КР Шайлоо жана референдум өткөрүү боюнча борбордук комиссиясынын «Кыргыз Республикасынын жергиликтүү өз алдынча башкаруусунун айрым аткаруу органдарынын башчыларын шайлоону дайындоо жөнүндө» токтому

КЫРГЫЗ РЕСПУБЛИКАСЫНЫН ШАЙЛОО ЖАНА РЕФЕРЕНДУМ ӨТКӨРҮҮ БОЮНЧА БОРБОРДУК КОМИССИЯСЫ ТОКТОМ 2016-жылдын 19-апрели № 83 Кыргыз Республикасынын жергиликтүү өз алдынча башкаруусунун айрым аткаруу органдарынын башчыларын шайлоону дайындоо жөнүндө Кыргыз Республикасынын Шайлоо жана референдум өткөрүү боюнча борбордук комиссиясынын 2016-жылдын 25-мартындагы № 61 токтому менен 2016-жылдын 13-апрелине дайындалган Талас облусунун Талас районунун Бекмолдо айыл өкмөтүнүн башчысынын шайлоосу, кворумдун болбой калгандыгына байланыштуу, өткөн жок. Нарын облусунун Нарын районунун мамлекеттик администрациясынын башчысы - акиминин 2016-жылдын 11-апрелиндеги № 60 буйругу менен Учкун айыл өкмөтүнүн башчысы Ж.Ч.Мокеевге, Учкун айылдык кеңешинин депутаттары II кезексиз сессиясында ишенбестик көрсөткөндүгүнүн негизинде, ал ээлеген кызматынан бошотулган. Ош облусунун Өзгөн районунун мамлекеттик администрациясынын башчысы - акиминин 2016-жылдын 11-апрелиндеги № 97 буйругу менен Кара-Таш айыл өкмөтүнүн башчысы Ж.А.Алиев, берген арызына ылайык, ээлеген кызматынан бошотулган. Жогоруда баяндалгандардын негизинде, "Кыргыз Республикасынын шайлоо жана референдум өткөрүү боюнча шайлоо комиссиялары жөнүндө" Кыргыз Республикасынын Мыйзамынын 6, 7-беренелерине, "Жергиликтүү өз алдынча башкаруу жөнүндө" Кыргыз Республикасынын Мыйзамынын 49-беренесине, Кыргыз Республикасынын Шайлоо жана референдум өткөрүү боюнча борбордук комиссиясынын 2011-жылдын 27-декабрындагы № 423 токтому менен бекитилген "Айыл өкмөтүнүн башчысын шайлоонун тартиби жөнүндө" жобосуна ылайык, Кыргыз Республикасынын Шайлоо жана референдум өткөрүү боюнча борбордук комиссиясы ТОКТОМ КЫЛАТ:

1. Талас облусунун Талас районунун Бекмолдо айыл өкмөтүнүн башчысын кайра шайлоо, мурда каттоодон өткөн талапкерлерди көрсөтүү менен, 2016-жылдын 3-майына дайындалсын жана саат 9.00дөн 12.00гө чейин өткөрүлсүн.

2. Нарын облусунун Нарын районунун Учкун жана Ош облусунун Өзгөн районунун Кара-Таш айыл өкмөттөрүнүн башчыларын шайлоо 2016-жылдын 6-майына дайындалсын жана саат 9.00дөн 12.00гө чейин өткөрүлсүн.

3. Талас, Нарын жана Өзгөн аймактык шайлоо комиссиялары шайлоону мыйзамдарда белгиленген тартипте өткөрүүнү уюштурсун.

4. Бул токтом "Эркин Тоо" газетасына жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

5. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын аппарат жетекчисинин орун басары А.Р.Джолбуновго жүктөлсүн.

Төрага

Т. Абдраимов