9-берене. Жаштарды иш менен камсыз кылууга жана жаштар ишкердигин өнүктүрүүгө көмөк көрсөтүү

1. Министрлер Кабинети эмгек рыногунун керектөөлөрүнө талдоо жана болжолдоо жүргүзөт, ошондой эле эмгекке жөндөмсүз жаштардын адистиги жана жынысы боюнча санын көзөмөлдөп турат. Талдоо жана болжолдоо жүргүзүүнүн тартиби Министрлер Кабинети тарабынан аныкталат.

2. Министрлер Кабинети эмгек рыногунун керектөөлөрүн талдоонун жана болжолдоонун негизинде жаштарды ишке орноштурууну жана алардын Кыргыз Республикасынын бүткүл аймагында ишке орношуу мүмкүнчүлүктөрү жөнүндө маалымат алуусун төмөнкүдөй жолдор менен камсыз кылат:

1) жаш адистерди колдоо боюнча программаларды иштеп чыгуу жана бекитүү;

2) ишкердикти колдоонун мамлекеттик кепилдиктерин ишке ашырууга жаш адистерди жана жаш ишкерлерди паритеттик негизде тартуу;

3) мамлекеттик жарандык жана муниципалдык кызматтарга кирүүгө кызыгууну жогорулатуу;

4) чакан жана орто ишканаларды өнүктүрүү;

5) экономиканын секторлорун каржылоонун альтернативдүү булактарын түзүү;

6) аймактарды өнүктүрүүнүн бирдиктүү адистештирилген пландарынын негизинде региондорду системалуу өнүктүрүү;

7) социалдык тапшырыктын алкагында жаштардын стартап-долбоорлорун жана демилгелерин колдоо;

8) калкты иш менен камсыз кылууга көмөк көрсөтүү чөйрөсүндөгү мыйзамдарда каралган кепилдиктерди камсыз кылуу.

3. Жаш ишкерлерди социалдык-экономикалык, уюштуруучулук жана укуктук колдоо боюнча чаралардын системасын Министрлер Кабинети орнотот.

4. Жаштар ишкердигин жүзөгө ашырган жана жаштар саясаты чөйрөсүндө мамлекеттик колдоодон пайдаланган адамдарга төмөнкүлөр кирет:

1) юридикалык жакты түзбөстөн ишкердик иш менен алектенген жаштар;

2) жаштар тарабынан уюштурулган дыйкан (фермердик) чарбалары;

3) жаштар тарабынан демилгеленген стартаптар;

4) жаштар тарабынан уюштурулган ишкердик демилгелер.

5. Жаштар ишкердигин мамлекеттик колдоо төмөнкүлөр аркылуу жүзөгө ашырылат:

1) социалдык жактан корголбогон жаштардын катмарын ишкердикке тартуу;

2) жаштарды ишкердик иштин негиздерине үйрөтүү, келишимдик негизде окуу жайлары менен иш берүүчүлөрдүн ортосундагы кызматташтыкты өнүктүрүү;

3) жаштар ишкердигин колдоо боюнча региондук программаларды иштеп чыгуу.