Кыргыз Республикасынын Министрлер Кабинетинин (2026-жылга чейин «Бир айыл - бир продукт» улуттук экономикалык долбоорун ишке ашыруу планын бекитүү тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН тескемеси 2023-жылдын 29-майы № 285-т Кыргыз Республикасынын Президентинин 2023-жылдын 20-февралындагы № 29 "Бир айыл - бир продукт" улуттук экономикалык долбоору жөнүндө" Жарлыгын ишке ашыруу максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. Төмөнкүлөр бекитилсин:

1) 2026-жылга чейин "Бир айыл - бир продукт" улуттук экономикалык долбоорун ишке ашыруу планы 1-тиркемеге ылайык;

2) 2026-жылга чейин "Бир айыл - бир продукт" улуттук экономикалык долбоорун ишке ашыруу боюнча иш-чаралар планы 2-тиркемеге ылайык.

2. Кыргыз Республикасынын аткаруу бийлигинин мамлекеттик органдары, Кыргыз Республикасынын Президентинин облустардагы ыйгарым укуктуу өкүлдөрү жыл сайын, отчеттук мезгилден кийинки жылдын 1-июнуна чейинки жана 31-декабрына чейинки мөөнөттө 2026-жылга чейин "Бир айыл - бир продукт" улуттук экономикалык долбоорун ишке ашыруу боюнча иш-чаралар планын ишке ашыруунун жүрүшү жөнүндө маалыматты Кыргыз Республикасынын Экономика жана коммерция министрлигине берип турсун.

3. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

4. Бул тескеме расмий жарыяланган күндөн тартып он беш күн өткөндөн кийин күчүнө кирет.

Кыргыз Республикасынын Министрлер Кабинетинин Төрагасы

А.У.Жапаров

1-тиркеме

2026-жылга чейин "Бир айыл - бир продукт" улуттук экономикалык долбоорун ишке ашыруу ПЛАНЫ

I. Кырдаалды талдоо

1.1. Тармактык адистештирүү

Кыргыз Республикасында "Бир айыл - бир продукт" (мындан ары - БАБП) долбоору бир нече жылдан бери (2007-жылдан тартып) Ысык-Көл облусунда ишке ашырылып келет жана жумуш орундарын түзүү, бал, накта ширелер жана кыям, жемиштер, кургатылган жемиштер, кийиз буюмдары ж.б. сыяктуу товарларды өндүрүүдөн жана сатуудан пайда алуу түрүндөгү оң натыйжаларды көрсөтүүдө. Долбоордун башкы милдети - жергиликтүү жамааттардын туруктуу ишине өзгөчө басым жасоо менен БАБП ыкмасы аркылуу чакан бизнести илгерилетүүнүн туруктуу моделин жайылтуу. 1-фаза: Ысык-Көл облусунда жергиликтүү жамааттарды активдештирүү долбоору (2007-2010) (J-СЕР) БАБП методун колдонуу менен J-СЕР долбоору Япония эл аралык кызматташтык агенттиги (JIСА) тарабынан жүргүзүлгөн "Ысык-Көл аймагын комплекстүү өнүктүрүү" изилдөөсүнүн жыйынтыгы боюнча 2007-жылы Ысык-Көл облусунда старт алган жана бул мезгил БАБП долбоорунун 1-фазасы деп аталат. Бул этапта 7 пилоттук өндүрүүчү тандалып алынган жана жергиликтүү ресурстарды колдонуу менен кыям, кийиз, самын сыяктуу буюмдар иштелип чыккан. Долбоордун биринчи фазасындагы иштер жергиликтүү жаратылыш ресурстарын пайдалануу менен өнөр жайды өнүктүрүүнүн потенциалын жана туризмди өнүктүрүү үчүн чоң мүмкүнчүлүктөрдү ырастады. 2-фаза: Ысык-Көл облусунда БАБП ыкмасы аркылуу чакан бизнести илгерилетүү жолу менен жергиликтүү жамааттарды активдештирүү (2010-2016) Төмөндө БАБП долбоорунун 2-фазасынын өзгөчөлүктөрү жана жетишкендиктери берилген:

1) БАБП концепциясын кеңири жайылтуу жана "Бир айыл - бир продукт" ассоциациясы" юридикалык жактардын бирикмесин (мындан ары - БАБП ассоциациясы) түзүү;

2) БАБП ассоциациясынын ишин колдоо үчүн "БАБП+1" коомдук бирикмесин түзүү;

3) продукттарды баалоо үчүн "Ысык-Көл Бренд" комитетин түзүү;

4) сатуу жана маркетинг системасын түзүү;

5) БАБПта чыгарылган продукцияны экспорттоо.

Долбоордун 2-фазасынын өзгөчөлүгү болуп долбоордо пилоттук топтор тандалып алынган эмес жана БАБП концепциясын түшүнүү шартында жергиликтүү өндүрүүчүлөрдүн катышуусу чектелген жок. Ошентип, долбоордун 2-фазасы Ысык-Көл облусунда БАБП концепциясын кеңири жайылтты. Анын натыйжасында БАБП ишине көбүрөөк адамдар тартылды. Жергиликтүү өндүрүүчүлөр менен долбоордун ортосундагы мамиле долбоордун концепциясын түшүнүүгө жана өз ара түшүнүшүүгө негизделген. Долбоорду ишке ашыруу үчүн пилоттук аянтчалар же конкреттүү өндүрүүчүлөр тандалган жок. Жергиликтүү ресурстарды колдонуу менен уникалдуу продукттарды чыгарууну каалагандардын бардыгы БАБП кыймылына кошулду жана БАБП кыймылын андан ары жайылтуу жана кеңейтүү үчүн маанилүү аянтча болуп калган БАБП ассоциациясын түзүүнү демилгелешти. 3-фаза: Ысык-Көл БАБП моделин өлкөнүн башка региондоруна жайылтуу долбоору (2017-2022) Долбоордун 3-фазасынын иштери төмөнкүдөй багыттарды камтыды:

- БАБП методун колдонуу менен мамлекеттик-жеке өнөктөштүктүн (мындан ары - МЖӨ) негизинде жергиликтүү өнөр жайды илгерилетүү үчүн Ысык-Көл БАБП моделин ишке киргизүүнүн түзүмүн иштеп чыгуу;

- ар бир облуста баалоо комитетинин функциясын айкалыштырган БАБП платформасын түзүү;

- БАБП региондук дүкөндөрүн түзүү, анда жергиликтүү региондук уюмдар менен кызматташууда региондордон келген продукциялар көргөзмөгө коюлат;

- ар бир облустун соода белгисин иштеп чыгуу, ал облустун баалоо комитетинин тандоосунан өткөн продукттарга ыйгарылат;

- БАБП борборлорунда (Бишкек ш. жана Каракол ш.) бренд-продукттарды сатуу, тышкы рынокторго чыгуу;

- борбордук деңгээлде МЖӨ платформасынын жолугушууларын, бренд-продукттардын конкурсун өткөрүү.

