КР Өкмөтүнүн (Кыргыз Республикасынын Өкмөтү менен Азербайжан Республикасынын Өкмөтүнүн ортосундагы Кирешеге жана капиталга салыктарга карата кош салык салуудан качуу жана салык салуулардан четтеп кетүүнү болтурбоо жөнүндө макулдашуунун долбоорун жактыруу) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2011-жылдын 29-апрели № 149-б

1. Кыргыз Республикасынын Өкмөтү менен Азербайжан Республикасынын Өкмөтүнүн ортосундагы Кирешеге жана капиталга салыктарга карата кош салык салуудан качуу жана салык салуулардан четтеп кетүүнү болтурбоо жөнүндө макулдашуунун тиркелген долбоору жактырылсын.

2. Кыргыз Республикасынын экономикалык жөнгө салуу министрине принциптүү эмес мүнөздөгү оңдоолорду киргизүү укугу менен аталган Макулдашууга Кыргыз Республикасынын Өкмөтүнүн атынан кол коюуга ыйгарым укук берилсин.

Премьер – министри

А.Атамбаев

Долбоор

Кыргыз Республикасынын Өкмөтү менен Азербайжан Республикасынын Өкмөтүнүн ортосундагы

Кирешеге жана капиталга салыктарга карата кош салык салуудан качуу жана салык салуулардан четтеп

кетүүнү болтурбоо жөнүндө

макулдашуу

Кыргыз Республикасынын Өкмөтү менен Азербайжан Республикасынын Өкмөтү Кирешеге жана капиталга салыктарга карата кош салык салуудан качуу жана салык салуулардан четтеп кетүүнү болтурбоо жөнүндө макулдашуу түзүүнү каалашып жана экономикалык, илимий, техникалык жана маданий кызматташтыкты өнүктүрүүгө жана бекемдөөгө өз умтулууларын ырастап, төмөнкүлөр жөнүндө макулдашты:

1-берене. Макулдашуу колдонула турган жактар

Бул Макулдашуу Макулдашуучу Мамлекеттердин биринин резиденти же экөөнүн тең резиденти болуп саналган жактарга карата колдонулат.

2-берене. Макулдашуу колдонула турган салыктар

1. Бул Макулдашуу Макулдашуучу Мамлекеттердин, анын администрациялык-аймактык бөлүмдөрүнүн жана бийликтин жергиликтүү органдарынын атынан Макулдашуучу Мамлекеттердин колдонуудагы мыйзамдарына ылайык алынуучу, аларды алуунун ыкмаларына карабастан, кирешелер жана капитал салыктарына карата колдонулат.

2. Кирешелерге жана капиталга салыктар деп кирешелердин жалпы суммасынан, капиталдын жалпы суммасынан, же кыймылдуу жана кыймылсыз мүлктөрдү ажыратуудан түшкөн кирешелерге салыкты кошкондо, кирешенин же капиталдын айрым элементтеринен, ишканалар төлөп берүүчү эмгек акынын же маянанын жалпы суммасынан алынуучу салыктар, ошондой эле капиталдын өсүшүнөн болуучу кирешелерден алынуучу бардык салыктар эсептелет.

3. Ушул Макулдашуу колдонула турган салыктарга тактап айтканда төмөнкүлөр кирет:

а) Кыргыз Республикасында:

- юридикалык жактардын пайдаларына жана кирешелерине салык;

- жеке жактардан киреше боюнча салык;

- мүлккө салык (мындан ары - «кыргыз салыктары» деп аталат).

б) Азербайжан Республикасында:

- юридикалык жактардын кирешелерине салык;

- жеке жактардын киреше боюнча салыктары;

- мүлккө салык (мындан ары - «азербайжан салыктары» деп аталат).

4. Толуктоо иретинде же колдонуудагы салыктардын ордуна ушул Макулдашууга кол коюлган күндөн кийин алына турган салыктарга окшош же мааниси боюнча ушул сыяктуу салыктарга да ушул Макулдашуу колдонулат. Макулдашуучу Мамлекеттердин компетенттүү органдары тиешелүү салыктык мыйзамдарына киргизилген ар кандай олуттуу өзгөртүүлөр тууралуу бири-бирине кабарлоого тийиш.

3-берене. Жалпы аныктамалар

1. Ушул Макулдашуунун максаты үчүн эгер контексте башкача келип чыкпаса:

а) «Макулдашуучу Мамлекеттер» жана «башка Макулдашуучу Мамлекеттер» деген терминдер контекстке жараша Кыргыз Республикасы жана Азербайжан Республикасы дегенди тушүндүрөт;

б) «Кыргызстан» деген термин Кыргыз Республикасын түшүндүрөт. Географиялык мааниде алганда «Кыргызстан» деген терминди колдонуу Кыргыз Республикасы эл аралык укуктарга ылайык эгемендүү укугун жана юрисдикцияны ишке ашырган жана анда Кыргыз Республикасынын салыктык мыйзамдары колдонулган аймакты билдирет;

в) «Азербайжан» деген термин Азербайжан Республикасы жер казынасына, деңиз түпкүрүнө жана жаратылыш ресурстарына эгемендүү укугун жана юрисдикциясын ишке ашырган, Каспий деңизинин секторун кошкондо, Азербайжан Республикасынын үстүндөгү Азербайжан Республикасына таандык аба мейкиндигин ошондой эле эл аралык укуктарга жана Азербайжан Республикасынын улуттук мыйзамдарына ылайык ушундай деп аныкталган же келечекте аныктала турган башка ар кандай аймак Азербайжан Республикасынын аймагын түшүндүрөт;

г) «жак» деген термин жеке адамды, компанияны жана ар кандай башка жактардын бирикмесин түшүндүрөт;

д) «компания» деген термин салык алуу максаты үчүн корпоративдик түзүлүш катары каралган ар кандай корпоративдик түзүлүштү же ар кандай уюмду түшүндүрөт;

е) «Макулдашуучу Мамлекеттин ишканасы» жана «башка Макулдашуучу Мамлекеттин ишканасы» деген терминдер тиешелүүлүгүнө жараша Макулдашуучу Мамлекеттин резиденти башкарган ишкананы жана башка Макулдашуучу Мамлекеттин резиденти башкарган ишкананы түшүндүрөт;

ж) «эл аралык ташуу» деген термин - деңиз же аба кемелери, же жер бетиндеги транспорт башка Макулдашуучу Мамлекеттеги пункттардын ортосунда гана пайдаланылган учурду кошпогондо, Макулдашуучу Мамлекеттин ишканасы пайдалануучу деңиз жана аба кемелери менен ар кандай ташууларды түшүндүрөт;

з) «компетенттүү орган» деген термин төмөнкүнү түшүндүрөт:

(1) Кыргыз Республикасында - Кыргыз Республикасынын Экономикалык жөнгө салуу министрлигин же анын ыйгарым укуктуу өкүлүн; (2) Азербайжан Республикасында - Финансы министрлигин жана Салыктар боюнча министрлигин;

и) «улуттук жак» төмөнкүнү түшүндүрөт:

(1) Макулдашуучу Мамлекеттин жарандыгы бар ар кандай жеке жак; (2) Макулдашуучу Мамлекеттин колдонуудагы мыйзамдарынын негизинде тийиштүү статус алган ар кандай юридикалык жак, шериктештик же ассоциация.

2. Макулдашуучу Мамлекет тарабынан ар кандай учурда ушул Макулдашууну колдонгондо андагы аныкталбаган ар кандай термин, эгерде контексттен башкача келип чыкпаса, ошол Мамлекеттин мыйзамдары боюнча ушул маани, бул Макулдашуу колдонулган салыктарга карата ушул мамлекеттин тийиштүү салыктык мыйзамдарында аныкталган мааниге ээ болсо, ошол Мамлекеттин башка мыйзамдарында аныкталган мааниден басымдуулук кылуучу мааниде болот.

