Республикасынын Президентинин ПТ № 43 (Жергиликтүү мамлекеттик администрациялардын жана жергиликтүү өз алдынча башкаруу органдарынын алдындагы жер мунапысын жүргүзүү боюнча комиссияларга көмөк жана методикалык жардам көрсөтүү боюнча ведомстволор аралык жумушчу топтун курамын түзүү тууралуу) тескемеси

КЫРГЫЗ РЕСПУБЛИКАСЫНЫН ПРЕЗИДЕНТИНИН ТЕСКЕМЕСИ 2023-жылдын 15-марты ПТ № 43

"Жер-укуктук мамилелерди жөнгө салуу жөнүндө" Кыргыз Республикасынын Мыйзамынын алкагында жер мунапысын жүргүзүү боюнча жергиликтүү мамлекеттик администрациялардын жана жергиликтүү өз алдынча башкаруу органдарынын комиссияларынын ишине көмөк жана методикалык жардам көрсөтүү максатында, Кыргыз Республикасынын Конституциясынын 66, 71-беренелерине ылайык:

1. Жергиликтүү мамлекеттик администрациялардын жана жергиликтүү өз алдынча башкаруу органдарынын алдындагы жер мунапысын жүргүзүү боюнча комиссияларга көмөк жана методикалык жардам көрсөтүү боюнча ведомстволор аралык жумушчу топ (мындан ары - ведомстволор аралык жумушчу топ) тиркемеге ылайык курамда түзүлсүн.

2. Ведомстволор аралык жумушчу топ ыкчам тартипте төмөнкүдөй чараларды көрсүн:

- эки жумалык мөөнөттө жер мунапысын жүргүзүү чөйрөсүндөгү ченемдик укуктук актыларды изилдесин жана Кыргыз Республикасынын Айыл чарба министрлигине аларды өркүндөтүү боюнча сунуштарды киргизсин;

- жергиликтүү мамлекеттик администрациялардын жана жергиликтүү өз алдынча башкаруу органдарынын алдындагы жер мунапысын жүргүзүү боюнча комиссиялардын ишинин натыйжалуулугун жогорулатуу максатында алардын ишине туруктуу мониторинг жүргүзсүн, отчетторун уксун жана алардын ишинин натыйжалуулугун камсыз кылууга багытталган башка чараларды көрсүн;

- жер мунапысын жүргүзүү боюнча комиссиялардын ишине тоскоол болгон проблемаларды четтетүү үчүн зарыл болгон чараларды өз убагында көрсүн;

- ай сайын жер мунапысын жүргүзүүнүн жүрүшү жөнүндө маалыматты Кыргыз Республикасынын Президентине киргизсин;

- ведомстволор аралык жумушчу топко анын иш процессинде келип чыгуучу маселелерди чечүү үчүн мамлекеттик органдардын жана жергиликтүү өз алдынча башкаруу органдарынын адистерин, ошондой эле көз карандысыз эксперттерди өзүнүн ишине тартууга укук берилсин.

3. Ведомстволор аралык жумушчу топтун ишин уюштуруучулук, методикалык жана башка камсыз кылуу Кыргыз Республикасынын Айыл чарба министрлигине жүктөлсүн.

4. Министрликтердин, мамлекеттик комитеттин, административдик ведомстволордун жана башка мамлекеттик органдардын жетекчилери, Кыргыз Республикасынын Президентинин облустардагы ыйгарым укуктуу өкүлдөрү, жергиликтүү мамлекеттик администрациялардын жана жергиликтүү өз алдынча башкаруу органдарынын башчылары:

- өз компетенциясынын чегинде жер мунапысын натыйжалуу жүргүзүүнү камсыз кылуу боюнча кечиктирилгис чараларды көрсүн, көрсөтүлгөн багыттагы жооптуу кызмат адамдарынын ишинин сапатын өзгөчө контролго алсын;

- ведомстволор аралык жумушчу топтун ишине ар тараптуу көмөк көрсөтсүн, зарыл болгон документтерди, маалымдамаларды жана маалыматтарды өз убагында берсин.

