Кыргыз Республикасынын Министрлер Кабинетинин (Бишкек шаарында кол коюлган Кыргыз Республикасы менен Азия инфраструктуралык инвестициялар банкынын ортосундагы Кредиттик макулдашууга («Кыргыз Республикасында кичи-, чакан жана орто ишканалар үчүн туруктуу финансы рыногун өнүктүрүү» долбоору) Кыргыз Республикасынын Министрлер Кабинетинин корутундусун жактыруу жөнүндө) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2026-жылдын 18-майы № 351-т

Мамлекеттик ички жол-жоболорду аткаруу максатында, "Кыргыз Республикасынын Жогорку Кеңешинин Регламенти жөнүндө" Кыргыз Республикасынын Мыйзамынын 65-беренесине, "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 11, 12-беренелерине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. 2026-жылдын 26-февралында Бишкек шаарында кол коюлган Кыргыз Республикасы менен Азия инфраструктуралык инвестициялар банкынын ортосундагы Кредиттик макулдашууга ("Кыргыз Республикасында кичи-, чакан жана орто ишканалар үчүн туруктуу финансы рыногун өнүктүрүү" долбоору) Кыргыз Республикасынын Министрлер Кабинетинин тиркелген корутундусу жактырылсын.

2. Кыргыз Республикасынын Финансы министрлиги жогоруда көрсөтүлгөн Кредиттик макулдашууну ишке ашырууга жооптуу ыйгарым укуктуу мамлекеттик орган болуп аныкталсын.

3. Кыргыз Республикасынын Министрлер Кабинетинин тиркелген корутундусу Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.Касымалиев

Кыргыз Республикасынын Министрлер Кабинетинин 2026-жылдын 18-майындагы № 351-т тескемеси менен жактырылган

2026-жылдын 26-февралында Бишкек шаарында кол коюлган Кыргыз Республикасы менен Азия инфраструктуралык инвестициялар банкынын ортосундагы Кредиттик макулдашууга ("Кыргыз Республикасында кичи-, чакан жана орто ишканалар үчүн туруктуу финансы рыногун өнүктүрүү" долбоору) Кыргыз Республикасынын Министрлер Кабинетинин КОРУТУНДУСУ

2026-жылдын 26-февралында Бишкек шаарында кол коюлган Кыргыз Республикасы менен Азия инфраструктуралык инвестициялар банкынын ортосундагы Кредиттик макулдашууну ("Кыргыз Республикасында кичи-, чакан жана орто ишканалар үчүн туруктуу финансы рыногун өнүктүрүү" долбоору) (мындан ары - Кредиттик макулдашуу) Кыргыз Республикасынын Конституциясынын жана мыйзамдарынын ченемдерине ылайык келет жана Кыргыз Республикасы катышуучу болуп саналган, мыйзамда белгиленген тартипте күчүнө кирген эл аралык келишимдерге каршы келбейт. Кредиттик макулдашуунун долбоору буга чейин Кыргыз Республикасынын Жогорку Кеңешинин профилдик комитеттери менен макулдашылган (Финансы, бюджет, ишкердик жана атаандаштыкты өнүктүрүү боюнча комитеттин 2026-жылдын 4-февралындагы № 6-561/26 чечими, Эл аралык иштер, коргоо, коопсуздук жана миграция боюнча комитеттин 2026-жылдын 3-февралындагы № 6-532/26 чечими) жана Кыргыз Республикасынын Министрлер Кабинетинин 2026-жылдын 10-февралындагы № 70-т тескемеси менен жактырылган. Азыркы учурда Кыргыз Республикасынын Финансы министрлиги тарабынан Эл аралык өнүктүрүү ассоциациясы 120,0 млн. АКШ доллары суммасында каржылоочу "Кыргыз Республикасында кичи-, чакан жана орто ишканалар үчүн туруктуу финансы рыногун өнүктүрүү" долбоору (мындан ары - долбоор) ишке ашырылууда. Бул долбоор 2025-жылдын 18-августунда күчүнө кирген. 2025-жылдын 21-апрелинде Вашингтон шаарында кол коюлган Кыргыз Республикасы менен Эл аралык өнүктүрүү ассоциациясынын ортосундагы Каржылоо жөнүндө макулдашуунун ("Кыргыз Республикасында микро-, чакан жана орто ишканалар (МЧОИ) үчүн туруктуу финансы рыногун өнүктүрүү" долбоору) жоболоруна ылайык долбоордун максаттарын ишке ашыруу үчүн Азия инфраструктуралык инвестициялар банкынан 50,0 млн. АКШ долларына эквиваленттүү суммада кош каржылоону тартуу каралган. Азия инфраструктуралык инвестициялар банкы тарабынан кошумча каржылоо долбоорунун концепциясы өзгөрүүсүз калат. Долбоор кичи, чакан жана орто ишканалар үчүн туруктуу финансылык рынокту түзүү аркылуу климаттын өзгөрүшүнүн кесепеттерин жеңилдетүүгө жана ага адаптациялоого көмөктөшөт. Ал "Кыргыз Республикасынын Мамлекеттик өнүктүрүү банкы" ачык акционердик коому тарабынан ишке ашырылып жаткан "Жашыл жана туруктуу каржылоо" долбоорунун 1-компонентин колдойт. "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 11, 12-беренелерине ылайык Кредиттик макулдашуу Кыргыз Республикасынын Жогорку Кеңешине ратификациялоого киргизилет. Кредиттик макулдашууну ратификациялоо кандайдыр бир финансы-экономикалык жана башка терс кесепеттерге, ошондой эле Кыргыз Республикасынын республикалык бюджетинен кошумча каржылоого алып келбейт.