562-берене. Коомдук иштерге тартуу жөнүндө токтомду аткаруунун тартиби жана шарттары

1. Коомдук иштер адамдар тарабынан иштен же окуудан бош убакытта акысыз негизде аткарылат.

2. Коомдук иштерге тартуу түрүндөгү жаза чарасы колдонулган адамдар төмөнкүлөргө милдеттүү:

1) коомдук ишке тартуу түрүндө жаза чарасын аткаруунун белгиленген тартибин жана шарттарын сактоого;

2) алар үчүн белгиленген объекттерде иштөөгө;

3) коомдук иштерди аткаруу жерине өз убагында келүүгө;

4) эмгекке ак ниет мамиле кылууга;

5) ишканалардын, уюмдардын жана мекемелердин администрациясынын мыйзамдуу талаптарын аткарууга;

6) жума ичинде бир жолу катталуу жана профилактикалык аңгемелешүү үчүн пробация органдарына келүүгө.

3. Укук бузуучу I же II топтогу майып деп таанылганда, кош бойлуу болгондо, пробация органдары сотко аларды жаза чарасын андан ары өтөөдөн бошотуу жөнүндө сунуштама жиберет.

4. Коомдук иштердин бир суткадагы узактыгы төмөнкүлөрдөн ашпоого тийиш:

1) 18 жаштан жогору укук бузуучулар (жеке жактар) үчүн – төрт сааттан;

2) жалпы билим берүү уюмдарынын (мектептердин), башталгыч жана орто кесиптик билим берүү уюмдарынын, окуу жылынын ичинде окуусун иш менен айкалыштырган 16 жаштан 18 жашка чейинки окуучулар үчүн – эки сааттан.

5. Укук бузуучуга негизги иштеген жери боюнча кезектеги өргүүнүн берилиши коомдук иштерди аткарууну токтотпойт. Жүйөөлүү себептер болгондо пробация органдары укук бузуучуларга жуманын ичинде сааттардын санынан аз иштөөгө уруксат берүүгө укуктуу.

6. Туруктуу иштеген жери жок жана окуу жайларында окубаган 18 жаштан ашкан укук бузуучуларга алардын жазуу жүзүндөгү макулдугу менен коомдук иштерге тартуу убактысы күнүнө сегиз саатка чейин, бирок жумасына кырк сааттан ашык эмес узартылышы мүмкүн.

7. Коомдук иштерди аткаруу аныкталган ишкананын, уюмдун жана мекеменин администрациясына төмөнкүлөр жүктөлөт:

1) эмгек жөнүндө мыйзамдарга ылайык, эмгектин коопсуз шарттарын камсыз кылуу;

2) адамдардын алар үчүн аныкталган иштерди аткаргандыгын контролдоо,

3) иштелип бүткөн убакыттын эсепке алуу табелин жүргүзүү, пробация органына учурдагы жуманын акыркы күнүнөн кечиктирбестен аткарылган иштердин актыларын түзүү жана жөнөтүү;

4) адамдардын коомдук ишти аткарууда жүрүм-туруму жана/же андан баш тарткандыгы тууралуу пробация органдарына маалымдоо жана кабарлоо.

8. Коомдук иштерди аткаруу учурунда адам жаракат алган учурда зыяндын ордун толтуруу эмгек мыйзамдарына ылайык жүргүзүлөт.

9. Укук бузуучу тарабынан коомдук иштерди аткаруунун тартиби жана шарттары бузулса, пробация органы анын себептерин аныктагандан кийин мыйзамдарга ылайык каралган жаза чарасынын башка түрүнө алмаштыруу жөнүндө укук бузуучуга жазуу жүзүндө эскертет.

10. Коомдук иштердин тартибин жана шарттарын бузуу болуп төмөнкүлөр саналат:

1) соттун токтому күчүнө кирген күндөн тартып он күндүн ичинде пробация органына өз убагында келбей коюу;

2) коомдук иштерди аткаруу жерине өз убагында келбөө;

3) эмгек тартибин бузуу;

4) эмгекке карата ак ниет мамиле жасабоо;

5) пробация органына каттоо үчүн жүйөлүү себептерсиз бир жолку келбей коюу;

6) ишканалардын, уюмдардын жана мекемелердин администрациясынын мыйзамдуу талаптарын көӊүлгө албоо;

7) коомдук иштерди аткаруу тартибин жана шарттарын кайталап бузуу.

11. Укук бузуучунун пробация органына белгиленген мөөнөттө келбей коюусунун жүйөлүү себептери болуп оорусу жана башка документтер менен тастыкталган аны пробация органына өз убагында барууга тоскоолдук жараткан жагдайлар эсептелет.

12. Пробация органы коомдук иштерди аткаруудан качкан укук бузуучуларга карата сотко сунуштама киргизет.