324-берене. Бузуулар жөнүндө ишти кароого даярдоодо ыйгарым укуктуу орган кабыл алуучу чечим

1. Бузуулар жөнүндө ишти кароого даярдоодо ыйгарым укуктуу орган төмөнкүдөй чечим кабыл алат:

1) ишти кароонун убактысын жана ордун дайындоо жөнүндө;

2) адамдарды чакыруу, иш боюнча зарыл кошумча материалдарды талап кылуу, экспертизаны дайындоо жөнүндө;

3) ишти кароону кийинкиге калтыруу жөнүндө;

4) иштин протоколун түзүүгө жана башка документтерди жол-жоболоштурууга укугу жок адам түзгөн учурда, иштин протоколун түзүү жана башка документтерди жол-жоболоштуруу туура эмес түзүлгөн же болбосо берилген материалдар толук эмес болгон учурда, ишти кароодо алардын ордун толтуруу мүмкүн болбогон жагдайда протоколду түзгөн ыйгарым укуктуу органга, анын өкүлүнө же кызмат адамына бузуу тууралуу протоколду жана иштин башка материалдарын кайтарып берүү жөнүндө;

5) эгерде ошол ишти кароо анын компетенциясына кирбесе, үч жумушчу күндүн ичинде иштин протоколун жана башка материалдарын караштуулугуна жараша кайтарып берүү жөнүндө;

6) ушул Кодексте каралган учурларда ыйгарым укуктуу органдын өкүлүн четтетүү жөнүндө;

7) ушул Кодекстин 302-беренесинде каралган жагдайлар болгон учурда өндүрүштү кыскартуу жөнүндө.

2. Ушул берененин 1-бөлүгүнүн 1-5-пункттарында каралган чечимдер аныктама түрүндө чыгарылат.

3. Ушул берененин 1-бөлүгүнүн 6- жана 7-пункттарына каралган чечим токтом түрүндө чыгарылат.

(КР 2019-жылдын 15-февралындагы № 25 Мыйзамынын редакциясына ылайык)