КР Өкмөтүнүн «Түрк маданияты жана мурасы фондунун финансылык эрежеле жөнүндө макулдашуунун долбоору жанаТүрк маданияты жана мурасы фондунун бюджетине мүчө мамлекеттердин милдеттүү төлөмдөрүнүн шкаласы боюнча протоколдун долбоору жактыруу жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2018-жылдын 30-августу № 306-б Түрк маданияты жана мурасы фонду менен кызматташтыкты андан ары өнүктүрүү максатында, "Кыргыз Республикасынын эл аралык келишимдери жөнүндө" Кыргыз Республикасынын Мыйзамына, "2012-жылдын 23-августунда Бишкек шаарында кол коюлган Түрк маданияты жана мурасы фондунун уставын ратификациялоо жөнүндө" Кыргыз Республикасынын Мыйзамы менен ратификацияланган Кыргыз Республикасынын Түрк маданияты жана мурасы фондунун уставына, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык:

1. Мамлекеттик тилде тиркелген төмөнкүлөр жактырылсын:

- Түрк маданияты жана мурасы фондунун финансылык эрежелери жөнүндө макулдашуунун долбоору;

- Түрк маданияты жана мурасы фондунун бюджетине мүчө мамлекеттердин милдеттүү төлөмдөрүнүн шкаласы боюнча протоколдун долбоору.

2. Кыргыз Республикасынын Өкмөтүнүн 2015-жылдын 10-сентябрындагы № 434-б буйругу күчүн жоготту деп таанылсын.

Премьер-министр

М.Д.Абылгазиев

Долбоор Түрк маданияты жана мурасы фондунун финансылык эрежелери жөнүндө МАКУЛДАШУУ Мындан ары "Тараптар" деп аталуучу Кыргыз Республикасынын, Азербайжан Республикасынын, Казакстан Республикасынын жана Түркия Республикасынын өкмөттөрү, эл аралык укуктун жалпы кабыл алынган принциптерин жана ченемдерин жетекчиликке алып, Азербайжан Республикасынын Нахчыван шаарында Түрк тилдүү мамлекеттердин башчыларынын IX Саммитинде кабыл алынган Түрк маданияты жана мурасы фондун (мындан ары - Фонд) түзүү жөнүндө 2009-жылдын 3-октябрындагы чечимге ылайык, 2012-жылдын 23-августунда Бишкек шаарында кол коюлган Түрк маданияты жана мурасы фондунун уставынын (мындан ары - Устав) 6-беренесинин жоболорун ишке ашыруу максатында, Фондду Азербайжан Республикасында жайгаштыруунун тартиби жөнүндө Азербайжан Республикасынын Өкмөтү менен Түрк маданияты жана мурасы фондунун ортосунда кабыл алуучу макулдашууну урматтоо менен, төмөнкүлөр жөнүндө макулдашты: 1-берене. Аныктамалар Ушул Макулдашууда төмөнкүдөй аныктамалар колдонулат: "Түрк Кеңеши" - Түрк тилдүү мамлекеттердин кызматташтык кеңеши; "Тараптар" - Уставга кол койгон Түрк Кеңешине мүчө мамлекеттер; "ТИМК" - Түрк Кеңешинин Тышкы иштер министрлеринин кеңеши; "ТМУКАК" - Түрк тилдүү мамлекеттердин улук кызмат адамдарынын комитети; "Кабыл алуучу өлкө" - аймагында Фонд жайгашкан мүчө өлкө; "Макулдашуу" - Түрк маданияты жана мурасы фондунун финансылык эрежелери жөнүндө ушул макулдашуу; "Президент" - Фонддун Президенти; "Кеңеш" - Фонддун Кеңеши, Түрк тилдүү мамлекеттердин кызматташтык кеңешине мүчө мамлекеттердин ар биринин бирден өкүлдөрүнөн турган көзөмөлдөөчү орган; "Катчылык" - Фонддун Катчылыгы; "Фонддун штаты" - Президенттен, адистерден жана жалпы тейлөөчү персоналдан турат; "Багуудагылар" - кызматчынын жубайы, 18 жашка чейинки никеге тура элек балдары жана толук көз каранды ата-энеси; "Фонддун имараттары" - Фонддун функцияларын ишке ашырууда пайдаланылган имарат же имараттын бөлүгү жана жер участогу; "Адистиги бар персонал" - келишимдин негизинде жалдоого алынган адистиги бар персонал; "Жалпы тейлөөчү персонал" - келишимдин негизинде жалдоого алынган техникалык персонал; "Бюджет" - Фонддун милдеттерин жана функцияларын аткарууга каралган каражатты түзүү жана сарптоо; "Финансылык жыл" - календардык жылдын 1-январынан баштап 31-декабрына чейинки мезгилди түшүндүрөт; "Төгүм" - кезектеги финансылык жылга карата Фонддун иши менен байланышкан чыгымдарды жабууга Тараптар үчүн белгиленген суммалар; "Тышкы аудит"- ТИМК тарабынан дайындалган көз карандысыз аудитор/аудиторлор тарабынан Фонддун финансылык жана экономикалык ишин текшерүү; "Кирешелер" - Фонд тарабынан бюджетке төлөм түрүндө алынган каражат; "Башка кирешелер" - Тараптар үчүн белгиленген суммалардан жана акчалай салымдардан сырткары түшкөн каражаттар жана финансылык жылдагы чыгымдардын ордун түздөн-түз толтуруунун жыйынтыгында алынган суммалар; "Сарптоолор" - Фонддун өз милдеттерин жана функцияларын каржылоо үчүн бюджеттен берилген каражат; "Талапкердин чыгымдары" - талапкерлердин транспорттук, мейманканада жашап туруу жана күнүмдүк чыгашалары; "Жүгүртмө каражаттардын резерви" - милдеттүү түрдөгү төгүмдөрдүн толук төлөмүн күткөн учурда Фонддун сарптоолору үчүн каралган бюджеттин бир бөлүгү. 2-берене. Негизги жоболор Ушул Макулдашууда каржылоо булактары, бюджетти түзүү, аткаруу жана отчеттуулук тартиби аныкталган. 3-берене. Бюджет

