Уюмдарда жана объекттерде ведомстволук (объекттик) өрткө каршы кызматтардын ишин жүзөгө ашыруу ЭРЕЖЕЛЕРИ

2-тиркеме

(Кыргыз Республикасынын Министрлер Кабинетинин 2024-жылдын 31-июлундагы № 445 токтомуна)

Уюмдарда жана объекттерде ведомстволук (объекттик) өрткө каршы кызматтардын ишин жүзөгө ашыруу ЭРЕЖЕЛЕРИ

1. Бул Уюмдарда жана объекттерде ведомстволук (объекттик) өрткө каршы кызматтардын ишин жүзөгө ашыруу эрежелери (мындан ары - Эрежелер) "Өрт коопсуздугу жөнүндө" Кыргыз Республикасынын Мыйзамынын 6-беренесинин 5-пунктуна ылайык иштелип чыккан жана Кыргыз Республикасынын аймагында ведомстволук өрткө каршы кызматтардын ишин жүзөгө ашыруу тартибин белгилейт.

2. Бул Эрежелерде колдонулуучу негизги түшүнүктөр:

ведомстволук (объекттик) өрткө каршы кызмат - өрттү алдын алууну жана өчүрүүнү уюштуруу үчүн объектте түзүлүүчү өрттөн коргоо бөлүгү; өрттү өчүрүү жана авариялык-куткаруу иштерин жүргүзүү - өрткө каршы кызматтардын өрттүн андан ары жайылуу мүмкүнчүлүгүн алдын алуу жана болгон күчтөр жана каражаттар менен аны ийгиликтүү жоюу үчүн шарттарды түзүү, жабыр тарткандарга жардам көрсөтүү, өрттөн келтирилген зыянды азайтуу боюнча иши; өрттү алдын алуу - өрт чыгуу мүмкүнчүлүгүн болтурбоого жана алардын кесепеттерин минималдаштырууга багытталган алдын алуу чараларынын жыйындысы; негизги өрт өчүрүүчү автомобилдер - өрттөн куткаруу бөлүмдөрүнүн өздүк курамын, өрт өчүрүүчү заттарды чакырылган жерге жеткирүү жана күйүү зонасына өрт өчүрүүчү заттарды (суу, порошок, инерттик газдар ж.б.) берүү, ошондой эле өздүк курам тарабынан биринчи кезектеги авариялык-куткаруу иштерин жүргүзүүгө багытталган өрт өчүрүүчү автомобилдер; атайын өрт өчүрүүчү автомобилдер - өрт учурунда атайын жумуштарды аткарууну камсыз кылууга багытталган өрт өчүрүүчү автомобилдер; нөөмөт сменасы - өрт өчүрүү жана авариялык-куткаруу иштерин жүргүзүү боюнча милдеттерди аткарууга бөлүмдүн даярдыгын үзгүлтүксүз кармап турууну камсыз кылуу үчүн багытталган суткалык наряд.

3. Ведомстволук (объекттик) өрткө каршы кызматтардын негизги милдеттери болуп төмөнкүлөр саналат:

1) объекттеги өрттү алдын алуу жана өчүрүү;

2) объектте авариялык-куткаруу иштерин жүргүзүү.

4. Негизги милдеттерге ылайык ведомстволук (объекттик) өрткө каршы кызмат чыгуучу техникасы бар жана чыгуучу техникасы жок түзүлөт:

1) чыгуучу техникасы менен - куралдануусунда негизги жана атайын өрт өчүрүүчү автомобилдер же башка ыңгайлаштырылган транспорт каражаттары болгон өрт өчүрүү деполору;

2) чыгуучу техникасы жок - өрт өчүрүү посттору, алардын кызматкерлери ыктыярдуу өрт өчүрүү түзүмдөрүнүн ичинен өрттү алдын алуу (профилактикалоо) боюнча ишти жүзөгө ашырат жана бул максаттар үчүн өрт өчүрүүнүн стационардык, мобилдүү же кол каражаттарын пайдалануу менен өрттүн өнүгүшүнүн баштапкы стадиясында өрттү өчүрүүгө катышат.

5. Ведомстволук (объекттик) өрткө каршы кызматка ишке он сегиз жашка толгон жана өрткө каршы кызматтардын адистерин даярдоо, кайра даярдоо жана квалификациясын жогорулатуу боюнча өрт коопсуздугун камсыз кылуу жаатындагы атайын даярдоо боюнча курстан өткөн Кыргыз Республикасынын жарандары кабыл алынат.

