Кыргыз Республикасынын миграциялык мыйзамдарын бузуу менен Кыргыз Республикасынын аймагында жүргөн чет өлкөлүк жарандардын жана жарандыгы жок адамдардын укуктук абалын жөнгө салуу жөнүндө убактылуу жобо (Кыргыз Республикасынын Министрлер Кабинетинин токтомуна)

Кыргыз Республикасынын миграциялык мыйзамдарын бузуу менен Кыргыз Республикасынын аймагында жүргөн чет өлкөлүк жарандардын жана жарандыгы жок адамдардын укуктук абалын жөнгө салуу жөнүндө убактылуу жобо

1. Кыргыз Республикасынын миграциялык мыйзамдарын бузуу менен Кыргыз Республикасынын аймагында жүргөн чет өлкөлүк жарандардын жана жарандыгы жок адамдардын укуктук абалын жөнгө салуу жөнүндө убактылуу жобо (мындан ары – Убактылуу жобо) Кыргыз Республикасынын аймагынан тышкары өз ыктыяры менен чыгып кеткен учурда аларды Кыргыз Республикасынын укук бузуулар жөнүндө мыйзамдарында каралган жоопкерчиликтен, ошондой эле чыгуу визасын тариздөө үчүн төлөнүүчү төлөмдөн бошотуунун тартибин, ошондой эле Кыргыз Республикасынан ыктыярдуу-контролдонуучу чыгуу шарттарын белгилейт.

2. Бул Убактылуу жобонун колдонулушу төмөнкү чет өлкөлүк жарандарга жана жарандыгы жок адамдарга жайылтылбайт:

1) жол жүрүү документи жокторго;

2) Кыргыз Республикасынын Жогорку сотунун качкын статусун же башпаанек берүүдөн баш тартуу жөнүндө мыйзамдуу күчүнө кирген чечими бар адамдарды кошпогондо, качкын статусун алган жана качкын статусун берүү жөнүндө өтүнүч берген адамдарга, ошондой эле башпаанек издеген адамдарга;

3) Кыргыз Республикасында кылмыш иши козголгондорго, иш боюнча өндүрүш аяктаганга чейин;

4) мыйзамдуу күчүнө кирген соттун чечими, анын ичинде чыгаруу жөнүндө чечими барларга;

5) Кыргыз Республикасынын жарандарынын жана Кыргыз Республикасында жашаган башка адамдардын ден соолугун сактоо, укуктарын жана мыйзамдуу кызыкчылыктарын коргоо үчүн коркунуч келтиргендерге;

6) Кыргыз Республикасынын улуттук коопсуздугуна коркунуч келтирген ишти жүргүзгөндөргө;

7) Кыргыз Республикасынын мыйзамдарына ылайык төлөнүүгө тийиш болгон салыктык карыздары барларга;

8) «Тышкы миграция жөнүндө» Кыргыз Республикасынын Мыйзамында каралган учурларда.

3. Ушул Убактылуу жобону ишке ашыруу үчүн жооптуу болуп тышкы иштер, миграция чөйрөсүндөгү ыйгарым укуктуу мамлекеттик органдар, ички иштер, улуттук коопсуздук жана мамлекеттик чек араны кайтаруу жана коргоо органдары саналат.

4. 2026-жылдын 31-июлунан кийин «Е-Visa» электрондук порталы аркылуу чыгуу визасына берилген арыздар Кыргыз Республикасынын тышкы миграция чөйрөсүндөгү мыйзамдарында белгиленген тартипте каралууга тийиш.

Арыз чыгуу үчүн зарыл болгон бардык документтер берилген учурдан тартып кароого кабыл алынды деп эсептелет.

5. Кыргыз Республикасынын аймагынан ыктыярдуу кетүүнү каалаган чет өлкөлүк жаран жана жарандыгы жок адам тышкы миграция жаатындагы ыйгарым укуктуу мамлекеттик органдарга кайрылат.

