырылат. Бул сапта, эгерде эч кандай өзгөрүү болбогон болсо, нөл көрсөтүлүүгө тийиш. "Корректировкаларды эске алуу менен өткөн жылдын акырына карата капитал" деп аталган 3-статьяда 1- жана 2-статьялардын суммасы берилет. Эгерде эч кандай корректировкалоолор болбосо, анда 3-статьянын мааниси 1-статьянын маанисине барабар болууга тийиш. "Жыл башынан тартып пайда (чыгым)" деп аталган 4-статьяда жыл башынан бери таза пайда (чыгым) көрсөтүлөт. Бул статьянын мааниси алынган пайда жана тарткан чыгымдар жөнүндө отчетто көрсөтүлгөн пайдаларга (чыгымдарга) ылайык келүүгө тийиш. "Өтүп жаткан жылы номиналдан үстөк төлөнгөн капитал" (нетто) деп аталган 5-статьяда акционерлер тарабынан номиналдан үстөк салынган акча каражаттарынын суммасы чагылдырылат. "Өтүп жаткан жылдагы резервдердеги өзгөрүүлөр (нетто)" деп аталган 6-статьяда жыл башынан бери капиталдык резервдерде болуп өткөн өзгөрүүлөр көрсөтүлөт:

а) негизги каражаттарды кайра баалоо боюнча резерв - жыл ичинде нетто-негизде негизги каражаттарды кайра баалоо боюнча резервдердеги кайсы болбосун өзгөртүүлөрдүн таза эффекти көрсөтүлөт;

б) сатуу үчүн жарактуу баалуу кагаздарды кайра баалоо боюнча резерв - жыл ичинде нетто-негизде баалуу кагаздарды кайра баалоо боюнча резервдердеги кайсы болбосун өзгөртүүлөрдүн таза эффекти көрсөтүлөт;

в) башка жалпы резерв - жыл ичинде нетто-негиздеги классификациялануучу активдер жана башка капиталдык резервдер боюнча жалпы резервдерге өзгөртүүлөрдүн таза эффекти көрсөтүлөт;

г) адистештирилген финансы уюмдарынын келечек керектөөлөрү үчүн резерв - жыл ичинде нетто-негизде адистештирилген финансы уюмдарынын келечектеги керектөөлөрү үчүн резервдердеги кандай болбосун өзгөртүүлөрдүн таза эффекти чагылдырылат.

"Жөнөкөй акциялар боюнча жарыяланган акча дивиденддерин минуска чыгаруу менен" деп аталган 7-статьяда күнгө карата төлөнбөгөн дивиденддерди кошо алганда, учурдагы жыл ичинде жөнөкөй акциялар боюнча жарыяланган бардык акча дивиденддери чагылдырылат. "Артыкчылык берилген акциялар боюнча жарыяланган акча дивиденддерин минуска чыгаруу менен" деп аталган 8-статьяда кийинки отчеттук күнгө төлөнбөгөн дивиденддерди кошо алганда, учурдагы жыл ичинде төлөө мөөнөтү чектелүү болгон сыяктуу эле, мөөнөтсүз болгон артыкчылык берилген акциялар боюнча жарыяланган бардык акча дивиденддери көрсөтүлөт. "Өтүп жаткан жылы капиталдагы башка корректировкалар (нетто)" деп аталган 9-статьяда жогоруда аталбаган бирок капиталга таасирин тийгизүүчү башка статьялар боюнча корректировкалоолордун таза суммасы жана уставдык капиталды көбөйтүү үчүн салынган акча каражаттарынын суммасы, ошондой эле негизги каражаттарды кайрадан баалоо боюнча резервден которулган бөлүгү көрсөтүлөт. "Жыйынтыгында, отчеттук мезгилдин акырына карата капитал" деп аталган 10-статьяда 3-саптан 9-сапка чейинки саптардын суммалары көрсөтүлөт. Бул сумма отчеттук жылдын акырына карата баланстык отчетто көрсөтүлгөн капиталдын суммасына барабар болууга тийиш.

2. "Адистештирилген финансы уюмдарынын акциялары жөнүндө маалыматтар" 3Б. бөлүкчөсүндө адистештирилген финансы уюму тарабынан чыгарылган акциялар тууралуу маалымат көрсөтүлөт.

"Жарыяланган уставдык капитал" деп аталган 1-статьяда адистештирилген финансы уюмунун уюштуруу документтеринде көрсөтүлгөн уставдык капитал чагылдырылат. "Бардыгы болуп, төлөнгөн уставдык капитал" деп аталган 2-статьяда 1-бөлүктүн В. "Капитал" деп аталган бөлүкчөсүнүн 14-статьясынын а) жана б) пунктчаларындагы жөнөкөй жана артыкчылык берилген акциялар көрсөтүлөт. Бардык суммалар миң сом менен берилет.

3. "Бөлүштүрүлбөгөн пайдадагы өзгөрүүлөр" деген 4-бөлүктө төмөнкү маалыматтар чагылдырылат.