1.2. Региондордо долбоордун моделин ишке ашыруу

2017-жылдан тартып Ысык-Көл БАБП моделин өлкөнүн башка региондоруна жайылтуу боюнча долбоордун 3-фазасынын алкагында (2017-2022) чийки зат жана башка региондордун өндүрүүчүлөрү боюнча изилдөөлөр жүргүзүлгөн, өндүрүүчүлөр үчүн да, мамлекеттик кызматкерлер үчүн да Ысык-Көл облусуна көптөгөн таанышуу сапарлары уюштурулган. Демилгелүү жана активдүү өндүрүүчүлөр жергиликтүү региондук ресурстарды пайдалануу менен продукция чыгара башташты. Бүгүнкү күндө 631 продукт иштелип чыкты, алардын айрымдары региондук брендге ээ болуп, Бишкек шаарында жайылтылууда. БАБП долбоору жаңы идеяларды жаратуу жана жаңы продукттарды жаратуу менен өндүрүүчүлөрдү колдойт. Мисалы Талас облусу төө буурчак менен белгилүү. Бирок буга чейин дыйкандар төө буурчакты чийки зат катары экспорттоп, сатышкан. Ал эми төө буурчакты кыргызстандыктар сейрек жешчү жана мурда кайра иштетишчү эмес. Ошентип, долбоордун алкагында печенье, манжу, чиликонкан, таттуу буурчак ж.б. сыяктуу төө буурчактан жасалган түрдүү азыктар иштелип чыгып, кыргыз коомунда төө буурчакты колдонуу маданиятын калыптандыруу түптөлө баштады. Дагы бир мисал болуп Нарын облусундагы Өрмөк эсептелет - долбоор продукттун сапатын жакшыртууну колдойт жана бул продуктту япониялык "Мужи" компаниясына сатууга күч-аракетин жумшайт. Мындан тышкары Ысык-Көл облусунун мисалында ар бир облустун бренд-комитети жана бренд-логосу иштелип чыкты. Региондордун ортосунда таза атаандаштыкты түзүү жана келечекте Кыргыз Республикасынын Улуттук брендин түзүү максатында жыл сайын бардык региондор арасында бренддер конкурсу өткөрүлүүдө.

1.3. БАБП долбоорунун өлкөнүн экономикасына кошкон салымы

"БАБП+1" коомдук бирикмесинин маалыматына ылайык БАБП долбоорунун жетишкендиктеринин бири 2011-жылдан баштап япониялык "Мужи" компаниясы менен кийизден жасалган буюмдарды экспорттоо боюнча кызматташуу болду. Бардык мезгилдеги контракттардын саны 167ди түздү, жалпы суммасы 238 млн. сомдон ашык. Өндүрүлгөн продукция Японияга, Кытай Эл Республикасына, Америка Кошмо Штаттарына жана Казакстан Республикасына экспорттолот.

1.4. БАБП долбоорун жөнгө салуу

БАБП улуттук долбоорунун ишин мамлекеттик жөнгө салуу өзгөчөлүктөргө ээ эмес жана ишкердик субъекттеринин, анын ичинде чакан ишкердик субъекттеринин ишин жөнгө салуучу мыйзамдардын жалпы ченемдеринин алкагында жүзөгө ашырылат.

1.5. БАБП долбоорунун моделин башка өлкөлөргө жайылтуу тажрыйбасы

БАБП долбоорунун 4-фазасын - Кыргыз Республикасынын БАБП долбоорунун моделин башка өлкөлөргө жайылтууну ишке ашыруунун алкагында долбоордун ийгиликтүү моделин коңшу өлкөлөргө (Казакстан Республикасы, Өзбекстан Республикасы) жайылтуу жана ишке ашыруу пландалган. 2021-жылдын 3-5-ноябрында Өзбекстан Республикасынын Каракалпакстандын Бозатау, Кунград жана Чимбай райондорунда "Бир айыл - бир продукт методунун негиздери" темасында бизнес-тренингдер өткөрүлдү, анда Япониядан жана Кыргызстандан келген эксперттер чакан жана орто бизнести өнүктүрүү чөйрөсүндөгү ийгиликтүү тажрыйбалары менен бөлүштү. Япония Өкмөтү тарабынан каржыланган БУУЭП жана ЮНФПАнын "Арал регионунда экологиялык, экономикалык алсыздыктарга карата, ошондой эле калктын саламаттыгы маселелеринде жергиликтүү жамааттардын жашоого туруктуулугунун потенциалын бекемдөө" биргелешкен программасынын алкагында окутуу демилгеленди. Тренингдерде БАБП кыймылынын тарыхын айтып беришти жана БАБП ыкмасын колдонуу менен бизнести кантип жасоо керектигин түшүндүрүштү, ошондой эле болгон жергиликтүү ресурстарды пайдалануу менен товарларды өндүрүүнү уюштуруу методу, продукцияны илгерилетүү, сапатты контролдоо, брэндинг жана башка көптөгөн маселелерди талкуулашты. Казакстанда БАБП долбоору 2021-жылдын 12-ноябрынан баштап ишке киргизилген жана Азия өнүктүрүү банкынын жана Казакстандагы БУУнун Өнүктүрүү программасынын техникалык жана финансылык колдоосунда Казакстан Республикасынын "Атамекен" Улуттук экономика министрлиги жана Казакстан Республикасынын Улуттук ишкерлер палатасы тарабынан ишке ашырылып жаткан "Ковид-19 пандемиясына каршы күрөшүүдө Казакстан үчүн тилектештик фонду" долбоорунун алкагында өлкөнүн 4 регионунда: Жамбул, Батыш-Казакстан, Костанай жана Мангыстау облустарында пилоттук режимде ишке ашырылууда. II. Жетишкендиктер жана көйгөйлөр

2.1. Негизги жетишкендиктер

Долбоордун максаты - айыл тургундарын бизнеске тартуу жана керектүү өндүрүштөрдү ачуу. 1-фаза - Ысык-Көл облусунда жергиликтүү жамааттарды активдештирүү долбоорун (2007-2010) ишке ашыруунун натыйжасында Ысык-Көл облусунда 7 пилоттук топ ишке киргизилген (кийизден жасалган буюмдар, кургатылган жемиштер, кыям, самын). 2-фаза - Ысык-Көл облусунда БАБП ыкмасы аркылуу чакан бизнести илгерилетүү жолу менен жергиликтүү жамааттарды активдештирүү долбоорунун (2012-2016-жж.) алкагында төмөнкүлөр түзүлдү:

- 2011-жылы БАБП ассоциациясы;

- 2012-жылы "Ысык-Көл Бренд" комитети

- 2014-жылы "БАБП+1" коомдук бирикмеси.

