Кыргыз Республикасынын Министрлер Кабинетинин төрагасынын («Өндүрүш жана керектөө калдыктары менен иштөө жаатындагы жөнгө салуу маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө» Кыргыз Республикасынын Мыйзамынын долбооруна Кыргыз Республикасынын Министрлер Кабинетинин корутундусун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТӨРАГАСЫНЫН ТЕСКЕМЕСИ

2024-жылдын 26-апрели № 232 "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 18, 27-беренелерине ылайык:

1. Кыргыз Республикасынын Жогорку Кеңешинин депутаты М.А.Маматалиев тарабынан демилгеленген "Өндүрүш жана керектөө калдыктары менен иштөө жаатындагы жөнгө салуу маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин корутундусу тиркемеге ылайык жактырылсын.

2. Тиркелген корутунду Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.У. Жапаров

Кыргыз Республикасынын Министрлер Кабинетинин Төрагасынын 2024-жылдын 26-апрелиндеги № 232 тескемеси менен жактырылган

"Өндүрүш жана керектөө калдыктары менен иштөө жаатындагы жөнгө салуу маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин КОРУТУНДУСУ

Кыргыз Республикасынын Министрлер Кабинети "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесине ылайык Кыргыз Республикасынын Жогорку Кеңешинин депутаты М.А.Маматалиев тарабынан демилгеленген "Өндүрүш жана керектөө калдыктары менен иштөө жаатындагы жөнгө салуу маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө" Кыргыз Республикасынын Мыйзамынын долбоорун (мындан ары - Мыйзамдын долбоору) карап чыгып, төмөнкүдөй корутундуга келди.

1. Мыйзамдын долбоорунун 1-беренесинин 1-пункту жана Салыктык эмес кирешелер жөнүндө Кыргыз Республикасынын кодексинин 84-1-беренеси менен товарларды пайдалануудан калдыктарды кайра иштетүү ченемдеринин аткарылышын камсыз кылуу үчүн утилдештирүү жыйымы Кыргыз Республикасынын аймагында товарларды өндүрүүнү жүзөгө ашыруучу юридикалык жана жеке жактар, жеке ишкерлер, ошондой эле үчүнчү өлкөлөрдөн товарларды импорттоону же Евразия экономикалык бирлигине мүчө мамлекеттерден товарларды импорттоону жүзөгө ашырган жактар тарабынан төлөнөт деп сунушталууда.

"Өндүрүш жана керектөө калдыктары жөнүндө" Кыргыз Республикасынын Мыйзамынын 2-беренесине ылайык товарларды пайдалануунун калдыктарын кайра иштетүү нормативдерин аткарууну камсыз кылууга утилдештирүү жыйымын үчүнчү өлкөлөрдөн товарларды импорттоону же Евразия экономикалык бирлигине мүчө мамлекеттерден товарларды импорттоону, ошондой эле Кыргыз Республикасынын аймагында товарларды өндүрүүнү жүзөгө ашыруучу юридикалык жана жеке жактар, жеке ишкерлер төлөйт. Ошону менен бирге жогоруда аталган Мыйзамдын 28-беренесинин 7-бөлүгүнө ылайык товарларды пайдалануунун калдыктарын өз алдынча кайра иштетүүнү камсыз кылбаган товарларды өндүрүүчүлөр, импорттоочулар Салыктык эмес кирешелер жөнүндө Кыргыз Республикасынын кодексине ылайык утилдештирүү жыйымын төлөйт, ушуга байланыштуу мыйзамдын долбоорунун 1-беренесинин 1-пунктчасын "жана өз алдынча кайра иштетүүнү камсыз кылбаган" деген сөздөр менен толуктоону сунуштайбыз.

2. Мыйзамдын долбоорунун 1-беренесинин 2-пунктчасы менен жогоруда аталган Кодекстин 84-2-беренесин жаңы редакцияда баяндоо сунушталат, ага ылайык товарларды пайдалануудан калдыктарды кайра иштетүүнүн ченемдерин аткарууну камсыз кылууга утилдештирүү жыйымынын каражаттарынын өлчөмү, төлөө мөөнөтү, тартиби жана чыгымдоо багыты өндүрүш жана керектөө калдыктары менен иштөө чөйрөсүндөгү мыйзамдарга ылайык Кыргыз Республикасынын Министрлер Кабинети тарабынан белгиленет.