Эгерде, отчеттук мезгил ичинде эч кандай өзгөрүүлөр болбогон болсо, анда бул статьяда нөлдүк белги көрсөтүлөт. Бардык суммалар миң сом менен берилет. "Өткөн жыл үчүн отчетто көрсөтүлгөн, бөлүштүрүлбөгөн пайда" деп аталган 1-статьяда алгач Баланстык отчетто жана Пайда жана чыгым жөнүндө отчетто көрсөтүлгөн, адистештирилген финансы уюмунун алгач бөлүштүрүлбөгөн пайдасы чагылдырылат. Өз ишин учурдагы жылдын 1-январында же андан кечирээк баштаган адистештирилген финансы уюму үчүн бул статьяда нөлдүк маани көрсөтүлөт. "Өткөн жылдын акырына карата көрсөтүлбөгөн, бөлүштүрүлбөгөн пайдадагы корректировкалар" деп аталган 2-статьяда алгач өткөн жыл үчүн баланстык отчетто бөлүштүрүлбөгөн пайдалардын алгач көрсөтүлгөн сандарга карата жасалган бардык корректировкалоолордун таза суммасы көрсөтүлөт. "Корректировкаларды эске алуу менен, өткөн жылдын акырына карата бөлүштүрүлбөгөн пайда" деп аталган 3-статьяда бул бөлүктүн 1 жана 2-статьялардын суммасы көрсөтүлөт. Эгерде, эч кандай корректировкалар болбогон болсо, анда бул статьянын мааниси 1-статьянын маанисине барабар болууга тийиш. "Жыл башынан бери пайда (чыгым)" деп аталган 4-статьяда Пайда жана чыгым жөнүндө отчетто көрсөтүлгөн, учурдагы мезгил үчүн таза пайда (чыгым) чагылдырылат. "Өтүп жаткан жылы адистештирилген финансы уюмунун келечек керектөөлөрү үчүн резервдеги өзгөртүүлөр (нетто)" деп аталган 5-статьяда учурдагы жыл ичинде орун алган келечек керектөөлөр үчүн камдагы кайсы болбосун өзгөртүүлөрдүн таза эффекти көрсөтүлөт. "Өтүп жаткан жылы бөлүштүрүлбөгөн пайдага таасир этүүчү башка резервдердегы өзгөртүүлөр (нетто)" деп аталган 6-статьяда негизги каражаттарды кайра баалоо боюнча камдагы өзгөртүүлөрдү кошо алганда, учурдагы жылы бөлүштүрүлбөгөн пайдага таасир эткен башка резервдердагы кайсы болбосун өзгөртүүлөрдүн таза эффекти чагылдырылат. "Жөнөкөй акциялар боюнча жарыяланган акча дивиденддерин минуска чыгаруу менен" деп аталган 7-статьяда отчеттук күнгө карата төлөнүп берилбеген дивиденддерди кошо алганда, өтүп жаткан жыл ичинде жөнөкөй акциялар боюнча жарыяланган бардык акча дивиденддери көрсөтүлөт. "Артыкчылык берилген акциялар боюнча жарыяланган акча дивиденддерин минуска чыгаруу менен" деп аталган 8-статьяда кийинки отчеттук мезгил ичинде төлөнүп берилүүчү дивиденддерди кошо алганда, ошол жылдагы мөөнөтү чектелген артыкчылыктуу акциялар сыяктуу эле, мөөнөтү чектелбеген акциялар боюнча жарыяланган бардык акча дивиденддер чагылдырылат. "Жөнөкөй акциялар боюнча жарыяланган акциялар түрүндө дивиденддерди минуска чыгаруу менен" деп аталган 9-статьяда отчеттук күнгө карата капиталда таанылбаган акцияларды кошо алганда, учурдагы жыл ичинде акциялар түрүндө жарыяланган дивиденддер чагылдырылат. "Артыкчылык берилген акциялар боюнча жарыяланган акциялар түрүндө дивиденддерди минуска чыгаруу менен" деп аталган 10-статьяда отчеттук күнгө карата капиталда таанылбаган дивиденддерди кошо алганда, төлөө мөөнөтү чектелүү сыяктуу эле, мөөнөтсүз артыкчылык берилген акциялар боюнча, акциялар түрүндө учурдагы жылдын ичинде жарыяланган дивиденддер көрсөтүлөт. "Өтүп жаткан жылы бөлүштүрүлбөгөн пайдадагы башка корректировкалар (нетто)” деп аталган 11-статьяда өтүп жаткан жылы бөлүштүрүлбөгөн пайдага таасир этүүчү кайсы болбосун башка өзгөрүүлөрдүн нетто-балансы. "Жыйынтыгында, отчеттук мезгилдин акырына карата бөлүштүрүлбөгөн пайда" деп аталган 12-статья бул таблицанын 3-статьясынан 11-статьясына чейинки статьялардын суммасын билдирет. Бул сумма отчеттук мезгил үчүн баланстык отчеттогу бөлүштүрүлбөгөн пайданын суммасына ылайык келүүгө тийиш.

