КР Өкмөтүнүн «Кыргыз Республикасынын Өкмөтү менен Россия Федерациясынын Өкмөтүнүн ортосундагы Аскердик фельдъегердик-почта байланышы жаатында кызматташуу жөнүндө макулдашуунун долбоорун жактыруу жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2019-жылдын 26-марты № 67-б

1. Кыргыз Республикасынын Өкмөтү менен Россия Федерациясынын Өкмөтүнүн ортосундагы Аскердик фельдъегердик-почта байланышы жаатында кызматташуу жөнүндө макулдашуунун тиркелген долбоору жактырылсын.

2. Кыргыз Республикасынын Куралдуу Күчтөрүнүн Генералдык штабынын башчысына принциптүү эмес мүнөздөгү өзгөртүүлөрдү жана толуктоолорду киргизүү укугу менен жогоруда аталган Макулдашуунун долбооруна кол коюуга ыйгарым укук берилсин.

Премьер-министр

М.Д.Абылгазиев

Долбоор

Кыргыз Республикасынын Өкмөтү менен Россия Федерациясынын Өкмөтүнүн ортосундагы Аскердик фельдъегердик-почта байланышы жаатында кызматташуу жөнүндө МАКУЛДАШУУ Мындан ары Тараптар деп аталуучу Кыргыз Республикасынын Өкмөтү менен Россия Федерациясынын Өкмөтү, Кыргыз Республикасы менен Россия Федерациясынын ортосундагы 1992-жылдын 10-июнундагы Достук, кызматташтык жана өз ара жардам жөнүндө келишимди жетекчиликке алып, Тараптардын мамлекеттеринин аскердик түзүлүштөрүнүн кызыкчылыгындагы жашыруун жана кызматтык маалыматтарды жеткирүүдө аларды коргоону камсыздоодо Тараптардын өз ара кызыкчылыктарын эске алып, аскердик фельдъегердик-почта байланышы жаатында маалымат алмашууну жана өз ара аракеттенүүнү камсыздоо үчүн күчтү бириктирүү жана аракеттерди макулдашуу зарылчылыгын таанып, төмөнкүлөр жөнүндө макулдашты: 1-берене. Ушул Макулдашууда колдонулуучу түшүнүктөр төмөнкүлөрдү билдирет: "вализа" - тийиштүү түрдө таризделген, сырткы бетинде аскердик корреспонденциянын көрүнүп турган тышкы идентификациялык белгиси ("Аскердик корреспонденция" деген жазуу), жөнөтүүчүнүн пломбасы жана (же) мөөрү бар баштык, пакет, конверт, куту, мүшөк, чемодан же башка таңгак; "аскердик корреспонденция" - аскердик түзүлүштөр жөнөтүүчү жана кабыл алуучу атайын жана кызматтык корреспонденция, атайын жүк; "аскердик түзүлүш" - Тараптардын мамлекеттеринин куралдуу күчтөрүнүн аскердик башкаруу органдары, аскер бөлүктөрү, бөлүкчөлөрү жана уюмдары (мекемелери); "аскердик фельдъегердик-почта байланыш тармагы" - бир Тараптын мамлекетинин куралдуу күчтөрүнүн фельдъегердик почта байланышынын аскер бөлүктөрүнүн жана бөлүкчөлөрүнүн (дайындалган жерге жөнөтүүлөрдүн жүрүүсүн камсыздаган бирдиктүү системага байланышкан Тараптардын мамлекеттеринин ыйгарым укуктуу органдарынын бөлүкчөлөрүнүн, авиациялык, темир жол жана автомобиль маршруттарынын жыйындысы), анын ичинде экинчи Тараптын мамлекетинин аймагында жайгашкан жеткирүү каражаттарынын жана аскердик корреспонденциянын бардык түрлөрүн кабыл алуу, иштетүү жана жеткирүү үчүн түзүлүүчү дайындалган жүрүү маршруттарынын жыйындысы; "кызматтык корреспонденция" - аскердик түзүлүштөргө даректелген жөнөкөй жана катталуучу каттар, бандеролдор жана жөнөтмөлөр; "атайын жүктөр" - жашыруун маалыматты камтыган буюмдар, материалдар же алардын компоненттери; "атайын корреспонденция" - ар түрдүү даражадагы жашыруундуулукка ээ болгон корреспонденция, ошондой эле Тараптардын ар бир мамлекетинин мыйзамдары менен корголуучу маалыматтарды камтыган башка корреспонденция; "фельдъегерлер (чабармандар жана колго берүүчүлөр)" - Тараптын ыйгарым укуктуу органынын ушул Тараптын мамлекетинин мыйзамдарына ылайык аскердик корреспонденциянын сакталышын камсыздоо жана жеткирүү боюнча милдеттерди аткарган кызмат адамдары. 2-берене. Ушул Макулдашууну ишке ашыруу максатында Тараптар ал күчүнө киргенден кийин 2 айлык мөөнөттө ыйгарым укуктуу органдарды дайындайт, алар дипломатиялык каналдар боюнча бири-бирине кабарлайт. 3-берене. Бир Тараптын мамлекетинин аскердик корреспонденциясын экинчи Тараптын мамлекетинин аймагында жайгашкан анын аскердик түзүлүштөрүнүн кызыкчылыгында жеткирүү ушул Макулдашуунун ажыратылгыс бөлүгү болуп эсептелген Аскердик фельдъегердик-почта байланыш тармагы боюнча аскердик корреспонденцияны жеткирүү жөнүндө жобо менен белгиленген эрежелерге ылайык биринчи Тараптын мамлекетинин аскердик фельдъегердик почта байланыш тармагы боюнча жүзөгө ашырылат. Тараптардын мамлекеттеринин ыйгарым укуктуу органдарынын өз ара сүйлөшүүсү боюнча экинчи Тараптын мамлекетинин аскердик түзүлүшүнө даректелген биринчи тараптын аскердик корреспонденциясын жеткирүү ушул же экинчи Тараптын аскердик фельдъегердик-почта байланыш тармагы боюнча өзүнүн корреспонденциясын жеткирүү үчүн белгиленген эрежелерге ылайык жүзөгө ашырылышы мүмкүн. 4-берене.

