Кыргыз Республикасынын Министрлер Кабинетинин Төрагасынын («Кыргыз Республикасынын айрым мыйзам актыларына („Жергиликтүү мамлекеттик администрация жана жергиликтүү өз алдынча башкаруу органдары жөнүндө“, „Мамлекеттик жарандык кызмат жана муниципалдык кызмат жөнүндө“ Кыргыз Республикасынын мыйзамдарына) өзгөртүүлөрдү киргизүү тууралуу» Кыргыз Республикасынын Мыйзамынын долбооруна Кыргыз Республикасынын Министрлер Кабинетинин корутундусун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН төрагасыНЫН ТЕСКЕМЕСИ 2022-жылдын 25-октябры № 694 "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 17, 18 жана 27-беренелерине ылайык:

1. "Кыргыз Республикасынын айрым мыйзам актыларына ("Жергиликтүү мамлекеттик администрация жана жергиликтүү өз алдынча башкаруу органдары жөнүндө", "Мамлекеттик жарандык кызмат жана муниципалдык кызмат жөнүндө" Кыргыз Республикасынын мыйзамдарына) өзгөртүүлөрдү киргизүү тууралуу" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин тиркелген корутундусу жактырылсын.

2. Бул корутунду Кыргыз Республикасынын Жогорку Кеңешине жиберилсин.

Кыргыз Республикасынын Министрлер Кабинетинин Төрагасы

А.У.Жапаров

Тиркеме

"Кыргыз Республикасынын айрым мыйзам актыларына ("Жергиликтүү мамлекеттик администрация жана жергиликтүү өз алдынча башкаруу органдары жөнүндө", "Мамлекеттик жарандык кызмат жана муниципалдык кызмат жөнүндө" Кыргыз Республикасынын мыйзамдарына) өзгөртүүлөрдү киргизүү тууралуу" Кыргыз Республикасынын Мыйзамынын долбооруна Кыргыз Республикасынын Министрлер Кабинетинин КОРУТУНДУСУ Кыргыз Республикасынын Министрлер Кабинети "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 17, 18 жана 27-беренелерине ылайык Кыргыз Республикасынын Жогорку Кеңешинин депутаты Ж.П.Нурбаев демилгелеген "Кыргыз Республикасынын айрым мыйзам актыларына ("Жергиликтүү мамлекеттик администрация жана жергиликтүү өз алдынча башкаруу органдары жөнүндө", "Мамлекеттик жарандык кызмат жана муниципалдык кызмат жөнүндө" Кыргыз Республикасынын мыйзамдарына) өзгөртүүлөрдү киргизүү тууралуу" Кыргыз Республикасынын Мыйзамынын долбоорун (мындан ары - Мыйзамдын долбоору) карап чыгып, төмөнкүдөй корутундуга келди.

1. Мыйзамдын долбоорунун 1-беренесинин 3-пунктунда аким, шаардын мэри жана айыл өкмөтүнүн башчысы кызмат ордуна талапкерлерге коюлуучу талаптардан жана чектөөлөрдөн талапкер тиешелүү райондун, шаардын жана айыл өкмөтүнүн тургуну болуп саналбоого тийиш деген ченемди алып салуу каралат.