тариздөө үчүн төлөмдөн бошотуу тартиби

6. Ушул Убактылуу жобонун колдонуу мезгилинде Кыргыз Республикасынан өз ыктыяры менен чыгып кетүү максатында ыйгарым укуктуу мамлекеттик органдарга өз ыктыяры менен кайрылган чет өлкөлүк жарандар жана жарандыгы жок адамдар ушул Убактылуу жободо каралган шарттар сакталган учурда Кыргыз Республикасынын миграция чөйрөсүндөгү укук бузуулар жөнүндө мыйзамдарында каралган жоопкерчиликтен бошотулат.

7. Жоопкерчиликтен бошотуу төмөнкү чет өлкөлүк жарандарга жана жарандыгы жок адамдарга карата колдонулат:

– Кыргыз Республикасынын аймагында болуу мөөнөтүн бузууга жол берген;

– визасынын, чет өлкөлүк жарандардын жана жарандыгы жок адамдардын Кыргыз Республикасынын аймагында болуусу жана эмгек ишин жүзөгө ашыруусу үчүн Бирдиктүү уруксаттын жана Кыргыз Республикасынын резидент-картасынын жана Кыргыз Республикасынын тышкы миграция чөйрөсүндөгү мыйзамдарында каралган башка уруксат берүүчү документтеринин мөөнөтү өткөн;

– ушул Убактылуу жобонун 2-пунктунда каралган учурларды кошпогондо, миграция чөйрөсүндөгү башка укук бузууларды жасагандарга.

8. Жоопкерчиликтен бошотуу Кыргыз Республикасынын ички иштер органдары тарабынан компроматтык маалыматтардын жоктугу жөнүндө катты берүү жолу менен жүзөгө ашырылат.

9. Жоопкерчиликтен бошотуу үчүн чет өлкөлүк жаран же жарандыгы жок адам төмөнкүлөрдү берет:

– инсандыгын ырастоочу документти же жол жүрүү документин;

– Кыргыз Республикасынан өз ыктыяры менен чыгып кетүү ниетин ырастоочу эркин формадагы арызды.

10. Чыгуу визасын тариздөө үчүн төлөмдөн бошотуу тышкы иштер чөйрөсүндөгү ыйгарым укуктуу мамлекеттик орган тарабынан жүзөгө ашырылат.

11. Чыгуу визасын төлөм албастан тариздөө төмөнкүлөрдүн негизинде жүзөгө ашырылат:

– инсандыгын ырастоочу документтин же жол жүрүү документинин;

– ички иштер органдарынын ушул Убактылуу жобонун талаптарын колдонуу жөнүндө чечиминин;

– чет өлкөлүк жарандын же жарандыгы жок адамдын Кыргыз Республикасынан өз ыктыяры менен чыгып кетүү жөнүндө арызынын.

12. Жоопкерчиликтен жана чыгуу визасын тариздөө үчүн төлөмдөн бошотулган чет өлкөлүк жарандар жана жарандыгы жок адамдар Кыргыз Республикасынын Президентинин 2026-жылдын 24-июнундагы № 233 «Кыргыз Республикасынын аймагында жүргөн чет өлкөлүк жарандардын жана жарандыгы жок адамдардын укуктук абалын жөнгө салуу боюнча чаралар жөнүндө» Жарлыгында белгиленген мөөнөттө Кыргыз Республикасынын аймагынан кетүүгө милдеттүү.

13. Чет өлкөлүк жаран же жарандыгы жок адам белгиленген мөөнөттө чыгып кетпеген учурда мындай адамдарга карата ушул Убактылуу жобонун күчү токтотулат жана ага карата Кыргыз Республикасынын укук бузуулар жөнүндө мыйзамдарында каралган чаралар колдонулат.