3-фаза - Ысык-Көл БАБП моделин өлкөнүн башка региондоруна жайылтуу долбоорун (2017-2020-жылдар) ишке ашыруунун натыйжасында:

- БАБП методун колдонуу менен МЖӨ негизинде жергиликтүү өнөр жайды илгерилетүү үчүн Ысык-Көл БАБП моделин ишке киргизүү түзүмү иштелип чыкты;

- ар бир облуста баалоо комитетинин функцияларын айкалыштырган БАБП платформасы түзүлдү;

- БАБП региондук дүкөндөрү уюштурулду, анда андан ары сатуу үчүн региондордон продукция көргөзмөгө коюлат;

- Кыргыз Республикасынын ар бир облусунун соода белгилери иштелип чыкты, алар баалоо комитетинин тандоосунан өткөн продукцияларга ыйгарылат;

- БАБП борборлорунда (Бишкек ш. жана Каракол ш.) бренд-продукцияларды сатуу тажрыйбасы топтолду, тышкы рынокторго чыгуу ишке ашырылды;

- МЖӨ платформасынын бир катар жолугушуулары жана бренд-продукттарга борбордук деңгээлде конкурс өткөрүлдү.

БАБПтын жергиликтүү калктын жашоосуна тийгизген таасири:

- жергиликтүү тургундар жергиликтүү ресурстарды кантип пайдалануу жана суроо-талапка ээ болгон товарларды өндүрүү боюнча билим жана көндүмдөргө ээ болушат. Ошентип, алар БАБП ыкмасын колдонуп, чакан бизнести жүргүзүүнү үйрөнүшөт;

- жергиликтүү өндүрүүчүлөр өндүрүштүк иш-аракеттерден акча таба башташат;

- Ысык-Көлдүк өндүрүүчүлөр 10 жылдан ашык убакыттан бери Япониянын "Муджи" компаниясына кийиз продукциясын экспорттоп келишет. Быйыл Ысык-Көлдүн өндүрүүчүлөрү гана эмес, Нарындын өндүрүүчүлөрү да өндүрүштүк ишке кошулуп, өз продукцияларын Японияга экспорттошту;

- региондордон жергиликтүү өндүрүүчүлөр региондук дүкөндөрдө, ошондой эле БАБП борборлорунда (Бишкек ш. жана Каракол ш.) өз продукцияларын көргөзмөгө коюуга жана сатууга мүмкүнчүлүк алышты.

Ысык-Көл облусу боюнча чеберканалардын саны: кийизди даярдоо боюнча чеберканалар - 12; азык-түлүк чеберканалары - 4; косметикалык чеберканалар - 1; Каракол шаарындагы БАБП окуу-өндүрүштүк борбору - 1. Ар бир облустагы чеберканалардын саны: Талас облусу - 7; Нарын облусу - 19; Ош облусу облусу - 8; Жалал-Абад облусу - 8; Баткен облусу - 5; Ысык-Көл облусу - 18. Бардыгы - 65.

2.2. 2026-жылга чейин "Бир айыл - бир продукт" улуттук экономикалык долбоорун ишке ашыруунун негизги тоскоолдуктары

Региондордо 2026-жылга чейин "Бир айыл - бир продукт" улуттук экономикалык долбоорун (мындан ары - БАБП-2026) ишке ашырылышын кечеңдетүүчү факторлор болуп тармактардын спецификалык тоскоолдуктары саналат:

- финансылык ресурстардын жоктугу;

- жайлардын жоктугу;

- ишканалардын потенциалынын чектелгендиги;

- ички рыноктун чакандыгы;

- региондук инфраструктуранын өнүкпөгөндүгү;

- керектүү квалификациядагы кадрлардын жетишсиздиги же жоктугу.

III. Максаты БАБП-2026 ишке ашыруунун максаты айыл чарбасын жүргүзгөн республиканын региондорунда өндүрүшкө дем берүү жана жөнгө салуу, жумушсуздук көйгөлөрүн чечүү, бизнести башкаруу, маркетинг жана продукцияны сатуу үчүн мүмкүнчүлүктөрдү кеңейтүү көз карашынан алганда өндүрүүчүлөрдө көндүмдөрдү өнүктүрүү жана айыл калкынын социалдык-экономикалык абалын жакшыртуу болуп саналат. IV. Артыкчылыктары Андан аркы натыйжаларга жетишүү үчүн мамлекеттик органдардын, фонддордун, академиялык чөйрөлөрдүн, ассоциациялардын, бизнес-сектордун күч-аракеттерин бириктирүү зарыл. БАБП долбоорун сапаттуу масштабдоо жана продукцияны анын концепциясы пайда болгон учурдан тартып акыркы керектөөчү сатып алганга чейин жылдыруу Кыргыз Республикасынын экономикасынын мультипликативдик өсүшүнө алып келет. Кыргыз Республикасынын ар бир айылы, шаары, району, облусу экспортко багытталган өзүнүн тар адистигине ээ болууга жана бизнести башкаруунун натыйжалуулугун жогорулатуу үчүн кооперацияланууга тийиш.

V. Милдеттери жана иш-чаралардын багыттары

Чакан бизнести илгерилетүүнүн туруктуу моделин бардык региондорго жайылтуу төмөнкү милдеттерди чечүүнү талап кылат:

1) бардык кызыкдар тараптардын жамааттык аракеттери аркылуу жакырчылыктын деңгээлин төмөндөтүү, тоскоолдуктарды жана тобокелдиктерди жоюу үчүн жергиликтүү жамааттарды, айылдарды, региондорду жана бүтүндөй өлкөнү активдештирүү;

2) жергиликтүү өндүрүштүн деңгээлинде спецификалык же уникалдуу продукцияны өндүрүүнү демилгелөө;

3) республиканын аймагынан товарлардын жана кызмат көрсөтүүлөрдүн экспортун өнүктүрүүгө көмөктөшүү, ата мекендик бренддерге жана өлкөнүн экспорттоочуларына колдоо көрсөтүү;

4) "Кыргызстанда жасалган (Made in Kyrgyzstan)" улуттук брендин түзүү жана жайылтуу;

5) региондук экономиканы өнүктүрүүгө дем берүү.

