Кыргыз Республикасынын Министрлер Кабинетинин Төрагасынын (Кыргыз Республикасынын Жогорку Кеңешинин депутаты Д.А.Джумабеков тарабынан демилгеленген «Кыргыз Республикасынын Салык кодексине өзгөртүүлөрдү киргизүү жөнүндө» Кыргыз Республикасынын Мыйзамынын долбооруна Кыргыз Республикасынын Министрлер Кабинетинин тиркелген корутундусун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТӨРАГАСЫ ТЕСКЕМЕ

2023-жылдын 12-декабры № 643 "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесине ылайык:

1. Кыргыз Республикасынын Жогорку Кеңешинин депутаты Д.А.Джумабеков тарабынан демилгеленген "Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин тиркелген корутундусу жактырылсын.

2. Бул корутунду Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.Жапаров

тиркеме

Кыргыз Республикасынын Министрлер Кабинетинин Төрагасынын 2023-жылдын 12-декабрындагы № 643 тескемеси менен жактырылган

"Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин КОРУТУНДУСУ

Кыргыз Республикасынын Министрлер Кабинети "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 27-беренесине ылайык Кыргыз Республикасынын Жогорку Кеңешинин депутаты Д.А.Джумабеков тарабынан демилгеленген "Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбоорун (мындан ары - Мыйзамдын долбоору) карап чыгып, төмөнкүдөй корутундуга келди. Мыйзамдын долбооруна негиздеме-маалымкатта ушул мыйзамдын долбоорун иштеп чыгуунун максаты республикалык бюджеттин каражаттарын натыйжалуу пайдалануу, патент алууга эмгек чыгымдарын кыскартуу жана мүлктү мурастык укук мурастоо тартибинде өткөрүп берүү учурунда мураскорлордун укуктарын ишке ашыруу болуп саналат деп көрсөтүлгөн. Алсак, Мыйзам долбоорунда Кыргыз Республикасынын Салык кодексинин 191-беренесинин 2-бөлүгүн ден соолугунун мүмкүнчүлүктөрү чектелүү, туруктуу багууга жана көзөмөлгө муктаж болгон баланын жеке ассистентинин кызматына акы төлөөнү, киреше салыгын төлөөдөн бошотууну караган 5-пункт менен толуктоо сунушталат. Айрым учурларда балдар гана ден соолугунун абалы боюнча туруктуу көзөмөлчүлүккө муктаж эмес экенин эске алып, Кыргыз Республикасынын Салык кодексинин 191-беренесинин 2-бөлүгүнүн 5-пунктунун сунушталган редакциясын төмөнкүдөй редакцияда баяндоону сунуштайбыз: "5) туруктуу багууга жана көзөмөлгө муктаж болгон, ден соолугунун мүмкүнчүлүктөрү чектелүү баланын жана/же адамдын жеке ассистентинин кызматына акы төлөө.". Ошондой эле Мыйзамдын долбоорунда Кыргыз Республикасынын Салык кодексинин 191-беренесинин 6-бөлүгүн мураска алынган кыймылсыз мүлктү сатуудан алынган кирешеге киреше салыгын төлөөдөн бошотууну караган 5-пункт менен толуктоо сунушталат. Бирок Кыргыз Республикасынын Салык кодексинин 191-беренесинин 5-бөлүгүнүн 3-пунктуна ылайык ишкердик ишти жүргүзүү процессинде жеке адам алган мүлктү, жумуштарды, кызмат көрсөтүүлөрдү кошпогондо, мурастоо же белекке берүү тартибинде ошол жеке адам тарабынан жакын туугандарынан алынган мүлктүн, жумуштардын, кызмат көрсөтүүлөрдүн наркына киреше салыгы салынбайт. Мындан тышкары, Кыргыз Республикасынын Салык кодексинин 191-беренесинин 6-бөлүгүнүн 2-пунктунда кыймылсыз мүлккө болгон укуктарды мамлекеттик каттоонун бирдиктүү тутумунун органынын маалыматтарына ылайык турак жай фондуна таандык болгон жана ушул кыймылсыз мүлккө укук катталган датадан тартып кийинки бир жылдан ашык убакыт жеке менчик укугунда салык төлөөчүгө таандык кыймылсыз мүлккө киреше салыгы салынбайт деп каралган. Ошентип, Кыргыз Республикасынын Салык кодексинин колдонуудагы редакциясынын жоболорунда мураска алынган кыймылсыз мүлктү киреше салыгын төлөбөстөн сатууга мүмкүндүк берүүчү ченемдер каралган. Ушуга байланыштуу Кыргыз Республикасынын Салык кодексин сунушталган ченем менен толуктоону максатка ылайыксыз деп эсептейбиз. Мында тактоо киргизүү максатында Кыргыз Республикасынын Салык кодексинин 191-беренесинин 6-бөлүгүнүн 2-пунктун төмөнкүдөй мазмундагы экинчи абзац менен толуктоону сунуштайбыз: "Эгерде сатылуучу мүлк салык төлөөчү тарабынан тартуулоо келишими боюнча же жакын тууганынан мурастоо тартибинде алынган болсо, анда белгиленген бир жылдык мөөнөттө тартуулоочунун же мурас калтыруучунун менчик укугу катталган датадан тартып эсептелет.". Жогоруда айтылгандардын негизинде Кыргыз Республикасынын Министрлер Кабинети Мыйзамдын долбоорун көрсөтүлгөн сын пикирлерди жана сунуштарды эске алуу менен жеткире иштеп чыгууну зарыл деп эсептейт.