62-статья. Коомдун ички аудит кызматы (ички аудитору)

(Берененин КР 2025-жылдын 26-июнундагы № 126 Мыйзамынын редакциясына ылайык)

1. Коомдун финансы-чарбалык ишине контроль жүргүзүү үчүн акционерлердин жалпы чогулушу тарабынан коомдун ички аудит кызматы (ички аудитору) шайланат. Эгерде коомдун уставында башкасы белгиленбесе, ички аудит кызматынын мүчөлөрү (ички аудитору) коомдун акционерлеринин ичинен шайланат.

Акциялардын 50 пайызынан ашыгына мамлекет ээ болгон коомдун ички аудит кызматынын (ички аудиторунун) курамына шайланган адамдар катары менен үч жолудан ашык шайланышы мүмкүн эмес. Ички аудит кызматынын мүчөлөрүнө (ички аудиторго) карата талаптар Кыргыз Республикасынын Министрлер Кабинети тарабынан белгилениши мүмкүн.

2. Коомдун ички аудит кызматынын (ички аудиторунун) ушул Мыйзам менен белгиленбеген компетенциясы коомдун уставы менен аныкталат.

Коомдун ички аудит кызматынын (ички аудиторунун) иштөө тартиби акционерлердин жалпы чогулушунда бекитилүүчү коомдун ички документи менен аныкталат.

3. Коомдун финансы-чарбалык ишин текшерүү коомдун жылдык ишинин жыйынтыгы боюнча, ошондой эле коомдун ички аудит кызматынын (ички аудиторунун), коомдун директорлор кеңешинин же коомдун добуш берүүчү акцияларынын жалпысынан 10 пайызынан кем эмесине ээ болгон акционерлеринин (акционеринин) талабы боюнча жүргүзүлөт.

Ички аудит кызматы (ички аудитор) үзгүлтүксүз, бирок кварталында кеминде бир жолу директорлор кеңешине аткарылган иштер жөнүндө маалымат берет. Ички аудит кызматы (ички аудитор) иштеринин натыйжалары акционерлерге коомдун акционерлеринин жалпы чогулушунда билдирилет.

4. Коомдун ички аудит кызматынын (ички аудитордун) талабы боюнча коомдун башкаруу органдарында кызмат ордун ээлеген адамдар коомдун финансы-чарбалык иши жөнүндөгү документтерди берүүгө милдеттүү.

5. Коомдун ички аудит кызматы (ички аудитор) төмөндөгүлөргө укуктуу:

- акционерлердин кезексиз жалпы чогулушун чакырууну талап кылууга;

- директорлор кеңешинин же директорлор кеңеши жок болгон учурда аткаруу органынын макулдугу боюнча компаниянын каражаттарынын эсебинен көз карандысыз эксперттерди жана аудитордук уюмду тартууга;

- каралып жаткан маселелер түшүндүрүүнү талап кылган учурларда ички аудит кызматынын жыйналыштарына аткаруучу органдын мүчөлөрүнүн катышууларын талап кылууга;

- коомдун кызмат адамдарынан анын иштөөсү үчүн зарыл болгон документтерди берүүлөрүн талап кылууга;

- (КР 2025-жылдын 20-июнундагы № 122 Мыйзамына ылайык күчүн жоготту)

- аудитордук уюмга суроо-талаптарды жөнөтүүгө жана аудитордук корутундуга же отчетко карата аудитордук уюмдун түшүндүрмөлөрүн алууга.

6. Коомдун ички аудит кызматынын мүчөлөрү (ички аудитор) бир эле убакта коомдун директорлор кеңешинин мүчөсү боло албайт, ошондой эле коомдун башкаруу органдарында дагы башка кызматтарды ээлей албайт.

Коомдун кызматкелери ички аудит кызматынын (ички аудиторунун) мүчөлөрү боло алышпайт.

7. Ички аудит кызматынын жыйналыштары кварталына бир жолудан кем эмес өткөрүлөт. Ички аудит кызматынын жыйналыштарын чакыруунун жана өткөрүүнүн тартиби коомдун ички документтери менен белгиленет.

(КР 2004-жылдын 13-августундагы № 128, 2011-жылдын 5-октябрындагы № 163, 2025-жылдын 20-июнундагы № 122, 2025-жылдын 26-июнундагы № 126 Мыйзамдарынын редакцияларына ылайык)