5.1. БАБП-2026 моделинин потенциалын бекемдөө

Бул долбоорду өнүктүрүүдөгү негизги тоскоолдуктардын бири болуп жергиликтүү жамааттардын туруктуу ишине өзгөчө көңүл буруу менен БАБП ыкмасы аркылуу чакан бизнести илгерилетүү чөйрөсүндө жергиликтүү адистердин компетенцияларынын жана көндүмдөрүнүн жетишсиздиги жана төмөн деңгээли саналат. БАБП-2026 моделинин потенциалын жогорулатууда колдоо чараларынын негизги багыттары адистерди кесиптик даярдоонун ар кандай деңгээлдери үчүн билим берүү программаларын кийин иштеп чыгуу менен талап кылынган адистиктерди аныктоого багытталат. Келечекте бул багытты ишке ашыруу кадрдык камсыздоонун тартыштыгын азайтууга түрткү берет.

5.2. Өндүрүлүүчү продукциянын жана экспорттун ассортиментин кеңейтүү

Азыркы учурда Кыргыз Республикасында өндүрүлгөн БАБП продукциясы (кийиз продукциясы, бал, кыям ж.б.) Японияга, Кытай Эл Республикасына, Америка Кошмо Штаттарына жана Казакстан Республикасына экспорттолот. 2022-жылы өндүрүлгөн продукциянын 46%ы экспортко сатылган. Кыргыз Республикасынын Экономика жана коммерция министрлиги БАБП моделин өлкөнүн бардык региондоруна жайылтуу боюнча чараларды көрүүдө. Ысык-Көл БАБП моделин өлкөнүн бардык башка региондоруна жайылтуу регионго жана анын базалык чийки затка негизги ролду басым жасоо менен чыгарылуучу продукциянын ассортиментин кеңейтүү үчүн мүмкүндүк берет. Чыгарылган продукцияны кеңейтүү экспортту көбөйтүү үчүн мүмкүнчүлүктөрдү түзөт, анткени БАБП чыгарган продукция чет өлкөлөрдө популярдуу жана суроо-талапка ээ. Ошондой эле бул багытты ишке ашыруунун алкагында региондук логистикалык борборлорду ирилештирүү жана чет өлкөлөрдүн рыногунун суроо-талаптарын изилдөө боюнча тиешелүү иш-чараларды өткөрүү пландалууда, алардын негизинде чыгарылган продукцияны кеңейтүүгө багыт алуу керек. Бул экспорттук иштин натыйжалуулугун жана БАБП алкагында чыгарылуучу продукттардын ички рынокто жеткиликтүүлүгүн жогорулатууга мүмкүндүк берет.

5.3. БАБП-2026 ишке ашыруу боюнча иш-чаралар планы

Жогоруда аталган милдеттерди ийгиликтүү имплементациялоо максатында БАБП-2026 ишке ашыруу боюнча иш-чаралар планы иштелип чыккан, анда конкреттүү иш-чаралар, бул иш-чараларды ишке ашырууга жооптуу мамлекеттик органдар, каржылоо булактары, ишке ашыруу мөөнөттөрү жана күтүлгөн натыйжалар көрсөтүлгөн. БАБП-2026 ишке ашыруу боюнча иш-чаралар планын аткаруу БАБП моделин Кыргыз Республикасынын бүткүл аймагында жайылтуу максаттарына жетишүүгө системалуу мамилени камсыз кылат.

5.4. БАБП-2026 ишке ашырууну каржылоо механизми

Кыргыз Республикасынын Президентинин 2023-жылдын 20-февралындагы № 29 "Бир айыл - бир продукт" улуттук экономикалык долбоору жөнүндө Жарлыгына ылайык БАБП-2026 катышуучулары үчүн финансылык каражаттар Региондорду өнүктүрүү фонддорунан бөлүнөт. Кыргыз Республикасынын Министрлер Кабинетинин 2023-жылдын 6-апрелиндеги № 187 "Региондорду өнүктүрүү фонддору тууралуу типтүү жобону бекитүү жөнүндө" токтомунун "Бир айыл - бир продукт" долбоорунун бөлүгүнө өзгөртүүлөрдү киргизүү төмөнкүлөрдү билдирет:

- үлүштүк катышуу принциптеринде ишкердик субъекттери, анын ичинде БАБП-2026 катышуучулары менен биргелешкен экономикалык долбоорлорду ишке ашыруу жана мөөнөттүүлүк, акы төлөө жана кайтарымдуулук негизинде долбоорлордун стартабы;

- региондорду өнүктүрүү фонддорунун Байкоочу кеңешинин кароосунда БАБП-2026 долбоорунун билдирүүчүлөрү автоматтык түрдө артыкчылыктуу балл алышат (100 баллдан 20 балл).

VI. Күтүлүүчү натыйжалар БАБП-2026 жогорку кошумча наркы, олуттуу экспорттук потенциалы бар улуттук продукцияны өндүрүүнү камсыздай алат, мультипликативдик натыйжаны түзүүгө көмөктөшөт жана башка тармактардын өсүшүнүн драйвери боло алат. Келечекте БАБП моделин ишке ашыруу бардык региондор боюнча динамикалуу өнүгүп жаткан сектор болуп калат жана Кыргыз Республикасынын улуттук экономикасынын дүйнөдөгү атаандаштыкка жөндөмдүүлүтүн жогорулатууга өбөлгө түзөт. Ушул өнүктүрүү планынын жана 2026-жылга чейин "Бир айыл - бир продукт" улуттук экономикалык долбоорун ишке ашыруу механизминин алкагында региондук экономиканы өнүктүрүү боюнча иш-аракеттер:

- натыйжалуу колдоо механизмдери менен региондук экономиканы өнүктүрүүнүн мамлекеттик саясатын түзүү;

- ата мекендик продукциянын атаандаштыкка жөндөмдүүлүгүн жогорулатуу;

- чыгарылган продукциянын сапатынын инфраструктурасын бекемдөө жана экспорттун өсүү мүмкүнчүлүгүн кеңейтүү;

- өлкөнүн позитивдүү имиджин түзүү жана инвестициялык жагымдуулугун жогорулатуу.

VII. Жагымдуу өбөлгөлөр жана тобокелдиктер

7.1. Жагымдуу өбөлгөлөр

БАБП-2026 ийгиликтүү ишке ашыруу үчүн жагымдуу өбөлгөлөр болуп жергиликтүү ресурстардан сапаттуу продукция өндүрүү, жумуш орундарын түзүү, бизнести башкаруу, маркетинг жана продукцияны сатуу үчүн мүмкүнчүлүктөрдү кеңейтүү, жергиликтүү жана эл аралык рыноктордо продукцияны илгерилетүү, жергиликтүү бренддерди түзүү, өндүрүлгөн продукциянын баалуулугун жогорулатуу көз карашынан алганда өндүрүүчүлөрдүн көндүмдөрүн өнүктүрүү саналат. БАБП-2026 илгерилетүүнү мамлекеттик деңгээлде колдоо аны андан ары ишке ашырууда, жергиликтүү жамааттардын мүчөлөрүнүн жана өндүрүүчүлөрдүн мамлекеттин ичиндеги экономикалык ролун жогорулатууга жана эл аралык рынокторго чыгууга даярдыгына жана умтулуусуна чоң натыйжа берет жана анын натыйжасында бул колдоо туризмдин өсүшүнө жана эл аралык өнөктөштөрдүн кызыгуусуна өбөлгө түзөт.

