9-берене. Аксакалдар сотунун мүчөлөрүнүн милдеттери

Аксакалдар сотунун мүчөсү төмөнкүлөргө милдеттүү:

1) Кыргыз Республикасынын Конституциясын, Кыргыз Республикасынын мыйзамдарын жана башка ченемдик укуктук актыларын сактоого;

2) адеп-ахлак жалпы кабыл алынган ченемдерин, этикалык жүрүм-турум стандарттарын сактоого;

3) өзү аксакалдар сотунун мүчөсү болуп шайланган тиешелүү аймактын бир бөлүгүнүн жергиликтүү коомдоштугунун мүчөлөрүнүн алдында мезгил-мезгили менен, бирок жылына бир жолудан кем эмес өзүнүн иши жана аксакалдар сотунун иши тууралуу отчет берүүгө;

4) өз алдынча жана уюштурулган курстарга окуудан өтүү аркылуу укуктук сабаттуулук деңгээлин жогорулатууга, укуктун ченемдерин колдонуу көндүмдөрүн өркүндөтүүгө, аксакалдар сотунун ишине тиешелүү Кыргыз Республикасынын ченемдик укуктук актыларын окуп-үйрөнүүгө;

5) иштерди (материалдарды) кароодо өзүнө белгилүү болуп калган жеке, үй-бүлөлүк, коммерциялык жана башка сырларга тиешелүү маалыматтарды ачыкка чыгарбоого;

6) аксакалдар сотунун мүчөсүнүн ар-намысына жана кадыр-баркына шек келтирген аракеттерге жол бербөөгө.