1. Ушул Макулдашууга ылайык жеткирилүүчү аскердик корреспонденция кол тийгис болуп эсептелет жана ачууга, жибербей кармап турууга болбойт.

Аймагына аскердик корреспонденция жеткирилүүчү Тараптын мамлекетинин чек ара органдары экинчи Тараптын ыйгарым укуктуу органынын фельдъегерлерин (чабармандарын жана колго берүүчүлөрүн), алар ушул Макулдашуунун 5-беренесинде каралган документтерди көрсөткөндө кезексиз тартипте мамлекеттик чек ара аркылуу өткөрөт, өзүнүн ыйгарым укуктарынын чегинде аскердик корреспонденцияны ыкчам жеткирүүнү уюштурууга колдоо көрсөтөт жана алардын өз кызматтык милдеттерин аткаруусуна керектүү жардам берет. Мамлекеттик чек ара аркылуу өтүп жаткан аскердик корреспонденция Тараптардын мамлекеттеринин аймагына ташып киргизүүгө (аймагынан ташып чыгарууга) тыюу салынган же чектелген жүк же мүлк (анын ичинде курал, баңгизат же аларды жасаганга, колдонгонго керектүү шаймандар) болушу мүмкүн деп болжолдоого олуттуу негиздер болгон учурда, аймагына аскердик корреспонденция ташып киргизилген (аймагынан ташып чыгарылган) Тараптын мамлекетинин чек ара органдары аймагына аскердик корреспонденция ташылып кирген (аймагынан ташылып чыккан) Тараптын мамлекетинин мыйзамдарында белгиленген тартипте техникалык каражаттар менен чек ара контролун жүргүзүшөт.