7.2. Тобокелдиктер

БАБП-2026 Кыргыз Республикасынын бүткүл аймагында ийгиликтүү ишке ашырууну камсыз кылуунун мүмкүн болгон тобокелдиктери жана коркунучтары болуп төмөнкүлөр саналат:

- БАБП-2026 ишке ашырууну мамлекеттик бюджеттен каржылоо мүмкүнчүлүгүнүн чектелгендиги жана эл аралык уюмдар же жеке инвесторлор тарабынан колдоонун жетишсиздиги;

- БАБП-2026 ишке ашыруу боюнча иш-чаралар планын ишке ашырууда жооптуу тараптардын ортосундагы тийиштүү координациянын жана макулдашылган аракеттердин жоктугу;

- БАБП ыкмасы аркылуу жергиликтүү жамааттардын туруктуу ишине өзгөчө басым жасоо менен чакан бизнести илгерилетүү чөйрөсүндө жергиликтүү адистердин тажрыйбасынын жана көндүмдөрүнүн жоктугу.

Кыскартуулардын тизмеси:

БАБП

-

"Бир айыл - бир продукт"

БУУӨП

-

Бириккен Улуттар Уюмунун Өнүктүрүү программасы

ЮНФПА

-

Бириккен Улуттар Уюмунун Калк фонду

JIСА

-

Япониянын эл аралык кызматташтык агенттиги

"БАБП+1" КБ

-

"Бир айыл - бир продукт+1" коомдук бирикмеси

2-тиркеме

2026-жылга чейин "Бир айыл - бир продукт" улуттук экономикалык долбоорун ишке ашыруу боюнча ИШ-ЧАРАЛАР ПЛАНЫ

№

Иш-чаралардын/милдеттердин аталышы

Чаралар/аракеттер

Ишке ашыруу мөөнөтү

Күтүлүүчү натыйжалар (продукт)

Каржылоо булактары

Жооптуу аткаруучулар

I БАГЫТ. УЮШТУРУУ-ТЕХНИКАЛЫК ИШ-ЧАРАЛАРДЫ КАМСЫЗ КЫЛУУ

1

Системалык деңгээлде БАБП долбоору боюнча институттук эс тутумдун ырааттуулугун камсыз кылуу

1.1. БАБП катчылыгы жөнүндө жобонун долбоорун иштеп чыгуу жана бекитүү;

1.2. "Бир айыл - бир продукт" улуттук экономикалык долбоорунун (мындан ары - БАБП-2026) региондук бренд-комитеттердин ишинин жобосун иштеп чыгуу жана бекитүү

2023-жылдын II кварталы

БАБП катчылыгы жөнүндө жобону бекитүү тууралуу ЭКМ буйругу; "БАБП-2026 региондук бренд-комитеттердин ишинин жобосун бекитүү жөнүндө" ЭКМ буйругу

Каржылоо талап кылынбайт

ЭКМ

1.3. "Кыргызстанда жасалган (Made in Kyrgyzstan)" улуттук брендин иштеп чыгуу жана түзүү

2025-жылдын 1-январына чейин

"Кыргызстанда жасалган (Made in Kyrgyzstan)" улуттук бренди (логотиби) расмий түрдө бекитилет жана ата мекендик продукцияны илгерилетүү үчүн улуттук логотип катары кеңири жарыяланат

Министрликтердин жана ведомстволордун тиешелүү жылдарга каралган каражаттарынын чегинде

СӨП, ЭКМ

II БАГЫТ. ИШКЕ АШЫРУУ МЕХАНИЗМДЕРИ

2

БАБП долбоорунун туруктуулугун улуттук деңгээлде камсыз кылуу

2.1. БАБП долбоорун ийгиликтүү ишке ашыруу үчүн региондордун өндүрүштүк-чарбалык кубаттуулуктарын аныктоо критерийин иштеп чыгуу;

чарбакер субъекттердин, фермердик чарбалардын, кооперативдердин, айыл чарба агрегаттарынын учурдагы өндүрүштүк кубаттуулуктарынын тизмесинин картасын түзүү; БАБП долбоорун ийгиликтүү ишке ашыруу үчүн райондордун потенциалын жана спецификациясын, ошондой эле региондордун өндүрүштүк-чарбалык кубаттуулуктарынын потенциалын аныктоо

2023-жылдын II кварталы

БАБП долбоорун ийгиликтүү ишке ашыруу үчүн региондордун өндүрүштүк-чарбалык кубаттуулуктарын аныктоо критерийин иштеп чыгуу жөнүндө АЧМ буйругу; чарбакер субъекттердин, фермердик чарбалардын, кооперативдердин, айыл чарба агрегаттарынын учурдагы өндүрүштүк кубаттуулуктарынын тизмесинин картасын түзүү; чарбакер субъекттердин, фермердик чарбалардын, кооперативдердин, айыл чарба агрегаттарынын саны жана сапаты боюнча маалыматтардын тизмеси жөнүндө АЧМ буйругу

Каржылоо талап кылынбайт

ЭКМ, АЧМ

2.2. БАБП улуттук долбоорун ишке ашыруу үчүн ар бир райондо техникалык топторду түзүү;

БАБП улуттук долбоорунун катчылыгы (ЭКМ) техникалык топ менен өз ара аракеттенүү механизмин бекитсин

2023-жылдын 30-декабрына чейин

БАБП улуттук долбоорун ишке ашыруу үчүн техникалык топту түзүү жөнүндө КРП облустардагы ЫУӨ буйругу; техникалык топ менен өз ара аракеттенүү механизмин бекитүү жөнүндө ЭКМ буйругу

Министрликтердин жана ведомстволордун тиешелүү жылдарга каралган каражаттарынын чегинде

ЭКМ, КРП облустардагы ЫУӨ, Бишкек жана Ош ш. мэриялары (макулдашуу боюнча)

2.3. БАБП долбоорунун катышуучулары үчүн Региондорду өнүктүрүү фонддорунан финансылык каражаттарды бөлүү жол-жобосун жөнөкөйлөтүү

2023-жылдын 30-майына чейин

"Региондорду өнүктүрүү фонддору жөнүндө типтүү жобону бекитүү тууралуу" КР МК токтомуна өзгөртүүлөрдү киргизүү