Мында "Өндүрүш жана керектөө калдыктары жөнүндө" Кыргыз Республикасынын Мыйзамынын 29-беренесинин 2-бөлүгүнө ылайык утилдештирүү жыйымы ушул Мыйзамдын 28-беренесинин 2-бөлүгүндө көрсөтүлгөн тизмекке ылайык товарлардын ар бир тобу, товарлардын таңгагынын тобу боюнча төмөнкүчө төлөнөт:

- товарларды өндүрүүчүлөр - квартал сайын, отчеттук кварталдан кийинки айдын 15-числосуна чейин;

- товарларды импорттоочулар - товар Кыргыз Республикасынын аймагына алып келинген учурдан тартып 15 күндөн кечиктирбестен.

Жогоруда баяндалгандарга байланыштуу Мыйзамдын долбоорунун 1-беренесинин 2-пунктчасындагы "мөөнөтү" деген сөздү алып салууну максатка ылайык деп эсептейбиз.

3. Мыйзамдын долбоорунун 2-беренеси менен Кыргыз Республикасынын Салык кодексинин 297-беренесинин 1-бөлүгүн (Кыргыз Республикасынын аймагына импорттолуучу, КНС төлөөдөн бошотулуучу товарлар) калдыктарды сорттоо, иштетүү, кайра иштетүү жана зыянсыздандыруу үчүн жабдууга КНС төлөөдөн бошотууну караган 26-пунктча менен толуктоо сунушталууда.

Ошол эле учурда Кыргыз Республикасынын Финансы министрлигинин корутундусунда Кыргыз Республикасынын Салык Кодексинин 297-беренесине сунушталган толуктоо берилүүчү салыктык жеңилдиктердин тизмегин кеңейте тургандыгы жана мамлекеттик бюджеттин белгилүү бир жоготууларына алып келиши мүмкүн экендиги белгиленген. Алсак жогоруда аталган Кодекстин 301-беренесинин 1-бөлүгүнө ылайык КНС төлөөчү же бирдиктүү салыктын негизинде салык салуунун жөнөкөйлөтүлгөн тутуму режимин пайдалануучу субъект тарабынан наркы 5000 эсептик көрсөткүчтөн кем болбогон товарларды Кыргыз Республикасынын аймагына импорттоодо импортко КНС төлөөдөн бошотулат, эгерде товар түздөн-түз өзүнүн өндүрүштүк максаттары үчүн негизги каражаттар катары ташып кирилсе. Ошентип калдыктарды сорттоо, иштетүү, кайра иштетүү жана зыянсыздандыруу үчүн импорттолуучу жабдууну КНСтен бошотуунун зарылдыгы жок. Ушуга байланыштуу Кыргыз Республикасынын Финансы министрлиги өзүнүн корутундусунда Мыйзамдын долбоорунун 2-беренесин алып салуу зарыл деп эсептейт.

4. Мыйзамдын долбоорунун 3-беренесинин 1-пунктунда "213-3" деген цифралардан кийин "-берене" деген сөздү (мамлекеттик тилдеги вариантка) жазуу керек.

5. Товарларды пайдалануудан калдыктарды кайра иштетүүнүн белгиленген ченемдерин аткарбоо жана утилдештирүү жыйымын төлөө тартибин бузуу үчүн мыйзамдын долбоору менен Кыргыз Республикасынын Укук бузуулар жөнүндө кодексинин 213-3-беренесин толуктоо аркылуу жеке жактарга 75 эсептик көрсөткүч жана юридикалык жактарга - 230 эсептик көрсөткүч өлчөмүндө айып пулду киргизүү сунушталууда. Мында жогоруда көрсөтүлгөн эсептик көрсөткүчтөрдүн өлчөмдөрү жасалган укук бузуунун мүнөзүнө жана адилеттүүлүк принцибине ылайык келерин белгилейбиз. Ушуга байланыштуу негиздеме-маалымкатты тиешелүү маалымат менен толуктоону сунуштайбыз.

6. Мыйзамдын долбоорунун 4-беренесинин 2-пункту менен "Кыргыз Республикасына лицензиялык-уруксат берүү тутуму жөнүндө" Кыргыз Республикасынын Мыйзамынын 16-беренесинин 4-пунктун төмөнкүдөй редакцияда баяндоо сунушталууда:

"I-V класстагы кооптуу калдыктарды ташуу (анын ичинде трансчек аралык), кайра иштетүү, сактоо, көмүү.". Укук колдонуу практикасында кемчиликтерди болтурбоо үчүн I-V класстагы кооптуу калдыктар боюнча маалыматтарды сунушталган редакцияда негиздеме-маалымкатта берүү зарылдыгы жөнүндө белгилейбиз.

