10-берене. Коопсуздук кеңешинин Төрагасынын ыйгарым укуктары

Коопсуздук кеңешинин Төрагасы:

1) Коопсуздук кеңешинин ишине жалпы жетекчиликти жүзөгө ашырат;

2) Коопсуздук кеңешинин иш планын жана анын жыйналыштарынын күн тартибин бекитет;

3) Коопсуздук кеңешинин жыйналышын өткөрүүнүн убактысын жана ордун аныктайт;

4) Коопсуздук кеңешинин жыйналыштарына төрагалык кылат;

5) улуттук коопсуздук чөйрөсүндөгү стратегиялык документтерди (концепцияларды, стратегияларды, доктриналарды), ошондой эле Кыргыз Республикасынын Куралдуу Күчтөрүн колдонуу боюнча пландоочу жана директивалык документтерди бекитет;

6) өз демилгеси боюнча Коопсуздук кеңешинин жыйналыштарын чакырат;

7) Коопсуздук кеңешинин катчысынын улуттук коопсуздуктун абалы жана Коопсуздук кеңешинин чечимдеринин аткарылышынын жүрүшү жөнүндө учурдук маалыматын угат;

8) Коопсуздук кеңешинин кароосуна киргизилген маселелер боюнча материалдарды, ошондой эле анын чечимдеринин долбоорлорун даярдоо боюнча Коопсуздук кеңешинин мүчөлөрүнө тапшырмаларды берет;

9) Коопсуздук кеңешинин жыйналышында каралып жаткан маселе боюнча катышууга мамлекеттик бийлик органдарынын жана коомдук уюмдардын, жалпыга маалымдоо каражаттарынын өкүлдөрүн, ошондой эле эксперттерди жана адистерди чакырат;

10) Коопсуздук кеңешинин чечимдеринин аткарылышын контролдоону уюштурат; мамлекет башчыларынын жамааттык коопсуздук, аскердик кызматташтык, азыркы учурдун чакырыктарына жана коркунучтарына каршы аракеттенүү маселелери боюнча кеңешмелерине катышат; коргонуу жана коопсуздук чөйрөсүндөгү эл аралык келишимдерге кол коёт;

11) тынчтыкты жана коопсуздукту кармап туруу боюнча мамлекеттер аралык келишимдик милдеттенмелерди аткаруу зарылдыгы болгондо Кыргыз Республикасынын Куралдуу Күчтөрүн анын чегинен сырткары пайдалануу жөнүндө маселени Кыргыз Республикасынын Жогорку Кеңешинин кароосуна киргизет;

12) мамлекеттик бийлик органдарынын жана жергиликтүү өз алдынча башкаруу органдарынын коргонуу жана коопсуздук жаатындагы ишин координациялайт;

13) Коопсуздук кеңешинин эмблемасын түзөт.

(КР 2022-жылдын 20-майындагы № 34 Мыйзамынын редакциясына ылайык)