Каржылоо талап кылынбайт

ЭКМ, ФМ, КР облустардагы ЫУӨ

2.4. БАБП долбоорун техникалык колдоо үчүн региондордо ЖОЖду/коожду аныктоо, региондук продукттардын рецепттерин иштеп чыгуу, аларды талдоо жана тестирлөө максатында долбоордун илимий потенциалын чыңдоо

2023-жылдын 30-декабрына чейин

БАБП долбоорунун илимий потенциалын чыңдоо боюнча биргелешкен буйрук чыгаруу; ЖОЖдун жана коождун окуучуларын окутуу механизмдерин иштеп чыгуу, БАБП долбоорун ишке ашыруу жолу менен кошумча билим алуу

Министрликтердин жана ведомстволордун тиешелүү жылдарга каралган каражаттарынын чегинде

БИМ, ЭКМ, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

2.5. МЖӨ ыкмасын колдонуу менен БАБП долбоорун региондордо аныктоого жана ишке ашырууга көмөк көрсөтүү

Туруктуу негизде

Мамлекеттик-жеке өнөктөштүк (мындан ары - МЖӨ) ыкмасын колдонуу менен БАБП долбооруна жеке өнөктөрдү (инвесторлорду) тартуу

Министрликтердин жана ведомстволордун тиешелүү жылдарга каралган каражаттарынын чегинде

ИУА, ЭКМ, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

2.6. "Мыкты улуттук бренд" улуттук конкурсун ишке ашырууну иштеп чыгууну камсыз кылуу

Жыл сайын

"Мыкты улуттук бренд" улуттук конкурсун ишке ашыруу чыгарылуучу продукциянын сапатын жана атаандаштыкка жөндөмдүүлүгүн жогорулатат

Министрликтердин жана ведомстволордун тиешелүү жылдарга каралган каражаттарынын чегинде

Кыргызпатент, ЭКМ, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

2.7. Мөмө, мөмө-жемиш жана жаңгак дарактарынын эң рентабелдүү сортторун андан ары региондук райондоштуруу үчүн аныктоо

2023-жылдын 30-декабрына чейин

Мөмө, мөмө-жемиш жана жаңгак дарактарынын эң рентабелдүү сортторунун тизмесин түзүү, өсүп кетүү жөндөмдүүлүк даражасын аныктоо жана республиканын 7 региону боюнча андан ары райондоштуруу

Министрликтердин жана ведомстволордун тиешелүү жылдарга каралган каражаттарынын чегинде

АЧМ, ЭКМ, БАБП борбору, УИА (макулдашуу боюнча)

2.8. КР Эмгек, социалдык камсыздоо жана миграция министрлиги менен биргеликте БАБП долбоору менен социалдык контракт боюнча 100 000 (жүз миң) сом өлчөмүндө финансылык каражаттарды берүү жол-жобосун жөнөкөйлөтүү

2023-жылдын II кварталы

КР МК 2022-жылдын 15-июлундагы № 385 "Социалдык контракттын негизинде социалдык жардам берүү жөнүндө" токтомуна өзгөртүүлөрдү киргизүү

Каржылоо талап кылынбайт

ЭСКММ, ЭКМ

2.9. "40 райондон 40 демилге" долбоору боюнча КР региондорунда иштелип чыккан инновациялык демилгелерди тандоо тартиби жөнүндө жобого өзгөртүүлөрдү жана толуктоолорду киргизүү

2023-жылдын 30-декабрына чейин

КР МК 2022-жылдын 29-июлундагы № 411 "40 райондон 40 демилге" долбоору боюнча КР региондорунда иштелип чыккан инновациялык демилгелерди тандоо тартиби жөнүндө жобону бекитүү тууралуу" токтомуна өзгөртүүлөрдү киргизүү

Каржылоо талап кылынбайт

ИМИМА, ЭКМ

III БАГЫТ. ОКУТУУ ЖАНА МААЛЫМАТТЫК КОЛДОО

3

Квалификацияны жогорулатуу жана маалыматтык колдоо

3.1. КР бардык аймагында ийгиликтүү ишке ашыруу үчүн БАБП-2026 жөнүндө масштабдуу маалымдоону уюштуруу;

БАБП-2026 улуттук долбоорун илгерилетүү жана ишке ашыруу процессине тартылган мамлекеттик жана муниципалдык кызматчыларды окутууну уюштуруу; БАБП-2026 ишке ашыруу боюнча нускаманы иштеп чыгуу

2023-жылдын 30-декабрына чейин

Өлкөнү туруктуу өнүктүрүү үчүн КР бардык аймагында БАБП-2026 ийгиликтүү ишке ашыруу; БАБП-2026 ишке ашыруу боюнча жергиликтүү бийлик органдарынын жана техникалык топтордун потенциалын жогорулатуу жана кызматташтыгын жакшыртуу; БАБП-2026 ийгиликтүү ишке ашыруу боюнча нускама

Министрликтердин жана ведомстволордун тиешелүү жылдарга каралган каражаттарынын чегинде

БАБП борбору, ЭКМ, БИМ КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

3.2. БАБП долбоорун экономикалык дипломатия линиясы боюнча ишке ашыруу боюнча маалыматтарды жайылтууну сунуштоо жана камсыз кылуу, БАБП продукциясын жайылтууга жана өлкөнүн ичинде жана чет өлкөлөрдө министрликтер менен ведомстволордун протоколдук иш-чараларында пайдаланууга көмөк көрсөтүү

2023-жылдын 30-декабрына чейин

КР МК "Экономикалык дипломатияны илгерилетүү боюнча Министрлер Кабинетинин айрым чечимдерине өзгөртүүлөрдү киргизүү жөнүндө" токтому; "Электрондук мамлекеттик сатып алууларды жүргүзүүнүн тартибин бекитүү жөнүндө" Кыргыз Республикасынын Бюджеттик классификациясын бекитүү тууралуу" буйругуна өзгөртүүлөрдү киргизүү жөнүндө" ФМ буйругу

Министрликтердин жана ведомстволордун тиешелүү жылдарга каралган каражаттарынын чегинде

ТИМ, ФМ, ЭКМ, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

3.3. БАБП долбоору боюнча маалыматтарды жайылтууну, жергиликтүү жамааттарды мобилизациялоону жана техникалык топторду (жамааттарды) түзүүнү сунуштоо жана камсыздоо

2023-жылдын 30-декабрына чейин

"БАБП долбоору боюнча маалыматты камсыздоо жана жайылтуу, жергиликтүү жамааттарды мобилизациялоо жана жамааттарды түзүү жөнүндө" КР МК караштуу МКЖӨБМА буйругу

Министрликтердин жана ведомстволордун тиешелүү жылдарга каралган каражаттарынын чегинде