6. Ведомстволук өрткө каршы кызматтын ишин координациялоо жана өрт менен күрөшүүгө даярдыгын контролдоо өрт коопсуздугу чөйрөсүндөгү ыйгарым укуктуу мамлекеттик органдар тарабынан ишке ашырылат.

7. Ведомстволук (объекттик) өрткө каршы кызматтын ишин уюштуруу тартиби ушул Эрежелерге ылайык объекттердин жетекчилери тарабынан аныкталат.

8. Бир ведомстволук өрткө каршы кызматтын үлүштүк катышкан жана ведомстволук өрткө каршы кызматтын ченемдик чыгуу радиусунда жайгашкан бир нече объекттерди тейлөөсүнө жол берилет.

9. Объекттик өрткө каршы кызматтардын ишин уюштурууну регламенттөөчү документтер ушул Эрежелеринин 1-тиркемесине ылайык объекттердин жетекчилери тарабынан түзүлөт.

10. Ведомстволук (объекттик) өрткө каршы кызмат туруктуу (күнү-түнү) даярдыкта турат.

11. Чыгуучу техникасы бар ведомстволук (объекттик) өрткө каршы кызматтын өрт өчүрүү деполорунун негизги бирдиги болуп эсептөө командири (сменанын жетекчиси) башчылык кылуучу өрт өчүрүүчү автомобилде эсептөө саналат. Эки жана андан ашык өрт өчүрүүчү автомобиль болгондо өрт өчүрүү бөлүгүндө кароолдор түзүлөт, аларга кароолдордун башчылары (сменанын жетекчилери) башчылык кылат.

12. Чыгуучу техникасы бар өрт өчүрүү бөлүктөрүндө өрттү алдын алуу боюнча иштерди жүргүзүү үчүн объекттин жетекчисинин чечими боюнча инструкторлор менен өрттү алдын алуу топтору түзүлөт, ошондой эле объектте өрт коопсуздугу үчүн жооптуу кызмат адамдарына жол берилет.

13. Чыгуучу техникасы жок ведомстволук (объекттик) өрткө каршы кызмат түзүлгөн объекттерди өрттөн коргоо ыктыярдуу өрт өчүрүү түзүмдөрүнүн мүчөлөрүнүн ичинен өрт инструктор-өрт өчүрүүчүлөр (нөөмөттүк сменада 2 штаттык кызматкерден кем эмес) тарабынан ишке ашырылат.

14. Күчтөрдү, каражаттарды ыкчам башкарууну жана өрт коопсуздугу чөйрөсүндөгү ыйгарым укуктуу мамлекеттик орган менен өз ара аракеттенүүнү уюштуруу үчүн өрт өчүрүү бөлүктөрүндө жана объекттик өрткө каршы кызматтардын постторунда объекттин жетекчисинин чечими боюнча төмөнкүлөрдү камсыз кылуучу байланыш пункттары түзүлөт:

1) өрт, авария жөнүндө билдирүүлөрдү кабыл алууну;

2) өрт өчүрүүчү автомобилдерде эсептерди чакыруу болгон жерге жиберүүнү;

3) тескемелерди берүүнү, өрт чыккан жерден маалымат алууну жана өрттү өчүрүү үчүн тартылган кызматтар менен өз ара аракеттенүүнү.

Өрт өчүрүү депосунун (постунун) байланыш пункту өрт коопсуздугу чөйрөсүндөгү ыйгарым укуктуу мамлекеттик органдын жакынкы бөлүмүнүн байланыш пунктунун байланыш каналы менен камсыз кылынат.

15. Өрт өчүрүүчү автомобилдер мобилдик радиостанциялар менен камсыздалат. Ошондой эле көчмө байланыш каражаттары менен өрт өчүрүүнүн жетекчиси, нөөмөттө турган жана иштөө шарттары боюнча өрт өчүрүү бөлүгүнүн жана постунун туруктуу жайгашкан жеринен тышкары турган кызматкерлер камсыз кылынат.

16. Өрт өчүрүү деполорунда жана посттордо дем алуу үчүн жараксыз чөйрөдө иштөө мүмкүнчүлүгү үчүн объекттин жетекчисинин чечими менен газ-түтүндөн коргоо кызматы түзүлөт.

17. Ведомстволук (объекттик) өрткө каршы кызмат үчүн негизги өрт өчүрүүчү автомобилдердин саны ушул Эрежелердин 2-тиркемесине ылайык аныкталат. Ведомстволук өрткө каршы кызматты күтүүгө объекттердин үлүштүк катышуусунда негизги өрт өчүрүүчү автомобилдердин саны суунун эң көп чыгымдалышын талап кылган объект боюнча аныкталат.

