12-берене. Башкы прокурордун ыйгарым укуктары жана укуктары

1. Башкы прокурор прокуратуранын толук түрдөгү бүткүл ыйгарым укуктарына ээ болот:

1) Кыргыз Республикасынын прокуратура системасын жетектейт жана анын ишине контролдоону жүзөгө ашырат;

2) Кыргыз Республикасынын аймагында мыйзамдардын жана башка ченемдик укуктук актылардын так жана бир түрдүү аткарылышына көзөмөлдүктү уюштурат жана жүргүзөт;

3) мыйзам менен белгиленген тартипте сүйлөшүүлөрдү жүргүзөт жана укуктук жардам жана кылмыштуулук менен күрөшүү маселелери боюнча Кыргыз Республикасынын эл аралык келишимдерине кол коет;

4) Кыргыз Республикасынын Жогорку Кеңешинин депутатына, судьяларга, башка адамдарга карата Кыргыз Республикасынын мыйзамдарына ылайык жазык ишин козгоо боюнча өзгөчө компетенцияга ээ;

5) Кыргыз Республикасынын Жогорку Кеңеши тарабынан кылмыш жасады деп айыптоо коюлган учурда Кыргыз Республикасынын Президентинин иш-аракеттеринде кылмыштын белгилери бар экендиги жөнүндө корутунду берет;

6) Кыргыз Республикасынын прокуратура системасынын уюштуруу жана ишинин маселелерин жана прокуратура органдарынын жана мекемелеринин бардык кызматкерлерин социалдык жана материалдык жактан камсыз кылуу чараларын ишке ашыруу тартибин жөнгө салуучу, көрсөтүлгөн кызматкерлер милдеттүү түрдө аткарууга тийиш болгон буйруктарды, көрсөтмөлөрдү, тескемелерди жана нускамаларды чыгарат;

7) Прокуратура, эмгек жана мамлекеттик кызмат жөнүндө мыйзамдарга ылайык прокуратура органдарынын кызматкерлеринин жумуш убагынын режимин жана эс алуусун аныктайт.

2. Башкы прокурор төмөнкүлөрдү кызматка дайындайт жана кызматынан бошотот:

1) Башкы прокуратуранын башкармалыктарынын, бөлүмдөрүнүн начальниктерин, алардын орун басарларын; Башкы прокурордун улук жардамчысын жана жардамчысын; улук прокурорлорду, башкармалыктардын, бөлүмдөрдүн прокурорлорун, өзгөчө маанилүү иштер боюнча улук тергөөчүлөрдү жана тергөөчүлөрдү; криминалист-прокурорлорду; башкы, жетектөөчү адистерди жана адистерди;

2) Аскер прокурорунун сунушу боюнча Аскер прокурорунун орун басарларын, улук жардамчыларын жана аскер прокуратурасынын бөлүмдөрүнүн начальниктерин, ошондой эле аскер гарнизондорунун прокурорлорун;

3) областтардын, Бишкек, Ош шаарларынын прокурорлорун; алардын сунушу боюнча - аталган прокуратуралардын орун басарларын, улук жардамчыларын жана бөлүмдөрүнүн начальниктерин;

4) райондордун (шаарлардын) прокурорлорун, ошондой эле жогору турган прокурорлордун сунушу боюнча гарнизондордун аскер прокурорлорун, ошондой эле адистештирилген прокуратуралардын прокурорлорун.

3. Башкы прокурор мыйзамдарда белгиленген тартипте:

1) прокуратуранын кызматкерлерине атайын класстык чендерди, класстык чендерди жана аскердик наамдарды ыйгарат;

2) ведомстволук сыйлыктар менен сыйлайт;

3) аларга жогорку класстык чендерди жана аскердик наамдарды ыйгаруу үчүн Кыргыз Республикасынын Президентине талапкерлерди сунуштайт;

4) прокуратура органдарынын кызматкерлерин мамлекеттик сыйлыктар менен сыйлоого жана Кыргыз Республикасынын ардактуу наамдарын ыйгарууга көрсөтөт.

4. Башкы прокурор төмөндөгүлөргө укуктуу:

1) мыйзамдардын жана башка ченемдик укуктук актылардын Кыргыз Республикасынын Конституциясына ылайык келбеген маселелер боюнча Кыргыз Республикасынын Жогорку сотунун Конституциялык палатасына кайрылууга;

2) мыйзам чыгаруучу органдарга жана мыйзам чыгарууга демилге укугуна ээ болгон органдарга мыйзамдарды жана башка ченемдик укуктук актыларды толуктоо, өзгөртүү, жокко чыгаруу же аларды кабыл алуу жөнүндө сунуш киргизүүгө.

5. Мыйзам тарабынан ага берилген башка ыйгарым укуктарды жүзөгө ашырат.

6. Башкы прокурор ушул Мыйзам тарабынан Кыргыз Республикасынын прокуратурасына жүктөлгөн милдеттердин аткарылышы үчүн жооп берет.

7. Башкы прокурор ыйгарым укуктарынын мөөнөтүнүн ичинде Кыргыз Республикасынын Жогорку Кеңешинин макулдугусуз камакка алынышы, сот тартибинде салынуучу администрациялык жаза чараларына тартылышы, жазык жоопкерчилигине тартылышы мүмкүн эмес.

(КР 2012-жылдын 29-февралындагы № 9 Мыйзамынын редакциясына ылайык)