Ушул чектөөчү чара коррупциялык көрүнүштөрдүн тобокелдигинин, кызыкчылыктардын кагылышуусунун алдын алуу максатында киргизилген. Бирок практикада жогоруда аталган ченемди адамдын туулган жерине карата колдонуу айрым маселелерди жарата тургандыгын моюнга алуу керек. Аталган ченемди айыл өкмөтүнүн башчыларына карата колдонууда айрым айыл аймактарынын (чек арага жакын, жетүүгө кыйын) өзгөчөлүктөрүн, ошондой эле республикалык маанидеги Бишкек, Ош шаарларынын мэрлерин эсепке алуу менен дифференциалдуу мамиле кылуу керек. Мамлекеттин коопсуздугун камсыздоо, мамлекеттик чек араны бекемдөө, чек ара аймактарындагы маселелерди чечүү, социалдык-экономикалык өнүгүүгө дем берүү, чек ара аймактарында жашаган калктын турмуш шартын жакшыртуу жана чек ара аймактарындагы калктын арасында ички миграцияны токтотуу максатында Кыргыз Республикасынын Өкмөтүнүн 2012-жылдын 20-мартындагы № 186 токтому менен өзгөчө статуска ээ айрым чек ара аймактарынын тизмеги бекитилген. Жалпы республика боюнча өзгөчө статусу бар чек арага жакын калктуу конуштардын саны 90, алардын ичинен: 81 айыл жана 9 участок, анын ичинде Баткен облусу боюнча 61 айыл жана 8 участок. Чек ара аймактарында жерди, жергиликтүү менталитетти өтө жакшы билген жана ыкчам чечимдерди кабыл алган учурда тиешелүү маалыматка ээ кызмат адамдары иштөөгө тийиш деп эсептейбиз. Мындан тышкары, "Баткен облусунун статусу жөнүндө" Кыргыз Республикасынын Мыйзамы Баткен облусунун статусун аныктайт, мамлекеттик органдардын жана жергиликтүү өз алдынча башкаруу органдарынын аймактык бөлүнүштөрүн уюштуруунун жана ишинин өзгөчөлүктөрүн белгилейт. Бийик тоолуу шарттарда жана алыскы барууга кыйын зоналарда жашаган жана иштеген жарандарды коргоо, тарткан кошумча материалдык жана физиологиялык чыгымдардын ордун толтуруу боюнча мамлекеттик кепилдиктерди жана компенсацияларды белгилөө максатында "Бийик тоолуу шарттарда жана алыскы барууга кыйын зоналарда жашаган жана иштеген адамдар үчүн мамлекеттик гарантиялар жана компенсациялар жөнүндө" Кыргыз Республикасынын Мыйзамы кабыл алынган. Бишкек жана Ош шаарлары боюнча "Борбордун статусу жөнүндө" жана "Ош шаарынын статусу жөнүндө" Кыргыз Республикасынын мыйзамдары менен республикалык маанидеги шаарлардын статустары аныкталгандыгын, жергиликтүү өз алдынча башкарууну уюштуруунун жана жүзөгө ашыруунун өзгөчөлүктөрү, анда жергиликтүү өз алдынча башкаруу органдарын түзүүнүн тартиби, алардын иш-милдеттери жана ыйгарым укуктары, мамлекеттик бийлик органдары менен өз ара мамилелери белгиленгендигин белгилей кетүү зарыл. Бишкек жана Ош шаарлары башкарууда өзгөчө орунду ээлейт, ошондой эле республиканын административдик-саясий, экономикалык, илим-билим берүүчү, тарыхый-маданий борборлору болуп саналат. Ушул шаарларга жашоо жана ар кандай иштин түрлөрүн жүргүзүү үчүн республиканын бардык региондорунан келишет. Жогоруда баяндалгандардын негизинде Мыйзамдын долбоорунун 1-беренесинин 14 жана 19-пункттарын төмөнкүдөй редакцияда баяндоону сунуштайбыз: "14) 46-берененин 3-бөлүгүнүн 3-пункту төмөнкүдөй редакцияда баяндалсын: "3) республикалык маанидеги шаарларды кошпогондо, тиешелүү шаардын тургуну болуп саналган;"; "19) 52-берененин 3-бөлүгүнүн 3-пункту төмөнкүдөй редакцияда баяндалсын: "3) чек арага жакын жана алыскы барууга кыйын райондордо жайгашкан айыл аймактарын кошпогондо, тиешелүү айыл аймагынын тургуну болуп саналган;".

2. Мыйзамдын долбоорунун 2-беренесинин 4-пунктунда мамлекеттик жарандык кызматчыларга жана муниципалдык кызматчыларга класстык чен үчүн үстөктөрдү төлөп берүүнү кайра улантуу, ошондой эле мамлекеттик жана муниципалдык кызматтагы иш стажына пропорциялуу ар жылдык акы төлөнүүчү өргүүгө кошумча календардык күндөрдү этабы менен берүү каралат.

Муну менен бирге Кыргыз Республикасынын Жогорку Кеңешинин депутаттары М.Самыйкожо жана А.Б.Кенжебаев демилгелеген "Мамлекеттик жарандык кызмат жана муниципалдык кызмат жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбоорунда (мыйзам долбоору 2022-жылдын 14-сентябрында биринчи окууда кабыл алынган) мамлекеттик жарандык кызматчыларга жана муниципалдык кызматчыларга класстык чен үчүн үстөктөрдү төлөп берүү жана мамлекеттик жана муниципалдык кызматтагы иш стажына пропорциялуу ар жылдык акы төлөнүүчү өргүүгө кошумча календардык күндөрдү этабы менен берүү бөлүгүндө аталган Мыйзамга тиешелүү түзөтүүлөрдү киргизүү каралгандыгын эске алуу керек. Ушуга байланыштуу Мыйзамдын долбоорунда класстык чендерге үстөктөрдү төлөп берүүгө жана кызматчыларга акы төлөнүүчү өргүүсүн көбөйтүүгө тийиштүү ченемдерди алып салууну сунуштайбыз. Жогоруда баяндалгандардын негизинде Кыргыз Республикасынын Министрлер Кабинети ушул Мыйзамдын долбоорун ушул корутундуда баяндалган сунуштарды эске алуу менен кабыл алууга болот деп эсептейт.