4-берене. Резидент

1. Ушул Макулдашуунун максаты үчүн «Макулдашуучу Мамлекеттин резиденти» деген термин ошол Мамлекеттин мыйзамдарына ылайык туруктуу жашаган жери, туруктуу барган жери, катталган жери (инкорпорирлөө) башкаруу орду же башка ушундай мүнөздөгү критерийлер боюнча ошол Мамлекеттин мыйзамдарына ылайык ага салык салынууга тийиш болгон ар кандай жакты, ошондой эле ошол Мамлекетти же анын кандайдыр-бир администрациялык-аймактык бөлүмүн же жергиликтүү бийлик органын түшүндүрөт. Бирок бул термин ушул Мамлекеттеги булактан алган кирешеге же анда жайгаштырылган капиталга ушул Мамлекетте салык салынуучу жактарды камтыбайт.

2. 1-пункттун жоболоруна ылайык эгерде жеке жак Макулдашуучу Мамлекеттердин экөөнүн тең резиденти болуп саналса, анын статусу төмөнкү мүнөздө аныкталат:

а) ал туруктуу турак жайга ээ болсо ошол Мамлекеттин резиденти болуп саналат: эгер ал эки мамлекетте тең туруктуу турак жайга ээ болсо, ал айрыкча тыгыз жеке жана экономикалык байланыштарга (жашоо тиричилик кызыкчылыгынын борбору) ээ болгон Мамлекеттин гана резиденти болуп саналат;

б) анын жашоо тиричилик кызыкчылыгынын борбору боло турган Мамлекет аныкталбаса, же ал туруктуу турак жайга бир дагы Мамлекетте ээ болбосо, анда ал демейде жашаган Мамлекеттин гана резиденти болуп саналат.

в) эгер ал дайыма эки Мамлекетте тең жашаса, же алардын биринде да жашабаса, андан ал кайсы Мамлекеттин жараны болуп саналса ошол Мамлекеттин резиденти болуп саналат;

г) эгер ал эки Мамлекеттин тең жараны болуп саналса, же алардын биринин да жараны болуп саналбаса Макулдашуучу Мамлекеттердин компетенттүү органдары өз ара макулдашуу боюнча маселени чечишет.

3. Эгер 1-пункттун жоболоруна ылайык жеке жак болуп саналбаган жак Макулдашуучу Мамлекеттердин экөөнүн тең резиденти болуп саналса, ал анын натыйжалуу башкаруу орду жайгашкан ошол Мамлекеттин резиденти болуп саналат.

5-берене. Туруктуу мекеме

1. Ушул Макулдашуунун максаттары үчүн «туруктуу мекеме» деген термин иш-аракеттердин туруктуу орду түшүндүрөт, ал аркылуу ишкананын коммерциялык иш-аракеттери толук же айрым ишке ашырылат.

2. «Туруктуу мекеме» деген термин негизинен төмөнкүлөрдү камтыйт:

а) башкаруу орду;

б) бөлүм;

в) офис;

г) фабрика;

д) өнөркана;

е) курулма, курулуш же кеме же кандайдыр-бир жаратылыш ресурстарын чалгындоо үчүн пайдаланылуучу башка жерлер;

ж) кендер, шахта, нефть жана газ бургулоолор, карьер же башка жаратылыш ресурстарын иштетүүчү же казып алуучу жерлер;

з) айыл чарба, жайыт же токой менчиктери.

3. «Туруктуу мекеме» термини өзүнө ошондой эле төмөнкүлөрдү камтыйт:

а) курулуш аянттарын, куруу, монтаждоо же куроо объектилери же алар менен байланышкан көзөмөлдөө иш-аракеттерин, бирок эгер ушундай аянт же объект же ушундай иш-аракет 6 айдан ашык уланса; жана

б) консультациялык кызматтарды кошкондо, ишкананын кызматкерлери же ишкана ушундай максаттар үчүн жалдаган башка персоналдары аркылуу кызматтарды көрсөтүү, бирок эгер мындай мүнөздөгү (ушундай же аны менен байланышкан долбоор үчүн) иш-аракеттер Макулдашуучу Мамлекеттин аймагында ар кандай 12 айлык мезгилдин аралыгында жыйынтыктап алганда 6 айдан ашыкча мезгил ичинде улантылганда гана.

4. Ушул берененин мурдагы жоболоруна карабастан «туруктуу мекеме» термини өзүнө төмөнкүлөрдү камтыбайт:

а) ишканага тиешелүү болгон товарларды жана буюмдарды сактоо жана көргөзүү максаты үчүн гана курулмаларды жана жабдууларды колдонууну;

б) сактоо жана көрсөтүү максаттары үчүн гана ишканага тийиштүү болгон товарлардын жана буюмдардын запасын кармоону;

в) башка ишкана тарабынан кайра иштетүү максаттары үчүн гана ишканага тийиштүү болгон товарлардын жана буюмдардын запасын кармоону;

г) товарларды же буюмдарды сатып алуу, же ишкана үчүн маалыматтарды топтоо максаттары үчүн гана иш-аракеттердин туруктуу ордун кармоону;

д) ишкана үчүн даярдоочу же көмөкчү мүнөздөгү ар кандай башка иш-аракетти жүргүзүү максатында гана иш-аракеттердин туруктуу ордун кармоону;

е) мындай комбинациялардын натыйжасында пайда болгон иш-аракеттин туруктуу орундагы жалпы иш-аракеттер даярдоочу жана көмөкчү мүнөздө боло турган шартта а)-е) пунктчаларында саналган иш-аракеттердин түрлөрүнүн ар кандай комбинацияларын ишке ашыруу үчүн иш-аракеттердин туруктуу ордун кармоону.

5. 1 жана 2-пункттардын жоболоруна карабастан, эгерде жак башка Макулдашуучу Мамлекеттин ишканасынын атынан Макулдашуучу Мамлекетте 7-пункттун жобосу колдонулган, көз карандысыз бар агент эмес болсо, анда бул ишкана биринчи эскертилген Мамлекеттерден ишкана үчүн иштеген ар кандай иштерге карата туруктуу мекемеси бар деп саналат, эгерде бул жак:

а) ишкананын атынан (бул жактын иш-аракеттеринен башка 4-пунктта каралган иш-аракеттери менен чектелсе, анткени бул иш-аракет иш-аракеттин туруктуу орду аркылуу ишке ашырыла тургандыгына карабастан, бул пункттун жоболорунун негизинде ушул туруктуу орун туруктуу өкүлчүлүктү түзбөйт) келишимдерди түзүү боюнча ыйгарым укугу болсо жана аны дайыма колдонсо;

б) мындай укуктарга ээ болбой туруп, адатта биринчи эскертилген Мамлекетте товарларды жана буюмдарды сактоо менен иштесе, ал жактан ишкананын атынан үзгүлтүксүз товарларды жана буюмдарды берсе.

6. Бул берененин мурдагы жоболоруна карабастан Макулдашуучу Мамлекеттин, кайрадан камсыздандырууну кошпогондо, камсыздандыруучу ишканасы, бул башка Мамлекеттин аймагында камсыздандыруунун сыйлык акыларын чогултса же 7-пункт колдонулуучу көз карандысыз статустагы агенттен башка жак аркылуу бул өлкөнүн тобокелдигин камсыздандырса, башка Мамлекетте мекемесинин туруктуу орду бар деп эсептелиши керек.

7. Ишкана Макулдашуучу Мамлекетте брокерлер, комиссиялык агенттер, же башка көз карандысыз статусу бар агенттер аркылуу, мындай жактар өздөрүнүн көнүмүш иш-аракеттеринин алкагында аракеттенген шартта гана, ишкердик иш-аракеттерди ишке ашыргандыгы үчүн Макулдашуучу Мамлекетте туруктуу мекемеси бар деп эсептелбейт. Бирок мындай агенттин иш-аракети ишкананын атынан жүргүзүлүп жаткан иш-аракетине толук же дээрлик толук бойдон арналганда, ал ушул пункттун түшүнүктөрүнүн алкагында көз карандысыз статустагы агент деп эсептелбейт.

