Ош шаардык Кеңешинин Ош шаарында мүлк жана жер салыгы боюнча Кз зоналдык коэффициенттердин өлчөмүн жана нарктык зоналардын чектерин бекитүү жөнүндө токтому

ОШ ШААРДЫК КЕӉЕШИ ТОКТОМ ОШ ШААРДЫК КЕҢЕШИНИН КЕЗЕКСИЗ XIII СЕССИЯСЫ (VI ЧАКЫРЫЛЫШ)

2025-жылдын 10-сентябры № 76 Ош шаарында мүлк жана жер салыгы боюнча Кз зоналдык коэффициенттердин өлчөмүн жана нарктык зоналардын чектерин бекитүү жөнүндө

Кыргыз Республикасынын Салык Кодексинин 5, 388, 404-беренелерин жана Кыргыз Республикасынын “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамынын 34, 40-беренелерин жетекчиликке алып, Ош шаарынын мэринин биринчи орун басары А.Шаршеналы уулунун жана Мамлекеттик салык кызматынын Ош шаары боюнча башкармалыгынын башчысы Н.А.Сатыбалдиевдин Ош шаарында мүлк жана жер салыгы боюнча Кз зоналдык коэффициенттердин өлчөмүн жана нарктык зоналардын чектерин бекитүү жөнүндөгү сунуштарын угуп жана талкуулап, Ош шаардык Кеңешинин бюджет, экономика жана өнөр-жай маселелери боюнча туруктуу депутаттык комиссиясынын 2025-жылдын 3-сентябрындагы №25 чечимин эске алып, Ош шаардык Кеңеши токтом кылат:

1. Ош шаарында турак эмес имараттар, курулмалар жана жайлар, ошондой эле калктуу конуштардын жерлери жана айыл чарба багытындагы эмес жерлер, үй жанындагы, короо жай жана багбанчылык-чарбак жер участоктору үчүн Кз зоналдык коэффициенттердин өлчөмү жана нарктык зоналардын чектери тиркемеге ылайык бекитилсин (тиркелет).

2.Токтом 2026-жылдын 1-январынан тартып мүлк жана жер салыгынын эсептөөлөрүнө жайылтыла тургандыгы белгиленсин.

3.Ош шаардык Кеңешинин 2022-жылдын 15-ноябрындагы №89 токтому 2026-жылдын 1-январынан күчүн жоготту деп табылсын.

4. Мамлекеттик салык кызматынын Ош шаары боюнча башкармалыгы ушул токтом менен бекитилген зоналдык коэффициенттерге ылайык салык салуу ишин алып барсын.

5. Токтом мыйзамда каралган тартипте катталсын, жалпыга маалымдоо каражаттарына жарыялансын жана Кыргыз Республикасынын ченемдик-укуктук актыларынын реестрине киргизүү үчүн Ош юстиция башкармалыгына жөнөтүлсүн.

6.Токтом расмий жарыяланган күндөн баштап күчүнө кирет.

7. Токтомдун аткарылышын көзөмөлдөө Ош шаардык Кеңешинин бюджет, экономика жана өнөр-жай маселелери боюнча туруктуу депутаттык комиссиясына (К.Шайиев) жүктөлсүн.

Төрага:

Б.Т. Баетов