3.1. Фонддун бюджети Фонддун узак мөөнөттүү долбоорлорун ишке ашырууга жыл сайын сарпталуучу чыгашаларды кошкондо финансылык жылга болгон акчалай жана башка түрдөгү кирешелерди жана сарптоолорду өзүнө камтыйт.

3.2. Фонддун бюджети Президент тарабынан иштелип чыгат жана ТМУКАКта жактырылгандан кийин ТИМК тарабынан бекитилет.

3.3. Кирешелерге төмөнкүлөр кирет:

а) Тараптардын милдеттүү түрдөгү төлөмдөрү, алардын төлөмдүк жөндөмүн жана Бириккен Улуттар Уюмуна төлөмдөрдүн шкаласын жана салыштыруучу аймактык уюмдардагы алардын учурдагы төлөмдөрүн эске алуу менен ТИМК тарабынан аныкталат. Бирок кабыл алуучу мамлекеттин төлөмү башка Тараптардын төлөмдөрүнөн аз эмес болууга тийиш. Милдеттүү түрдөгү төлөмдөрдүн шкаласы өзүнчө протокол менен түзүлүп, ТИМК тарабынан кол коюлат жана максатка ылайыктуу болсо өзгөртүлүүсү мүмкүн;

б) гранттар;

в) Тараптардын Фонддун бюджетине ыктыярдуу түрдөгү төгүмдөрү, анын өлчөмдөрү чектелбейт;

г) байкоочу мамлекеттерден, башка мамлекеттерден, башка эл аралык уюмдардан жана форумдардан, юридикалык жана жеке жактардан алынышы мүмкүн болгон Тараптар бекитүүгө тийиштүү акчалай жана/же башка формадагы ыктыярдуу төлөмдөр;

д) Фонддун максатына жана милдетине каршы келбеген башка каражаттар, анын ичинде пайыздардан түшкөн киреше жана башка кирешелер.

3.4. Сарптоолорго төмөнкүлөр кирет:

а) маданий жана илимий чыгымдар:

- изилдөө чыгымдары;

- долбоор боюнча чыгымдар;

- симпозиумдар, илимий конференциялар жана жолугушуулар;

- басып чыгаруу чыгымдары;

- субподрядчиктер;

- консультациялык чыгымдар;

а) кызматкерлерге сарптоолор:

Президенттин эмгек акысы, анын ичинде:

1. медициналык камсыздандыруу; 2. багуудагыларга жөлөкпул; 3. билим алууга чыгашалар; 4. жашоо үчүн жөлөкпул; 5. өргүүгө ротациялык чыгымдар, бала багуу боюнча өргүү (жылына бир жолу), 7. өкүлчүлүк чыгымдары; 8. салымдар жана социалдык камсыздандыруу боюнча төлөмдөр кирет;