2. Аймагына аскердик корреспонденция жеткирилген Тараптын мамлекетинин мамлекеттик бийлик органдары жана уюмдары (мекемелери):

а) экинчи Тараптын мамлекетинин ыйгарым укуктуу органынын фельдъегерлерине (чабармандарына жана колго берүүчүлөрүнө) колдоо көрсөтөт, анын ичинде:

аскердик корреспонденцияны жеткирүүнү жана анын кепилденген сакталуу шарттарын камсыздоону уюштурууга, ошондой эле аскердик корреспонденцияны жеткирүү боюнча алардын милдеттерди аткаруусуна жардам берүүгө; белгиленген тарифтер боюнча транспортко кезексиз билет алууга; куралдуу кол салуу (кол салуу коркунучу) болгон учурда аскердик корреспонденцияны, куралдарды жана ок-дарыларды коргоого; аскердик корреспонденцияны жеткирүүгө же кызматтык маалыматты берүүгө башка мүмкүнчүлүк жок болгондо автомобилдик транспорт жана байланыш каражаттарын берүүгө; маршруттун акыркы пунктту болуп эсептелбеген аэродромдорго аба кемелери конгон учурда аскердик корреспонденцияны жайгаштыруу жана фельдъегерлердин (чабармандардын жана колго берүүчүлөрдүн) эс алуусу үчүн өзүнчө бөлүнгөн жайларды берүүгө; фельдъегерлер (чабармандар жана колго берүүчүлөр) жүргөн аба кемелерди жана поезддерди жөнөтүү аргасыз кармалган учурда башка каражаттар менен аскердик корреспонденцияны жеткирүүгө;

б) фельдъегерлер (чабармандар жана колго берүүчүлөр) жүргөн транспорт авария болгон учурда алардагы болгон аскердик корреспонденцияны жана куралдарды сактап калууга жана сакталышын камсыздоого аларга керектүү жардам көрсөтөт;

в) фельдъегерлер (чабармандар жана колго берүүчүлөр) ооруган, жаракат алган, каза болгон же өзүнүн милдеттерин аткарууга мүмкүн болбогон башка жагдайлар келип чыккан учурда аскердик корреспонденцияны коргоо, сактыгын жана кол тийгистигин камсыздоо боюнча чараларды көрөт жана аскердик корреспонденция жеткирилүүчү Тараптын мамлекетинин ыйгарым укуктуу органына кабарлайт.

