КР Министрлер Кабинетинин (Мамлекеттик органдар жана жергиликтүү өз алдынча башкаруу органдары тарабынан берилүүчү ишкердик ишти жүзөгө ашыруу үчүн зарыл болгон уруксат берүүчү документтердин бирдиктүү электрондук реестрин түзүү тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2021-жылдын 16-августу № 144-т Мамлекеттик органдар жана жергиликтүү өз алдынча башкаруу органдары тарабынан берилүүчү ишкердик ишти жүзөгө ашыруу үчүн зарыл болгон уруксат берүүчү документтер жөнүндө толук маалыматты электрондук форматта алуу мүмкүндүгүн түзүү максатында, Кыргыз Республикасынын Президентинин 2021-жылдын 29-январындагы № 3 "Менчикти коргоо жана ишкерлер менен инвесторлорду колдоо жөнүндө" Жарлыгынын 3-пунктун аткаруунун алкагында, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык:

1. Кыргыз Республикасынын Экономика жана финансы министрлиги:

- Мамлекеттик органдар жана жергиликтүү өз алдынча башкаруу органдары тарабынан берилүүчү ишкердик ишти жүзөгө ашыруу үчүн зарыл болгон уруксат берүүчү документтердин бирдиктүү электрондук реестрин (мындан ары - Бирдиктүү электрондук реестр) түзсүн;

- Бирдиктүү электрондук реестрди түзүү жана жүргүзүү тартибин бекитсин;

- уруксат берүүчү документтерди берген ыйгарым укуктуу мамлекеттик органдарга үзгүлтүксүз толтуруп туруу үчүн Бирдиктүү электрондук реестрге кирүү мүмкүндүгүн берсин.

2. Төмөнкүлөр белгиленсин:

- Бирдиктүү электрондук реестрге ишкердик иш процессинде иш-аракеттерди жүргүзүү үчүн болушу же өткөрүү зарыл болгон бардык уруксат берүүчү документтер жана жол-жоболор жөнүндө маалыматтар киргизилери;

- аткаруу бийлигинин мамлекеттик органдары ишкердик субъекттеринен алар тууралуу маалымат Бирдиктүү электрондук реестрге киргизилбеген уруксат берүүчү документтерди берүүнү же уруксат берүү жол-жоболорун аткарууну талап кылууга укуксуз экендиги.

3. Уруксат берүүчү документтерди берген аткаруу бийлигинин мамлекеттик органдары, Кыргыз Республикасынын Улуттук банкы (макулдашуу боюнча), жергиликтүү өз алдынча башкаруу органдары (макулдашуу боюнча):

- бир айлык мөөнөттө берилген уруксат берүүчү документтер жөнүндө маалыматтарды Бирдиктүү электрондук реестрге киргизсин;

- Кыргыз Республикасынын Экономика жана финансы министрлиги аныктаган тартипте Бирдиктүү электрондук реестрдеги маалыматтарды үзгүлтүксүз жаңылап турууну, ошондой эле алардын тактыгын, толуктугун жана аныктыгын камсыз кылсын;

- Бирдиктүү электрондук реестрде маалыматтарды туруктуу негизде жүргүзүү жана жаңылап туруу үчүн жооптуу кызматкерлерди аныктасын.

4. Кыргыз Республикасынын Айыл, суу чарба жана аймактарды өнүктүрүү министрлигине караштуу Аймактык өнүгүү мамлекеттик агенттиги жергиликтүү өз алдынча башкаруу органдарына Бирдиктүү электрондук реестрде камтылган маалыматтарды толтурууга жана үзгүлтүксүз жаңылоого көмөк көрсөтсүн.

5. Бул тескеменин аткарылышы үчүн жеке жоопкерчилик аткаруу бийлигинин мамлекеттик органдарынын жетекчилерине жүктөлсүн.

6. Бул тескеменин аткарылышын контролдоо Кыргыз Республикасынын Президентинин Администрациясынын тиешелүү түзүмдүк бөлүмдөрүнө жүктөлсүн.

Төрага

У.А.Марипов