18. Объекттерде өрттү өчүрүү үчүн зарыл болгон негизги өрт өчүрүүчү автомобилдерди оңдоодо жана/же техникалык тейлөөдө көтөрүп жүрүүчү же көчмө өрт өчүрүү мотопомпалары же ыңгайлаштырылган транспорт каражаттары каралат.

19. Ведомстволук өрткө каршы кызматтын бөлүмдөрү үчүн атайын өрт өчүрүүчү автомобилдердин саны алардын өзгөчөлүгүн эске алуу менен объекттин жетекчиси тарабынан аныкталат.

20. Өрт өчүрүүчү автомобилдер өрт коопсуздугун камсыз кылуу жаатындагы мамлекеттер аралык стандарттарга жана регламенттерге ылайык жайгаштырылат жана эксплуатацияланат.

21. Объектте нөөмөт сменасындагы ведомстволук өрткө каршы кызматтын кызматкерлеринин саны өрт өчүрүүчү автомобилдердин санын өрт өчүрүүчү автомобилдеги эсептердин санына көбөйтүү менен аныкталат.

22. Ведомстволук өрткө каршы кызматтын кызматкерлеринин жалпы саны Кыргыз Республикасынын эмгек мыйзамдарына ылайык алардын ишиндеги смен алмашууну жана жумуш убактысынын узактыгын эске алуу менен аныкталат.

23. Ведомстволук өрткө каршы кызматтын кызматкерлеринин жалпы саны объекттин кызматкерлеринин бекитилген штаттык санынын 50%на барабар же андан ашкан учурда ыктыярдуу өрткө каршы түзүмдүн курамына кирген объекттин штаттык кызматкерлеринин эсебинен кызмат орундарын ээлөөгө жол берилет.

24. Ведомстволук өрткө каршы кызматта объекттин өндүрүштүк мүнөздөмөлөрүн эске алуу менен теориялык жана практикалык сабактарды камтыган кызматкерлерди жыл сайын атайын даярдоо каралат.

Уюмдарда жана объекттерде ведомстволук (объекттик) өрткө каршы кызматтардын ишин жүзөгө ашыруу эрежелерине 1-тиркеме

Объекттик өрткө каршы кызматтардын ишин уюштурууну жөнгө салуучу документтер

№

Документтин аталышы

Сактоочу жай

Кызматты уюштуруу боюнча

1

Кызматтын китеби

Кароол башчы (сменанын жетекчиси)

2

Кароолдогу нөөмөт кызматкерлеринин функциялык милдеттери

Өрт коопсуздугу, эмгекти коргоо жана коопсуздук техникасы боюнча инженер

3

Бөлүктүн куралдануусунда турган өрт өчүрүүчү автомобилдерге эсептөөнүн табели

4

Кызматкерлерди кароолдорго бекитип берүү жөнүндө ведомствонун буйругу

Өрт коопсуздугу, эмгекти коргоо жана коопсуздук техникасы боюнча инженер

5

Кызматкерлердин даректеринин жана телефондорунун тизмеги

Даярдоону уюштуруу боюнча

6

Өздүк курамды кесиптик даярдоону уюштуруу жана өткөрүү боюнча буйрук (учурдагы жылга)

Өрт коопсуздугу, эмгекти коргоо жана коопсуздук техникасы боюнча инженер

7

Өрт өчүрүүчүлөр, айдоочулар жана радиотелефонисттер кызмат ордуна жаңы кабыл алынган кызматкерлердин алгачкы даярдыктан өткөндүгү жөнүндө сертификаттар (көчүрмөлөрү), стажировкаларды уюштуруу жана өткөрүү боюнча документтер

Кадрлар бөлүмү

8

Атайын даярдыктан жана стажировкадан өткөндөн кийин өз алдынча иштөөгө уруксат берүү жөнүндө буйрук

Өрт коопсуздугу, эмгекти коргоо жана коопсуздук техникасы боюнча инженер

9

Өрт өчүрүүчүлөрдү, айдоочуларды жана радиотелефонисттерди кийинки даярдыктан өткөрүү боюнча тематикалык пландар жана окутуунун расписаниеси

Өрт коопсуздугу, эмгекти коргоо жана коопсуздук техникасы боюнча инженер

10

Объекттерде ыкчам-тактикалык изилдөө, өрткө каршы тактикалык сабактарды өткөрүүнүн (күндүзгү жана түнкү убакта) план-графиги

Өрт коопсуздугу, эмгекти коргоо жана коопсуздук техникасы боюнча инженер

11

Өздүк курамдын дем алуу органдарын жеке коргоочу каражаттар менен түтүн камерасында машыгуусунун план-графиги (газ-түтүндөн коргоо кызматы бар болсо)