8. Компания Макулдашуучу Мамлекеттин резиденти болуп саналган, контролдой турган же башка Макулдашуучу Мамлекеттин резиденти болуп саналган компания тарабынан контролдоно турган фактысы болсо, же бул башка Мамлекетте коммерциялык иш-аракетти ишке ашырса (же туруктуу мекеме аркылуу, же башкача түрдө) өзүнөн-өзү бул компаниялардын бири экинчисинин туруктуу мекемеси боло албайт.

6-берене. Кыймылсыз мүлктөн киреше

1. Макулдашуучу Мамлекеттин резиденти башка Макулдашуучу Мамлекетте жайгашкан кыймылсыз мүлктөн (айыл жана токой чарбасынан кирешелерди кошкондо) алуучу кирешеге бул башка Мамлекетте салык салынат.

2. «Кыймылсыз мүлк» термини каралып жаткан мүлк жайгашкан Макулдашуучу Мамлекеттин мыйзамдары боюнча мааниге ээ. Бул термин ар кандай учурларда кыймылсыз мүлккө карата көмөкчү мүлктү, айыл жана токой чарбасында пайдаланылуучу малды жана жабдууларды, жер менчигине карата жалпы укуктун жоболорунда колдонулуучу укуктарды, кыймылсыз мүлктүн узуфруктун жана минералдык ресурстарды, булактарды жана башка жаратылыш кендерин иштеп чыгуу же иштеп чыгууга укук үчүн компенсация катары өзгөрмөлүү же белгиленген төлөмдөргө укуктарды камтыйт; деңиз жана аба кемелери кыймылсыз мүлк катары каралбайт.

3. 1-пункттун жоболору кыймылсыз мүлктү түз пайдалануудан, ижарага берүүдөн же аны кандайдыр-бир башка түрдө пайдалануудан алынган кирешелерге карата колдонулат.

4. 1 жана 3-пункттардын жоболору ишкананын кыймылсыз мүлктөрүнөн жана көз карандысыз жеке кызматтарды көрсөтүү үчүн пайдаланылуучу кыймылсыз мүлктөн кирешелерге карата колдонулат.

7-берене. Коммерциялык иш-аракеттерден киреше

1. Макулдашуучу Мамлекеттин ишканасынын кирешесине, эгерде мындай ишкана башка Макулдашуучу Мамлекетте жайгашкан туруктуу мекеме аркылуу коммерциялык иш-аракеттерди ишке ашырбаса, Макулдашуучу Мамлекетте гана салык салынат. Эгерде ишкана жогоруда айтылгандай өз иш-аракеттерин ишке ашырса, ишкананын кирешесине башка Мамлекетте салык салынышы мүмкүн, бирок мындай туруктуу мекемеге тийиштүү болгон бөлүгүнө гана салык салынат.

2. 3-пункттун жоболорун эске алуу менен эгер Макулдашуучу Мамлекеттин ишканасы башка Макулдашуучу Мамлекетте жайгашкан туруктуу мекеме аркылуу коммерциялык иш-аракеттерди ишке ашырса, анда ар бир Макулдашуучу Мамлекетте бул туруктуу мекемеге эгер ал өз алдынча жана өзүнчө мекеме болгондо, ушундай же ушуга окшогон шартта, ушундай же ушуга окшогон иш-аракеттер менен алектенген жана анын туруктуу мекемеси болуп саналган ишканадан толук көз карандысыз аракеттенгенде алууга мүмкүн болгон кирешеси же болбосо тапкан пайдасы кирет.

3. Туруктуу мекеменин кирешесин аныктоодо туруктуу мекеменин максаттары үчүн келтирилген чыгымдарды, башкаруу жана жалпы административдик чыгымдарды кошкондо, бул чыгымдар туруктуу мекеме жайгашкан Мамлекетте, же кайда гана болбосун келтирилгендигине карабастан эсептен чыгарууга жол берилет. Бирок (иш жүзүндөгү чыгымдардын ордун толтурууну кошпогондо) патенттерди же башка укуктарды пайдалангандын ордуна роялти, сыйлык акы же башка ушундай төлөмдөр катары, же көрсөтүлгөн кызматтар же башкаруу үчүн комиссиондук төлөм катары, же, банктык мекемелерди кошпогондо, туруктуу мекемеге карыз катары берилген сумманын пайыздарынын төлөмү катары ишкананын башкы офисине же анын башка офистеринин кимисине болбосун төлөнүүчү суммаларды эсептен чыгарууга жол берилбейт.

4. Эгерде Макулдашуучу Мамлекет тарабынан туруктуу мекемеге тийиштүү кирешени ишкананын кирешесинин жалпы суммасын анын ар түрдүү бөлүмдөрү боюнча пропорциялуу бөлүштүрүүнүн негизинде аныктоо кадимки практика болуп саналса, ушул берененин 2-пунктунда Макулдашуучу Мамлекетке адатта кабыл алынгандай бөлүштүрүү аркылуу салык салынуучу кирешени аныктоого тыюу салбайт; бөлүштүрүүнүн тандалып алынган ыкмасы ушул беренеде камтылган принциптерге ылайык келген натыйжаларды бериши керек.

5. Ишкана үчүн аталган туруктуу мекеме жүргүзгөн товарларды жана буюмдарды жөн эле сатып алуусу туруктуу мекеменин кирешеси катары эсептелбейт.

6. Мурдагы пункттардын максаттары үчүн туруктуу мекемеге тийиштүү киреше, эгерде белгиленген тартипти өзгөртүү үчүн маанилүү жана жетишердик негиздери болбосо, жыл сайын бир гана ошол ыкма менен аныкталат.

7. Эгер пайда кирешенин элементтерин же ушул Макулдашуунун башка беренелеринде өзүнчө каралган кирешени камтыса, анда бул берененин жоболору ушул берененин жоболоруна колдонулбайт.

8-берене. Эл аралык ташуулар

1. Эл аралык ташууларда деңиз же аба кемелерин пайдалануудан Макулдашуучу Мамлекеттин ишканасы алуучу пайдага ушул Мамлекетте гана салык салынат.

2. Ушул берененин максаттары үчүн эл аралык ташууларда деңиз же аба кемелерин пайдалануудан алынган пайда төмөнкүлөрдөн алынган пайданы да камтыйт:

а) эл аралык ташууларда деңиз же аба кемелеринин курамын кошпогондо аларды кез-кезде ижарага берүүдөн;

б) эл аралык ташууларда, эгер иш-аракеттердин мындай түрү эл аралык ташуулардагы деңиз, аба кемелерин жана жер бетиндеги транспортту толуктаса же пайдаланууга кирсе, контейнерлерди (ошондой эле трейлерлерди жана контейнерлерди ташуу үчүн тийиштүү жабдууларды) сактоодон, пайдалануудан же ижарага берүүдөн.

3. 1-пункттун жобосу ошондой эле транспорт каражаттарын пайдалануу боюнча биргелешкен ишканада же эл аралык уюмда пулга катышуудан түшүүчү пайдага карата колдонулат.