ЭКМ, МКЖӨБМА, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

3.4. БАБП чыгаруучу продукциянын этикеткасына түшүрүү үчүн ИУА сайтынын QR-кодун иштеп чыгуу

2023-жылдын 30-декабрына чейин

Чет өлкөлүк түз инвестицияларды тартуу, өлкөнүн экономикасына инвестицияларды көбөйтүү

Министрликтердин жана ведомстволордун тиешелүү жылдарга каралган каражаттарынын чегинде

ЭКМ, ИУА, БАБП борбору

3.5. Жалпыга маалымдоо каражаттары (телерадиоберүү) аркылуу өлкөнүн ар бир регионунда БАБП продукцияларын илгерилетүү

Туруктуу негизде

Өлкөнүн калкын дайыма маалымдоо

Министрликтердин жана ведомстволордун тиешелүү жылдарга каралган каражаттарынын чегинде

КР МК

3.6. БАБП брендинин продукциясы экспортко контракт түзүү үчүн эл аралык көргөзмөлөрдө же бизнес-өнөктөштөрдүн жарманкелеринде туруктуу негизде колдонулат

Туруктуу негизде

Өлкөнүн калкын дайыма маалымдоо жана БАБП продукциясын таратуу, ошондой эле БАБП долбооруна жеке өнөктөрдү (инвесторлорду) тартуу

Министрликтердин жана ведомстволордун тиешелүү жылдарга каралган каражаттарынын чегинде

Министрликтер жана ведомстволор

IV БАГЫТ. РЕГИОНДОРДУН ЭКОНОМИКАЛЫК АКТИВДҮҮЛҮГҮН КАЛЫБЫНА КЕЛТИРҮҮ

4.1

Система түзүүчү ишканаларды, чакан жана орто бизнести колдоо

Өлкөнүн бардык региондору боюнча БАБП продукцияларынын жаңы өндүрүштүк цехтерин ишке киргизүүгө колдоо көрсөтүү

Туруктуу негизде

Жаңы жумуш орундарын түзүү, салыктык түшүүлөрдү көбөйтүү, региондордун экспорттук потенциалын жогорулатуу; БАБП улуттук долбоорун ишке ашыруу боюнча жергиликтүү бийлик органдарынын жана техникалык топтордун потенциалын жогорулатуу жана кызматташтыгын жакшыртуу

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде

ЭКМ, ФМ, БАБП борбору, КРП облустардагы ЫУӨ, Бишкек жана Ош шаарларынын мэриялары (макулдашуу боюнча)

4.2

Аймактарды комплекстүү өнүктүрүүгө өтүү

Региондорду өнүктүрүү фонддорунун ишин экономикалык долбоорлорду ишке ашырууга кайра багыттоо

Туруктуу негизде

Экономикалык долбоорлорду өнүктүрүү фонддорунун каражаттарынын 20%дан кем эмесин өздөштүрүү

КР облустук жана райондук өнүктүрүү фонддорунун тиешелүү жылдарга каралган каражаттарынын чегинде

ФМ, ЭКМ, КРП облустардагы ЫУӨ

4.3

Региондордо кластердик ыкманы илгерилетүү

Региондордун деңгээлинде кластерлерди түзүү боюнча моделди киргизүү

Туруктуу негизде

КР бардык аймагында 3төн кем эмес кластердик долбоорду ишке ашыруу

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде

БАБП борбору, ЭКМ, КРП облустардагы ЫУӨ

4.4

БАБП продукцияларын өндүрүүчүлөрдүн потенциалын жогорулатуу жана кызматташтыгын жакшыртуу

Региондун түштүк бөлүгүндө (Ош, Жалал-Абад, Баткен облустары) БАБП окуу-логистикалык борборун түзүү керек, ал тренингдерди өткөрүү, таңгактоо, сактоо, жүктөө ролун аткарат

2024-жылдын аягына чейин

БАБП улуттук долбоорун ишке ашыруу боюнча өндүрүүчүлөрдүн, жергиликтүү бийлик органдарынын жана техникалык топтордун потенциалын жогорулатуу жана кызматташтыгын жакшыртуу, жаңы жумуш орундарын түзүү жана региондордун экспорттук потенциалын жогорулатуу

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде

КР МК

V БАГЫТ. ОПЕРАЦИЯЛЫК ЧЫГЫМДАР

№

Бюджеттин беренелери

Толук маалымат

Аткаруу мөөнөтү

Чыгымдар боюнча кеңири маалымат (АКШ доллары менен)

Чыгымдардын жалпы суммасы жана каржылоо булагы

Жооптуу аткаруучулар

5.1

Түшүндүрмө брошюралар түрүндө кеңири маалымат, ошондой эле БАБП-2026 колдонмо (нускама)

Түшүндүрмө брошюралар түрүндө БАБП-2026 кеңири маалымат; Түшүндүрмө брошюралар түрүндө БАБП-2026 колдонмо (нускама)

2023-жылдын 30-декабрына чейин

Брошюра: 10000 даана х 0,5$ = 5000$ х 3 (түрү) = 15000$; Колдонмо (нускама) 3000 даана х 3 (түрү) = 9000 даана х 5$ = 45000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 60000 АКШ доллары

ЭКМ, ФМ, ПИБ, донордук уюмдар

5.2

БАБП чеберкана цехтерин реконструкциялоо

Өлкөнүн 6 (Талас, Ысык-Көл, Нарын, Жалал-Абад, Ош жана Баткен) облустарында чеберкана цехтерин реконструкциялоо

2024-жылдын II кварталына чейин

Өлкөнүн 6 облусунда чеберкана цехтерин реконструкциялоо: 8000$ (1 облуска эсептөө) х 6 = 48000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 48000 АКШ доллары

ЭКМ, ФМ, ПИБ, донордук уюмдар

5.3

БАБП региондук бренд-дүкөндөрдү ачуу

6 облуста (Чүй, Талас, Нарын, Жалал-Абад, Ош жана Баткен) БАБП региондук бренд-дүкөндөрдү ачуу; 6 облуста (Чүй, Талас, Нарын, Жалал-Абад, Ош жана Баткен) БАБП бренд-дүкөндөр үчүн жабдуулар

2024-жылдын 31-декабрына чейин

6 облуста БАБП региондук бренд-дүкөндөрдү ачуу: 8000$ (1 облуска эсептөө) х 6 = 48000$; 6 облуста БАБП бренд-дүкөндөр үчүн жабдуулар: 5000$ (1 облуска эсептөө) х 6 = 48000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 96000 АКШ доллары

