Бажылык, башка документтерди жана (же) маалыматтарды текшерүү жыйынтыктарын тариздөө тартиби (Кыргыз Республикасынын Өкмөтүнүн токтомуна ылайык)

Бажылык, башка документтерди жана (же) маалыматтарды текшерүү жыйынтыктарын тариздөө тартиби

(Кыргыз Республикасынын Министрлер Кабинетинин 2026-жылдын 29-июнундагы № 444 токтомунун редакциясына ылайык)

1. Ушул Тартип Евразия экономикалык бирлигинин Бажы кодексинин 326-беренесине, «Бажылык жөнгө салуу жөнүндө» Кыргыз Республикасынын Мыйзамынын 129-беренесине ылайык иштелип чыккан жана Кыргыз Республикасынын бажы органдары (мындан ары – бажы органдары) тарабынан бажылык, башка документтерди жана (же) маалыматтарды текшерүүнүн аяктагандыгы жөнүндө кабарламаны (мындан ары – Кабарлама) тариздөө жана тышкы экономикалык иштин катышуучуларына (мындан ары – текшерилүүчү жак) жиберүү эрежелерин аныктайт.

2. Бажылык, башка документтерди жана (же) маалыматтарды текшерүү жыйынтыктары бажы иши чөйрөсүндөгү ыйгарым укуктуу мамлекеттик органдын чечими менен бекитилген форма боюнча Кабарлама түрүндө таризделет.

3. Кабарлама бажылык контролдоонун алкагында бажы органдары тарабынан жүргүзүлүүчү бажылык, башка документтерди жана (же) маалыматтарды текшерүү жыйынтыктары боюнча таризделет.

4. Текшерүү жүргүзгөн бажы органы төмөнкүдөй мөөнөттөрдө Кабарламаны тариздөөгө жана текшерилүүчү жакка жиберүүгө милдеттүү:

– эгерде текшерүү чыгаруу мөөнөтүн узартуунун алкагында товарларды чыгарууга чейин жүргүзүлгөн учурда, товарларды чыгаруу жөнүндө чечим кабыл алынган күндөн кийинки бир жумуш күндөн кечиктирбестен (Евразия экономикалык бирлигинин Бажы кодексинин 325-беренеси);

– эгерде текшерүү товарлар чыгарылгандан кийин жүргүзүлгөн учурда, текшерүүнүн жыйынтыктарын белгилөөчү тиешелүү документ таризделген күндөн кийинки үч жумуш күндөн кечиктирбестен.

5. Кабарлама текшерилүүчү жакка төмөнкү ыкмалардын бири менен жиберилет:

1) артыкчылыктуу ыкма (электрондук документ жүгүртүү) –бажы органдарынын маалыматтык системалары аркылуу ыйгарым укуктуу кызмат адамынын электрондук колу коюлган электрондук документ түрүндө;

2) кошумча ыкма (кагаз жүзүндө):

– текшерилүүчү жактын жетекчисине же анын ыйгарым укуктуу өкүлүнө (ыйгарым укуктарын ырастаган документти тиркөө менен) жеке өзүнө кол койдуруу менен тапшырылат;

– алуучунун дарегин көрсөтүү жана тапшырылгандыгы жөнүндө кабарлоо менен буйрутма почталык кат менен (электрондук документти жиберүүгө техникалык мүмкүнчүлүк болбогондо же жеке өзүнө тапшыруу мүмкүн эмес болгон учурда).

Кабарлама электрондук түрдө жиберилген учурда, эгерде Кыргыз Республикасынын мыйзамдарында башкача каралбаса, аны кагаз жүзүндө кайталоо талап кылынбайт.

6. Кабарламаны алган дата болуп төмөнкүлөр эсептелет:

– электрондук документтин текшерилүүчү жактын жеке кабинетине (маалыматтык ресурсуна) жеткирилгендигин ырастаган бажы органдарынын маалыматтык системасында белгиленген дата;

– бажы органынын көктөмөлөрүндө калуучу Кабарламанын көчүрмөсүндө текшерилүүчү жактын ыйгарым укуктуу адамынын жеке колу коюлган дата;

– почталык каттын тапшырылгандыгы жөнүндө кабарламада көрсөтүлгөн дата.

Эгерде текшерилүүчү жак Кабарламаны алуудан баш тартса же тиешелүү түрдө билдирилгендигине карабастан аны алуу үчүн келбесе, Кабарлама тиешелүү актыда же почта кызматынын алуудан баш тарткандыгы/келбегендиги жөнүндө белгиси коюлган күнү алынды деп эсептелет.

7. Кабарламаны жиберүү мөөнөттөрүнүн жана тартибинин сакталышын контролдоо текшерүү жүргүзгөн бажы органдарынын түзүмдүк бөлүмдөрүнүн жетекчилерине жүктөлөт.

8. Бажы органдарынын кызмат адамдары ушул Тартипти сактабагандыгы үчүн Кыргыз Республикасынын мыйзамдарына ылайык жоопкерчилик тартат.