Кыргыз Республикасынын Министрлер Кабинетинин (Бишкек шаарында кол коюлган Кыргыз Республикасы менен Араб экономикалык өнүктүрүүнүн Кувейт фондунун ортосундагы «Улуттук госпиталдын нейрохирургиялык борборун куруу жана жабдуу» долбоору боюнча кредиттик макулдашууга Кыргыз Республикасынын Министрлер Кабинетинин корутундусун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ 2023-жылдын 18-апрели № 183-т "Кыргыз Республикасынын Жогорку Кеңешинин Регламенти жөнүндө" Кыргыз Республикасынын Мыйзамынын 68-беренесине ылайык, мамлекеттик ички жол-жоболорду аткаруу максатында:

1. 2016-жылдын 11-мартында Бишкек шаарында кол коюлган Кыргыз Республикасы менен Араб экономикалык өнүктүрүүнүн Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууга Кыргыз Республикасынын Министрлер Кабинетинин тиркелген корутундусу жактырылсын.

2. Кыргыз Республикасынын Министрлер Кабинетинин тиркелген корутундусу Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.Жапаров

Кыргыз Республикасынын Министрлер Кабинетинин 2023-жылдын 18-апрелиндеги № 183-т тескемеси менен жактырылган

2016-жылдын 11-мартында Бишкек шаарында кол коюлган Кыргыз Республикасы менен Араб экономикалык өнүктүрүүнүн Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууга Кыргыз Республикасынын Министрлер Кабинетинин КОРУТУНДУСУ Кыргыз Республикасы менен Араб экономикалык өнүктүрүү боюнча Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууга (мындан ары - Кредиттик макулдашуу) 2016-жылдын 11-мартында Бишкек шаарында кол коюлган. Кредиттик макулдашуунун негизги максаты нейрохирургиялык бейтаптарга жогорку адистештирилген шашылыш жана пландуу жардам көрсөтүлө турган заманбап дарылоо-диагностикалык жабдуулар менен жабдылган нейрохирургиялык борборду куруу, ошондой эле жогорку квалификациялуу адистерди даярдоо болгон. Кредиттик макулдашуунун долбоору кол коюлганга чейин ал Кыргыз Республикасынын Жогорку Кеңешинин профилдик комитеттери: Эл аралык иштер, коргонуу жана коопсуздук боюнча комитети, Бюджет жана финансы боюнча комитети, Социалдык маселелер, билим берүү, илим, маданият жана саламаттык сактоо боюнча комитети менен макулдашылган жана Кыргыз Республикасынын Өкмөтүнүн 2016-жылдын 10-мартындагы № 94-б буйругу менен жактырылган. Долбоор техникалык көйгөйлөргө байланыштуу бир катар объективдүү жана субъективдүү себептерден улам толук ишке ашпай калган, атап айтканда долбоорду ишке ашыруу бөлүмүнүн жоктугу, долбоорду ишке ашыруу бөлүмүнүн кызматкерлерин макулдашуунун жана бекитүүнүн узак жол-жобосу, тендердик документтер, коронавирустук инфекциянын пандемиясына байланыштуу дүйнөдөгү экономикалык кырдаалдын өзгөрүшү (авиа каттамдардын жабылуусу, өзгөчө кырдаалдын киргизилиши, доллардын курсунун көтөрүлүшү ж.б.). Долбоорду ишке ашыруу мөөнөтүн 2022-жылы аяктоо зарылдыгын, 2022-жылдын августунда Араб координациялык тобунун алкагында өткөн тараптардын жолугушуусунун жыйынтыгын, жаңы техникалык-экономикалык негиздеменин жоктугуна, долбоорду ишке ашыруу үчүн төлөмдөрдүн жоктугуна байланыштуу кыргыз тараптын долбоордун сметасын кайра эсептөөгө мүмкүн эместигин эске алуу менен, Араб экономикасын өнүктүрүүнүн Кувейт фондуна Кыргыз Республикасы менен Араб экономикалык өнүктүрүүнүн Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууну токтотуу жөнүндө сунуш киргизилген, өз учурунда Араб экономикасын өнүктүрүүнүн Кувейт фонду сунушту колдоп, кабыл алган жана Кыргыз Республикасынын Финансы министрлигинин дарегине 2023-жылдын 3-январында расмий кат аркылуу жообун берген. Кредиттик каражаттар өздөштүрүлбөгөндүгүн эске алуу менен кредитти тейлөө үчүн пайыздар жана негизги сумма боюнча төлөмдөр жүргүзүлгөн эмес, "2016-жылдын 11-мартында Бишкек шаарында кол коюлган Кыргыз Республикасы менен Араб экономикалык өнүктүрүүнүн Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууну денонсациялоо жөнүндө" Кыргыз Республикасынын Мыйзамынын долбоорун кабыл алуу республикалык бюджеттен финансылык чыгымдарга алып келбейт. Кыргыз Республикасынын Министрлер Кабинети Кредиттик макулдашууну денонсациялоону мүмкүн, ошондой эле "2016-жылдын 11-мартында Бишкек шаарында кол коюлган Кыргыз Республикасы менен Араб экономикалык өнүктүрүүнүн Кувейт фондунун ортосундагы "Улуттук госпиталдын нейрохирургиялык борборун куруу жана жабдуу" долбоору боюнча кредиттик макулдашууну денонсациялоо жөнүндө" Кыргыз Республикасынын Мыйзамынын долбоорун кабыл алууну максатка ылайык деп эсептейт.