б) адистиги бар кызматкерлердин эмгек акысы, анын ичинде:

1. медициналык камсыздандыруу; 2. багуудагыларга жөлөкпул; 3. билим алууга чыгашалар; 4. 5 жылга (бир жылда бир жолу) эргүүгө ротациялык чыгымдар, 6. социалдык жана пенсиялык камсыздандыруу боюнча төлөмдөр кирет;

в) жалпы тейлөөчү персоналдын эмгек акысы, анын ичинде:

1. медициналык камсыздандыруу; 2. багуудагыларга жөлөкпул; 3. социалдык жана пенсиялык камсыздандыруу боюнча төлөмдөр кирет;

г) персоналдын кызматтык контрагы токтотулган учурда бошотуу жөлөкпулу;

д) Фонддун кызматкерлеринин иш сапарларына болгон, анын ичинде суткалык, транспорттук жана мейманканада жашап туруу чыгымдары;

е) персоналды окутуу;

ж) талапкерлердин чыгымдары;

кабыл алуучу тараптын жарандарына багуудагыларга жөлөкпул жана билим алууга чыгашалар төлөнбөйт;

з) административдик чыгымдар:

1. персоналды өзүнүн милдетин аткаруу учурунда кырсыктардан сактоо/кызматкерлердин иш ордуна кырсыктардан сактоо боюнча камсыздандыруу;

2. милдеттүү социалдык камсыздандыруу;

3. фонд үчүн товарларды жана кызмат көрсөтүүлөрдү сатып алуу;

4. фонддун иши үчүн зарыл болгон кеңсе эмеректерин, жабдууларды, автомобилдерди жана башка каражаттарды сатып алуу;

5. имараттарды техникалык тейлөө, кеңсе эмеректерин, жабдууларды, автомобилдерди жана башка буюмдарды оңдоо жана техникалык кызмат көрсөтүү;

6. протоколдук чыгымдар;

7. Фонддун Кеңешинин мүчөлөрүнүн иш сапарга болгон, анын ичинде транспорттук, суткалык жана мейманканада жашап туруу чыгымдары кирет.

3.5. Финансылык жылга карата персоналдын ээлеген кызматына жана айлык маянасына жараша чыгымдарды көрсөтүүчү Фонддун персоналына болгон чыгымдардын матрицасы Фонд тарабынан даярдалып, ТМУКАКтын жактыруусунан кийин ТИМК тарабынан бекитилет.

4-берене. Бюджетти башкаруу

4.1. Бюджетти Президент башкарат.

4.2. Ар бир Тараптын милдеттүү төлөмүнүн так суммасы бюджетте көрсөтүлөт.

4.3. Бюджетке ар жылдык төлөмдөр АКШ долларында эсептелет жана төлөнөт.

4.4. Фонд ТИМКга бюджетке белгиленген төлөм толугу менен берилгендиги боюнча Түрк Кеңешинин Катчылыгы аркылуу маалымат берет.

4.5. Тийиштүү төлөмдөр финансылык жылдын биринчи үч айынын ичинде төлөнөт. Бирок, аны аткаруу улуттук мыйзамдарга байланыштуу мүмкүн болбогон учурда төлөмдөр төрт интервалда төгүлүшү жана ар бир кварталдын башталышында төлөнүшү мүмкүн.

5-берене. Сарптоолорду баалоо

5.1. Фонддун бюджети сарптоолорду баалоо боюнча финансылык жылдагы чыгымдарды камтыган документке ылайык аткарылат.

5.2. Фонддун Президенти өзүнүн бюджеттик долбоорун даярдап, ар бир пункт боюнча негиздемеси жана эсептөөлөрү менен ТМУКАКга Түрк Кеңешинин катчылыгы аркылуу жиберет жана ТИМК аны келерки финансылык жылдын биринчи жарымында бекитет.

5.3. ТИМК кийинки финансылык жылдын бюджетин 31-декабрга чейин карайт жана бекитет. Бирок, келерки жылдын бюджети кабыл алынбаган учурда колдонуудагы бюджет бекитилген mutatis mutandis принциптери менен пайдаланылат.

