17-берене. Ичүүчү суунун коопсуздугунун мониторинги

1. Чарбалык-ичүүчү суу менен камсыздоо системасын эксплуатациялоочу жеке жана юридикалык жактар ичүүчү суунун коопсуздугу жана суу тазалоонун натыйжалуулугу жөнүндө маалымат алуу максатында керектөөчүлөргө берилүүчү ичүүчү суунун мониторингин жүзөгө ашырат.

2. Ичүүчү суунун коопсуздугунун көрсөткүчтөрү боюнча изилдөөлөр төмөнкүдөй жүргүзүлөт:

- чарбалык-ичүүчү суу менен жабдуунун борбордоштурулган системаларынан ушул Мыйзамдын 5-тиркемесине ылайык;

- чарбалык-ичүүчү суу менен жабдуунун борбордоштурулбаган системаларынан ушул Мыйзамдын 2-тиркемесине ылайык.

3. Ичүүчү сууну текшерүүгө алуу жана изилдөө жыл ичинде системалуу жүргүзүлөт.

4. Ичүүчү сууга мониторинг жүргүзүү программасы чарбалык-ичүүчү суу менен камсыздоо системасын эксплуатациялоочу жеке жана юридикалык жактар тарабынан ушул Мыйзамдын 2, 5 жана 6-тиркемелерине ылайык саламаттык сактоо жаатындагы Кыргыз Республикасынын ыйгарым укуктуу мамлекеттик органы менен макулдашуу боюнча иштелип чыгат.

5. Ичүүчү сууда ченемдик көрсөткүчтөрү белгиленбеген, адамдын ден соолугу үчүн потенциалдуу коркунучтуу заттар же микроорганизмдер бар экени жөнүндө негиздүү күмөн пайда болгондо сууну кошумча текшерүү жүргүзүлөт.

6. Чарбалык-ичүүчү суу менен камсыздоо системасын эксплуатациялоочу жеке жана юридикалык жактар жана ыйгарым укуктуу мамлекеттик органдар Кыргыз Республикасынын Өкмөтү тарабынан бекитилген эрежелерге жана усулдарга ылайык ичүүчү сууга лабораториялык изилдөө жүргүзүүнүн эрежелерин сактоого милдеттүү.

7. Чарбалык-ичүүчү суу менен камсыздоо системасын эксплуатациялоочу жеке жана юридикалык жактар ичүүчү суунун коопсуздугу жөнүндө талаш маселелерди чечүү үчүн көз каранды эмес аккредиттелген лабораторияларда изилдөөлөрдү жүргүзөт.