9-берене. Ассоциацияланган ишканалар

1. Эгер:

а) Макулдашуучу Мамлекеттин ишканасы башка Макулдашуучу Мамлекеттин ишканасын башкарууга, контролдоого же капиталына түз же кыйыр катышса; же

б) бир жана ошол эле жактар Макулдашуучу Мамлекеттин ишканасын, ошондой эле башка Макулдашуучу Мамлекеттин ишканасын башкарууга, контролдоого же капиталына түз же кыйыр катышса жана ар бир учурда эки ишкананын ортосунда коммерциялык жана финансылык өз ара мамилелеринде эки көз карандысыз ишкананын ортосундагы боло турган шарттардан айырмаланган шарттар түзүлсө же белгиленсе, анда алардын биринин эсебине чегериле турган, бирок бул шарттардын бар экендигинен ага чегерилбеген ар кандай пайда бул ишкананын пайдасына киргизилет жана тийиштүү түрдө салык салынат.

2. Макулдашуучу Мамлекет бул Мамлекеттин ишканасынын пайдасына башка Мамлекетте салык салууга дуушар болгон башка Макулдашуучу Мамлекеттин ишканасына карата пайданы киргизген жана тийиштүү түрдө салык салган учурда, ушул мүнөздө киргизилген пайда биринчи эскертилген Мамлекеттин ишканасына чегериле турган пайда деп саналат, эгер эки ишкананын ортосундагы мамиле эки көз карандысыз ишкананын ортосундагы мамиледей болсо, анда бул башка Мамлекет ушул пайдага чегерилген салыктын суммасына карата тийиштүү оңдоп-түзөтүүлөрдү жүргүзөт. Мындай оңдоп-түзөтүүлөр аныкталганда ушул Макулдашуунун башка жоболору керектүү деңгээлде эске алынат, ал эми Макулдашуучу Мамлекеттердин компетенттүү органдары бири-бири менен зарыл болгон учурда консультацияларды өткөрө алышат.

10-берене. Дивиденддер

1. Макулдашуучу Мамлекеттин резиденти болуп саналган компания башка Макулдашуучу Мамлекеттин резидентине төлөп берүүчү дивиденддерге башка Мамлекетте салык салынышы мүмкүн.

2. Бирок мындай дивиденддерге, дивиденддерди төлөп жаткан компания резиденти болуп саналган Макулдашуучу Мамлекетте да Мамлекеттин мыйзамдарына ылайык салык салынышы мүмкүн, бирок дивиденддердин иш жүзүндөгү ээси башка Макулдашуучу Мамлекеттин резиденти болуп саналса, анда мындай мүнөздө алынган салык дивиденддин жалпы суммасынын 10 процентинен ашпайт.

Бул пункт дивиденддер төлөнө турган пайдага карата компанияга салык салууда колдонулбайт.

3. «Дивиденддер» термини ушул беренеде колдонгон учурда акциялардан, «жуиссанс» акциясынан же «жуиссанс» укугунан, кен казуу өнөр жайларынын акцияларынан, уюштуруучулардын акцияларынан же пайдага катышууга укук берүүчү карыз милдеттенмеси болуп саналбаган башка укуктарынан кирешелерди, ошондой эле пайданы бөлүштүрүүчү компания резиденти болуп саналган башка Мамлекеттин мыйзамдарына ылайык акциялардан түшкөн пайда катары, ушундай эле салыктык жөнгө салууга тиешелүү болгон башка корпоративдик укуктардан түшкөн кирешелерди түшүндүрөт.

4. Дивиденддерди, экинчи жакта жайгашкан туруктуу мекемеси аркылуу, төлөөчү компания резиденти болуп саналган башка Макулдашуучу Мамлекетте, эгер дивиденддердин иш жүзүндөгү ээси биринчи Макулдашуучу Мамлекеттин резиденти болуп туруп коммерциялык иш-аракетин жүзөгө ашырса жобонун 1 жана 2-пункттары колдонулбайт, же бул башка Мамлекетте ал жакта жайгашкан туруктуу базасы, жана холдинг менен, иш жүзүндө ушундай туруктуу мекеме же ушундай туруктуу базага карата көз карандысыз жеке кызматтарды көрсөтсө, ага карата дивиденддер төлөнөт. Мындай учурда кырдаалга жараша 7-берененин же 14-берененин жоболору колдонулат.

5. Макулдашуучу Мамлекеттин резиденти болуп саналган компания башка Макулдашуучу Мамлекеттен пайда же киреше алган учурда, бул башка Мамлекет эгер мындай дивиденддер бул башка Мамлекеттин резидентине төлөнсө же эгерде ал дивиденддер төлөнүп жаткан холдинг иш жүзүндө бул башка Мамлекетте жайгашкан туруктуу мекемеге же туруктуу базага тийиштүү экендигин кошпогондо, дивиденддерден ар кандай салык алынбайт жана компаниянын бөлүштүрүлбөгөн пайдасынан төлөнүүчү дивиденддерге же ошол башка Мамлекетте келип чыгуучу толук же жарым-жартылай пайдадан же кирешеден турган бөлүштүрүлбөгөн пайдага салык алынбайт.

11-берене. Проценттер

1. Макулдашуучу Мамлекетте пайда болгон жана башка Макулдашуучу Мамлекеттин резидентине төлөнүүчү проценттерден ошол башка Мамлекетте салык алынышы мүмкүн.

2. Бирок мындай проценттер алар пайда болгон Макулдашуучу Мамлекетте жана ошол Мамлекеттин мыйзамдарына ылайык салык салынышы мүмкүн, бирок эгер алуучу иш жүзүндө проценттердин ээси болуп туруп башка Макулдашуучу Мамлекеттин резиденти болуп саналса, анда мындай мүнөздө алынган салык проценттин жалпы суммасынын 10 процентинен ашпайт.

3. 2-пункттун жоболоруна карабастан Макулдашуучу Мамлекетте пайда болгон проценттер, эгер бул проценттер башка Макулдашуучу Мамлекеттин Өкмөтүнө же Улуттук банкына, же экинчи Макулдашуучу Мамлекеттин Өкмөтүнө толук таандык болгон ар кандай финансылык институтка төлөнсө, салыктан бошотулат.

4. «Проценттер» термини бул беренеде колдонгон учурда ипотекалык камсыздоого жана карызкордун кирешесине катышуу укугуна ээ экендигине карабастан карыздык талаптардан алынуучу кирешенин ар кандай түрүн жана атап айтканда өкмөттүк баалуу кагаздардан жана облигациялардан же карыздык милдеттенмелерден, бул баалуу кагаздар, облигациялар же карыздык милдеттенмелер боюнча сыйлык акыларды жана утуштарды кошкондо, кирешелерди билдирет. Өз убагында төлөбөгөндүк үчүн айыптар ушул берененин максаттары үчүн процент катары каралбайт.

5. 1 жана 2-пункттардын жоболору эгер проценттердин иш жүзүндөгү ээси Макулдашуучу Мамлекетин резиденти болуп туруп башка Макулдашуучу Мамлекетте жайгашкан туруктуу мекеме аркылуу проценттер пайда болуучу коммерциялык иш-аракетин ишке ашырса, же ошол башка Мамлекетте жайгашкан туруктуу базадан көз карандысыз жеке кызматтарды көрсөтсө жана проценттер төлөнгөн карыздык талап чындыгында эле ушундай туруктуу мекемеге же туруктуу базага байланышса, колдонулбайт. Бул учурда кырдаалга жараша 7 же 14-берененин жоболору колдонулат.

6. Эгерде төлөөчү Макулдашуучу Мамлекеттин өзү, анын администрациялык-аймактык бөлүмү, жергиликтүү бийлик органы же ошол Мамлекеттин резиденти болуп саналса, ошол Мамлекетте проценттер келип чыкты деп эсептелет. Бирок проценттерди төлөөчү жак Макулдашуучу Мамлекеттин резиденти болуп санала тургандыгына же андай эместигине, Макулдашуучу Мамлекетте туруктуу мекемеси же туруктуу базасы бар экендигине, ага байланыштуу проценттерди төлөө боюнча карыздар жана мындай проценттерди төлөө боюнча чыгымдарды туруктуу мекеме же туруктуу база тарта тургандыгына карабастан, мындай проценттер туруктуу мекеме же туруктуу база жайгашкан Мамлекетте келип чыкты деп эсептелет.

