КР Өкмөтүнүн («1916-жылдагы кайгылуу окуялардын жүрүшүндө курман болгондордун мемориалы» тарыхый-маданий маанидеги объектти куруу тууралуу) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2016-жылдын 29-февралы № 75-б 1916-жылдагы улуттук-боштондук көтөрүлүштүн жүрүшүндө жана андан кийин болгон кыргыз мамлекеттүүлүгүн калыбына келтирүү үчүн жүз миңдеген адамдардын өмүрүн алган Үркүн кайгылуу окуясынын убагында курман болгондордун элесине урмат көрсөтүү менен, Кыргыз Республикасынын Президентинин 2015-жылдын 12-августундагы № 168 "1916-жылдагы каргашалуу окуялардын жүрүшүндө курман болгондордун жаркын элесине арналган мемориал жөнүндө" Жарлыгын аткаруу үчүн, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык:

1. Кыргыз Республикасынын Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигинин Турак жай-жарандык курулуш департаменти (мындан ары - Департамент):

- "1916-жылдагы кайгылуу окуялардын жүрүшүндө курман болгондордун мемориалы" тарыхый-маданий маанидеги объектти (мындан ары - объект) жарыш долбоорлоо жана куруу боюнча бирдиктүү заказчы болсун;

- "Мамлекеттик сатып алуулар жөнүндө" Кыргыз Республикасынын Мыйзамынын 21-беренесине ылайык Кыргыз Республикасынын Маданият, маалымат жана туризм министрлиги тарабынан өткөрүлгөн конкурстун жеңүүчүсү менен долбоордук-сметалык документтерди жана скульптуралык жумуштарды иштеп чыгууга келишим түзсүн;

- белгиленген тартипте конкурс өткөрүү жолу менен объектти куруу үчүн подряддык уюмду тандоо жүргүзсүн;

- 1916-жылдагы окуялардын 100 жылдыгына арналган иш-чаралардын планына ылайык 2016-жылдын 1-июлуна чейинки мөөнөттө объектти пайдаланууга берүүнү камсыз кылсын.

2. Кыргыз Республикасынын Маданият, маалымат жана туризм министрлиги белгиленген талаптарга ылайык объекттин композициясынын скульптуралык-архитектуралык бөлүгүнө алдын-ала чыгаша сметасын Департаментке берсин.

3. Бишкек шаарынын Архитектура жана шаар куруу башкы башкармалыгына (Бишкекбашкыархитектура) төмөнкүлөр сунушталсын:

- Департамент жана долбоордун автору менен бирге объекттин эскиздик долбоорун тиешелүү жер участогуна байлаштыруу;

- объекттин долбоордук-сметалык документтерин иштеп чыгууга жана курууга уруксат документтерин өз убагында берүүнү камсыз кылуу.

4. Кыргыз Республикасынын Финансы министрлиги объекттин долбоордук иштерин жана курулушун каржылоону Департамент тарабынан берилген сметага ылайык "Капиталдык салымдар" беренеси боюнча 2016-жылга республикалык бюджеттин эсебинен каржылануучу объекттердин тизмегине киргизсин.

5. Кыргыз Республикасынын Өкмөтүнө караштуу Экологиялык жана техникалык коопсуздук боюнча мамлекеттик инспекция белгиленген тартипте 2016-жылдын 1-июлуна чейинки мөөнөттө объектти пайдаланууга кабыл алсын.

6. Мамлекеттик органдар жана мекемелер, жергиликтүү мамлекеттик администрациялар жергиликтүү өз алдынча башкаруу органдары менен бирге объектти долбоорлоо жана куруу боюнча иштерге активдүү катышышсын жана көмөк көрсөтүшсүн.

7. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын курулуш, транспорт жана коммуникациялар бөлүмүнө жүктөлсүн.

Премьер-министр

Т.А. Сариев