14. Чет өлкөлүк жарандын же жарандыгы жок адамдын Кыргыз Республикасынан чыгып кетүү үчүн авиабилеттерди сатып алууга байланышкан чыгымдары адамдын өзүнүн же чакыруучу тараптын эсебинен жүргүзүлөт. Чакыруучу тарапты аныктоо мүмкүн болбогон жана адамда финансылык каражаттар жок болгон учурда, анын репатриациялоо боюнча чыгымдар, ошондой эле убактылуу жайгаштыруу пунктун күтүүнү жана анын иштөөсүн камсыз кылууга чыгымдар Кыргыз Республикасынын Министрлер Кабинетинин 2026-жылдын 30-апрелиндеги № 312 «Кыргыз Республикасынын аймагында чет өлкөлүк жарандардын жана жарандыгы жок адамдардын болуу тартибин жөнгө салуучу документтерди тариздөө жол-жоболорун оптималдаштыруу жөнүндө» токтому менен бекитилген Кыргыз Республикасынын визаларын, Кыргыз Республикасынын аймагында чет өлкөлүк жарандардын жана жарандыгы жок адамдардын болуусу жана эмгек ишин жүзөгө ашыруусу үчүн бирдиктүү уруксатты жана Кыргыз Республикасынын резидент-картасын тариздөө тартиби жөнүндө убактылуу жобонун

116-пунктунда каралган кепилдик төгүмдүн эсебинен каржыланат.

15. Кыргыз Республикасынын миграциялык мыйзамдарынын талаптарын бузган жана өзүнүн укуктук абалын жөнгө салбаган же жогоруда аталган Жарлык менен белгиленген мөөнөттө Кыргыз Республикасынан тышкары өз ыктыяры менен чыгып кетүү укугун пайдаланбаган чет өлкөлүк жарандар жана жарандыгы жок адамдар убактылуу жайгаштыруу пунктуна жеткирилүүгө тийиш.

16. Ички иштер жана улуттук коопсуздукту камсыз кылуу чөйрөсүндөгү ыйгарым укуктуу органдар тарабынан убактылуу жайгаштыруу пунктуна жеткирилүүгө тийиш болгон чет өлкөлүк жарандарды жана жарандыгы жок адамдарды аныктоо боюнча иш-чаралар жүргүзүлөт.

17. Убактылуу жайгаштыруу пунктунда төмөнкүдөй иш-чаралар жүргүзүлөт:

– Кыргыз Республикасынын аймагында жүрүүгө жана чыгып кетүүгө укук берүүчү документтерди текшерүү;

– медициналык кароо;

– адамдарды ички иштер, улуттук коопсуздук, миграция чөйрөсүндөгү ыйгарым укуктуу органдардын карамагында болгон эсепке алуулар, анын ичинде иммигранттар, этникалык кыргыздар, качкындар жана адамдарды сатуунун курмандыктары маселелерин, ошондой эле айып пулдардын болушу, издөөдө болушу жана адамдардын мыйзамдуу жүрүшүнө же орун которуусуна тоскоолдук кылуучу башка маалыматтар боюнча текшерүү;

– ички иштер жана улуттук коопсуздукту камсыздоо чөйрөсүндөгү ыйгарым укуктуу органдар тарабынан Кыргыз Республикасынын укук бузуулар жөнүндө кодексине ылайык укук бузуулар жөнүндө протокол түзүлөт;

– чакырган тарапты аныктоо (бар болсо).

18. Чет өлкөлүк жарандарды жана жарандыгы жок адамдарды убактылуу жайгаштыруу пунктунда кармоо мөөнөтү келип түшкөн күндөн тартып 30 суткадан ашпайт. Чет өлкөлүк жарандын же жарандыгы жок адамдын жарактуу жол жүрүү документи жок учурда, бул мөөнөт 60 суткага чейин узартылышы мүмкүн.

Убактылуу жайгаштыруу пунктуна келип түшкөндүгү жөнүндө маалыматтар жана укук бузуучулар жөнүндө башка маалыматтар ушул Убактылуу жобонун тиркемесине ылайык форма боюнча түзүлгөн чет өлкөлүк жарандарды жана жарандыгы жок адамдарды кабыл алууну эсепке алуу журналына жазылат.

Кыргыз Республикасынын миграциялык мыйзамдарын бузуу менен Кыргыз Республикасынын аймагында жүргөн чет өлкөлүк жарандардын жана жарандыгы жок адамдардын укуктук абалын жөнгө салуу жөнүндө убактылуу жобого тиркеме

Чет өлкөлүк жарандарды жана жарандыгы жок адамдарды кабыл алууну эсепке алуу журналы