КР Өкмөтүнүн (Кыргыз Республикасынын Өкмөтү менен Казакстан Республикасынын Өкмөтүнүн ортосундагы Кыргыз Республикасынын «Ак-Тилек автожолу» жана Казакстан Республикасынын «Карасу автожолу» өткөрүү пункттарынын ортосунда жаңы көпүрө куруу жана колдонуудагы көпүрөнү реконструкциялоо боюнча биргелешкен иш-аракеттер жөнүндө макулдашуунун долбоору жактыруу жөнүндө) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2019-жылдын 25-ноябры, № 440-б Кыргыз Республикасы менен Казакстан Республикасынын ортосундагы эл аралык транспорттук коридорлорду андан ары өнүктүрүү максатында, "Кыргыз Республикасынын Өкмөтү - жөнүндө" Кыргыз Республикасынын конституциялык Мыйзамынын 10 жана 17-беренелерине, "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 8-беренесине ылайык:

1. Кыргыз Республикасынын Өкмөтү менен Казакстан Республикасынын Өкмөтүнүн ортосундагы Кыргыз Республикасынын "Ак-Тилек автожолу" жана Казакстан Республикасынын "Карасу автожолу" өткөрүү пункттарынын ортосунда жаңы көпүрө куруу жана колдонуудагы көпүрөнү реконструкциялоо боюнча биргелешкен иш-аракеттер жөнүндө макулдашуунун тиркелген долбоору жактырылсын.

2. Кыргыз Республикасынын Транспорт жана жол министрине жогоруда аталган Макулдашуунун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен кол коюуга ыйгарым укук берилсин.

Премьер-министр

М.Д. Абылгазиев

Долбоор Кыргыз Республикасынын Өкмөтү менен Казакстан Республикасынын Өкмөтүнүн ортосундагы Кыргыз Республикасынын "Ак-Тилек автожолу" жана Казакстан Республикасынын "Карасу автожолу" өткөрүү пункттарынын ортосунда жаңы көпүрө куруу жана колдонуудагы көпүрөнү реконструкциялоо боюнча биргелешкен иш-аракеттер жөнүндө МАКУЛДАШУУ Мындан ары Тараптар деп аталуучу Кыргыз Республикасынын Өкмөтү менен Казакстан Республикасынын Өкмөтү эки мамлекеттин региондорунун ортосунда өз ара алмашуу жана соода-экономикалык байланыштар үчүн ыңгайлуу шарттарды түзүү максатында, жыл бою ишенимдүү жана туруктуу каттамды камсыздоо жана өнүктүрүү зарылдыгынан улам, Кыргыз Республикасынын "Ак-Тилек автожолу" жана Казакстан Республикасынын "Карасу автожолу" өткөрүү пункттарынын ортосунда автожол көпүрөлөрүн долбоорлоо, куруу, реконструкциялоо, эксплуатациялоо жана күтүү боюнча биргелешкен иш-аракеттер жөнүндө чечимди ишке ашырууну каалап, төмөнкүлөр жөнүндө макулдашты: 1- берене Ушул Макулдашууда "көпүрөлөр" деген термин менен Кыргыз Республикасынын "Ак-Тилек автожолу" жана Казакстан Республикасынын "Карасу автожолу" өткөрүү пункттарынын ортосунда чек арадагы Чу суусу аркылуу жаңы көпүрө курууну жана колдонуудагы көпүрөнү реконструкциялоону камтыган автожол көпүрөлөрү түшүнүлөт (мындан ары текст боюнча "көпүрөлөр"). 2- берене Ушул Макулдашууну ишке ашыруу боюнча иштерди Тараптардын ыйгарым укуктуу органдары координациялашат:

- кыргыз тараптан - Кыргыз Республикасынын Транспорт жана жол министрлиги;

- казак тараптан - Казакстан Республикасынын Индустрия жана инфраструктуралык өнүктүрүү министрлиги.

Өздөрүнүн ыйгарым укуктуу мамлекеттик органдарын өзгөрткөн учурда Тараптар бири-бирине дипломатиялык каналдар боюнча токтоосуз кабарлашат. 3-берене Көпүрөлөрдү долбоорлоо, куруу, реконструкциялоо, эксплуатациялоо жана тейлөө үчүн жооптуу уюмдар болуп төмөнкүлөр саналат:

- кыргыз тараптан - Кыргыз Республикасынын Транспорт жана жол министрлигинин алдындагы Жол чарба департаменти;

- казак тараптан - Казакстан Республикасынын Индустрия жана инфраструктуралык өнүктүрүү министрлигинин Автомобиль жолдору комитети.

