КР Министрлер Кабинетинин Долбоору Кыргыз Республикасынын Ички иштер министрлиги менен Россия Федерациясынын Улуттук гвардиясынын аскерлеринин федералдык кызматынын ортосундагы Кызматташуу жөнүндө МАКУЛДАШУУ

ПРЕДСЕДАТЕЛЬ КАБИНЕТА МИНИСТРОВ КЫРГЫЗСКОЙ РЕСПУБЛИКИ РАСПОРЯЖЕНИЕ от 1 февраля 2022 года № 41-р Кыргыз Республикасынын Ички иштер министрлиги менен Россия Федерациясынын Улуттук гвардиясынын аскерлеринин федералдык кызматынын ортосундагы Кызматташуу жөнүндө макулдашуунун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Председатель

А.У. Жапаров

Долбоор

Кыргыз Республикасынын Ички иштер министрлиги менен Россия Федерациясынын Улуттук гвардиясынын аскерлеринин федералдык кызматынын ортосундагы Кызматташуу жөнүндө МАКУЛДАШУУ Мындан ары Тараптар деп аталуучу Кыргыз Республикасынын Ички иштер министрлиги жана Россия Федерациясынын Улуттук гвардиясынын аскерлеринин федералдык кызматы, коомдук коопсуздукту камсыз кылуу, адамдын жана жарандын укуктарын жана эркиндиктерин коргоо жаатында эл аралык кызматташтыкты өнүктүрүүгө чоң маани берип, Тараптардын өз ара аракеттенүүсүн чыңдоого болгон каалоолорунан улам, эл аралык укуктун жалпы таанылган принциптеринин жана ченемдеринин негизинде, төмөнкүлөр жөнүндө макулдашты: 1-берене. Кызматташуунун милдеттенмелери Тараптар ушул Макулдашуунун жоболоруна ылайык, өз компетенциясынын чегинде аракеттенип, Тараптардын мамлекеттеринин мыйзамдарын жана эл аралык милдеттенмелерин сактоо менен кызматташат. 2-берене. Кызматташуунун багыттары Тараптар төмөнкү багыттар боюнча кызматташат: коомдук тартипти сактоо жана коомдук коопсуздукту камсыз кылуу; маанилүү мамлекеттик объектилерди, атайын жүктөрдү, коммуникациялар боюнча курулмаларды коргоо; экстремизмге каршы күрөшүү; куралды жүгүртүү жаатында мамлекеттик контролдоо; өзгөчө маанилүү жана режимдик объекттерди коргоо; жеке жана юридикалык жактардын мүлктөрүн коргоо; кылмыштуулукка каршы аракеттерди күчтөндүрүү иш-чараларын камсыз кылуу; спорттук жана маданий байланыштарды өнүктүрүү; Тараптардын аскер кызматчыларын, кызматчыларын, жарандык персоналын жана алардын үй-бүлө мүчөлөрүн санаторийлик-курорттук дарылоодо келишимдик негизде жардам көрсөтүү. 3-берене. Кызматташуунун формалары

1. Ушул Макулдашуунун 2-беренесинин жоболорун ишке ашыруу максатында Тараптар төмөнкүдөй формаларда кызматташууну ишке ашырат:

ушул Макулдашуунун 2-беренесинде аныкталган кызматташуунун багыттары боюнча иш-чараларды жүзөгө ашыруу тажрыйбаларын алмашуу; консультацияларды, семинарларды, конференцияларды жана окуу-методикалык жыйындарды өткөрүү; кадрларды даярдоо; биргелешкен окууларды (машыгууларды) өткөрүү; командалык-штабдык жана тактикалык-атайын окууларга, Тараптардын бири өткөргөн кесиптик чеберчиликтин ачык кароо-конкурстарына байкоочу катары катышуу; илимий-изилдөө иштери; маалыматтык технологияларды өнүктүрүү; мыйзамдык жана башка ченемдик укуктук актыларды, илимий-техникалык адабияттарды жана Тараптардын иштеринин маселелери боюнча маалымат алмашуу; кызматташуу процессинде келип чыккан маселелер боюнча Тараптардын ишин координациялоо, анын ичинде биргелешкен жумушчу топторду түзүү.

2. Ушул Макулдашуу Тараптарга ушул Макулдашуунун 1-беренесинде аныкталган шарттарды эске алуу менен кызматташуунун башка өз ара алгылыктуу формаларын аныктоого жана өнүктүрүүгө тоскоолдук кылбайт.