ЭКМ, БАБП борбору, ФМ, донордук уюмдар

5.4

Бишкек шаарында БАБП борбордук бренд-дүкөндү түзүү жана эксплуатацияга берүү жана аны эксплуатациялоо үчүн ижара акысы (зарылдыгына жараша)

Бишкек шаарында БАБП борбордук бренд-дүкөндү жайгаштыруу, жаңы локациясын кеңейтүү жана эксплуатацияга берүү жана эксплуатациялоо үчүн ижара акысы (зарылдыгына жараша)

2023-жылдын 31-декабрына чейин

Жаңы локацияны жайгаштыруу, кеңейтүү жана эксплуатацияга берүү жана эксплуатациялоо үчүн ижара акысы (зарылдыгына жараша): 30000$ + 1000$ (зарылдыгына жараша ижара акысы) х 12 ай х 4 жыл = 78000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 78000 АКШ доллары

ЭКМ, БАБП борбору, ФМ, Бишкек ш. мэриясы, донордук уюмдар

5.5

БАБП брендин ыйгаруу үчүн продукцияны тандоо боюнча бренд-комитеттерди уюштуруу

Ар бир облуста БАБП брендин ыйгаруу үчүн продукцияны тандоо боюнча бренд-комитеттерди уюштуруу (7 облуста жылына 1 жолудан кем эмес)

Туруктуу негизде (ар бир облуста жылына кеминде 1 жолу)

Ар бир облуста БАБП брендин ыйгаруу үчүн продукцияны тандоо боюнча бренд-комитеттерди уюштуруу үчүн операциялык чыгымдар (7 облуста жылына 1 жолудан кем эмес): 500$ х 7 облус х 4 жыл = 14000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 14000 АКШ доллары

ЭКМ, БАБП борбору, ФМ, КРП облустардагы ЫУӨ, донордук уюмдар

5.6

"Кыргызстанда жасалган" улуттук бренд конкурсу

Бишкек шаарында "Кыргызстанда жасалган" улуттук бренд конкурсун уюштуруу

Туруктуу негизде (жылына кеминде 1 жолу)

"Кыргызстанда жасалган" улуттук бренд конкурсун уюштуруу үчүн операциялык чыгымдар (конференц-залды ижарага алуу ж.б.): 5000$ х 4 жыл = 20000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 20000 АКШ доллары

ЭКМ, БАБП борбору, ФМ, Бишкек ш. мэриясы, донордук уюмдар

5.7

Көчө баннерлери, жарнак такталары аркылуу маалыматты жайылтуу

Көчө баннерлери, жарнак такталары аркылуу 7 облуста 5тен аянтта маалыматты жайылтуу

Туруктуу негизде

Баннерди жасоого операциялык чыгымдар, ошондой эле аянт үчүн ижара акы: 35 орун 200$ х 3 жыл = 21000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 20000 АКШ доллары

ЭКМ, БАБП борбору, ФМ, КРП облустардагы ЫУӨ, Бишкек жана Ош шаарларынын мэриясы, донордук уюмдар

5.8

Телекөрсөтүү аркылуу жайылтуу үчүн видеороликтерди, телепрограммаларды түзүү

Телекөрсөтүү боюнча жайылтуу үчүн видеороликтерди, телепрограммаларды түзүү (КТРК, НТС, ТНТ Кыргызстан ж.б.)

Туруктуу негизде

Видеороликтерди, телепрограммаларды түзүүгө жана көрсөтүүгө операциялык чыгымдар: 5000$ х 4 жыл = 20000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 20000 АКШ доллары

ЭКМ, БАБП борбору, ФМ, донордук уюмдар

5.9

Квалификацияны жогорулатуу үчүн Каракол шаарына (БАБП окуу-логистикалык борбору) таанышуу сапары

Өндүрүүчүлөрдүн, ошондой эле министрликтердин жана ведомстволордун өз ара тартылган кызматкерлеринин квалификациясын жогорулатуу үчүн Каракол шаарына (БАБП окуу-логистикалык борбору) таанышуу сапары

Туруктуу негизде (жылына кеминде 1 жолу)

Каракол шаарына (БАБП окуу-логистикалык борбору) таанышуу сапарына операциялык чыгымдар: 5000$ х 4 жыл = 20000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 20000 АКШ доллары

ЭКМ, БАБП борбору, ФМ, донордук уюмдар

5.10

Эл аралык көргөзмө үчүн улуттук павильондун үлгүсү

Улуттук павильонго бөлүштүрүп, БАБП продукциясы менен эл аралык көргөзмөлөргө катышуу

Туруктуу негизде (жылына кеминде 1 жолу)

БАБП продукциясы менен улуттук павильонду бөлүштүрүүгө операциялык чыгымдар, ошондой эле башка коштоочу чыгымдар: 30000 $ х 3 жолу (2026-жылга чейин бардык мезгил үчүн) = 90000$

Министрликтердин жана ведомстволордун тиешелүү жылдарга каралган каражаттарынын жана донордук каражаттардын чегинде - 90000 АКШ доллары

ЭКМ, БАБП борбору, ФМ, донордук уюмдар

Кыскартуулардын тизмеси:

КР

-

Кыргыз Республикасы

БАБП

-

"Бир айыл - бир продукт" долбоору

БАБП-2026

-

2026-жылга чейин "Бир айыл - бир продукт" улуттук экономикалык долбоору

КРМК

-

Кыргыз Республикасынын Министрлер Кабинети

ПИБ

-

Кыргыз Республикасынын Президентинин Иш башкармасы

ТИМ

-

Кыргыз Республикасынын Тышкы иштер министрлиги

БИМ

-

Кыргыз Республикасынын Билим берүү жана илим министрлиги

АЧМ

-

Кыргыз Республикасынын Айыл чарба министрлиги

ЭКМ

-

Кыргыз Республикасынын Экономика жана коммерция министрлиги

ЮМ

-

Кыргыз Республикасынын Юстиция министрлиги

ФМ

-

Кыргыз Республикасынын Финансы министрлиги

ЭСКММ

-

Кыргыз Республикасынын Эмгек, социалдык камсыздоо жана миграция министрлиги

ИУА

-

Кыргыз Республикасынын Президентине караштуу Инвестициялар боюнча улуттук агенттик

МКЖӨБМА

-

Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттик

ИМИМА

-

Кыргыз Республикасынын Министрлер Кабинетине караштуу Интеллектуалдык менчик жана инновациялар мамлекеттик агенттиги

КРП облустардагы ЫУӨ

-

Кыргыз Республикасынын Президентинин облустардагы ыйгарым укуктуу өкүлдөрү

МЖӨ

-

мамлекеттик-жеке өнөктөштүк

УИА

-

Кыргыз Республикасынын Улуттук илимдер академиясы

СӨП

-

Кыргыз Республикасынын Соода-өнөр жай палатасы