26-берене. Автомобиль жолдорун оңдоо жана күтүү

1. Автомобиль жолдорун оңдоо жана күтүү төмөнкүлөр тарабынан камсыздалат:

1) жалпы пайдалануудагы автомобиль жолдорунда - алар карамагында болгон транспорт жана коммуникациялар чөйрөсүндөгү ыйгарым укуктуу мамлекеттик орган, ошондой эле жол участокторунда жана жол курулмаларында аларды күтүү боюнча кызмат көрсөтүүлөрдү сатып алуу келишиминин негизинде жеке менчик жол-куруу уюмдары тарабынан;

2) ведомстволук жана жеке менчик автомобиль жолдорунда - тиешелүү ведомстволор жана ошол жолдордун ээлери тарабынан;

3) муниципалдык автомобиль жолдорунда - жергиликтүү өз алдынча башкаруу органдары тарабынан.

2. Кыргыз Республикасында жалпы пайдалануудагы автомобиль жолдорун жана жол курулмаларын оңдоо жана күтүү боюнча жумуштарды пландаштыруунун жана жүргүзүүнүн тартиби жөнүндө жобо транспорт жана коммуникациялар чөйрөсүндөгү ыйгарым укуктуу мамлекеттик орган тарабынан бекитилет.

3. Жалпы пайдалануудагы автомобиль жолдорун оңдоо жана күтүү боюнча жумуштарды пландаштыруу жол активдерин башкаруунун бирдиктүү маалыматтык системасын милдеттүү түрдө пайдалануу менен жүзөгө ашырылат. Ушул системага карата негизги талаптар, аны түзүү, өнүктүрүү, эксплуатацияга киргизүү жана эксплуатациядан чыгаруу маселелери транспорт жана коммуникациялар чөйрөсүндөгү ыйгарым укуктуу мамлекеттик орган тарабынан Кыргыз Республикасынын электрондук башкаруу жөнүндө мыйзамдарына ылайык белгиленет.

4. Жалпы пайдалануудагы автомобиль жолдорун оңдоого жана күтүүгө ченемдик финансылык чыгымдар транспорт жана коммуникациялар чөйрөсүндөгү ыйгарым укуктуу мамлекеттик орган тарабынан бекитилет.

5. Жалпы пайдалануудагы автомобиль жолдорун оңдоо жана күтүү боюнча ар жылдык план транспорт жана коммуникациялар чөйрөсүндөгү ыйгарым укуктуу мамлекеттик орган тарабынан иштелип чыгат жана бекитилет. Бул планга долбоордук документтери жана финансылык ырастоосу жок объекттерди киргизүүгө тыюу салынат.

6. Жалпы пайдалануудагы автомобиль жолдорун жана алардагы жасалма курулмаларды оңдоо жана күтүү боюнча жумуштардын классификациясы транспорт жана коммуникациялар чөйрөсүндөгү ыйгарым укуктуу мамлекеттик орган тарабынан белгиленет.

7. Жалпы пайдалануудагы автомобиль жолдорун жана жол курулмаларын күтүү алар боюнча кызмат көрсөтүүлөрдү сатып алуу келишиминин негизинде жүзөгө ашырылышы мүмкүн, аларга акы аларды күтүү деңгээлине ылайык төлөнөт. Жалпы пайдалануудагы автомобиль жолдорун күтүү тартиби жөнүндө жобо аларды күтүү боюнча кызмат көрсөтүүлөрдү сатып алуу келишиминин негизинде автомобиль жолдорунун участокторунун тизмегин, аларды күтүү боюнча жумуштарды аныктоо менен транспорт жана коммуникациялар чөйрөсүндөгү ыйгарым укуктуу мамлекеттик орган тарабынан бекитилет.

Автомобиль жолдорун күтүү боюнча кызмат көрсөтүүлөрдү сатып алуу келишимдери орточо эмгек акынын өлчөмүнүн жана негизги курулуш материалдарына баалардын өзгөрүшүн эске алып, жумуштардын наркын индексациялоону белгилөө менен беш жылдан кем эмес мөөнөткө түзүлөт.

8. Жалпы пайдалануудагы автомобиль жолдорун караган транспорт жана коммуникациялар чөйрөсүндөгү ыйгарым укуктуу мамлекеттик органдын жол органдары, ведомстволук, жеке менчик жана муниципалдык автомобиль жолдорунун менчик ээлери автомобиль жолдорун жол кыймылынын коопсуздугунун талаптарына жооп берген абалда оңдоого жана күтүүгө, ушул жолдорду жакшыртууну, алардын тармагын өнүктүрүүнү камсыздоого милдеттүү.

9. Автомобиль жолдорунун транспорттук-эксплуатациялык мүнөздөмөлөрүнүн техникалык регламенттердин талаптарына шайкештигин аныктоо максатында автомобиль жолдорунун менчик ээлери автомобиль жолдорунун техникалык абалын транспорт жана коммуникациялар чөйрөсүндөгү ыйгарым укуктуу мамлекеттик орган белгилеген тартипте баалоону жүргүзөт.