5.4. Акча которуулар үчүн операциялар Фонд жайгашкан өлкөнүн улуттук валютасында, эгер зарыл болсо, башка өлкөлөрдүн улуттук валюталарында жүргүзүлүшү мүмкүн.

5.5. Жергиликтүү валютадагы сарптоолор үчүн бюджеттик сметанын алмашуу курсу турган өлкөнүн Борбордук банкынын өткөн жылдагы орточо алмашуу курсуна негизделет.

5.6. Бекитилген бюджеттин алкагында бир пункттан экинчи пунктка ар кандай которуу Тараптарга Фонд тарабынан алдын ала маалымдап түшүндүрмө берүү менен ишке ашырылат, эмгек акы боюнча пункттан башкаларына, бирок мындай которуулар пункттардын жалпы санынын 10%нан ашпоого тийиш. Эгер Тараптар 30 (отуз) күндүн ичинде каршылык билдирбесе, сунушталган акча каражатын которуу бекитилди деп эсептелинет. Эгер бир предметтен башка буюмга акча которуу 10%дан ашса ТИМКтин жактыруусу менен аткарылат.

5.7. Максаттуу багыты боюнча финансылык жылдын аягына чейин пайдаланылбай калган Фонддун бюджетинин каражаттарынын калдыктары кийинки финансылык жылдын бюджетинин киреше бөлүгүнө кошулууга тийиш. Ар бир мүчө мамлекеттин төлөмү эсептелүүгө тийиш жана катышуучуларга алардын төлөмдөрүнүн суммасы тууралуу маалымат жиберилет.

5.8. Өткөн жылда жабдууларды жана узак убакытка пайдалануучу буюмдарды сатып алууда толук эмес түрдө пайдаланылгандыгына байланыштуу 1-январга карата калган калдык бюджет кийинкиге калтырылган долбоорлорду каржылоо үчүн пайдаланылат.

6-берене. Акча каражаттарын сактоо

6.1. Президент Фонддун акча каражаттары сакталуучу банктык эсепти/эсептерди аныктайт.

6.2. Фонддун эсептери АКШ долларында жана турган мамлекеттин улуттук валютасында болууга тийиш. Алдыдагы мезгилге карата чыгымдар үчүн валюталык алмашуу курсунун бухгалтердик эсеби турган мамлекеттин Борбордук банкынын үч айлык орточо курстарына негизделет.

7-берене. Отчеттуулук

7.1. Президент Фонддун финансылык каражаттарын башкарууну контролдойт жана бул иш үчүн ТМУКАК аркылуу ТИМК алдында отчет берет.

7.2. Президент Фонддун финансылык ресурстарын ТМУКАК аркылуу ТИМКга мурунку финансылык мезгилден кийинки жылдын 31-мартынан кечиктирбестен ар бир финансылык жыл үчүн жылдык отчет берет.

7.3. Ар бир финансылык жылдын аягында акчанын тартыштыгынын калдыгы чыгашалардын кирешелерден ашканын же кирешеден чыгашалардын ашканын эсептөө аркылуу аныкталышы мүмкүн. Бюджеттин кассалык тартыштыгы болгон учурда Президент ТМУКАК аркылуу ТИМКке билдирет жана зарыл болгон чараларды көрүү тууралуу сунуштарын киргизет.

8-берене. Аудит

8.1. Фонддун финансылык ишине тышкы аудит ар бир бюджеттик мезгилдин аягында жүргүзүлөт. Аудит ТМУКАКтын жактыруусу аркылуу ТИМК ыйгарым укук берген эл аралык таанылган көз карандысыз юридикалык компания тарабынан жүргүзүлөт. Президент ыйгарым укуктуу органга тышкы аудитти жүргүзүү үчүн керек болгон документтерди берет.

8.2. Тышкы аудит жүргүзүлгөндөн кийин текшерүү жөнүндө аудитордук отчет Президент тарабынан Тараптарга жөнөтүлөт.

9-берене. Жүгүртмө каражаттардын резерви

9.1. Жүгүртмө каражаттардын резерви бюджеттин бөлүгү болуп саналат жана жыл сайын милдеттүү түрдөгү төлөмдөрдү алганга чейин бюджеттик ассигнованиелерди каржылоого гана жумшалат.

9.2. Жүгүртмө каражаттардын суммасы жылдык бюджеттин 10% бөлүгүнөн кем эмес суммада белгиленет. Милдеттүү түрдөгү төлөмдөрдү алгандан кийин аталган сумма жүгүртмө каражаттардын резервине кайтарылат.