7. Эгерде төлөөчүнүн жана иш жүзүндөгү ээсинин ортосундагы өзгөчө мамилелердин себебинен проценттер же экөөнүн же кандайдыр бир башка жактын ортосунда карыздык талаптын негизинде төлөнүүчү проценттердин суммасы мындай мамилелер жок учурда төлөөчүнүн жана иш жүзүндөгү ээсинин ортосунда макулдашылган проценттердин суммасынан ашып кетсе бул берененын жобосу соңку эскертилген суммага гана колдонулат. Мындай учурда төлөмдүн ашыкча бөлүгүнө ушул Макулдашуунун башка жоболорун тийиштүү түрдө эске алуу менен ар бир Макулдашуучу Мамлекеттин мыйзамдарына ылайык салык салынууга тийиш.

12-берене. Роялти

1. Макулдашуучу Мамлекетте келип чыккан жана башка Макулдашуучу Мамлекеттин резидентине төлөнүүчү роялти ошол башка Мамлекетте алынышы мүмкүн.

2. Бирок мындай роялти бул Мамлекеттин мыйзамдарына ылайык алар келип чыккан Макулдашуучу Мамлекетте да салык алынышы мүмкүн, бирок эгерде алуучу роялтинин иш жүзүндө ээси болсо жана башка Макулдашуучу Мамлекеттин резиденти болуп саналса мындай түрдө алынуучу салык роялтинин жалпы суммасынын 10%нен ашпоого тийиш.

3. Бул беренеда колдонууда «Роялти» термини ар кандай адабият, искусство чыгармаларына же программалык камсыздоону кошо алганда илимий эмгектерге, кино фильмдерге, кандайдыр бир патенттерге, соода маркаларына, дизайн же моделге, планга, жашыруун формулага же процесске автордук укуктарын пайдалануу укугун колдонуу же берүү же өнөр жайлык, коммерциялык же илимий жабдууларды пайдалануу укугун колдонуу же берүү же өнөр жайлык коммерциялык же илимий тажрыйбага тиешелүү маалымат үчүн сыйлык катарында алынуучу ар кандай түрдөгү төлөмдөрдү билдирет.

4. 1 жана 2-пунктун жоболору Макулдашуучу Мамлекеттин резиденти роялтинин иш жүзүндөгү ээси башка мамлекетте коммерциялык иш жүргүзсө, роялти ошол жерде туруктуу жайгашкан мекеме аркылуу келип чыкса же болбосо ошол экинчи Мамлекетте туруктуу жайгашкан база менен көз карандысыз жеке кызматтарды көрсөтсө, аларга карата мындай туруктуу мекеме же туруктуу база менен чындыгында байланышкан роялти төлөнсө колдонулбайт. Мындай учурда кырдаалга жараша 7 же 14-берененин жоболору колдонулат.

5. Роялти төлөөчү Макулдашуучу Мамлекеттин өзү, анын администрациялык-аймактык бөлүмү, жергиликтүү бийлик органдары же ошол Мамлекеттин резиденти болуп саналса ошол Мамлекеттен келип чыкты деп эсептелет. Бирок ал Макулдашуучу Мамлекеттин резиденти болуп саналабы же жокпу, Макулдашуучу Мамлекетте туруктуу мекемеси же туруктуу базасы бар экендигине карабастан роялти төлөөчү жак аны төлөө милдеттенмеси жана буларды төлөөгө байланыштуу чыгымдар болгондо мындай роялти туруктуу мекеме же туруктуу база жайгашкан Мамлекетте келип чыгат.

6. Эгерде төлөөчүнүн жана иш жүзүндө роялтинин ээсинин же алардын экөөнүн тең же кандайдыр бир башка жактын ортосундагы өзгөчө мамилелердин себеби боюнча колдонууга, укукка же маалыматка таандык роялтинин суммасы мындай мамилелер жок учурда төлөөчү менен роялтинин иш жүзүндөгү ээсинин ортосунда макулдашылган суммадан ашса, бул берененин жоболору соңку аталган суммага гана колдонулат. Мындай учурда төлөмдүн ашыкча бөлүгү ушул Макулдашуунун башка жоболорун тийиштүү түрдө эске алуу менен ар бир Макулдашуучу Мамлекеттин мыйзамдарына ылайык салык салынууга тийиш.

13-берене. Мүлктүн наркынын өсүшүнөн түшүүчү кирешелер

1. 6-беренеда эске алынган жана башка Макулдашуучу Мамлекетте турган кыймылсыз мүлктү ажыратууда Макулдашуучу Мамлекеттин резиденти алуучу кирешелерге ошол башка Мамлекетте салык алынышы мүмкүн.

2. Макулдашуучу Мамлекеттин ишканасы башка Макулдашуучу Мамлекетте жайгашкан туруктуу мекеменин коммерциялык мүлкүнүн бөлүгүн түзүүчү кыймылдуу мүлктү же көз карандысыз жеке кызматтарды көрсөтүү максатында башка Макулдашуучу Мамлекеттеги Макулдашуучу Мамлекеттин резидентинин туруктуу базасына таандык кыймылдуу мүлктү ажыратуудан түшүүчү кирешелерден, мындай туруктуу мекемени ажыратууда (өзүнчө же бардык ишкана менен бирге), же болбосо мындай туруктуу базаны ажыратуудан түшкөн кирешелерди кошо алганда, экинчи мамлекетте салык алынышы мүмкүн.

3. Эл аралык ташууларда колдонулуучу деңиз жана аба кемелерин же мындай деңиз жана аба кемелерин пайдаланууга байланыштуу кыймылдуу мүлктү ажыратуудан Макулдашуучу Мамлекеттин резиденти алган кирешеге ошол гана Макулдашуучу Мамлекетте салык салынат.

4. Активдери башка Макулдашуучу Мамлекетте жайгашкан кыймылсыз мүлктөн толугу менен же негизинен, түз же кыйыр түрдө турган акцияларды жана компаниянын башка корпоративдик укуктарын ажыратуудан Макулдашуучу Мамлекеттин резиденти алган кирешеге ошол гана Макулдашуучу Мамлекетте салык салынат.

5. 1, 2, 3 жана 4-пунктарда эскертилбеген кандайдыр бир мүлктү ажыратуудан түшүүчү кирешелерден резиденти ажыратылуучу мүлктүн жагы болуп саналган Макулдашуучу Мамлекетте гана салык алынат.

14-берене. Көз карандысыз жеке кызмат көрсөтүүлөр

1. Кесиптик кызматтарды же башка көз карандысыз мүнөздөгү ушундай иштерди көрсөтүүдөн Макулдашуучу Мамлекеттин резиденти алган кирешелерге салык ошол гана Мамлекетте алынат, буга мындай кирешеден башка Макулдашуучу Мамлекетте салык салына турган төмөнкүдөй учурлар кирбейт:

а) эгерде анын иш-аракетин жүргүзүү максаты үчүн башка Макулдашуучу Мамлекетте дайыма жеткиликтүү туруктуу базасы болгон учурда башка Макулдашуучу Мамлекетте ошол туруктуу базага таандык кирешенин бөлүгүнө гана салык салынат; же

б) эгерде башка Макулдашуучу Мамлекетке анын келиши он эки айлык мезгилдеги жалпысынан 183 күндү түзсө же андан ашкан мезгилге улантылса; мындай учурда башка Макулдашуучу Мамлекеттеги иш-аракеттен алынган кирешенин бөлүгүнө гана ошол Мамлекетте салык салынышы мүмкүн.