4-берене. Жардам көрсөтүү жөнүндө суроо-талаптар

1. Ушул Макулдашуунун алкагында кызматташуу жардам көрсөтүү жөнүндө суроо-талаптардын (мындан ары - суроо-талап) негизинде же Тараптын демилгеси боюнча мындай жардам көрсөтүү экинчи Тараптын кызыкчылыгын көздөйт деп болжолдонуп ишке ашырылат.

2. Суроо-талаптар жазуу жүзүндө жиберилет. Шашылыш учурларда суроо-талаптар оозеки берилиши мүмкүн, бирок 3 суткадан кечиктирбестен алар жазуу жүзүндө, анын ичинде текстти берүүнүн техникалык каражаттарын колдонуу менен ырасталууга тийиш.

Эгерде суроо-талаптын аныктыгына же мазмунуна шектенүү жаралса, кошумча ырастоо суралышы мүмкүн.

3. Суроо-талаптарда төмөнкүлөр камтылат:

суроочу Тараптын жана суроо-талап жиберилген Тараптын аталышы; иштин маңызын баяндоо; суроо-талаптын максатын жана негиздемесин көрсөтүү; суралган жардамдын мазмунун баяндоо; суроо-талаптын туура аткарылышы үчүн пайдалуу болушу мүмкүн болгон ар кандай башка маалыматтар.

4. Жазуу жүзүндө жиберилген же ырасталган суроо-талапка суроочу Тараптын жетекчиси же анын орун басары кол коёт жана суроочу Тараптын мөөрү менен күбөлөндүрүлөт.

5-берене. Жардам берүүдөн баш тартуу

1. Эгерде суроо-талап жиберилген Тарап суроо-талаптын аткарылышы анын мамлекетинин эгемендигине, коопсуздугуна, коомдук тартипке же башка маанилүү кызыкчылыктарына зыян келтириши мүмкүн же анын мамлекетинин мыйзамдарына же эл аралык милдеттенмелерине карама-каршы келет деп эсептесе, ал ушул Макулдашуунун алкагында жардам көрсөтүүдөн толугу менен же жарым-жартылай баш тартат.

2. Суроо-талап жиберилген Тарап ушул берененин 1-пунктунун негизинде, жардам көрсөтүүдөн баш тартуу жөнүндө чечим чыгарганга чейин мүмкүн болсо суроо-талап жиберилген Тарап зарыл деп эсептеген шарттарды сактоодо жардам көрсөтүлүшү мүмкүн же мүмкүн эместиги жөнүндө маселени кароо үчүн сураган Тарап менен консультация өткөрөт. Суроочу Тарал ага жардам көрсөтүлө турган негиздеги шарттарды сактайт.

3. Суроочу Тарап баш тартуунун себептерин көрсөтүү менен суроо-талапты аткаруудан толук же жарым-жартылай баш тартуу жөнүндө жазуу жүзүндө билдирет.

6-берене. Суроо-талапты аткаруу

1. Суроо-талап жиберилген Тарап суроо-талаптын тез жана мүмкүн болушунча толук аткарылышын камсыз кылуу үчүн бардык зарыл чараларды көрөт.

Суроо-талапты аткарууга тоскоол болгон же анын аткарылышын олуттуу кечеңдеткен жагдайлар жөнүндө суроочу Тарапка дароо кабарланат.

2. Суроо-талап жиберилген Тарап өзүнүн пикири боюнча суроо-талапты талаптагыдай аткаруу үчүн зарыл болгон кошумча маалыматтарды суроого укуктуу.

3. Суроо-талап жиберилген Тарап суроочу Тараптын өтүнүчү боюнча суроо-талапты алуу фактысынын, бул суроо-талаптын мазмунунун жана аны коштоочу документтердин, ошондой эле жардам көрсөтүү фактысынын купуялуулугун камсыз кылуу үчүн зарыл чараларды көрөт.

Эгерде купуялуулукту сактабастан суроо-талапты аткаруу мүмкүн болбосо, суроо-талап жиберилген Тарап бул жөнүндө суроочу Тарапка маалымдайт, ал мындай шарттарда суроо-талапты аткарууга болорун же болбосун чечет.

4. Суроо-талап жиберилген Тарап суроо-талапты аткаруунун жыйынтыктары жөнүндө мүмкүн болушунча тез арада суроочу Тарапка маалымдайт.

7-берене. Алынган маалыматтарды жана документтерди пайдаланууну чектөө

1. Ар бир Тарап экинчи Тараптан алынган маалыматтардын жана документтердин, эгерде алар жашыруун мүнөзгө ээ болсо же берүүчү тарап аларды ачыкка чыгарууну каалабаса купуялуулугун камсыздайт. Мындай маалыматтардын жана документтердин купуялуулугун берүүчү Тарап аныктайт.