5-берене. Тараптардын мамлекеттеринин аскердик түзүлүштөрүнө корреспонденция жеткирүүчү фельдъегерлер (чабармандар жана колго берүүчүлөр) мамлекеттик чек араны кесип өтүү үчүн жарактуу документтерди көрсөткөндө Тараптардын мамлекеттеринин аймагына табелдик куралы (ок атуучу куралы жана атайын каражаттары) менен тоскоолдуксуз кирет жана Тараптардын мамлекеттеринин мыйзамдарына ылайык андан чыгат. Фельдъегерлердин (чабармандардын жана колго берүүчүлөрдүн) табелдик куралды (ок атуучу куралды жана атайын каражаттарды) жана кара күчтү сактоо, алып жүрүү жана колдонуу тартиби барган мамлекетинин мыйзамдары жана Тараптардын мамлекеттеринин аталган маселелерди жөнгө салган эл аралык келишимдери менен аныкталат. Фельдъегерлер (чабармандар жана колго берүүчүлөр) өздөрүнүн кызматтык милдеттерин аткарууда аты-жөнү, ошондой эле алардын статусу жана аскердик корреспонденцияны түзгөн орундардын саны көрсөтүлгөн расмий документтер жана Тараптардын мамлекеттеринин улуттук мыйзамдары менен аныкталган башка документтер менен камсыздалышы керек. Расмий документте көрсөтүлгөн маалыматтар Тараптын мамлекетинин ыйгарым укуктуу органынын аскердик корреспонденция жөнөткөн бөлүкчөсүнөн расмий адамдын колу менен күбөлөндүрүлөт жана жөнөтүүчүнүн мөөрү басылат. Аскердик корреспонденцияны жылдыруу үчүн вализа колдонулат. Фельдъегерлер (чабармандар жана колго берүүчүлөр) аскердик корреспонденция жеткирилген Тараптын мамлекетинин аймагында жүргөн мезгилде барган мамлекетинин коргоосун, жеке кол тийгистикти колдонот жана кармоого, камакка алууга жатпайт. Фельдъегерлер (чабармандар жана колго берүүчүлөр) барган мамлекетинин мыйзамдарын сактоого жана анын ички ишине кийлигишпөөгө милдеттүү. 6-берене. Ушул Макулдашууну аткаруунун жүрүшүндө Тараптардын бири экинчи Тараптын мамлекетинин жашыруун маалыматтарды алып жүрүүчүсүн же жеткирилген аскердик корреспонденцияда камтылган жашыруун маалыматтарга жетүүнү өзүнүн карамагына алган учурда, мындай маалыматты колдонуу жана аны сактоо 2003-жылдын 19-сентябрындагы Кыргыз Республикасынын Өкмөтү менен Россия Федерациясынын ортосундагы Жашыруун маалыматтарды өз ара коргоо жөнүндө макулдашууга ылайык жүзөгө ашырылат. Ушул Макулдашууну ишке ашыруунун жүрүшүндө Тараптардын бири алган маалымат экинчи Тараптын мамлекетинин эгемендүүлүгүнө, коопсуздугуна, коомдук тартибине же башка маанилүү кызыкчылыктарына каршы колдонулбашы керек. Ушул Макулдашууну ишке ашыруунун жүрүшүндө экинчи Тараптан алынган маалыматты бир Тараптын үчүнчү тарапка, анын ичинде юридикалык жана жеке жактарга берүүсүнө мындай маалыматты берген Тараптын жазуу жүзүндөгү макулдугу менен гана жол берилет. 7-берене. Бир Тараптын мамлекетинин аскердик корреспонденциясын экинчи Тараптын аймагында жайгашкан анын аскердик түзүлүштөрүнө жеткирүү менен байланышкан бардык чыгымдар жөнөтүүчү Тараптын каражаттарынын эсебинен жүзөгө ашырылат. 8-берене. Ушул Макулдашууну ишке ашыруу максатында Тараптардын мамлекеттеринин ыйгарым укуктуу органдары 2 жылда бир жолудан кем эмес же зарылдыгына жараша биргелешкен кеңешмелерди өткөрөт. 9-берене. Ушул Макулдашууну чечмелөөгө же колдонууга байланыштуу Тараптардын ортосунда келип чыккан талаш маселелер сүйлөшүүлөр жана консультациялар жолу менен чечилет. 10-берене. Ушул Макулдашуунун күчүнө кириши үчүн керектүү мамлекеттик ички жол-жоболорду Тараптардын аткаргандыгы жөнүндө жазуу түрүндөгү акыркы кабарлоо алган датадан баштап, ал күчүнө кирет. Ушул Макулдашууга Тараптардын өз ара макулдугу боюнча өзгөртүүлөр жана толуктоолор киргизилиши мүмкүн, алар ушул Макулдашуунун ажыратылгыс бөлүгү болуп эсептелген өзүнчө протоколдор менен таризделет. Ушул Макулдашуу 5 жылдык мөөнөткө түзүлөт жана кийинки 5 жылдык мөөнөттөргө автоматтык түрдө узартылат. Ар бир Тарап тийиштүү мөөнөт аяктаганга 6 ай калганга чейин ушул Макулдашуунун колдонулушун токтотуу ниети жөнүндө экинчи Тарапка жазуу жүзүндө кабарлап, ушул Макулдашуунун колдонулушун токтото алат. Бишкек шаарында 2019-жылдын __-______________ эки түп нускада, ар бири кыргыз жана орус тилдеринде түзүлдү, мында эки текст тең бирдей күчкө ээ. Ушул Макулдашууну чечмелөөдө пикир келишпестиктер келип чыккан учурда орус тилиндеги текст негиз катары алынат.

Кыргыз Республикасынын Өкмөтү үчүн

Россия Федерациясынын Өкмөтү үчүн

Кыргыз Республикасынын Өкмөтү менен Россия Федерациясынын Өкмөтүнүн ортосундагы Аскердик фельдъегердик-почта байланышы жаатындагы кызматташуу жөнүндө макулдашууга тиркеме

Аскердик фельдъегердик-почта байланыш тармагы аркылуу аскердик корреспонденцияны жеткирүү жөнүндө ЖОБО

1. Ушул Жобо бир Тараптын мамлекетинин аскердик корреспонденциясын экинчи Тараптын мамлекетинин аймагында жайгашкан аскердик түзүлүштөрүнүн кызыкчылыгында биринчи Тараптын аскердик фельдъегердик-почта байланышынын тармагы аркылуу жеткирүүнүн тартибин аныктайт.