2. «Кесиптик кызмат көрсөтүүлөр» термини, атап айтканда көз карандысыз илимий, адабий, артисттик, билим берүү же педагогикалык иш аракеттер ошондой эле врачтардын, юристтердин, инженерлердин, архитекторлордун, стоматологдордун, бухгалтерлердин жана аудиторлордун көз карандысыз иш-аракеттерин камтыйт.

15-берене. Көз каранды жеке кызмат көрсөтүүлөр

1. 16, 18 жана 19-беренелердин жоболорун эске алуу менен жалдоо боюнча иштерге байланыштуу Макулдашуучу Мамлекеттин резиденти алган маяна, эмгек акы жана башка ушул сыяктуу сыйлык акыларга эгерде жалдоо боюнча мындай иш башка Макулдашуучу Мамлекетте ишке ашырылбаса, ошол Мамлекетте гана салык алынат. Эгерде жалдоо боюнча иш ушундай жүргүзүлсө, алынган сыйлык акыдан ошол Мамлекетте салык алынат.

2. 1-пунктун жобосуна карабастан башка Макулдашуучу Мамлекетте ишке ашырылуучу жалдоо боюнча иштерге байланыштуу Макулдашуучу Мамлекеттин резиденти алган сыйлык акыга биринчи аталаган Мамлекетте гана салык алынат, эгерде:

а) алуучу 12-айлык мезгилде жалпысынан 183 күндөн ашпаган мезгилдин аралыгында башка Мамлекетте болсо, жана

б) сыйлык акы жалдоочу же башка Мамлекеттин резиденти болуп саналбаган жалдоочунун атынан төлөнсө, жана

в) сыйлык акыларды төлөө боюнча чыгымдарды жалдоочунун башка Мамлекеттеги туруктуу мекемеси же туруктуу базасы тартпаса.

3. Ушул берененин мурдагы жоболоруна карабастан Макулдашуучу Мамлекеттин ишканасы эл аралык ташууларда эксплуатациялаган деңиз жана аба кемесинин бортунда жүргүзүлүүчү жалдоо боюнча иштерге байланыштуу сыйлык акылардан салык ошол Мамлекетте кармалышы мүмкүн.

16-берене. Директорлордун сыйлык акысы

1. Директорлор кеңешинин мүчөсү же байкоочу кеңештин мүчөсү же башка Макулдашуучу Мамлекеттин резиденти болуп саналган ушул сыяктуу компаниянын органы катарында Макулдашуучу Мамлекеттин резиденти алган төлөмдөрдөн жана директорлук сыйлык акыдан ошол башка Мамлекетте салык алынышы мүмкүн.

17-берене. Искусство кызматкерлери жана спортсмендер

1. 14 жана 15-берененин жоболоруна карабастан башка Макулдашуучу Мамлекетте театр, кино артисти, радио же теле көрсөтүү сыяктуу искусство кызматкери же музыкант катарында же спортсмен катарында Макулдашуучу Мамлекеттин резиденти алган кирешеден ошол башка Мамлекетте салык алынышы мүмкүн.

2. Искусство кызматкери же спортсмен катары жеке иш-аракеттен түшүүчү киреше ошол искусство кызматкерге же спортсменге эмес, башка адамга эсептелсе бул кирешеден 7, 14 жана 15-беренелердин жоболоруна карабастан, искусство кызматкери же спортсмен иш жүргүзгөн Макулдашуучу Мамлекетте салык алынат.

3. 1 жана 2-пунктардын жоболору эгерде башка Мамлекетке келиши толугу менен же негизинен бир же эки Макулдашуучу Мамлекеттин Мамлекеттик Фонддорунан же Макулдашуучу Мамлекеттердин Өкмөттөрүнүн ортосунда маданият жөнүндө макулдашуунун алкагында же администрациялык-аймактык бөлүмдөрү же жергиликтүү бийлик органдары тарабынан каржыланса башка Макулдашуучу Мамлекетте жүргүзүлгөн иш-аракеттерден Макулдашуучу Мамлекеттин резиденти алган кирешеге колдонулбайт. Мындай учурда кирешеге искусство кызматкери же спортсмен резиденти болуп саналган Макулдашуучу Мамлекетте гана салык салынууга тийиш.

18-берене. Пенсиялар жана аннуитет

1. 19-берененин 2-пунктунун жоболорун эске алуу менен жалдоо боюнча жүргүзүлгөн мурдагы иш үчүн Макулдашуучу Мамлекеттин резидентине төлөөчү пенсиялар жана башка ушундай түрдөгү сыйлык акылар жана аннуитет үчүн ошол гана Мамлекетте салык салынууга тийиш.

2. «Аннуитет» термини өмүрүнүн бүткүл аралыгындагы белгиленген убакытка же болбосо милдеттенмеге ылайык аныкталган же так белгиленген убакытка мезгили менен төлөнүүгө тийиш болгон акчалай же нарктык көрүнүшүндө адекваттуу же толук түрдөгү сыйлык акынын ордуна төлөнүүгө тийиш болгон белгиленген сумманы билдирет.

3. Макулдашуучу Мамлекетте келип чыгуучу жана башка Макулдашуучу Мамлекеттин резидентине төлөнүүчү алименттерден жана башка ушул сыяктуу төлөмдөрдөн ошол башка Мамлекетте гана салык алынат.

19-берене. Мамлекеттик кызмат

1. а) Макулдашуучу Мамлекет же анын администрациялык-аймактык бөлүмдөрү же жергиликтүү бийлик органдары тарабынан ошол Мамлекетке же анын административдик-аймактык бөлүмдөрүнө же жергиликтүү бийлик органдарына көрсөтүлгөн кызматтарга карата жеке адамдын пенсия жана аннуитеттен башка маянасына, эмгек акысына жана башка ушул сыяктуу сыйлык акысына ошол Мамлекетте гана салык салынат.

б) Бирок мындай маянага, эмгек акыга жана башка ушул сыяктуу сыйлык акыга эгерде кызмат башка Мамлекетте көрсөтүлсө жана жеке адам ошол Мамлекеттин резиденти болуп саналса башка Макулдашуучу Мамлекетте гана салык салынат, ал:

(1) ушул Мамлекеттин жараны болуп саналса; (2) кызмат көрсөтүү максатында гана ошол Мамлекеттин резиденти болбосо.

2. а) Макулдашуучу Мамлекет же анын администрациялык-аймактык бөлүмдөрү же жергиликтүү бийлик органы же алар түзгөн фонддор тарабынан ошол Мамлекетке же анын администрациялык-аймактык бөлүмдөрүнө же жергиликтүү бийлик органына көрсөтүлүүчү кызмат үчүн жеке адамга төлөнүүчү пенсияга ошол Мамлекетте гана салык салынат.

б) Бирок мындай пенсиядан эгерде жеке адам ошол Мамлекеттин резиденти же жараны болуп саналса башка Макулдашуучу мамлекетте гана салык алынат.

3. 15, 16, 17 жана 18-берененин жоболору Макулдашуучу Мамлекет же анын администрациялык-аймактык бөлүмдөрү же жергиликтүү бийлик органы коммерциялык ишти аткарууга байланыштуу жүргүзгөн кызматтарга карата сыйлык акыларга жана пенсияларга колдонулат.

20-берене. Студенттер

1. Макулдашуучу Мамлекеттин резиденти же башка Макулдашуучу Мамлекетке келээр алдында түздөн-түз резиденти болуп саналган, жана биринчи аталган Мамлекетте окуу же билим алуу максатында гана жүргөн студент же стажер алган төлөмдөрдөн жана жашоо, окуу жана билим алуу максаттары үчүн арналган төлөмдөрдөн, ошол Мамлекеттин чегинде жүргөн булактардан төлөнсө, ошол Мамлекетте салык алынбайт.

21-берене. Башка кирешелер

1. Бул Макулдашуунун мурдакы беренелеринде эскерилбеген, келип чыгуу булагына карабастан Макулдашуучу Мамлекеттин резидентинин кирешелеринин түрлөрүнө ошол Мамлекетте гана салык салынууга тийиш.