Өрт коопсуздугу, эмгекти коргоо жана коопсуздук техникасы боюнча инженер

Өрт өчүрүүнү уюштуруу боюнча

12

Күч жана каражаттарды тартуунун бекитилген планы

Депонун байланыш пункту

13

Бөлүктүн чыгуучу районунун суу булактары, өрт, жарылуу коркунучу бар объекттер, күчтүү уулуу заттар менен, адамдар көп болуучу объекттер жана башка маанилүү объекттер түшүрүлгөн план-картасы

Депонун байланыш пункту

14

Кыргыз Республикасынын Өзгөчө кырдаалдар министрлигинин өз ара аракеттенүү, тиричилик жактан камсыздоо кызматтарынын, аймактык бөлүмдөрүнүн телефондорунун маалымдамасы

Депонун байланыш пункту

15

Кыргыз Республикасынын Өзгөчө кырдаалдар министрлигинин өз ара аракеттенүү, тиричилик жактан камсыздоо кызматтары, аймактык бөлүмдөрү менен өз ара аракеттенүү нускамалары

Депонун байланыш пункту

16

Өрт өчүрүүнүн ыкчам пландары жана карточкалары

Сменанын жетекчиси

17

Өрт өчүрүүчү автомобилдер үчүн өрт өчүрүүгө чыгуу жолдомолору

Сменанын жетекчиси

18

Бөлүктүн байланыш пунктунун журналы

Сменанын жетекчиси

Газ-түтүндөн коргоо кызматы боюнча (бар болсо)

19

Газ-түтүндөн коргоочунун өздүк картасы

Өрт коопсуздугу, эмгекти коргоо жана коопсуздук техникасы боюнча инженер

20

Газ-түтүндөн коргоочулардын жеке дем алуу органдарын коргоо каражаттарын бекитүү (кайра бекитүү) жөнүндө буйрук

Кадрлар бөлүмү

21

Кызматкерлерге коопсуздук күзөтүндө өз алдынча иштөөгө уруксат берүү жөнүндө буйруктан көчүрмө

Кадрлар бөлүмү

22

Газ-түтүндөн коргоо кызматынын күзөтүндө газ-түтүндөн коргоо кызматынын мүлкүнүн тизмеси (жабдуулар, аспаптар, маска шаймандары, баллондор, регенеративдик патрондор, дем алуу органдарын жеке коргоо каражаттары)

Газ-түтүндөн коргоо кызматынын күзөтү

23

Дем алуу органдарын жеке коргоо каражаттарын тейлөө жана газ-түтүндөн коргоо кызматынын күзөтүндө иштөөдөгү коопсуздук чаралары жөнүндө нускама

Газ-түтүндөн коргоо кызматынын күзөтү

24

Дем алуу органдарын жеке коргоо каражаттарын оңдоого берүү жөнүндө акт

Газ-түтүндөн коргоо кызматынын күзөтү (папкада)

25

Дем алуу органдарын жеке коргоо каражаттарын текшерүүнү каттоону эсепке алуунун № 1 журналы

Газ-түтүндөн коргоо кызматынын күзөтү

26

Дем алуу органдарын жеке коргоо каражаттарын текшерүүнү каттоону эсепке алуунун № 2 журналы

Газ-түтүндөн коргоо кызматынын күзөтү

27

Газ-түтүндөн коргоо кызматынын жумушчу звенолорун эсепке алуунун журналы

Күжүрмөн эсептеги ар бир негизги өрт өчүрүүчү автомобилге 1

Коопсуздук техникасы боюнча

28

Коопсуздук техникасы боюнча инструктаж журналы

Өрт коопсуздугу, эмгекти коргоо жана коопсуздук техникасы боюнча инженер

Өрт өчүрүүчү техникалар боюнча

29

Өрт өчүрүүчү автомобилдерге айдоочулук курамды бекитип берүү жөнүндө буйруктан көчүрмө

Өрт коопсуздугу, эмгекти коргоо жана коопсуздук техникасы боюнча инженер

30

Өрт өчүрүүчү автомобилдерди техникалык тейлөө боюнча график, өрт өчүрүүчү автомобилдерди техникалык тейлөө жүргүзүүнүн план-карталары

Өрт коопсуздугу, эмгекти коргоо жана коопсуздук техникасы боюнча инженер

31

Өрт өчүрүүчү автомобилдерди кабыл алуу-өткөрүү журналы

Кароол башчы (сменанын жетекчиси)