7. Мыйзамдын долбоорунун 5-беренесинин 3-бөлүгү менен Кыргыз Республикасынын Министрлер Кабинетине алты айлык мөөнөттө өзүнүн ченемдик укуктук актыларын ушул Мыйзамга ылайык келтирүү сунушталган. Ошол эле учурда "Кыргыз Республикасынын ченемдик укуктук актылары жөнүндө" Кыргыз Республикасынын Мыйзамынын 24-беренесине ылайык эгерде ченемдик укуктук актыны колдонуу үчүн башка ченемдик укуктук актыларга өзгөртүүлөрдү жана толуктоолорду киргизүү зарыл болсо, ченемдик укуктук актынын киргизилүүчү долбооруна ушундай өзгөртүүлөр жана толуктоолор киргизилүүчү башка ченемдик укуктук актылардын долбоорлору тиркелүүгө тийиш экендигин белгилей кетүү зарыл, ушуга байланыштуу негиздеме-маалымкатты Кыргыз Республикасынын Министрлер Кабинетинин ченемдик укуктук актыларын иштеп чыгуу жана аларга тиешелүү өзгөртүүлөрдү киргизүү зарылдыгын камтыган маалымат менен толуктоону сунуштайбыз.

8. Кыргыз Республикасынын Министрлер Кабинетинин 2022-жылдын 10-августундагы № 444 "Ишкердик субъекттеринин ишине ченемдик укуктук актылардын жөнгө салуучу таасирин талдоо методикасын бекитүү жөнүндө" токтому менен бекитилген Ишкердик субъекттеринин ишине ченемдик укуктук актылардын жөнгө салуучу таасирин талдоо методикасынын 29-пунктуна ылайык аналитикалык катка жумушчу топтун бардык мүчөлөрү кол коюшат жана иштеп чыккан органдын жетекчиси же ал ыйгарым укук берген адам тарабынан бекитилет. Жумушчу топтун мүчөсү аналитикалык катка кол коюудан баш тарткан учурда документке жумушчу топтун мүчөсүнүн баш тартуусунун себептерин негиздөө менен түшүндүрмөсү, ал болбогон учурда жумушчу топтун түшүндүрмөсү тиркелет.

Мында мыйзамдын долбоорунда Кыргыз Республикасынын Укук бузуулар жөнүндө кодексине толуктоолор көрсөтүлгөн эмес. Ошондой эле сунушталган жөнгө салуу этабында аныкталган көйгөйлөрдү чечүүгө багытталган жөнгө салуу максатын аныктоо жана баяндоо жана максатка жетүүдөгү прогрессти баалоо үчүн колдонулуучу сандык жана сапаттык көрсөткүчтөрдүн тизмегин аныктоо зарыл. Аналитикалык кат төмөнкүлөр менен коштолот:

- сунушталган жөнгө салуудан күтүлүүчү экономикалык натыйжаларды деталдуу баалоо;

- Ишкердик субъекттеринин ишине ченемдик укуктук актылардын жөнгө салуучу таасирин талдоо методикасынын 1-тиркемесине ылайык форма боюнча ченемдик укуктук актынын долбоорун иштеп чыгуу жөнүндө кабарлоо;

- Ишкердик субъекттеринин ишине ченемдик укуктук актылардын жөнгө салуучу таасирин талдоо методикасынын 2-тиркемесине ылайык форма боюнча сунуштардын жана жооптордун реестри (болсо);

- Ишкердик субъекттеринин ишине ченемдик укуктук актылардын жөнгө салуучу таасирин талдоо методикасынын 4-тиркемесине ылайык форма боюнча жөнгө салуучу таасирин талдоо жүргүзүүдө коомдук консультацияларды өткөрүү жөнүндө отчет.

Берилген аналитикалык эскертүү жогоруда белгиленген эскертүүлөрдү эске алуу менен аяктоого тийиш.

10. Мыйзамдын долбоорун тариздөөнү Кыргыз Республикасынын Жогорку Кеңешинин 2015-жылдын 26-июнундагы № 5389-V "Мыйзам чыгаруу техникасы боюнча нускаманы бекитүү жөнүндө" токтому менен бекитилген Мыйзам чыгаруу техникасы боюнча нускаманын 55-пунктуна ылайык кайра кароону сунуштайбыз.

Жогоруда баяндалгандардын негизинде Кыргыз Республикасынын Министрлер Кабинети "Өндүрүш жана керектөө калдыктары менен иштөө жаатындагы жөнгө салуу маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө" Кыргыз Республикасынын Мыйзамынын долбоорун сунушталган редакцияда кабыл алууну максатка ылайыксыз деп эсептейт.