2. 1-пунктун жобосу 6-берененин 2-пунктунда аныкталган кыймылсыз мүлктөн түшүүчү кирешелерден тышкары кирешелерге карата эгерде мындай кирешелерди алуучу Макулдашуучу Мамлекеттин резиденти болуп саналса, анда жайгашкан туруктуу мекемеси аркылуу башка Макулдашуучу Мамлекетте коммерциялык иш жүргүзсө же ошол башка Мамлекетке анда турган туруктуу базасы аркылуу көз карандысыз жеке кызматтарды көрсөтсө алынган кирешеге байланыштуу укукка же мүлккө ээ болсо, чындыгында эле мындай туруктуу мекеме же база менен байланышта болсо, аларга карата колдонулбайт. Мындай учурда кырдаалга жараша 7 же 14-берененин жоболору колдонулат.

3. 1 жана 2-пункттардын жоболоруна карабастан, ушул Макулдашуунун мурдакы беренелеринде каралбаган жана башка Макулдашуучу Мамлекетте келип чыккан Макулдашуучу Мамлекеттин резидентинин кирешелеринин түрлөрүнө башка Мамлекетте салык салынышы мүмкүн.

22-берене. Капитал

1. Макулдашуучу Мамлекеттин резидентине таандык жана башка Макулдашуучу Мамлекетте жайгашкан, 6-беренеде эскертилген кыймылсыз мүлк түрүндөгү капиталга ошол башка Мамлекетте салык салынышы мүмкүн.

2. Макулдашуучу Мамлекетте ишканасы болгон Макулдашуучу Мамлекеттин туруктуу мекемесинин коммерциялык мүлкүнүн бөлүгү болуп саналган кыймылдуу мүлк түрүндөгү же көзкарандысыз жекече кызматтарды көрсөтүү максатында башка Макулдашуучу Мамлекетте Макулдашуучу Мамлекеттин резидентинин карамагында болгон туруктуу базага таандык кыймылдуу мүлк түрүндөгү капиталга ошол башка Мамлекетте салык салынышы мүмкүн.

3. Эл аралык ташууларда Макулдашуучу Мамлекеттин резиденти эксплуатациялоочу деңиз же аба транспорту түрүндөгү, ошондой эле мындай деңиз же аба транспортун колдонууга тиешелүү кыймылдуу мүлк түрүндөгү капиталга ошол башка Мамлекетте салык салынышы мүмкүн.

4. Макулдашуучу Мамлекеттин резидентинин капиталынын башка бардык элементтерине ошол Мамлекетте гана салык алынат.

23-берене. Кош салык салууну четтетүү ыкмасы

1. Кыргызстанда кош салык салуу төмөнкүдөй түрдө четтетилет:

а) эгерде Кыргызстандын резиденти киреше алса же капиталга ээ болуп,

ушул Макулдашуунун жоболоруна ылайык Азербайжан Республикасында салык салына турган болсо Кыргызстан төмөнкүлөргө мүмкүндүк берет: (1) бул резиденттин кирешесине салыктан Азербайжанга төлөнгөн киреше салыгына барабар сумманы эсептен чыгарып салууга; (2) бул резиденттин капиталына салыктан Азербайжанга төлөнгөн капиталга барабар салыктын суммасын эсептен чыгарып салууга; жогоруда келтирилген жоболорго ылайык эсептен чыгарылган салыктын суммасы Кыргызстандагы колдонуудагы мыйзамдарга ылайык ставкалар боюнча мындай кирешеге же капиталга эсептелиши мүмкүн болгон салыктын суммасынан ашпоого тийиш;

б) эгерде Кыргызстандын резиденти ушул Макулдашуунун жоболоруна ылайык Азербайжанда гана салык алына турган киреше алса же капиталга ээ болсо Кыргызстан бул кирешени же капиталды салык салуу базасына киргизе алат, бирок Кыргызстанда салык салынууга дуушар болуучу мындай кирешеге же капиталга салыктын ставкасын белгилөө максатында гана жүргүзүлөт.

2. Азербайжанда кош салык салуу төмөнкүдөй түрдө четтетилет:

Эгерде Азербайжандын резиденти ушул Макулдашуунун беренелеринин негизинде Кыргызстанда салык салынуучу киреше алса же мүлккө ээ болсо мындай кирешеге же мүлккө Кыргызстанга төлөнгөн салыктын суммасы Азербайжандагы ошол адамдан ушул кирешеге жана мүлккө байланыштуу кармалган салыктын суммасы чыгарылууга тийиш. Бирок чыгарылуучу сумма Азербайжандын салык салуу мыйзамдарына жана тартибине ылайык мындай кирешеге же мүлккө эсептелген салыктын суммасынан ашпоого тийиш.

24-берене. Кысымга албоо

1. Макулдашуучу Мамлекеттин улуттук жактарына башка Макулдашуучу Мамлекетте башка же кыйла түйшүктүү салык салууга же атап айтканда ушул эле кырдаалда резидентчиликке байланыштуу башка Мамлекеттин улуттук жактары дуушар болгон же дуушар болушу мүмкүн болгон башкача же кыйла түйшүктүү салык салынбайт. Бул жобо ошондой эле биринчи берененин жобосуна карабастан бир же эки Макулдашуучу Мамлекеттердин резиденти болуп саналбаган жактарга колдонулбайт.

2. Макулдашуучу Мамлекеттин резиденти болуп саналган жарандагы жок адамга кайсыл болбосун Макулдашуучу Мамлекеттердин кандайдыр бир салык салынууга же болбосо кыйла түйшүктүү салык салууга ошол эле кырдаалда башка Мамлекеттин улуттук жактары дуушар болгон же дуушар болушу мүмкүн болгон башкача же кыйла түйшүктүү салык салынбайт.

3. Макулдашуучу Мамлекеттин башка Макулдашуучу Мамлекетте ишканасы болгон туруктуу мекемесине салык салуу жагдайы ошондой эле иш жүргүзгөн башка Мамлекеттин ишканасына салык салуудан кем болбоого тийиш. Мындай жобо Макулдашуучу Мамлекетти башка Макулдашуучу Мамлекеттин резидентине алардын жарандык статусунун же үй-бүлөөлүк жагдайынын негизинде салык салуу боюнча өздөрүнүн резидентине берилүүчү кандайдыр бир жекече жеңилдиктерди, эсептен чыгарып салууларды жана арзандатууларды берүүгө милдеттендирүү катары түшүндүрүлбөөгө тийиш.

4. 9-берененин 1-пунктунун, 11-берененин 7-пунктунун же 12-берененин 6-пунктунун жоболору колдонулган учурду кошпогондо Макулдашуучу Мамлекеттин башка Макулдашуучу Мамлекеттин резидентине төлөнүүчү проценттер, роялтилер жана башка төлөмдөр мындай ишкананын салык салынуучу пайдасын аныктоо максатында баштапкы эскертилген Мамлекеттин резидентине төлөнгөндөй шартта эсептен чыгарылууга тийиш. Ушундай эле Макулдашуучу Мамлекеттин ишканасынын башка Макулдашуучу Мамлекеттин резидентине болгон ар кандай карызы ошол ишкананын салык салынуучу капиталын аныктоо максатында баштапкы аталган Мамлекеттин резидентине болгон карыздын шарттарында эсептен чыгарылууга тийиш.

5. Капиталы бир же бир нече резиденттерге толук же жарым жартылай таандык болгон же түз же кыйыр түрдө башка Макулдашуучу мамлекеттин бир же бир нече резиденти тарабынан контролдонгон Макулдашуучу Мамлекеттин ишканасына баштапкы аталган Мамлекетте салык салууга жана ошол баштапкы аталган Мамлекеттин ушул сыяктуу ишканасы дуушар болгон же дуушар болушу мүмкүн болгон башка же кыйла түйшүктүү салык салынбайт.