Өрткө каршы техникалык шаймандар боюнча

32

Өрткө каршы техникалык шаймандарды сыноо журналы

Кароол башчы (сменанын жетекчиси)

33

Ар бир негизги жана атайын автомобилге өрткө каршы техникалык шаймандардын тизмеси

Кароол башчы (сменанын жетекчиси)

34

Диэлектрдик каражаттарды сыноо актылары

Өрт коопсуздугу, эмгекти коргоо жана коопсуздук техникасы боюнча инженер

Жеңчелер чарбасы боюнча

35

Өрт жеңчелеринин паспорттору

Кароол башчы (сменанын жетекчиси)

36

Жеңчелерди эсепке алуу журналы

Кароол башчы (сменанын жетекчиси)

37

Өрт жеңчелеринин акыркы сыноосунун ведомосту

Кароол башчы (сменанын жетекчиси)

Өрткө каршы суу менен жабдуу боюнча

38

Өрткө каршы гидранттарды жана башка суу менен камсыздоо булактарын текшерүү журналы

Өрт коопсуздугу, эмгекти коргоо жана коопсуздук техникасы боюнча инженер

39

Объекттин суу булактарынын маалымдамасы жана планшети

Күжүрмөн эсептеги ар бир негизги автомобилге

Уюмдарда жана объекттерде ведомстволук (объекттик) өрткө каршы кызматтардын ишин жүзөгө ашыруу эрежелерине 2-тиркеме

Ведомстволук өрткө каршы кызматынын негизги өрт өчүрүүчү автомобилдеринин санын аныктоо

1. Ведомстволук өрткө каршы кызматы үчүн ылайыкташтырылган, негизги өрт өчүрүүчү автомобилдердин саны төмөнкүдөй аныкталат:

1) мыйзамдарда белгиленген тартипте бекитилген курулуш жана долбоорлоо чөйрөсүндөгү ченемдик укуктук актыларга ылайык;

2) объектте мүмкүн болгон өрттүн эң татаал вариантын өчүрүүгө талап кылынган суунун сарпталышынын бир өрт өчүрүүчү автомобилге эсептелген суу найы, бирок экиден кем эмеси менен берилүүчү (14 л/с) суунун сарпталышынын катышына ылайык. Алынган сан 0,5 л/сдан жогору болгондо өсүү жагына тегеректелиши керек.

2. Өрттү өчүрүүгө суунун талап кылынган чыгымынын эсеби Кыргыз Республикасынын курулуш, өрт коопсуздугун камсыз кылуу чөйрөсүндөгү ыйгарым укуктуу мамлекеттик орган тарабынан бекитилген ченемдик укуктук актыларга, эрежелерге жана нускамаларга ылайык аныкталат.

3. Мүмкүн болгон өрттүн эң татаал варианты болуп төмөнкүлөрдөгү өрт саналат:

1) мунай жана (же) газ өндүрүү боюнча объекттер үчүн эң көп өндүрүмдүүлүктөгү скважиналарда;

2) мунай сордуруучу станциялар, газ толтуруучу станциялар, мунай базалары, мунай продукттарынын кампалары, жер астындагы газ сактоочу станциялар үчүн эң чоң сыйымдуулуктагы резервуарлар;

3) негизинен газды кайра иштетүүчү заводдордун, мунайды кайра иштетүүчү заводдордун, газ компрессордук станциялардын, мунай куюучу жана мунай төгүүчү эстакадалардын, мунай химиялык продукцияларын, химиялык продукцияларды, шиналарды жана резина-техникалык буюмдарды өндүргөн ишканалардын, минералдык жер семирткичтердин, суюлтулган көмүр суутек газдарын кайра иштетүү жана алуу боюнча ишканалардын өндүрүштүк имаратында же сырткы технологиялык орнотмолорунда, көмүр казуучу кендердин, кара жана түстүү металлдар объекттеринде, элеваторлордо, жээкке жакын тайыз жерлерде мунайды жана газды өндүрүү жана даярдоо үчүн деңиздеги операцияларды колдоо базаларында;

4) электр энергиясы өнөр жайынын эң көп өрт коркунучу бар имаратында, курулмасында же сырткы орнотмосунда;

5) өнөр жай өндүрүшүнүн бардык түрлөрүнүн эң көп өрт коркунучу бар имаратында, курулмасында же сырткы орнотмосунда;

6) аэропорттордун вокзалынын имаратында;

7) жардыргыч заттардын кампалары үчүн эң чоң сыйымдуулуктагы сактоо объектинде;

8) рыноктор үчүн эң чоң соода аянты бар имаратта.