Жогоруда аталгап жооптуу уюмдардын аталыштары же функциялары өзгөргөндүгү жөнүндө Тараптар дипломатиялык каналдар боюнча өз учурунда кабарланышат. 4- берене

1. Жаңы көпүрө куруу жана колдонуудагы көпүрөнү реконструкциялоо чек арадагы Чу суусунун агымынын багытын, анын нугун, жээгинин линиясын жана мамлекеттик чек ара линиясынын өтүшүн өзгөртпөшү, бул райондогу экологиялык жана башка коопсуздукту бузбашы керек.

2. Көпүрөлөрдү Тараптардын ар бири өз аймагында бир мезгилде тургузушу керек, куруу жана реконструкциялоо аяктагандан кийин көпүрөлөр Кыргыз Республикасы менен Казакстан Республикасынын менчигине бирдей үлүштө өткөрүп берилет.

3. Көпүрөлөрдү эксплуатациялоону жана күтүүнү Тараптар өз аймактарынын чегинде ишке ашырышат.

4. Көпүрөлөрдү эксплуатациялоонун жана күтүүнүн конкреттүү режими Тараптардын ушул Макулдашуунун 3-беренесинде көрсөтүлгөн жооптуу уюмдарынын ортосунда кошумча макулдашылат.

5. Тараптардын мамлекеттик чек аралары аркылуу өткөрүү жана өндүрүштүк зарылдык боюнча трансчек аралык курулмалардын тейлөөчү персоналынын чарбалык, өндүрүштүк же башка иштерди жүргүзүү үчүн мамлекеттик чек араларда жана чек ара тилкесинде болуу тартиби 2017-жылдын 25-декабрында Астана шаарында кол коюлган Кыргыз Республикасынын Өкмөтү менен Казакстан Республикасынын Өкмөтүнүн ортосундагы Кыргыз-казакстан мамлекеттик чек ара режими жөнүндө макулдашууда белгиленген тартипте аныкталат.

5- берене Көпүрөлөрдү тургузууга байланышкан бардык чыгымдарды, анын ичинде материалдык-техникалык ресурстарды тартуу менен долбоорлоо-изилдөө иштерине кеткен чыгымдарды, ошондой эле көпүрөлөрдү курууга жана реконструкциялоого байланышкан башка чыгымдарды Тараптар бирдей үлүштө көтөрүшөт.

2. Көпүрөлөргө баруучу транспорт жолдорун, көмөкчү объекттерди жана курулмаларды ар бир Тарап өз мамлекетинин аймагында өз алдынча курат жана көпүрөлөрдү курууну аяктоо менен бир мезгилде бүткөрөт.

6- берене Ушул Макулдашуу күчүнө киргенден кийин ушул Макулдашуунун 3-беренесинде көрсөтүлгөн уюмдар 3 (үч) айдын ичинде кызматташуу жөнүндө сүйлөшүүлөрдү жүргүзүшөт, көпүрөлөрдүн курулмаларынын конкреттүү маселелерин жөнгө салуучу зарыл болгон келишимдик документтерди иштеп чыгышат жана кол коюшат, анын ичинде изилдөө жана долбоорлоо иштерин жүргүзүү бөлүгүндө, алардын натыйжаларын бекитүүнү - тиешелүү экспертизаларды жүргүзүүнү, көпүрөлөрдү эксплуатациялоо жана күтүү режимин кошкондо. 7- берене Ушул Макулдашуунун жоболорун чечмелөөдө жана пайдаланууда талаш-тартыштар жана каршы пикирлер келип чыккан учурда, Тараптар аларды консультацияларды жана сүйлөшүүлөрдү жүргүзүү жолу менен чечишет. 8- берене Тараптардын өз ара макулдугу боюнча ушул Макулдашууга анын ажырагыс бөлүгү болуп саналган өзүнчө протоколдор менен таризделүүчү өзгөртүүлөр жана толуктоолор киргизилиши мүмкүн. 9- берене Ушул Макулдашуу анын күчүнө кириши үчүн зарыл болгон мамлекеттик ички жол-жоболорду Тараптардын аткаргандыгы жөнүндө акыркы жазуу жүзүндөгү кабарлоо алынган датадан тартып күчүнө кирет. 10- берене Ушул Макулдашуу аныкталбаган мөөнөткө түзүлөт жана Тараптардын бири анын колдонулушун токтотуу жөнүндө өзүнүн ниети тууралуу экинчи Тарапка жазуу жүзүндө кабарлаган датадан тартып 6 (алты) ай өткөнгө чейин күчүндө болот. 20_-жылдын "_" _ "_" шаарында эки нускада, ар бири кыргыз, казак жана орус тилдеринде түзүлдү, мында бардык тексттер бирдей күчкө ээ. Ушул Макулдашуунун жоболорун чечмелөөдө каршы пикирлер келип чыккан учурда Тараптар орус тилиндеги текстти жетекчиликке алышат.

Кыргыз Республикасынын Өкмөтү үчүн Казакстан Республикасынын Өкмөтү үчүн