534-берене. Адамды чет мамлекетке убактылуу өткөрүп берүү (экстрадициялоо) жана адамды убактылуу өткөрүп берүү жөнүндө суроо-талап жөнөтүү

1. Эгерде өткөрүп берүүнү кийинкиге калтыруу кылмыш куугунтугунун эскирүү мөөнөтүнүн бүтүшүнө же кылмышты тергөөгө зыян келтирсе, өтүнүч боюнча өткөрүп берүү талап кылынган адам Башкы прокурор же анын орун басарлары белгилеген шарттарды сактоо милдеттенмелери болгон учурда убактылуу өткөрүлүп берилиши мүмкүн.

Убактылуу өткөрүлүп берилген (экстрадицияланган) адам кылмыш иши боюнча процессуалдык аракеттер жүргүзүлгөндөн кийин өткөрүлүп (экстрадицияланып) берилген күндөн тартып 90 суткадан кечиктирилбестен кайтарылышы керек. Өз ара макулдашуу боюнча бул мөөнөт узартылышы мүмкүн, бирок Кыргыз Республикасынын аймагында жасаган кылмышы үчүн жазанын өтөлө элек мөөнөтүнөн ашпоого тийиш.

2. Эгерде адамды өткөрүп берүүнү (экстрадициялоону) кийинкиге калтыруу кылмыш жоопкерчилигине тартуу мөөнөтүнүн эскирүүсүнө же кылмыш иши боюнча далилдердин жоголуусуна алып келе турган болсо, Башкы прокурор же анын орун басарлары адамды убактылуу өткөрүп берүү (экстрадициялоо) жөнүндө ушул Кодекстин 523-беренесинде каралган тартипте даярдалуучу суроо-талап менен кайрылышы мүмкүн.

3. Адамды убактылуу өткөрүп берүү (экстрадициялоо) жөнүндө суроо-талап канааттандырылган учурда бул адам макулдашылган мөөнөттө тиешелүү чет мамлекетке кайтарылып берилүүгө тийиш.

4. Зарыл болгон учурда процессти жүргүзүүчү орган адамды убактылуу өткөрүп берүүнүн (экстрадициялоонун) мөөнөтүн узартуу жөнүндө документтерди даярдайт, алар адамды убактылуу өткөрүп берүүнүн (экстрадициялоонун) мөөнөтү аяктаганга чейин 20 суткадан кечиктирбестен Башкы прокуратурага жиберилет.