25-берене. Өз ара макулдашуу жол-жоболору

1. Эгерде жак бир же эки Макулдашуучу Мамлекеттердин аракеттери аны ушул Макулдашуунун жоболоруна ылайык эмес салык салууга алып келди же алып келет деп эсептесе, бул Мамлекеттердин улуттук мыйзамдарында каралган коргоо каражаттарына карабастан өздөрүнүн ишин кароо үчүн ал резиденти болуп саналган Макулдашуучу Мамлекеттин компетенттүү органдарына, эгерде мындай учур ал улуттук жагы болуп саналган ошол Мамлекеттин 24-беренесинин 1-пунктуна туура келсе, кароого берет. Арыз Макулдашуунун жоболоруна ылайык келбеген салык салууга алып келүүчү аракеттер жөнүндө кабарлоо берилген учурдан тартып үч жылдын аралыгында берилүүгө тийиш.

2. Компетенттүү орган арызды негиздүү деп тапса, ал өзү канааттандыралык чечимге келе албаса Макулдашууга дал келбеген салык салуудан качуу максатында маселени башка Макулдашуучу Мамлекеттин компетенттүү органы менен өз ара Макулдашуу боюнча чечүүгө умтулат. Ар кандай жетишилген макулдашуу ошол Макулдашуучу Мамлекеттердин ички мыйзамдарындагы кандайдыр бир убактылуу чектөөлөргө карабастан аткарылат.

3. Макулдашуучу Мамлекеттердин компетенттүү органдары Макулдашууну чечмелөөдө же колдонууда келип чыгуучу ар кандай кыйынчылыктарды же шектенүүлөрдү өз ара макулдашуу боюнча чечүүгө умтулат. Алар Макулдашууда каралбаган учурларда кош салык салууну четтетүү максатында бири-бири менен консультация жүргүзүшөт.

4. Макулдашуучу Мамлекеттердин компетенттүү органдары мурдагы пункттарды макулдашуу жана түшүнүү максатында бири-бири менен түз байланыштарга чыга алышат.

26-берене. Маалымат алмашуу

1. Макулдашуучу мамлекеттердин компетенттүү органдары ушул Макулдашуунун жоболорун же Макулдашуучу Мамлекет, анын администрациялык-аймактык бөлүмдөрү же анын жергиликтүү бийлик органдары алуучу Макулдашуучу Мамлекеттердин салыктарынын ар кандай түрүнө жана аталыштарына тиешелүү ички мыйзамдарды аткаруу үчүн зарыл болгон, эгерде салык салуу ошол мыйзамдарда каралса жана ушул Макулдашууга каршы келбесе, зарыл маалыматтарды алмашат. Маалыматтарды алмашуу 1 жана 2-беренелерде чектелбейт. Макулдашуучу Мамлекет алган ар кандай маалымат ошол Мамлекеттин ички мыйзамдарынын чектеринде алынган маалымат сыяктуу эле жашыруун болуп саналат жана Макулдашуу колдонула турган салыктарга карата аныктоо же жыйноо, мажбурлап өндүрүү же соттук териштирүү же аппеляцияларды кароо менен иш жүргүзген жактарга же органдарга (сотторду жана администрациялык органдарды кошо алганда) гана билдирилет. Мындай жактар же органдар бул маалыматты ошондой максаттар үчүн гана колдонушат. Алар мындай маалыматты соттук ачык отурумдун жүрүшүндө же соттук чечимдерди кабыл алууда гана ачыкка чыгара алышат.

2. Кандай гана учур болбосун 1-пунктун жоболору Макулдашуучу Мамлекеттерди милдеттендирүүчү катары төмөнкүдөй чечмеленүүгө тийиш эмес:

а) тигил же бул Макулдашуучу Мамлекеттин мыйзамдарына жана администрациялык практикага каршы келүүчү административдик чараларды көрүү;

б) мыйзамдар боюнча же тигил же бул Макулдашуучу Мамлекеттин демейдеги администрациялык практикасынын жүрүшүндө алууга болбой турган маалыматтарды берүү;

в) ачыкка чыгаруу мамлекеттик саясатка каршы келүүчү кандайдыр бир соода, экономикалык, өнөр жайлык, коммерциялык же кесиптик сырды же болбосо соода процессин ачкан маалыматты берүү.

27-берене. Дипломатиялык өкүлчүлүктөрдүн жана консулдук мекемелердин мүчөлөрү

Бул Макулдашуунун эч кандай жобосу Дипломатиялык өкүлчүлүктөрдүн жана консулдук мекемелердин мүчөлөрүнүн эл аралык укуктун жалпы нормалары тарабынан же атайын Макулдашуулардын негизинде берилген салыктык артыкчылыктарына колдонулбайт.

28-берене. Күчүнө кириши

1. Макулдашуучу Мамлекеттер ушул Макулдашуунун күчүнө кириши үчүн алардын мыйзамдары талап кылуучу зарыл болгон мамлекеттик ички жол-жоболорду аткаргандыгы жөнүндө дипломатиялык каналдар аркылуу бири-бирине кабарлашат.

2. Бул макулдашуу ушул берененин 1-пунктунда аталаган соңку кабарлоо берилген күндөн тартып күчүнө кирет жана анын жоболору төмөнкүдөй колдонулат:

а) булактан алынуучу салыктарга карата - бул Макулдашуу күчүнө кирген календардык жылдын биринчи январында же андан кийин төлөнүүчү же эсепке алынган (кредиттелген) салыктар үчүн;

б) башка салыктарга карата - бул Макулдашуу күчүнө кирген календардык жылдын биринчи январында же андан кийин башталуучу салык салынуучу мезгилдер үчүн.

3. Бул Макулдашууга Макулдашуучу Мамлекеттердин өз ара макулдугу боюнча өзүнчө Протокол менен таризделген өзгөртүүлөр жана толуктоолор киргизилиши мүмкүн, ал ушул Макулдашуунун ажырагыс бөлүгү болуп саналат. Бул Протоколдор ушул берененин 1 жана 2-пункттарында каралган жол-жоболорго ылайык күчүнө кирет.

29-берене. Колдонулушун токтотуу

Бул Макулдашуу Макулдашуучу Мамлекеттердин бири анын колдонулушун токтотконго чейин күчүндө болот. Ар бир Макулдашуучу Мамлекет бул Макулдашуу күчүнө кирген күндөн тартып беш жыл өткөндөн кийин башталуучу календардык жыл аяктаганга чейин кеминде алты айдан кечиктирбестен Макулдашуунун колдонулушун токтотуу жөнүндө дипломатиялык каналдар боюнча жазуу жүзүндө кабарлоо менен ушул Макулдашуунун колдонулушун токтото алат. Мындай учурда Макулдашуу төмөнкүлөргө карата өзүнүн колдонулушун токтотот:

а) булактан алынуучу салыктарга карата - мындай кабарлоо берилген жылдан кийинки календардык жылдын биринчи январында же андан кийин төлөнүүчү же эсепке алынган (кредиттелген) салыктар үчүн;

б) башка салыктарга карата - мындай кабарлоо берилген жылдан кийинки календардык жылдын биринчи январында же андан кийин башталуучу салык салынуучу мезгилдер үчүн.

Муну тастыктоо үчүн буга тийиштүү түрдө ыйгарым укугу барлар ушул Макулдашууга кол коюшту.

______________ -жылдын «____»________ 2 нускада, кыргыз, азербайжан жана орус тилдеринде түзүлдү, бардык тексттер бирдей күчкө ээ. Пикир келишпестиктер келип чыкса орус тилиндеги текст колдонулат.

Кыргыз Республикасынын Өкмөтү үчүн

Азербайжан Республикасынын Өкмөтү үчүн