| | | Адистештирилген финансы уюмдарынын ишин жөнгө салуу эрежелерине карата 6-тиркеме 20__-жылдын "__" _____________ карата абал боюнча Мезгил-мезгили менен берилүүчү регулятивдик отчет |

5-БӨЛҮК. ЧЕТ ӨЛКӨ ВАЛЮТАСЫН САТЫП АЛУУ ЖАНА САТУУ БОЮНЧА КҮНДӨЛҮК ОТЧЕТ А бөлүкчөсү. Накталай эмес чет өлкө валютасын сатып алуу жана сатуу боюнча күндөлүк отчет (номиналы боюнча)

Накталай эмес чет өлкө валютасын сатып алуу жана сатуу көлөмү жөнүндө жыйынтыктоочу отчет (номиналы боюнча) | Валюта коду | Күндүн башындагы калдык | Сатып алуу курсу | Сатып алуу көлөмү | резиденттерден | Резидент эместерден | Башка кириштөө | Сатуу курсу | Сатуу көлөмү | резиденттерден | Резидент эместерден | Башка чыгаша | Күндүн аягындагы калдык |

Б бөлүкчөсү. НАКТАЛАЙ ЭМЕС ЧЕТ ӨЛКӨ ВАЛЮТАСЫН САТЫП АЛУУ ЖАНА САТУУ БОЮНЧА КҮНДӨЛҮК ОТЧЕТ I бөлүк

Эскертүүлөр: " Накталай эмес чет өлкө валютасы менен операциялар боюнча күндөлүк отчет" деген Б бөлүкчөдө төмөнкү маалыматтар чагылдырылат. "Бардыгы болуп күндүн башталышына карата калдык" тилкесинде күндүн башталышындагы резидент банктардагы эсептешүү эсептериндеги чет өлкө валютасындагы накталай эмес каражаттардын суммасы көрсөтүлөт. "анын ичинде резидент банктардын эсептешүү эсептеринде" деген тилкеде күндүн башына карата резидент банктарындагы эсептешүү эсебиндеги чет өлкө валютасындагы накталай эмес каражаттардын суммасы көрсөтүлөт. "Бардыгы болуп келип түшкөн валюта" тилкесинде отчеттук күн ичинде келип түшкөн накталай эмес чет өлкө валютасынын жалпы суммасы көрсөтүлөт. "бардыгы болуп сатып алынган" деген сапта АФУ сатып алган накталай эмес чет өлкө валютасынын жалпы суммасы көрсөтүлөт. "анын ичинен, бардыгы болуп резидент банктардан сатып алынган” деген сапта резидент банктардан сатып алынган накталай эмес чет өлкө валютасынын суммасы көрсөтүлөт. "накталай акча алуу" деген сапта комиссиялык төлөмдөрдү эсепке албастан, ошол эле аталыштагы накталай валютага алмаштыруу үчүн түшкөн накталай эмес чет өлкө валютасынын суммасы көрсөтүлөт. "башка түшүүлөр" сабында негизги статьялардын тизмесине кирбеген операциялар боюнча түшкөн накталай эмес чет өлкө валютасынын суммасы көрсөтүлөт. "Валютанын агылып чыгышы, бардыгы болуп" деген сапта отчёттук күн үчүн сарпталган накталай эмес чет өлкө валютасынын жалпы суммасы көрсөтүлөт. "Анын ичинде сатылганы, бардыгы болуп" деген сапта АФУ тарабынан сатылган накталай эмес чет өлкө валютасынын жалпы суммасы көрсөтүлөт. "Анын ичинен резидент банктарга" деген сапта резидент банктарга сатылган накталай эмес чет өлкө валютасынын суммасы берилет. "Анын ичинде накталай акча алуу" деген сапта комиссиялык төлөмдөрдү эске албастан, ошол эле аталыштагы накталай валютага алмаштыруу үчүн берилген накталай эмес чет өлкө валютасынын суммасы көрсөтүлөт. "Анын ичинде башка агылып чыгуу" сабында негизги статьялардын тизмесине кирбеген операциялар боюнча накталай эмес чет өлкө валютасынын жалпы суммасы көрсөтүлөт. "Күндүн аягындагы калдык, бардыгы болуп" сабында күндүн аягында резидент банктардагы эсептешүү эсептериндеги чет өлкө валютасындагы накталай эмес каражаттардын жалпы суммасы чагылдырылат. "Анын ичинде резидент банктардагы эсептешүү эсептеринде" деген сапта күндүн аягында резидент банктардагы эсептешүү эсептериндеги накталай эмес чет өлкө валютасынын суммасы көрсөтүлөт. "Башка чет өлкө валюталары" тилкесинде ар бир чет өлкө валютасы боюнча валютанын сандык коду Валюталардын эл аралык маалымдамасына (ISO 4712) ылайык көрсөтүлөт, бул маалымдама КР УКнын веб-сайтында жайгашкан: www.stat.kg/Методология жана классификаторлор/Классификаторлор/Валюталардын мамлекеттер аралык классификатору.

6-бөлүк. Экономикалык ченемдердин сакталышы тууралуу маалымат