2. Ушул Макулдашуунун негизинде алынган суроо-талапты аткаруунун натыйжалары аларды берген Тараптын макулдугусуз алар суралган жана берилген максаттардан башка максатта колдонулушу мүмкүн эмес.

3. Ушул Макулдашуунун негизинде бир Тарап алган маалыматты үчүнчү жакка берүү үчүн бул маалыматты берген Тараптын алдын ала макулдугу талап кылынат.

4. Ушул берененин жоболоруна ылайык суроо-талапты аткаруунун натыйжасында алынган маалыматтарды жана документтерди пайдаланууга же ачыкка чыгарууга болот, эгерде сураган Тараптын мамлекетинин мыйзамдарында ушундай жол менен аракеттенүү милдети каралса. Суроочу Тарап мындай маалыматтарды жана документтерди мүмкүн болгон жана болжолдонгон пайдалануу же ачыкка чыгаруу жөнүндө суроо-талап жиберилген Тарапка алдын ала кабарлайт. Мындай учурда суроо-талап жиберилген Тарап купуя маалыматты суроочу Тарапка берүүдөн баш тарта алат.

5. Кыргыз Республикасынын мамлекеттик сырларын жана Россия Федерациясынын мамлекеттик жашырын сырларын түзгөн маалыматтарды берүүнүн тартиби, шарттары жана коргоо чаралары 2003-жылдын 19-сентябрындагы Кыргыз Республикасынын Өкмөтү менен Россия Федерациясынын Өкмөтүнүн ортосундагы Жашыруун маалыматтарды өз ара коргоо жөнүндө макулдашуу менен аныкталат.

8-берене. Чыгымдар Тараптар, эгерде ар бир конкреттүү учурда башка тартип макулдашылбаса, ушул Макулдашууну ишке ашыруунун жүрүшүндө келип чыккан чыгымдарды өз алдынча көтөрүшөт. 9-берене. Тилдер Тараптар ушул Макулдашуунун негизинде кызматташууда орус тилин колдонушат. 10-берене. Кызматташууну координациялоо Ушул Макулдашуунун алкагында Тараптардын кызматташуусу боюнча иш-чараларды координациялоо төмөнкүлөргө жүктөлөт: Кыргыз тараптан - Кыргыз Республикасынын Ички иштер министрлигинин Укуктук камсыздоо жана эл аралык кызматташуу башкармалыгына; Россия тараптан - Россия Федерациясынын Улуттук гвардиясынын аскерлеринин федералдык кызматынын Башкы уюштуруу башкармалыгына. Тараптардын аталган бөлүмдөрү өз ара түз байланыштарды жүргүзө алышат. 11-берене. Жумушчу жолугушуулар жана консультациялар Тараптардын өкүлдөрү зарыл болгон учурда ушул Макулдашуунун негизинде кызматташууну бекемдөө жана натыйжалуулугун жогорулатуу маселелерин кароо максатында жумушчу жолугушууларды жана консультацияларды өткөрүшөт. 12-берене. Пикир келишпестиктерди чечүү Ушул Макулдашуунун жоболорун чечмелөөгө же колдонууга байланыштуу Тараптардын ортосунда келип чыккан пикир келишпестиктер консультациялар жана сүйлөшүүлөр аркылуу чечилет. 13-берене. Корутунду жоболор

1. Ушул Макулдашуу кол коюлган датадан тартып күчүнө кирет жана Тараптардын бири экинчи Тараптын анын колдонулушун токтотуу ниети жөнүндө жазуу жүзүндөгү билдирүүсүн алган датадан тартып 6 ай өткөнгө чейин жарактуу болот.

2. Эгерде Тараптар башкача макулдашпаса ушул Макулдашуунун 7-беренесинин жоболору аны колдонуу токтотулган датадан тартып 5 жыл бою күчүндө болот.

3. Тараптардын өз ара макулдашуусу боюнча ушул Макулдашууга анын ажырагыс бөлүгү болуп саналган, өзүнчө протоколдор менен таризделүүчү өзгөртүүлөр жана толуктоолор киргизилиши мүмкүн.

__________________ шаарында _______-жылдын "___" ___________ эки нускада, ар бири кыргыз жана орус тилдеринде даярдалган, бардык тексттер бирдей юридикалык күчкө ээ.

Кыргыз Республикасынын Ички иштер министрлиги үчүн

Россия Федерациясынын Улуттук гвардиясынын аскерлеринин федералдык кызматы үчүн