5. Министрликтердин, мамлекеттик комитеттин, административдик ведомстволордун жана башка мамлекеттик органдардын жетекчилеринин, Кыргыз Республикасынын Президентинин облустардагы ыйгарым укуктуу өкүлдөрүнүн, жергиликтүү мамлекеттик администрациялардын жана жергиликтүү өз алдынча башкаруу органдарынын башчыларынын ушул тескемени аткаруу боюнча ишти талаптагыдай уюштургандыгы үчүн жеке жоопкерчилиги белгиленсин.

6. Ведомстволор аралык жумушчу топ өз ишин жер мунапысын жүргүзүү аяктаганга чейин жүргүзөт деп аныкталсын.

7. Бул тескеменин аткарылышын контролдоону өзүмө калтырам.

Кыргыз Республикасынын Президенти

С.Н.Жапаров

Тиркеме

Жергиликтүү мамлекеттик администрациялардын жана жергиликтүү өз алдынча башкаруу органдарынын алдындагы жер мунапысын жүргүзүү боюнча комиссияларга көмөк жана методикалык жардам көрсөтүү боюнча ведомстволор аралык жумушчу топтун КУРАМЫ (КР Президентинин 2025-жылдын 26-майындагы ПТ № 169 тескемесинин редакциясына ылайык)

Кыргыз Республикасынын Президентинин Администрациясынын Жетекчисинин орун басары - Президенттин жана Министрлер Кабинетинин чечимдерин даярдоо боюнча башкармалыктын начальниги, ведомстволор аралык жумушчу топтун жетекчиси; Кыргыз Республикасынын Президентинин Администрациясынын Президенттин жана Министрлер Кабинетинин чечимдерин даярдоо боюнча башкармалыгынын уюштуруу иштери жана аймактар менен өз ара аракеттенүү бөлүмүнүн аймактарды өнүктүрүү секторунун башчысы, ведомстволор аралык жумушчу топтун жетекчисинин орун басары; Кыргыз Республикасынын суу ресурстары, айыл чарба жана кайра иштетүү өнөр жайы министринин биринчи орун басары, ведомстволор аралык жумушчу топтун жетекчисинин орун басары; Кыргыз Республикасынын Министрлер Кабинетине караштуу Жер ресурстары, кадастр, геодезия жана картография боюнча мамлекеттик агенттиктин директору, ведомстволор аралык жумушчу топтун жетекчисинин орун басары. Ведомстволор аралык жумушчу топтун мүчөлөрү: Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгынын контролдоо бөлүмүнүн башчысынын орун басары; Кыргыз Республикасынын Президентинин Администрациясынын Президенттин жана Министрлер Кабинетинин чечимдерин даярдоо боюнча башкармалыгынын тармактык саясат бөлүмүнүн башкы эксперти; Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгынын контролдоо бөлүмүнүн инспектору; Кыргыз Республикасынын Президентинин Администрациясынын сот жана прокуратура органдары менен өз ара аракеттенүү бөлүмүнүн эксперти; Кыргыз Республикасынын Президентинин Администрациясынын Жетекчисинин орун басары - Президенттин жана Министрлер Кабинетинин чечимдерин даярдоо боюнча башкармалыгынын начальнигинин жардамчысы; Кыргыз Республикасынын ички иштер министринин орун басары; Кыргыз Республикасынын юстиция министринин орун басары; Кыргыз Республикасынын энергетика министринин орун басары; Кыргыз Республикасынын саламаттык сактоо министринин орун басары, Кыргыз Республикасынын башкы мамлекеттик санитардык врачы; Кыргыз Республикасынын курулуш, архитектура жана турак жай-коммуналдык чарба министринин орун басары; Кыргыз Республикасынын Башкы прокуратурасынын бөлүм башчысы; Кыргыз Республикасынын Улуттук коопсуздук мамлекеттик комитетинин кызматкери; Кыргыз Республикасынын Президентинин Кыргыз Республикасынын Жалал-Абад облусундагы ыйгарым укуктуу өкүлү; Кыргыз Республикасынын Президентинин Кыргыз Республикасынын Ош облусундагы ыйгарым укуктуу өкүлү; Кыргыз Республикасынын Президентинин Кыргыз Республикасынын Чүй облусундагы ыйгарым укуктуу өкүлү; Бишкек шаарынын мэри; Ош шаарынын мэри; Бишкек шаарынын мэриясынын Жеке турак жай курулушу жана шаар куруу департаментинин директорунун орун басары.