10-берене. Корутунду жоболор

10.1. Аталган Макулдашуу Тараптар анын күчүнө кирүүсү үчүн зарыл болгон мамлекеттик ички жол-жоболорду аяктагандыгы жөнүндө кат жүзүндөгү билдирүүнү Депозитарий дипломатиялык каналдар аркылуу алгандан кийин отузунчу күнү күчүнө кирет.

Аталган Макулдашуу, ага кошулуучу мамлекеттер үчүн кошулуу жөнүндө документти Депозитарий алгандан кийин отузунчу күнү күчүнө кирет.

10.2. Ушул Макулдашуунун депозитарийи катары Азербайжан Республикасы эсептелет. Депозитарий кат жүзүндө дипломатиялык каналдар аркылуу Тараптарга башка мамлекеттерден ушул Макулдашууну ратификациялоо, кабыл алуу, бекитүү же кошулуу тууралуу документ алынгандыгы жөнүндө билдирүү жиберет.

10.3. Ушул Макулдашууну чечмелөөдө жана колдонууда кайчы пикирлер келип чыккан учурда, Тараптар аларды кеңешүү жана сүйлөшүү жолу аркылуу жөнгө салат.

10.4. Тараптардын өз ара макулдашуусу боюнча ушул Макулдашууга өзүнчө протоколдор түрүндө өзгөртүүлөр жана толуктоолор киргизилиши мүмкүн жана алар ушул берененин 10.1-пунктунда каралган жол-жобого ылайык күчүнө кирет. Өзгөртүүлөр жана толуктоолор ушул Макулдашуунун ажыратылгыс бөлүгү болуп эсептелет.

10.5. Ар бир Тарап Депозитарийге жазуу түрүндө билдирүү жиберүү менен ушул Макулдашуудан чыгууга укуктуу. Депозитарий билдирүүнү алган күндөн алты ай өткөндөн кийин аталган Макулдашуудан чыгуучу Тарапка карата колдонулушу токтотулат.

_____________ шаарында 20__-жылдын "__" ____________ бир түп нускада кыргыз, азербайжан, казак, түрк жана англис тилдеринде түзүлдү, бардык тексттер бирдей мааниге ээ. Кайчы пикирлер келип чыккан учурда, англис тилиндеги текст артыкчылыктуу күчкө ээ болот.

Кыргыз Республикасынын Өкмөтү үчүн

Азербайжан Республикасынын Өкмөтү үчүн

Казакстан Республикасынын Өкмөтү үчүн

Түркия Республикасынын Өкмөтү үчүн

Долбоор Түрк маданияты жана мурасы фондунун бюджетине мүчө мамлекеттердин милдеттүү төлөмдөрүнүн шкаласы боюнча ПРОТОКОЛ Мындан ары "Тараптар" деп аталуучу Кыргыз Республикасынын, Азербайжан Республикасынын, Казакстан Республикасынын жана Түркия Республикасынын өкмөттөрү 2012-жылдын 23-августунда кол коюлган Түрк маданияты жана мурасы фондунун уставына ылайык төмөнкүдөй милдеттүү түрдөгү төлөмдөрдүн шкаласын белгилөөгө макул болушту:

- Кыргыз Республикасы - 0,5%;

- Азербайжан Республикасы - 40%;

- Казакстан Республикасы - 25%;

- Түркия Республикасы - 30%.

Бул Протокол Тараптар анын күчүнө кирүүсү үчүн зарыл болгон мамлекеттик ички жол-жоболорду аткаргандыгы жөнүндө кат жүзүндөгү акыркы билдирүүнү Депозитарий дипломатиялык каналдар аркылуу алгандан кийин отузунчу күнү күчүнө кирет. Бул Протоколдун депозитарийи Азербайжан Республикасы болуп саналат. ____________ шаарында 20__-жылдын "__" __________ бир түп нускада кыргыз, азербайжан, казак, түрк жана англис тилдеринде түзүлдү, бардык тексттер бирдей мааниге ээ. Кайчы пикирлер келип чыккан учурда англис тилиндеги текст артыкчылыктуу күчкө ээ болот.

Кыргыз Республикасынын Өкмөтү үчүн

Азербайжан Республикасынын Өкмөтү үчүн

Казакстан Республикасынын Өкмөтү үчүн

Түркия Республикасынын Өкмөтү үчүн