2. Аскердик корреспонденция Тараптын мамлекетинин аскердик түзүлүштөрү жайгашкан калктуу конушка (жайгашуу пункту) алардын кызыкчылыгында түздөн-түз жеткирилет. Мында бир Тараптын аскердик фельдъегердик-почта байланыш тармагынын аскердик бөлүктөрү жана бөлүкчөлөрү экинчи Тараптын ыйгарым укуктуу органынын фельдъегерлерине (курьерлерине, колго берүүчүлөрүнө) аскердик корреспонденцияны жеткирүүдө көмөк көрсөтүшөт.

Аскердик корреспонденцияны жеткирүү эреже катары, эки фельдъегер (курьер, колго берүүчү) тарабынан жүзөгө ашырылат, алардын бирөөсү аскердик корреспонденцияны жеткирүү боюнча тапшырманы аткарууга жооптуу болуп дайындалат.

3. Тараптын мамлекетинин кызыкчылыгы үчүн аскердик корреспонденция жеткирилүүчү алардын аскердик фельдъегердик-почта байланыш тармагынын аскердик түзүлүштөрү экинчи Тараптын мамлекетинин аймагы боюнча аскердик корреспонденция жеткиргенде, алар аймагында жүргөн Тараптын мамлекетинин мыйзамдарына ылайык аны жеткирүүнүн коопсуздугун камсыздоо боюнча иш-чараларды жүзөгө ашырышат.

4. Аскердик корреспонденция жеткирүү боюнча тапшырманы аткарууда фельдъегерлер (курьерлер, колго берүүчүлөр) аскердик корреспонденция жеткирилген Тараптын мамлекетинин коопсуздук органдарына, ички иштер, чек ара жана бажы органдарына, аэропорттун (темир жол вокзалдарынын жана автобекеттердин) башчыларына кайрылууга укуктуу.

Аталган органдар жана адамдар аларга аскердик корреспонденцияны ыкчам жеткирүүнү уюштурууга көмөк көрсөтүшөт жана алар өз кызматтык милдеттерин аткарууда зарыл болгон жардамды беришет.

5. Аскердик корреспонденция кол жүк жана багаж катары төмөнкүдөй ташылат:

а) аба транспорту менен - жарандык авиациянын каттамдагы аба кемелеринин жүргүнчүлөр салондорунда, ал эми айрым учурда - атайын жана почта каттамындагы аскердик-транспорттук учактарда жана тик учактарда;

б) темир жол транспорту менен - жүргүнчү жана ылдам жүрүүчү поезддердин өзүнчө жүргүнчү купелеринде, анын ичинде почта вагондорунда;

в) автомобиль транспорту менен - атайын автомашиналарда.

Кызматтык корреспонденцияны коомдук пайдалануудагы автомобиль транспорту менен жеткирүү табелдик куралсыз (ок атуучу куралсыз жана атайын каражаттарсыз) жүргүзүлөт.

6. Фельдъегерлер (курьерлер, колго берүүчүлөр) үчүн орундарды, ошондой эле 5-пунктта аталган транспорт каражаттарына жалпы жүргүнчүлөрдү отургузганга чейин отургузуу укугун Тараптардын мамлекеттеринин аба, темир жол, автомобиль транспортун башкаруу органдары (уюмдар) камсыздашат.

7. Ташылуучу аскердик корреспонденцияга бардык коштомо документтер орус тилинде толтурулат. Аскердик корреспонденциянын даректелүүчүсү кыргыз тилинде көрсөтүлсө, жөнөтмөлөрдөгү даректин жана белгилердин орус тилиндеги котормосу болушу керек.

8. Ушул Жобонун 5-пунктунун в) подпунктчасынын экинчи абзацында каралган учурдан тышкары, аскердик корреспонденцияны жеткирүүдө фельдъегерлердин (курьерлердин, колго берүүчүлөрдүн) табелдик куралдары (ок атуучу куралдары жана атайын каражаттары) болушу керек. Аскердик корреспонденция жеткирилген Тараптын мамлекетинин мамлекеттик чек арасы аркылуу табелдик куралды (ок атуучу куралды жана атайын каражаттарды) өткөрүү үчүн негиз болуп, аны сактоого, алып жүрүүгө, колдонууга жана пайдаланууга укук берген расмий документтер (фельдъегердин (курьердин, колго берүүчүнүн) өздүгүн күбөлөндүргөн өздүк күбөлүктөр жана командировкалык жазма буйруктар) саналат.